十 月 十 六 日 星 期 一
十八歲的第二天
唉....昨天大戰過後,今日又可以做番一隻懶羊羊喇,不過日日響屋企又真係幾悶,而我又 失眠,朝朝八點就醒,唯有訓下晏覺喇,真係好悠閒架,最初我都會覺得無得讀書係幾浪費 時間,但無辨法喇,要留番條命仔先可以返學架,欲速則不達,咪當而家係「悠長假期」囉 ,好番之後就無得過d咁神仙式的生活架喇。
今日又睇vcd ,坐響麻麻張搖搖椅度,一路搖一路睇「辣手回春」,究竟係「小親親」太好 睇,定係「辣手回春」真係好差呢,成套戲都好似好夾硬做咁,個故仔好無里頭囉,呵欠~~ 睇完仲好早喎,於是又翻睇「小親親」,睇完都成五點喇,嘻,今日有節目,就係同媽咪一 齊出旺角,約左d舅父、舅母食飯。
哇!出旺角喎,仲係同媽咪出,嘻,有著數。我同媽咪一齊撘巴士出去,一路撘,我一路聽 住sammie的一隻舊碟「很愛很愛」,我唔係佢fans呀,但就好鐘意呢隻碟的每一首歌,每一 次聽我都會諗起我十七年裡面其中最開心的一段日子--民安隊訓練,因為以前每一日返民安 隊我都係聽住呢隻碟,好懷念呀,「煙花也會停但頭上亦有星,願你很愛我,因很愛很愛.. ..」。當我好留心聽歌的時侯,有一件事引開了我注意,我忍唔住按了暫停,偷偷八卦一下 ;有個白頭老伯伯拎住一個惠康袋,坐左響我前面個男人隔離,奇怪喇,成架車都係位,點 解係都要坐人隔離呢?個呀伯開始同個男人講野,我心諗「哦~~原來係傻佬,聽下佢點傻法 先....」,再聽落去先知,原來佢響度講耶穌,個男人一直都無動於衷,果一刻,我覺得個 呀伯好討厭,其一係因為我對成日講住「耶穌、耶穌」的人一向有反感,你信就得喇,點解 一定要疲勞轟炸我,一定要我信呀,咁同邪教有咩分別?其二係我望住個呀伯,佢不停不停 咁講,我好想問佢「耶穌有無教你禮貌?你有無理過人地感受架?不停咁塞d嘈音入人地耳 仔,咁同強姦人有咩分別?」,唉....煩左好幾個站之後,個呀伯轉移目標去左後面煩第二 個,咁又何苦呢....
著陸旺角喇,嘻,媽咪應承左送 md機做生日禮物,於是就去左友誠大廈睇喇,哇,一棟裡面 有成十間電器舖,我地遂間睇,十五十六咁,都唔知邊部好,算喇,食完飯先算喇。哇,美 食當前,我就梗係百無禁忌,乜都食喇,希望唔會食完又嘔三日喇。酒樓個廁所好恐佈架, 我好緊急咁行入去,但見到實在太陰森喇,唔得,我唔想吉場變「怪談」呀,都係叫媽咪陪 我去好d,一入廁格閂埋門,真係黑得好緊要,驚驚。怪事跟住就發生喇,當我出番黎飲緊 最後一啖汽水時,個女部長竟然....嗌我「靚仔,要唔要多支汽水呀?」我當堂呆左,下? 唔係喇 fa,我咁可愛,你點可以以為我係男仔黎架,真係大吉利事呀,采采采,嗚嗚~~激死 我喇....咚!
