TO呀咩:

黎左咁多次都無留過言，好對唔住呀。其實因為懶，又因為諗唔到有乜同你講…所以咪等到而家囉…

睇過你果篇「這又關你事嗎」，令我知道關懷其他人有好多方式。或者因為咁，所以我唔敢留言卦，我知自己唔識講野；唔係驚畀你寸，只係驚自己── 一個偶然睇到你網站既普通過路人，會講錯野。令你諗起一D你唔想諗起既事。

我知你係個好堅強既人，唔會咁易畀人HURT到，或者反而係我係個無膽既人黎卦，等到而家先肯講我一直想講既野。

每次黎到，睇到你既日記，你D笑得咁燦爛既相；真係令我好佩服你既堅強，同好羡慕你有一班咁好既朋友。堅強呢樣野，唔係話要做到就即刻做得到；同樣，開朗既人生都一樣…

黎到分享到你既生活，令我不其然都覺得開心放鬆左。(尤其是見到你成日做D古靈精怪既動作 :P)肯公開自己既相片，生活，甚至身體情況，其實需要唔少既勇氣，但呀咩你就偏偏畀到勇氣畀所有睇過你個站既朋友。你無刻意宣揚D乜野熱愛生命既信息，但你既每隻字，每個笑容，都畀我地知道何謂活得有意義，其實你真係好偉大…我份人最怕講肉麻野，但我認為而家唔講出黎，仲等幾時？

O係呢個越黎越普遍既個人網站世界中，大家既個人網站都越黎越靚，個個都追求住一個完美既網站外觀；但「溫馨感覺」呢樣野，唔好話買少見少，直情係越黎越難搵。一個地方，去到會令你覺得舒服，有親切感，係好難得架。呀咩你既努力無白費架，睇下每日既人流，就知道有幾多人渴求住你畀到佢地既溫暖感覺。雖然你而家係離我地遠左一D，但我地仍然唔會就此忘記吉場，因為你帶畀我地既精神並唔會就咁流失。(越黎越肉麻TIM…… :P)

已經唔想提起果D為左少少事而自殺既人，唔想話咩「佢地應該學習其他人既堅強」。因為每個人既人生係點，係由佢自己選擇既。呀咩你選擇樂觀面對，佢地就選擇自以為最唔使煩既做法；而且點選擇，相信唔使其他人教卦。

亦都唔想講「點解個天會對呀咩你咁唔公平？」因為個天要點對自己，我地根本無得揀。咁諗咪盞搞到自己更加失落。雖然我唔知呀咩你係咪真係睇化，但既然你已經選擇左開心咁去過人生，我當然會支持認同你既做法…(而家先講可能遲左D，但我仍然想話你知我呢個諗法！)

當一個唔識自己既人係朋友，好似好傻。我都好希望可以同呀咩你做朋友，但我始終未必會承認一個唔識自己既人係朋友，呀咩對唔住。咁我同你既關係不如就係「支持者」同「被支持者」啦！好唔好？無論呀咩你O係邊度，O係幾遠，我都會一直支持你。我都知有好多好多既人一直都支持住你，但多我一個唔會太多卦:P？

其實我都諗過用D咁求其既廣東話寫呢篇野，係咪太過輕佻同唔尊重。但我覺得同人傾計，唔通要之乎者也咩？咁就唔係傾計啦！如果我太長氣，又或者講錯D乜，希望你唔好介意啦。

在此，祝呀咩你快樂，永遠永遠咁快樂。

一個永遠支持你既人 FaLLWiND科雲上

二００三年一月一日

《back》