給我愛的咩咩

04-10-2002

咩咩 :

就快到你生日喇 , 好掛住你呀。

記得初初入吉場 , 抱住戰戰驚驚的心態留言俾你 , 見到你覆我的留言 , 我會開心到成晚都訓唔著 , 因為我佩服你囉。漸漸開始同你熟 , 我就開始在IC蕉同你傾計 , 其實我一早已經add左你o架喇 , 只不過我唔夠膽同你講野 , o個陣我o係icq hi 你 , 驚你會唔知我係邊個 , 又驚你唔覆我 , 好彩...你唔單只記得我 , 我地仲傾得好開心 , 原來你同我一樣都好鐘意睇金田一 , 我仲應承會借俾你睇tim。

到左上年的12月 , 我約左阿bee去睇戲 , 我同你講 , 你言語中話俾我知你都想去 , 於是我就邀請埋你喇 , 而你又想去睇煙花喎 , 嘻~我就梗係就你啦 , 一於去睇煙花! 到左出街o個日 , 我好驚好驚 , 哈哈 , 話晒都第一次見網友喎 , 仲要係打孖上 , 不過....對於我黎講 , 你並唔係網友 , 而係我好朋友。搭車o個陣 , 阿bee打俾我 , 話俾我知你唔舒服 , 黎唔到。我一方面好失望 , 另一方面又好擔心你 , 唔知你點....返到屋企 , 見到你online , 問一問你 , 好彩你都無乜事...我先無咁擔心。

之後我二月 , 我又約過你去唱k , 我記得o個陣你仲好攪笑咁同我講 : 「我第一次同你開房呀 , 好緊張呢...」呢次係我第二次約你去街 , 不過到最後 , 你都無出現 , 因為你入左廠...聽到呢個消息 , 真係幾唔開心 , 我真係好擔心你的病 , 知道你唔鐘意人地講你的病 , 所以你的近況都係由笨溪佢地話俾我知。呢一次我地又去唔成嚕...我地試過約埋一齊去同bee狗慶祝生日 , 不過最後都係去唔成 , 因為...你又入左廠...哈哈 , 唔知點解 , 我好似黑住你咁 , 次次同我去街都會入廠...唔知係咪我迷信呢?我真係覺得自己黑住你...之後我就住主動約過你去街喇。有一次 , 你搵我去camp , 但係因為時間上的問題 , 我去唔到。諗返起 , 其實真係好後悔 , 因為o個一次係最後一次機會俾我見你 , 之後見你 , 已經o係歡送會上喇....

同你傾過兩次電話 , 兩次我都驚到唔多敢出聲。第一次係約你去唱k , 好多人一齊打俾你 , 我...只係講左幾句野...真係好怯~第二次 , 係同冬冬一齊打俾你 , 傾點樣同bee狗慶祝 , 雖然傾得唔耐 , 但係足以令我又一次開心到訓唔著。一路傾電話 , 你一路講話你俾人打緊 , 原來...你係打緊機~嘻~

有一次 , 我同笨溪講話我想要個計數器 , 你即刻俾左你申請計數器o個版俾我 , 原來係笨溪話左俾你知。哈哈 , 笨溪仲話埋俾你知我好鐘意松本潤tim , 你竟然會知到我咁多野喎....我多謝你 , 你同我講 : 「唔駛 , 好朋友嘛」一句好朋友 , 令到我心都甜埋。

歡送會當晚 , 見到你訓o係床上 , 個人好瘦好瘦 , 瘦到見到骨。見到你咁樣 , 好心痛 , 呢次係我第一次見你 , 亦都係最後一次。我係一個基督徒 , 本來唔應該上香俾你 , 但係見到你咁瘦 , 又想你變返以前肥肥白白的笨咩 , 於是我都係選擇上香俾你 , 希望可以令你食飽D~上香o個陣 , 我偷偷地講左一句 : 「我愛你。」摺銀紙俾你 , 原本我唔識o架 , 不過之後都學識左 , 仲好專心咁摺俾你tim , 因為下面消費物價指數好高嘛 , 要摺多D俾你 , 等你可以多D錢駛~之後每一次去上香俾你 , 我都會講我愛你, 因為我真係好愛你。

我慶幸自己能識到你 , 雖然未見過你 , 但係你已經成為我好朋友。

願你在別的世界依然快樂。

細蚊女