記得第一次見您送比您既sony喵杯

記得我打劫過您哥哥送比您既sony喵欖枕

記得同您嚮大嶼山一齊講高音王壞話

記得您指住我隻手臂話同您大脾一樣咁粗

記得成日同您鬥咀而每次我都比您嬴

記得您送比我既熊喵電話繩

記得幫您買到下半場既時候我嚮沙田開心到跳黎跳去

記得我每次問您有冇掛住我您都話怕我唔開心所以呃下我答掛住我

記得您睜開眼望我隻熊喵公仔既微笑

記得您最後一次同我揮手講拜拜

記得您……

好掛住您

攝於07-17-2001

第一次探您既時候,我就好似一個小fans迷偶像咁.真係好緊張>"<!!

好多網友想見您都好少可以探您,其實覺得自己好好彩.

　　嚮咩咩離開既時候，佢身邊除左佢最愛既親人之外，好榮幸地，我都係其中一個。我同咩咩唔算得上係摯友，唔算得上係知己，但係咩哥哥話佢已經當左我係家庭既一份子。識左咩咩一年喇，最初嚮佢心目中我係「哥哥既女朋友」呢個身份，可能一開始我就當佢係我偶像啦，我鍚佢既程度比鍚佢哥哥仲深～嘿嘿。好多時見到Ｄ好得意既野，無論佢鐘唔鐘意都好啦，就算冇錢都諗辦法買俾佢，為既就只係博佢一笑。記得上年十一月去睇流星雨之前，我同咩哥哥嗌交，咩咩係第一個開聲為我抱不平，就嚮0個次之後我同咩咩愈來愈熟絡嚕。

　　咩哥哥同我講，我係唯一一個可以同咩咩玩得咁埋既女朋友，其實我都有Ｄ懷疑，有時我會怕咩咩唔鐘意我，所以我都唔敢講一Ｄ逆佢意既說話，甚至唔敢主動講野，我怕我既話題會悶親佢。其實無論係嚮屋企，去醫院覆診，出街玩都好啦，只要有咩哥哥出現我差唔多都會出現咁滯，可能因為咁我同咩咩成日朝夕相對啦，大家都知道佢都幾怕靜，當佢同我獨處既時候都會撩我講下野，我地仲愈玩愈埋潻。我地既話題好廣泛架，只要係佢身邊發生既事都會講，好似講下佢Ｄ朋友呀，醫生護士甚至係咩咩親戚既壞話。我同佢既性格最似就係好八同埋好師奶仔，佢有咩唔滿意就一次過講埋出黎，所以佢鐘唔鐘意一個朋友我都略知一二架，因為佢知道我一定唔會係二五仔嘛，見到又平又靚既野就問下我仲有冇邊度可以再平Ｄ咁。最好笑就係咩咩成日持住哥哥鍚佢，就專登嚮哥哥面前蝦我！而咩哥哥每次都幫住個妹既，我就要好唔忿氣咁既樣咯。

++25062002小倍日記++

給咩咩的信---

仲記得會考前有一晚,好唔想溫書

自己無聊亂入人地d網睇~發現您

一直好似追看小說一樣睇您既野,通宵睇左十個鐘頭

一向唔會嚮電腦識人既我好想認識您,但係又好怕接觸您

因為我怕我同您做左朋友之後我會唔捨得您

但係我最後都覺得,無論結果係點,我識到您係我既榮幸

所以留左第一個唔知您會唔會睇既牛言

之後我好似上左癮咁,一日唔黎就好似冇食飯咁

好開心,您地吉場人接受左我呢個新人,仲慢慢入左笨家村.

     今日見到auntie執緊您間房.您真係好茜利~您d公仔,禮物多到可以開鋪頭,auntie話好多都係您病之前日日攬住黎玩既公仔,但係因為您既病,令您唔可以成日接觸呢d公仔,因為怕有細菌,所以您唯有將所有公仔收埋曬.我都一個女仔,亦都同您一樣好鐘意毛公仔,如果我比人收埋曬日日攬住既公仔.我諗我一定唔開心到喊...