食完飯,經過 iso ,哇喇,好靚呀,廚窗果條粉紅色的長裙,仲要係靚到令人感動流涕果種 ,唉....不過可惜喇,我又無 kelly 隻腳咁長,著咩都唔好睇喇,算喇。爸爸帶左我去表哥做野果間電器舖,最後都係決定買最 update果部sony mz-r900,有錄音架,咁咪可以錄 mp3 聽,唔洗再幫襯老翻囉,嘻,多謝爸爸、媽咪。
好慘呀,為左追巴士,我隻著住涼鞋的腳竟然踢左落d污水度,上車後發覺,咦?好大陣栗子味,今次都算多謝喇,老天爺一定係知我鐘意食栗子呀。

十 月 十 七 日 星 期 二
我的最愛
七點幾就起左身,無無聊聊就去搵下電腦後面邊個位係插光籤喇,首先仲未食早餐的我,用 盡九牛二虎之力搬左部電腦出黎,咦?發現左部腦後面個櫃好多塵喎,忍唔住拎塊布抹抹抹 ,無計喇,有潔辟,白雪雪先靚架嘛。拎住條光籤左插右插都唔知邊個係,好彩無爆炸,幾 經辛苦,終於俾我搵到喇,但部 md說明書全部都係日文,死喇,唯有自己研究喇,搞到成九點幾,呼~~終於整到喇,嘻,覺得自己好叻呀。
媽咪訂左d貨今日要返深圳拎,唉....好想跟佢去呀,以前每次我都跟佢返去,嘻,之後我 又可以一個人去行羅湖商業城,度度講下價,執番d平野番黎,不過我最鐘意都係去睇玻璃 介指,記得我第一隻玻璃介指係挨我哥哥買俾我的,佢地一開價就三十蚊一隻,最後都以十 二蚊成交,之後買多左,知道根本唔係咁貴,所以我都費事問價,免得俾人獅子開大口,咬我一啖,我一走過去就問七蚊賣唔賣,嘻,當然次次成功喇。媽咪揀野又揀得耐喎,我一個 人,睇到咁多玻璃介指,試問我一個女仔又點可以抗拒果種誘惑呢,所以我儲了十幾隻好靚 好靚的玻璃介子,大大小小、唔同顏色,令我諗起色彩鮮艷的彩虹泡泡糖,不過靚的東西都 係經唔係日子的催殘,而且仲係玻璃咁脆弱的介子,好多隻都不知不覺間俾我整爛了,原本每天我都會戴唔同款式番學,但實在太易爛喇,連我最深愛的一隻都粉碎了,呢一堆深愛的飾物漸漸變成我的收藏品,放在我書桌面的一隻玻璃碟子中,繼續在燈光下展現「她」的高貴 、美麗。每當我拿起碟子,看見一早爛了但又唔捨得丟的玻璃碎,我都覺得「她們」好似楚 楚可憐咁望住我,話俾我知「她們」不想在書桌活一世,叫我再帶「她們」出街炫耀一下, 「她」係應該屬於外面的花花世界的,我唔忍心話俾「她們」知我的苦衷,唯 有一次又一次逃避「她們」埋怨的眼光。每當有重要約會時,我又會忍唔住戴上玻璃介子, 果一刻,我見到「她」又再一次自豪的笑起來了,我就係最鐘意「她」自大的性格;女人的 鑽石介子,少女的玻璃介子,都係唔同時代的一種優越感,戴起「她」,連我的手指都甜絲 絲的笑起來。呢種好似糖果般令人心動的玻璃介子,沒有再在羅湖商業城中出現了,舊地重遊都難再見到「她」的芳蹤了。一講起我的最愛就停唔到口,嘻,深圳太污糟了,畢竟我都係一 個病人,適可而止,唯有暫別一下這個老地方喇,上次媽咪番去,買左一套羊咩咩的床舖番 黎,今次我又叫佢買手信,我都覺得有點兒那個,其實媽咪係即日來回架,不過嗎咪好順得人咁買左手信番黎,係咩?竟然....都係床舖,仲買左三套,一套麻麻,一套工人,一套我,嘻,我持細行凶,首先揀左一套顏色係黃黃綠綠的,好靚,我諗訓響裡面一定會好開心 、發番個甜夢呀,嘻。
