八 月 二 十 八 日

希望今晚可以見到她 第四天飲那些好似豉油的中藥，藥依然係好咸、好苦，但今天的苦比起前天的苦，又好像沒那麼苦了， 畢竟，習慣了；時間不會減輕痛楚，但會令人習慣痛苦，我都習慣了沒戀愛，沒男友疼的日子了，這兩 個月，每次跌倒，大哭大鬧一場，然後拍拍膝頭上的灰塵，又一個人站起來繼續走了，一個人，再不是 這麼大不了的事，他給我的傷害，隨著時間，習慣了。 媽媽整天在家教三嬸織繩，而我就悶到訓左兩次晏覺，睇左半次「心動」，唉....個個朋友都番工，我 再無得番學，又無得出街，就會悶死架喇，你得唔得閒呀，不如出黎陪我吹水喇，三點旺地恆等，不見 不散。 唉....我諗係我唔update喇，我總係對身邊某種非常流行的戀愛態度有所質疑，點解一個人可以同時同 幾個人拍拖？點解見一兩次就話鐘意、就話溝，怎至未見過的net friend又話溝，一係就話自己剛甩拖 悶，就求其叫個人一齊，原因係「悶」，可能真係我思想守舊喇，我真的接受唔到，我淨係覺得呢種遊 戲式的戀愛係浪費時間、無聊、幼稚，我需要的是認真的戀愛，我不需要遊戲。 好多人都說我堅強，但其實可以的話，我寧願軟弱，畢竟，我的堅強是被迫的，我都好想一世無風無浪 ，一直有人疼，一直有人保護我，一直軟弱下去。堅強，某程度上是一個人經歷太多不幸而造成的；懦 弱，某程度上是一種幸福的表現。 瑪麗醫院有一個患淋巴性血癌的病友，今天早上去世了，記得我曾經和她同房呀，她一直都好疼我，有什麼好 吃都分點給我，她生日那天，我們還一起吃蛋糕，她的心願就是回家，但可惜情況一直不好，到了今天 ，她終於可以回家了。我好難過，我好掛念她，希望我今晚可以見到她，我想親口祝福他她。

八 月 二 十 九 日

一口銀絲米粉的恩賜 好失望呀，一早起身先知，「她」沒來過呀，還是她來過，而我忘了那個夢呢？但我都好失望，我怕 再見不到她，我心信，我還可以見多她一次。其實可能是我太傻，根本接受唔到，她已去世了這個事 實，所以還在傻傻的等一件不會發生的事發生。 尋晚同susuky傾電話傾到兩點，今朝又八點起身，再係咁失眠落去真係唔掂，但原來強哥都係失眠， 但情況有少許不同，他是點訓都，我同佢決定一齊研究一些醫失眠的書，一定搵個方法醫好佢，好 開心呀，我的失眠雖然係辛苦，但唔知點解忽然變得好幸福，朋友的力量真係緊要呀，「呀強！好兄弟！」~~不過真係再唔 掂就試下食安眠藥，都兩個月喇。 今朝同左ｄ親戚去左科學館呀，其實都係諗住乘機出去玩下。我係寶林村間大快活門口見到幾個綠色 和平的人做問卷，有個女仔好得意架個樣，頭髮短短戴住頂鴨咀帽，真係有衝動想走過去同佢講「不 如我同你做一份丫！」順便問佢icq都好嘛，但最後都係唔敢，唉....有點後悔tim。 五點幾去完科學館返屋企，特登買左一包「她」好喜歡吃的銀絲米粉，我想試試吃她曾經吃過的味道 ，也算是和她一起吃過吧。我以前常常認為她的存在是應該的，但到了這一刻我才知道，我沒有好好 珍惜她，到她走了，後悔都來得太遲。原來身邊的一切，沒有一樣是「應該的」，就連一口銀絲米粉 ，也是一種恩賜，畢竟，可以再吃這個，對她來說都太難了。 約左呀明出旺角，講左話出到去電話聯絡，但我竟然唔記得抄低佢電話，途中同winnie傾電話時，先 知winnie係識呀明，好邪呀，出到去旺角，又竟然撞到一個睇過我網頁的男仔，而佢又竟然係呀明的 同學，哇，好複雜呀，總之就邪係喇。呀明帶左我上波樓，好辛苦呀，好似跌左落個煙灰缸咁，之後 出尖咀搵winnie，十二點幾返到屋企，俾呀媽鬧呀，嗚~~~~四點先訓得著呀，好慘。