       上星期同auntie傾開計,佢好唔開心咁同我講麻麻要丟曬您房裡面所有野.其實我地個個都唔贊成,甚至係想將您間房完封不動,等我地可以留返個回憶.不過麻麻講既說話大家都要聽,auntie唯有慢慢慢慢咁執走d野,但係其實佢一d都唔想丟.呢幾日auntie決定左執d您最鐘意既公仔,衫褲...等您走0個日拎埋去一齊陪您走.見到auntie咁比心雞逐樣逐樣睇同揀您既野,我都88卦卦咁走入房睇.見佢一袋又一袋咁拎出黎,真係多到我都唔敢相信,可能您太多人鍚嚕~咁多人送野比您(唔准囂張呀~!),但係好多野您用都冇用過.我知您係一個好珍惜人地送比您既野既人,每一件禮物都放得好好,好整齊.見到您個櫃桶入面收埋左好多中學時代既信,上堂傳既紙仔同相,auntie話您d字咁cutie,睇得好辛苦,於是auntie就叫我讀比佢聽.嘿嘿~好得意呀.您d信令我諗返起一個普通女仔既荳芽夢,令我諗返起我同您差唔多年齡既時候都係成日寫信呀,傳紙仔呀咁.我諗您勢估唔到您辛辛苦苦收埋既少女秘密比媽咪發現曬嚕~哈~~比我我一定會覺得好瘀姐－﹏－”

春季嘉年華-您岩岩出院,知道嘉年華就結束就急不及待咁黎同d公仔影相.

咩哥哥同我講過~其實好多時您都好想玩,可惜您只可以睇人地玩,而自己只可以感受現場既氣氛.

　       Auntie都話冇可能收得埋咁多野,唯一既方法就係將人地送比您既野比返0個個人,當係一個留念.除左一d好有紀念價值既野之外,其餘好新既衫,唔知邊個送既公仔等等都會送去慈善機構.但係我知道.auntie真係好唔捨得.有時我諗,其實您都只係一個好普通既女仔,有初戀,有暗戀,有開心既中學生活,有細路女既秘密,有討厭既人,有知己,做既野其實同我冇咩分別,但係點解您遇既野比我多咁多,而您,亦都得到您應有既成就.大家都為您自豪,為您驕傲.就係因為您,我得著既野都多左好多.

           一路望住auntie執野,我一路諗返起我送比您既野.最開心既,係我最後送比您既錄音毛毛蟲,我去買0個日,我得返60蚊,只可以買到兩隻.我將一隻比左好朋友,另一隻比左您.您哥哥都知我好鐘意,但係我覺得係值得既,送比您就等於我自己得到,比起我自己得到仲更開心.Auntie話隻毛毛蟲留低左您最後一把聲,一定要好好保留佢.我好開心,因為我送比您之後您一直放嚮醫院床邊陪住您,錄低您既笑聲.但係好擔心,擔心有一日呢條毛毛蟲會冇電,好唔想.見到我第一次見您送比您既sony喵杯,auntie叫我拎返去留念,我拎住隻杯…有d唔開心…一年幾前我送比您,我從來冇諗過一年幾之後會返到我手上.auntie將您其中一隻公仔同一個盒比左我,叫我幫佢keep~突然間我覺得咩咩您好似嚮我隔離,叫我唔好玩殘您d公仔咁~^^您放心啦~我都好鍚公仔既~嘿嘿.

            好耐冇見喇.您有冇掛住我呀?好掛住您.真0家.所以我日日都帶住隻熊喵公仔返學同出街,因為我帶住佢就好似同您一齊去街咁.我成日對住隻公仔講野~搞到我比d同學仔話我痴左線~~嘰嘰~~~佢地都唔知您嚮度!係啵~我下個禮拜去大嶼山camp呀~一唔一齊去呀?定係想留嚮屋企陪auntie丫?您自己揀嚕~仲有呀.唔水擔心大家呀,我地都生活得好好!好啦~~唔講咁耐嚕.費事您眼都花埋~~@@星期四大酒店見啦=)

看得見的天空--豈止這麼大．．．

 一朵永不枯萎的鮮花

一塊永不掉下的綠葉

一條永不止息的流水

一盞永不暗淡的明燈

一場永不看厭的電影

一首永不停止的音樂

一隻永不沉悶的唱片

一顆永不遠離的星星

一把永不沙啞的聲音

一張永不憂愁的咀臉

一個永不消失的笑容

一段永不忘掉的回憶

就只有您                                                                                               

為您祝福

為您安靜

永別了16-6 11:00am

                     18062002 16:29