吉場 , 吉場 , 呀咩吉場 …. 已經成為左我每一日會去嘅地方 , 都成為左我每一日都會記起嘅地方。

雖然我唔認識呀咩 , 但係由佢所留低嘅網頁入面 , 令到我會覺得我每一日都係陪緊呀咩 , 每一日佢都會有好多新奇嘅野 , 每一日佢都會係笑住咁對住你 , 真係好特別。

我記得係大約兩至三年前 , 突然有一日有人比左依個網址比我 , 就係呀咩吉場 , 當時我好悶 , 所以我就入左去睇 , 睇睇下 …. 感覺就好似失去左一個親人咁 , 係我發現依個網頁之前 , 我剛剛都有親人離開 , 感覺真係一樣 , 唔知點解會係咁呢 ? 其實係果一段嘅時候我的心情每一日都係好難過 , 屋企發生好多不如意嘅事 , 令到我覺得我生活得咁痛苦 , 但係睇完呀咩留低嘅網頁之後 , 我對生命完全改觀左 , 亦都因為呀咩留低嘅網頁令到我改變左好多 , 係依兩三年 , 我係呀咩嘅網小上面學到好多野 , 學識左珍惜 , 凡事要謙虛同忍耐 , 我覺得我依兩三年入面我自己係進步左 , 都係因為呀咩 , 呀咩精神長存 !!!!

我完全覺得呀咩係好強 , 佢係好勁 , 我亦都記得呀咩講過佢唔勁 , 佢唔想咁勁 , 佢寧願做一個普通人 , 我好想好想繼續係佢身上面學到更加多嘅野 , 但係好可惜 , 最後 , 呀咩佢都係留低左佢最愛嘅網頁同埋佢最愛嘅親人 , 我亦都識唔到呀咩 , 我就只可以睇佢嘅日記黎認識佢 , 好想好想係依到同呀咩講一聲 , 多謝您 , 係你教識左我點樣去珍惜身邊所有嘅野 , 好多謝您 !!

我覺得呀咩有一個好好嘅媽媽 , 啫係羊媽媽 , 每一次當羊媽媽黎到天水圍 , 我都一定會出去搵佢 , 搵佢同我傾下計 , 同羊媽媽傾計嘅時間會過得特別快 , 同羊媽媽傾完計嘅感覺會好好 , 好舒服 , 我亦都係羊媽媽身上學識左努力同堅持 , 由一個唔識英文 , 唔識得開電腦嘅上左年紀嘅女士黎講 , 可以依家識得整好多唔同好靚好得意好生動嘅動畫 , 我真係好佩服羊媽媽, 每一日工作完畢後 , 仲可以有好多精力去做好多唔同嘅野 , 我覺得真係非一般人做得到呀 , 我覺得羊家一家人都係我的榜樣。

我仲記得羊媽媽講過 , 佢未見過羊爸爸流淚嘅一面 , 係因為羊爸爸係一個強者 , 每一次都會係支持羊媽媽 , 去開解同安慰羊媽媽 , 我覺得羊爸爸依個係一個好重要嘅角色 , 因為如果羊媽媽無左羊爸爸嘅開解同支持 , 可能羊媽媽會支撐不住 , 但係我深信羊爸爸都會有弱嘅一面 , 每個人都會有佢嘅唔開心 , 我覺得羊爸爸羊媽媽同呀咩都係一樣 , 佢地都可以將佢地嘅唔開心處理得好好 , 唔係同人地講 , “我今日好唔開心呀 , 我琴日又係好唔開心 , 我聽日都會係好唔開心架啦 … “咁樣係好差呀 , 但係羊媽媽一家都唔係咁樣樣 , 佢地可以好快就暫時忘記佢地嘅唔開心 , 因為我都有一個信念 , “唔開心又係咁過 , 開心又係咁過 , 點解唔開開心心咁過呢 ? “

呀咩吉場比我嘅感覺就係 ….

一個好大嘅家庭

一個好多人去嘅地方

一個可以令到人改變嘅地方

一個令到好多人都會感動嘅地方

一個令到你都好似成為一分子嘅地方

一個好特別嘅地方

一個令到你每一日唔黎唔得嘅地方

一個我好鍾意嘅地方

一個令到你學到好多野嘅地方

一個 ………

亦都係一個令到人感到遺憾嘅地方
 

唔知道大家又對吉場有咩感覺呢 ? 我好鍾意都好認同呀咩所講過嘅一句 “ 我唔係要人認同我嘅講法 , 我只係想將我嘅唔開心渲洩出去 … “ 我真係好鍾意呀咩講嘅依一句 , 我最遺憾嘅就真係我識唔到呀咩 , 但係我都會繼續去認識呀咩同埋羊媽媽一家 , 我會好努力咁支持羊媽媽一家的 !!

                                                                                                    傻魚。敬上

                                                                                                    24.06.2005