八 月 三 十 日

不想你忘記我 聽媽媽說，病房中的另一個二十歲的姐姐，情況又很差了，剛剛過身的那個姐姐是癌細胞擴散到腦，所 以離開時好安詳，而這個就是擴散到腳，所以兩條腿都發黑，走不到路，整天只可以睡在床上，聽說他 的癌細胞已增加至九十八個巴仙，現在就連日夜也分不出來，精神好差好差。她他兩個曾經情況都好過 ，但到了現在，一個離開了，一個就情況不太滿意，我不知道我會不會有這麼一天，我真的想不到我可 以怎樣去面到「死亡」這個絕望的詞語。忽然好灰心，剛剛入院時的病友，有好幾個都離開了，而我的 結果會係點呢，想到這裡，我都好怕，我幾堅強都好，我都好害怕兩眼一合就告別世界，我不想這一天 過後，你一下子就忘記了我。

八 月 三 十 一 日

shopping萬歲！ 哇哇~~好開心呀！今日約左susuky去行街街，但之前就有點擔心她著得太性感，而我就著得太保守，站 在一起會好古怪，但出到黎又唔覺丫，完全係一對好襯的lesbian，哈哈，咁我地就順理成章學其他情侶 咁係條街度扮連体怪嬰喇(對唔住呀，六月~~)。當susuky買低腰底褲時，我就話「老婆~~番到去記得著 俾我睇喎！」於是連老闆娘都頂我地唔順，用好「羡慕」的眼光望住我地，哈。我地一點鐘開始行，行 左花園街、新世紀、旺角中心、女人街、兆萬、銀城、加連威老道、利時、三間書局、log on....我發 現shopping的力量係無限大的，可以令兩個普通的女仔行足七個鐘都唔，拎住一袋二袋好似成包米咁 重的戰利品，行足五個地鐵站都唔夠，仲想游水過埋銅鑼灣，shopping的魔力真係偉大呀~~ 記得好久以前，我地有個同學叫朱曉儀，佢發明星夢發到咩美女選舉都幾乎見到佢(從此呀咩腦中所謂 「美女」的定義重新估計)，而家佢都算稍有名氣，仲改埋名叫駱樂，係咩咩「全港最靚web j」喎~唔 知係邊個？睇下今其咸書「PEN THOUSE」封面咪知囉。我同susuky成日都話如果係旺角見到佢，一定要 好大聲講「你咪係山雞傳裡面做北姑果個？」其實講下都已經大快人心。結果，今日我地真係係旺角鬧 市見到佢，唉....不過來得太突然了，我和susuky都未有反應，而「全港最靚web j」姐姐就好親切地 向我地揮手，哈，乜我地識佢架咩？不過真係好邪呀，日日吹水講的事，竟然變真喎，哈哈。 搵左幾間書局先搵到「交換日記」，總算係今日最大的收獲。八點幾又約左五個朋友仔去飲野，原來個 個都係高手，我連玩包剪ｗ都輸，真係遲鈍怪呀，嗚~~又俾媽咪鬧，所以十二點就閃喇，在此 thank you dom dom送我返屋企喎~ 一點幾番到屋企，透著火爐，在暗暗的廚房中煮了個麵麵，平日不愛吃麵麵的我，因為太肚餓了，所以 把它吃清光。風扇緩緩的吹著，我側著身坐在麻麻的搖搖椅上，把腳擱在扶手，頭輕輕躺著椅背，慢慢 、慢慢的搖搖搖搖....手中可樂的兩顆冰「噹噹」的碰著鐵杯子，一鑵335毫升的可樂，對我來說太多了 ，所以我分了一半給哥哥。我拿著那本「交換日記」，一邊看、心一邊飄到遠遠，下一次三號風球的晚 上，我會在做些什麼呢？到哪一天，抱著我的是一個人，而不是一張搖搖椅呢？和我分享「噹噹」聲的 可樂會是誰呢？跟我交換日記的人會是九龍皇帝嗎？我想我該睡了，怪念頭又在作怪了。 交換日記--->同一作者的另一本書---> (左)估下Lo gon同Lo paul點解，(右)中學時代的我和susuky

