羊爸爸致悼詞


          呀咩0既親朋、戚友、同學再加網友，今日大家都好有心，黎出席呢個送別會同呀咩薦行。
          

          1982年10月15日是我的女兒出世，當年我在外母處工作，在呀咩未出世時，同大舅打賭，呢個一定係女，結果擺滿月酒時有兩圍酒席是大舅輸的， 當時的高興是難以形容，我已經有一個仔，而家加多個女即是好字。

          雖然工作有寄人籬下之感，但每想起家中母親、妻兒，尤其女兒每次睡醒總是笑面迎人，所以甚麼也沒所謂了。
        

        因我們倆夫婦都是返工，一對小兒女都是由袓母帶大的，每天麻麻帶住妹妹送哥哥返學，終於連妹妹都返學了，穿新衣，著新鞋，背住新書包，拖住哥哥開開心心上學去， 到第三天就喊住不肯上學，嗚嗚~~~~0個度都冇麻麻，見唔到麻麻我唔返學喇~~~~~~

          轉眼間又上小學了，這段時間，印象最深刻是生病時要睇醫生0既先決條件，我唔打針！ 記得有一次打防疫針，佢嚇到暈左，要麻麻去學校接佢放學。

         到升中學時被派了同區 band five 0既慕光中學，返學初期，遭同學籌旗 (搶錢)分黨分派，敬愛0既老師又移民，樣樣都令佢好唔開心，升上中三變左師姐級先唔怕d同學仔搗旦了。

         中學畢業後，轉讀設計學院，返展翅同民安隊，朋友就真係多左好多，睇見佢開心，我地都開心。

         惡夢也在此時醞釀，參加完民安隊0既訓練營返黎，就開始傷風咳，雖然有睇醫生，但都係唔斷尾，拖到過舊曆年，情況越黎越嚴重，跟姑媽、姑姐去深圳玩， 辛苦到死咁滯，連上幾級樓梯都喘晒氣。

          睇醫生抽血化驗，血0既指數極不尋常，再入浸會作全身檢查，初步証實係血癌，咁重0既病住私家醫院真係負擔唔起，經醫生介紹咁就入左瑪麗醫院；當時0既血科，瑪麗是手屈一指的。

         經抽骨髓証實，個正式病名係"急性骨髓性白血病"，仲要立刻落化療，當佢知道左自己病0既嚴重性，喊左三日，就企番起身， 欣然面對連串0既治療同化療，八個月0既化療都失敗要立刻換骨髓，過程也真是淒涼，病房要隔離，初期還可靠電話同電腦跟外界連絡，但稍後喉嚨潰爛，食唔到野，仲要係咁嘔，嘔到冇野嘔仲嘔埋血， 甚至嘔到連眼0既微絲血管都爆埋~~~住左個幾月情況稍為穩定，可以出院回家，但都不能去街與外人接觸，驚受感染，不過，能夠同家人相聚都是最幸福的。

         但一次又一次0咁復發，做左兩次血幹細胞移植都失敗之後，醫生提議搵外人骨髓，成功機會得兩成，排斥亦會相對提高； 呀咩考慮過之後，拒絕左醫生0既建議，而希望有其他方法，求神問卜都試過，始終都遇唔到一個好中醫，醫院亦成為佢第二個家，既然路是自己揀的，所以佢都以開心、 歡顏同珍惜黎面對每一日，而我地也只可眼巴巴的等待那一天的降臨。

         佢爭取同屋企人、朋友的相聚，體力許可，我地都鼓勵佢盡情的去食、去玩、去唱，一路以來，SINA.COM 0既介紹 internet magazine、舒兒日報、uzone roadshow等等0既訪問，仲有你地0既留言、鼓勵，對呀咩黎講，都係一支強心針，其實佢可以支持到而家，你地都有好大0既功勞。

         唔知你地有冇聽過人電學，由去年開始，我每日都會電佢十零分鐘，課本上說是吸收佢唔好0既磁場，將血液過濾，但在我黎講，卻是父女0既心靈交流。即使佢在醫院， 我都會堅持每日去電佢一電，順便接埋羊媽媽返屋企！

        0係佢呢段重病期間，我地陪完呀咩之後再返屋企，已是十二點有多，踏入家門0既第一件事，唔係食飯沖涼，而係開電腦， 講呀咩0既病情俾你地知，你地0既留言亦帶俾我地安慰同鼓舞， 總覺人間有情；但當睇番呀咩0既日記時，我d眼淚就忍唔住掉下來了，佢好似帶緊我去玩，講緊野俾我聽，令我開心又痛心！佢0既生命雖短，卻可以活出彩虹！

       祝願今日黎到呢個送別會0既人，開心快樂咁過每一天，讓呀咩0既生命彩虹照遍你地。

各位有心有心，珍重珍重！  (羊媽媽代筆 )

後記  ：這兩幅照片你地都會在 roadshow裡面見過 ~~~ 但後面的故事你知道嗎？

  這兩張相係拍於去年 17-7-01一個紅色暴雨警告的晚上，時間已差不多十一點，當時羊爸爸雖然穿了雨衣，但因是駕駛綿羊仔電單車的關係，到達時衣服鞋襪都已全身濕透，一路滴水咁行入血科病房， 當值的護士姐姐怕他冷親，給他一套病人衣服替換， 好讓他入房探望要換血幹的女兒，本來咁狂風暴雨，我都叫他唔好黎，但他說咩咩在醫院，唔黎唔得喎~~~~~。亦是我後來才知道的，就是他承諾了女兒，如果她在醫院...他一定 去探她 ~~~~~~~

到走時才發覺嬏嬏，不停用厚毛巾將羊爸爸換出來的衣服包來扭、來索~~  真係唔該你呢 !

還有護士姐姐~~~~你地既愛心連我地家屬都受惠呢~~~~~~~~~~~~ 羊媽媽憶述。