等左成年,toy story2終於出左vcd 喇,好好睇呀,仲送電話繩,未睇過記得買黎睇,唔係 就好唔update架喇。



十 月 十 八 日 星 期 三
自我肯定的地方
嘻,好開心呀,終於update番晒d日記喇,還清舊債,心情特別靚,吹口哨都吹得得戚d, 唔好以為我懶先欠落咁多舊債呀,雖然我係唔多勤力,不過主要原因都係之前入左醫院成個 星期,響屋企又好易累,所以....其實我唔知道我個日記有幾多人睇,怎至係有無人睇,不 過我寫呢個日記,最終目的係想我和你都同樣開心,我樂意將自己的瘀事大方話俾你知,博 你一笑,能令你開心,我就任務完成,功成身退。我以前曾經養過一堆倉鼠,起初會好有耐 性,陪佢地玩、幫佢地清潔,但日子久了,新鮮感漸漸淡化,我將佢地通通丟掉,我很沒愛心嗎?我一直都責怪自己貪新鮮、冷血,我覺得自己一點責任感都沒有,但畢竟良心發現得太遲了,寫這個日記是我養倉鼠的一個 續,今次我要用事實去証明我是有改過的,開始是 一點點的新鮮感,接下來的就是感情和責任感,這個日記不是我一時興起所造成的一個爛攤 子,這裡是自我肯定的地方,從開始的那一天,我已決定不會隨隨便便放棄。
今日我試下用LP錄 md,哇,厲害呀,一隻 md竟然可以錄成七十首歌呀,佩服佩服。玩左成日 夢幻西餐廳2,六點幾同媽咪撘地鐵去深水涉,唉....一耐無去街,出街就會好驚,硬係覺 得自己好古怪,俾人眼望望。頭髮比前一個月長左少少喇,所以先敢扮番個女仔出街咋,嘻 ,上個月買果前靚得令人心動的粉紅色鞋,今日終於有機會著喇。出到深水涉,首先去左高登,我想搵個靚靚 keybroad丫嘛,哇喇,俾我見到一個 hello kitty keybroad,好靚呀,不 過....當我諗起一個月之後,個 keybroad會有好多野食、野飲、指甲跌晒落去,我就覺得都係唔係好值,左睇右睇,媽咪又催我快d走,話d空氣唔好,唉....結果空手而回。爸爸響西九龍中心開舖頭的,所以又走去探班,探完再去鴨寮街行,媽咪話要買電話線喎,佢話要博條線去個廁所度,咁以後廁所緊都可以煲粥喇,嘻。之前唔見電話,連我最最心愛的千嬅 、sony貓貓騎木馬、hello kitty 電話繩都唔見埋,千嬅果條又要絕左版,左搵右搵先搵到 貓貓電話繩,不過無騎木馬的,唉....不過都幾搞笑,無電話,但有三條新的電話繩,嗚嗚 ~~
今日我見到一個著粉紅色夏老威衫的男仔,哇,我好佩服佢呀,對自己咁有自信,我身為一個女仔,每次見到 紛紅色的東西都好想買,但又唔敢用喎,始終我都唔係適合著粉紅色的可愛女孩,但當我見 到果個男仔果一刻,我唔再自卑喇,男仔都可以著粉紅,我身為女仔,粉紅色的東西都應該 係創做俾我地用的。


十 月 十 九 日 星 期 四
哇!我出冊喇!
