BB最可愛o既地方，就係一見人就笑，咩咩就係咁，甚至係俾人攪醒，佢都係笑左先。

佢呢個人凡事講原則、講公平，知慳識儉(亦可以講係斤斤計較)，重諾言，當然佢亦會要求你都係咁樣對待佢。

對朋友：情與義….值千金….刀山去地獄去亦無憾………………..o係佢讀中五時，開始學做第一個網頁"凱西的烏托邦"一般少女心聲。 

中五考結業試時拍拖，會考就鬧失戀，呢d都係佢考唔到好成績，冇得升中六既原因。少女o既荳芽夢，多數都係咁收場。 

       但失戀卻令佢收拾心情，報讀大一設計書院，閒時就去"肯德基"做兼職， 後來發覺設計是她的至愛，兼職都唔做，再讀埋香港設計書院，參加展翅計劃，民安隊受訓，都唔知佢d 時間點分配，但就知道呢段時間係佢最開心、最充實的日子。在我地眼中，佢唔似時下一般女仔咁食煙、飲酒、浦d、落bar同講粗口，佢都冇呢d壞習慣，佢o既人生係好積極，好正面，所以我地都好信任佢，但佢o個d斤斤計較，太講原則o既性格，就會得 罪好多人都唔知。

       患病令一個十七歲0既少女改變一切，教授講佢知係白血病，佢都若無其事，但講話唔可以返學佢就喊到收唔到聲；化療所帶來o既痛苦，戀人o既離棄，都令佢情緒低落，吉場開張就是她失戀企返起身的日子，佢寄情於網頁的製作，不停的嘗試、改進，這裡變成佢o既內心世界。

       第一次o既復發，有被形容為與哥哥撈亂骨頭o既全敏合骨髓，但換骨髓個多月的辛苦，是令你不敢回頭再望的。充滿希望的過了三個月，癌細胞佔了血液8%，立刻再落骨髓o既加強劑-血幹細胞，但一個月後o既骨髓佈告，癌細胞上升到五十幾，唯一可以做就係再落多次血幹細胞，而今次是什麼抗排斥葯都唔要，希望有排斥就可將癌細胞打低，當然是天不從人願，哥哥同佢就係撈亂骨頭嘛，點會有排斥。醫生又提議搵外人骨髓，但呀咩拒絕左，一來唔想再入骨髓房，二來排斥除左好辛苦外一樣會死人的，咁咪好唔抵，咁辛苦都要死，所以佢揀左條開開心心活下去的路，當然呢條係掘頭路。 

        我地尊重佢o既決定，陪佢走埋呢段路，再將以後幾十年o既感情，濃縮o係呢段時間俾晒佢，令佢開心之餘，我地亦唔會事後有所遺憾。最滿意係全家一心，個個都沒有怨言。

         跟住黎 o既日子，白血球唔停咁升，佢係代表o左癌細胞 o既活躍程度，我地正常o既白血球係 4 ~11 度，佢最高試過去到 227 度，就係今年一月中的一次，o個次係我第一次簽危險時唔再急救同意書，落o左化療之後，癌細胞暫時被驅散，佢才得以出院；但進進出出， o係醫院 o既時間仲多過屋企，所以佢好珍惜可以自由活動 o既時間，記得有一次佢約 o左一個朋友o係尖沙咀見，但被放飛機，對方仲話你大把人約，點會剩係約我一個啦，呢次係佢最憤怒 o既一次。

        o係呢段時間，家人、朋友同電腦就係佢o既精神支柱，冇左你地，佢o既人生就冇咁多姿多彩。

           到最後一次入院，發燒照肺，發覺個肺花花地，用o左十日貴貴黃葯水都冇效，先知道唔係有菌而係癌細胞入o左肺(因血小板低同咩唔俾抽組織去驗 )，由醫生講話佢唔得喇，佢都支持 o左十幾日，呢 d 都係賺番黎架。


         記得佢曾經問我：我而家個網頁有咁多人睇，如果我無病咪會做得更加好或者係做其他事都會咁成功。 我個答案：未必！如果唔係有病，你都唔知去左邊，點會放咁多時間、同心機 o係部電腦度，你可能係o個d 晚晚浦D落bar o既wet妹，而唔係呀咩嚕。佢諗左一陣：係喎！

       其實上天係好公平，佢取走你一樣野，就會俾番另一樣野你，得失睇你用乜野態度去面對，珍惜眼前人同身邊 o既一切，要用每一角度去欣賞同讚美，咁先不枉此生嘛。

              係度我多謝羊爸爸一路 o既支持，如果冇佢開解，我同咩咩都唔可以咁輕鬆去面對，冇佢 o既支持，可能我已精神崩潰，多謝你！

[BACK]