九 月 一 日

其實我係女仔 嗚~~~~訓得六個鐘又俾媽咪叫醒，要去灣仔睇中醫呀，好眼訓好眼訓，成個道友婆咁撘車出去，個醫師 話叫我食胎盤呀，差ｄ當場嚇暈，好彩媽咪都覺得核突，所以放我一條生路，不過都要食鹿的胎盤，喂 喂喂，唔好諗到咁變態住，其實係晒乾左架，不過呢次ｄ藥仲難飲，好似....多左陣血腥味....假架假 架，有山渣餅食就唔苦喇。今日雖然超，但shopping的力量係無限大的，所以依然抱住「有錢洗到盡 」「財散人安樂」的歪理，繼續愈戰愈勇，買左一對好靚靚的粉紅色皮鞋，真係好靚架，呀咩同粉紅皮 鞋在廚窗視線相遇果一刻，真係令人心動呀，好想快ｄ去街街呀，你約我喇你約我喇，七點鐘五支竽 等。呀咩有兩樣野係會買到停唔到手的，你估係咩？係玻璃介指同公仔，我以前成日同媽咪番深圳，主 要都係買玻璃介指，因為香港無得買嘛，我試過一次買左七隻呀，仲每次去都買，所以收藏左好多，但 亦爛左好多隻，所以所餘無幾，都唔捨得再戴喇；而對於公仔，我就無咁幸福，要自己買俾自己，嗚~~ 其實主要原因係我好鐘意將ｄ靚靚公仔掛係個袋度，所以就不停買，有次放學一個人行年宵，買左十隻 公仔呀，而家最鐘意就係sony隻貓貓，真係好得意架，可惜喇，今日想去買時，間舖頭又消失左，嗚~~ 雖然我頭髮短短，但性格都係一個好女仔的女仔，唉....其實我好想著裙架，但奈何個樣唔似女仔，費 事俾人以為我男人老狗「扮」女仔喇，不過幻想一下都好happy架喇，唯有一個人「尼」埋係屋企著喇， 嗚~~~~不過講真喇，真係好想可以留番長ｄ頭髮，做番一個成日喊的女仔，但可能現在頭髮的長度，都 告訴我，我要像一個男仔，我沒人保護了，我要一個人努力的撐下去，我要比一個男仔更堅強。 真係超瘀皮呀，我戴住頂帽出街時，媽咪先話我知，頂帽係綠色的，死喇死喇，甜心，你唔好跟佬呀。

九 月 二 日

飲咖啡的羊 尋晚兩點幾飲左一鑵咖啡，搞到個心「囉囉 noo」發呆發到四點先訓得著，諗一諗我成年都無飲咖啡， 唔怪得知咁唔舒服喇。今朝訓到十點就醒，成四點鐘先食早餐，咦？點解我可以咁唔正常架呢，唔通我 係外星羊？好多謝飄泊浪子先生呀，我搵左幾日，個個朋友都幫我搵果首「結果」廣東版，終於搵到喇 ，原來係叫「不必再躲」，我好鐘意呢首歌的音樂，好好聽。因為一鑵可樂我一個人飲唔晒呀，所以又 走去飲左鑵咖啡，哎呀，飲完又開始唔舒服，我真係黎賤架，搞到成日都無咩心機，個腦實晒，咩都 諗唔到，辛苦辛苦，連日記都唔想寫喇。