哇喇哇喇,今朝一早 nathya就打俾我,嘻,好野!有街去喇,三點鐘太子地鐵站等。哇!nathya 披散頭髮,仲黑恤衫黑長裙,勁勁勁勁似 miss mo ,而我就著黃衫、綠裙、粉紅圍巾、黃襪 、粉紅鞋,剛剛一個黑色同彩色的對比,哈,好似兩個無喇更的人咁,好鬼搞笑。佢不停抨 激我對粉紅鞋呀,話我「著紅鞋」,又話我係麥當勞叔叔,哇,我個口邊有咁大呀。首先第一站就梗係去睇sony貓 貓喇,睇中左個散子包,但貓貓係白雪雪架嘛,d錢又污糟喎,一定好快變左黑貓,都係算 喇,之後去左行花園街,咦?好香呀,原來係辣辣魚蛋呀,哇,好似好好食咁喎....睇得唔 食得,真無癮。陪 nathya去穿耳呀,哇~~~~我好緊張呀,反而佢就好冷靜,響隻耳仔都穿個 隆喎,傻架咩,咁痛....佢仲係穿耳骨,哎呀哎呀,好驚呀,但我又想睇呀,哈,因為自己 唔會穿架嘛,果個小姐拎住個類似釘書機的物体,「拍」「拍」兩聲咁就將隻耳環「釘」左 上隻耳仔度喇,哇,睇到我毛管棟呀,之後仲腳軟,暈暈地....咚。之後去左行女人街、旺 電、信和,買左兩隻電腦game碟,影左兩張卡卡,呼~~隻腳好累呀,再撘118 過海去柴灣探 賣老翻的嘉凝,嘻,我又拎左兩隻game碟同兩隻vcd 走。哇,七點幾 lu,同 nathya兩丁友去 大家樂打邊爐,拾下拾下咁,好鬼浪漫。
番到屋企仲有下文,話說,夜晚呀媽打俾我,問我俾唔俾佢加入我同 nathya,一齊打邊爐, 咁難得同 nathya拍下拖,有大人在場又唔敢亂吹水,所以都係唔好喇,點知番到屋企,見到 媽咪響個廳度,用個煎 pan 加個無火煮食爐,一個人打邊爐,哇,媽咪幾時變得咁激進架? 諗一諗,佢早有前科架喇,上次我同班同學去食韓國燒烤,又係唔侵佢玩之嘛,點知佢一個 人自己走左去食,唉....今日我都有不詳預感架喇,但尋晚我同媽咪先去完食韓國燒烤,真 係估唔到佢會有此一著,我無俾佢亂我陣腳呀,橫掂剛剛大家樂d一哥火窩d肥牛勁少,都 唔係幾夠,嘻,番到黎再接力下一場,屋企果然唔同d,鐘意食的野就勁多,唔似頭先賣淨 個醉雞窩,我又唔鐘意食雞喎,但就雞最多,搞到我淨係食果少少肉肉同菜菜,唉....都係 屋企好。
 


十 月 二 十 日 星 期 五
坪洲之旅
哇,都未訓醒就聽到「的的得得」聲,咦?唔係喇 fa,死喇!今日約左朋友仔入坪洲宿營架 喎,咁大雨,咁點算呀?唯有晨咁早跳番part求停雨舞喇,跳到九點幾就開始寫番尋日的日 記,寫到十一點幾,哎呀,就出門口喇喎,又未食早餐,唯有左哽一包八粒的山竹牛肉,唉 ....實在太難食喇。出面落住大雨,擔住果把粉藍色的雨傘,拎住一袋行李,衝左出門口, 哎呀哎呀,其實把雨傘似太陽傘多,因為真係好小童size,結果,上車前我全身有50個%已 經開始滲水,對面海又塞車,幾經辛苦終於出到灣仔喇,我一手擔住把傘子,一手拎住copy 出黎的地圖,咦?點解將地圖上面D街名全部睇唔到架?都係我部 scener解像度低出事喇, 我要去摩理臣山ive 接個朋友放學,唉....我憑住隱約見到地圖上的麥記「M」字,盲摸摸 ,終於摸到喇,不過....我個朋友睇死我搵唔到,所以走左出灣仔等我,唉....浪費我一番 苦心,仲諗住感動下佢。見咁大雨,索性遲d先入去坪洲,所以同朋友去左老麥食野,我的 首選就係....「唔該一個菠蘿新地,多菠蘿、多花生。」,肥?唔怕喇,一次半次,食得是 福丫嘛,個姐姐仔好好人呀,d糖漿到滿到瀉晒呀,好食!話時話,我已經一嘗「薄荷奶昔 」的滋味喇,實在....實在....太難飲喇,一飲落去,我塊面即該變左同杯野一樣色--青色 ,初初果幾啖都 ok,但暖左d之後,哇....好甜呀,糖尿病呀!勇於挑戰的人可以試試。
兩點半,我同朋友兩個人踏上坪洲的渡輪上,九個字的行程,終於到喇,朋友媽咪響坪洲開 左間舖頭,所以可以借宿一宵。響碼頭行兩至三個字終於到達喇,不過我對著住涼鞋的腳已 經踏滿晒泥喇。夜晚去左惠康買野食,嘻,晚餐、早餐我都係揀食福字牌的冬陰功米粉,係 就係幾辣,不過好好食,仲有呀,芋頭脆皮樂減價呀,我的最愛呀,仲要十一蚊四條,好! 食得最福!


十 月 二 十 一 日 星 期 六
沉默的小島
雨依然下個不停,我係好鐘意落雨,但一心想去玩,又因為落雨而取消取消取消,真係掃興 呀。 坪洲係一個好靜的小島,沒有車,只有單車,比長洲還要細,島上面出租的渡假屋少之又少,多數都係兩三層的 住宅多,島上的居民都有一個「坪洲樣」,一睇落去就會知道係唔係島上居民。呢個平靜的 小島好似香港以外的另一個國家咁,自成一各,自給自足,個個人都悠悠閒閒咁走路,唔似 得市區的人,係唔係趕時間都係行得咁快。當我踏上坪洲後,發現這個陌生的地方,也有一 間熟識的店子,就係惠康喇,我諗坪洲人都有一個「入日而息」的習慣,所以連唯一的「夜 店」--七十一,都執左笠,剩番一個遺址。朋友原本有好幾個「旅遊名勝」要帶我去玩的, 但因天雨關係,所以都一一取消了,改為室內活動,睇老翻「咪走雞」。坪洲有一條好長好長的橋,係通去另一個小小島的,橋 下面就係海,好多人都會響橋上面釣魚,夜晚橋身仲會亮起一盞一盞的紅燈,提醒船隻「呢 面有條橋架,唔好撞過黎呀。」,另一個名勝就係島上面的唯一一個山,雖然係小山,但慢 慢行的話,都要一、兩個鐘。行山、釣魚一向都係我最鐘意玩的,不過唯有等下一次天氣好 才有機會試試了。
我地撘六點三的船出番中環,再見喇坪洲,雖然無真真正正在島上走過,唔可以講有咩唔捨 得,但相比起香港島的「熱情、活潑」,我倒幾欣賞坪洲的「沉默、樸素」,我同「他」的 感情,一切盡在不言中。之後我去左香港仔搵我媽咪,今日我地約左去哥哥做廚房的「扒王 至尊」食西餐,呢次都算係我有記憶以來,第一次響屋企和大家樂以外的地方食西餐,哥哥 幫我同媽咪點左個成舊水的肉眼,哇,係咪真係好食先?因為怕有菌,所以我果個係十成熟 ,唉....希望唔會咬甩牙喇,而媽咪果個,哥哥話五成先有肉味喎,食果陣我又唔覺好難咬 喎,點解呢?仲好好食呀,再睇睇,咦?有血呀!仲好似同媽咪果個差唔多生,但憑住果一點微弱的燭光 ,根本睇唔清楚,算喇,佢話十成熟無理由唔信架,點知....食晒之後個廚師先走出黎話, 個十成熟的上錯左俾第二個人,而我食緊果個....咚。我地個鐵板餐係用瓦碟上的,哥哥話 如果用鐵板上,個扒就會響上面繼續煮,結果就會比預期中熟,仲會黐底呀,真係唔講唔知 呀。我諗呢間餐廳最吸引我的係有得上網,嘻,兩日無上網喇。





十 月 二 十 二 日 星 期 日
史勞比公園