九 月 三 日

淺水灣記 嗚~~尋晚成晚訓唔著，今朝又要八點幾起身，咁搞法遲早x_x。 一早起食又同呀哥嘈，佢拿住個木衣架想打我，哈，我先唔驚呀，呀媽係度，我唔信佢敢打呀，由細到 大都俾佢恰，而家緊係恃住自己有病，「博」佢「應該」唔會打我，呼～好彩佢真係唔敢打。 勁瘀呀，落巴士果陣俾呀如姐踩甩左隻人字拖，即時著番，拖住佢落車起勢咁走，逃離「瘀帶」，嗚～ 可惜呢個故仔同灰姑娘果個無關係。 今日約左十個展翅大使的朋友仔去淺水灣玩呀，佢地去到燒野食，嗚～我又唔食得喎，怕唔乾淨，唯有 望住佢地食得津津有味喇。上次去淺水灣玩三十七度超熱，仲要勁多賓妹，迫到死呀，好彩今次有少少 雨，所以唔係咁多人。之後我地去左沙灘玩，以前我好鐘意去沙灘游水架(其實係侵水)，而且又 成日去淺水灣釣魚，對我來說淺水灣係屬於我的，是我的後花園(無咁有錢)，好親切、好多回憶，所以 一見到個海我就發顛咁衝左落去，ＣＯＯＬ！果種感覺實在太好喇，我真係想成個跳落去侵呀，哈，玩 到落晒形，成身都濕晒，係差ｄ無滴水咋，不過又因為擔心個傷口會破傷風，所以之後都收儉左，好不 安咁走左去急救站洗洗個傷口。安心左之後又繼續顛，去左玩九十度「烏」低身，用個百佳袋捉魚魚， 但「烏」到勃晒都係捉到兩條，有ｄ無癮，就去左捉ｄ滿足感大、挑戰性低，的超微形小蟹蟹，哇哇 ，呀如好勁架，捉蟹好似執米咁，話咁快就捉左二十幾隻，果然係新一代蟹王呀，「呀如，你好叻呀， 我愛你！」。我發現數字球係發明俾牛玩架，印像中我玩果三次，都玩到暈低咁滯，因為跑黎跑去再加 埋狂笑，導致腦部缺氧，個頭又痛，果然係唔適合羊玩，咩～。 佢地諗住去銅鑼灣唱ｋ，一齊撘車走果陣，我同呀如唔小心落早左個站，所以索性去行陣街先，因為ｋ 房空氣唔好呀，唉～呀咩超難服侍，頻臨絕種嘛。哈，我地剛剛去完沙灘玩，好似兩個拾荒者「落」到 一ｄ好現代化的地方，真係失禮晒。我去左金百利探susuky，再去time square 探nathya，之後係city super食左個好好好好食的日式燒餅(羊咩推介)，送左呀如撘車我就上去ｋ房搵佢地，但由於太焗的關係 ，等到nathya收左工，我又落左去同佢飲野，送佢撘埋車(咦？點解做埋ｄ野咁似男仔架呢？唔通我係. .....)就上番去坐，我發現三個男仔唱起「人妖打排球」果首歌真係非比尋常咁傳神，由其係可愛的dick dick，真係嬌俏到無得頂，都幾耐人尋味。我想聽呀東的風一樣的男子，但就係剛剛唱到時就俾人cut左 ，埋單喎......今日又玩到點幾先歸家，無法喇，我又就夠期入去住喇....緊係盡情咁玩喇。 嗚嗚～一邊寫日記一邊俾蚊咬，咬到四點幾，我又失眠喇。

 

講過咩呀<----------昔日發傻---------->繼續睇嚕