實在太過份喇,點解去camp果兩日你唔肯停下雨,俾我玩下,反而今日就要出太陽,仲晨咁 早熱醒我,俾你激死我喇。十二點幾出門口,落官塘搭 89x去沙田,今日約左 karry、tony、 dick、呀明去史勞比公園,首先去麥記醫下個肚先,哇,間麥記好大呀,不過....係迫滿晒 人,唉....d菲傭、賓妹又霸住晒d位,再加上好多好多化骨龍,侵佔晒所有企位、坐位、 排隊位、行路位,我地分頭等位,點知我同 karry 等果張個師奶原來剛剛坐低,仲等我地等左鬼咁耐,咁都唔單聲。最後由人妖dick霸到位,辛苦你喇。開心樂園餐d hello kitty都 幾得意喎,著校服果隻好靚呀,等我記住換番個先。話時話,老麥最近有個幾有建設性、幾 有著數的行為,咳咳,又幫老麥賣賣廣告,每當在下雨天,就可以用二十五蚊響麥記買一把 雨傘,聽講好大把,可以放三個人,之後唔用又可以拎把雨傘番黎,換番一張二十五蚊的現 金券,買下野食,聽落好似麥記好蝕底,但當我用呢把傘的時侯,傘上的大「m」已不經不 覺幫佢賣左好多廣告喇,不過大家都有著數,互相利用,何樂而不為呢? 食完野,正式向史勞比公園進發,咦?點解有條龍咁鬼長架呢,唔通派平安米?唔係喎,一 家大細架喎,原來係....個個都係瘋狗症,排緊史勞比公園,哇~~~~~~~~~~~~~~~~條龍排左 兩層呀,仲打左三個大蛇餅,我諗排到都幾個鐘喇,所以唯有放棄喇,去左行街、行玩具反 斗城。哇喇,好多toy story2的玩具呀,仲有薯仔蛋先生,嘻,佢地響裡面打排球,哈哈, 仲掟親人呀,加埋都成百歲喇,真係頂佢地唔順呀。行行下,行左去一間賣板仔用品的鋪頭 ,咦?原來我個靚仔表哥響果度做呀,嘻,佢真係幾鬼型架,每次見佢都一身板仔look,嘻 ,我覺得男仔咁著最好睇,cool!
 karry、tony、dick ,今晚都要同親戚食飯,都唔知係咪三個約埋架,而呀明就要開工,剩 番我一個孤家寡佬,唯有提早番屋企休息休息喇。
夜晚四哥打俾我,我地又講番民安隊d開心野,唉....忽然好掛住其中一個叫呀基的男仔, 佢個樣好正經,但每次同佢玩,佢都好鬼可愛,好玩得,我就係鐘意撩d怕羞的男仔,好鬼 搞笑。我上次見佢已經係三月的事了,果時我仲有頭髮,仲係「孖辮妹」,我又記得,佢第 一次黎探我,買左好多糖俾我,我一見到就感動到喊晒,而最後一次,因為我的病,我唔可 以接觸植物,佢就拎左一束佢自己整的紅色玫瑰花俾我,花紙上仲寫左個「緣」字。四哥聽 到我講想約佢出黎聚舊,之後就即刻用三線打左俾呀基,一時間我都唔知講咩好,剩係聽到 四哥約左呀基星期三出黎,唉....我都好想去呀,我都好懷念民安隊的一切,四哥明知我想 去,但又偏偏唔俾我去,算數,我先唔恨去呀!..............嗚~~~~~~~~不過問心丫,可 以去的話我都未必敢去,因為我已經再唔係一年前健健康康、長頭髮的呀咩了,但如果我以 後都見唔到佢,咁我永遠在佢的回憶中,都係貪玩的我,我永遠都不會老了。活在回憶中的 我是最好的了。
趕時間咁寫起篇日記,但 sever 問題 upload唔到上去,真係黑仔呀!
 

咁又過左個生日<----------昔日發傻----------->跟住又點呢