十 月 三 十 日 星 期 一

多謝你幫我撕呀東海報 一早就要起身去瑪麗醫院了，今日的行程就係朝早去睇牙、測肺功能，下午見營養師。好 驚呀，我由細到大最怕見牙醫，每次都係由屋企喊到診所，更惶論什麼牙科保健了，我都 是偷走的，但今日唔可以再避了，因為換骨髓之前要化療，之後的療程中，有九成人的口 腔都會爛一整個星期，如果本身有爛牙，情況就更可怕了，沒有抵抗的牙齒，就會白白的 迅速被蛀，想到呢個情境，唉....我唯有屈服喇。屈服還屈服，等左成個鐘，越等就越凍 ，呀！終於到我喇，一行入牙醫院，我的腳一軟，好驚呀，結果才剛躺下，我的眼淚就湧 出黎喇，一路張開口「呀~~」，就一直喊，個醫生竟然只係「睇牙」，睇完就叫我出去搵 私家補牙，下？之前ｄ姑娘仲話脫完牙，驚我痛到測唔到肺功能。之後肺功能就係放枝好 粗的管入口，不停依指示呼氣吸氣，唉....好累呀，好似做完一輪劇烈運動。驚左成朝， 午飯不如去海怡半島行街喇，忽然好想食麥當當，結果迫媽咪陪我食，好舒服呀呢度，陽 光從玻璃的天花板微微透入室內，而我就挑了一張有太陽傘的桌子坐下，四周圍都有雀仔 ，唔知佢點入黎架呢。之後就去左百佳行下，哇！可能我太過鄉下喇，真係未見過咁鬼大 間百佳，連夾糖糖架都有，其他食物差唔多講得出都有，無知的我真係幾落後。 之後我地撘小巴番瑪麗，俾五蚊之嘛，就有個司機同你賣命，上山落山條路仲快過過山車 。 營養師將我的「飲食金字答」彈得一文不值，不停講呢ｄ唔係病人應該有的飲食習慣，唉 ....我諗個個後生仔女都係咁架喇，有咪一餐囉，無咪煮個麵囉，有乜咁奇怪喎。 我淨係想響入院前做晒我想做的事，我唔知幾時會接到醫院的電話，我希望果日永遠唔會 出現，對我黎講，果日就係我的末日。 今晚，我約左以前香港設雞學院的同學去吃飯，好開心呀，久未露面的同學都俾面出席， 但我實在太怕她踩我著涼鞋的腳趾了，所以對她都係敬而遠之。我地今次又係食蕉葉咖哩 屋，我果個做侍應的小學同學，好醒目咁帶我地坐番上次個位，席間，我沒有提過我病情 轉壞的消息，畢竟太掃興了，都係留番俾自己好。笑得最多果個依然都係我，我諗無人會 睇得出，而睇左我網頁的朋友，見我無提，佢都沒有講了，多謝你的諒解。響旺角彌敦道 鬧市又俾我見到呀東的海報，我攘住要同學幫我撕落黎，佢地都義不容遲咁幫我，嘻，我 拎住陳曉東路穿隆海報，好滿足了，仲有幾多日可以俾我去玩呢？

十 月 三 十 一 日 星 期 二

萬聖節快樂 今日又要返醫院繼續做全身檢查，呢幾日都八點幾起身，山長水遠返醫院，真係好累呀。 上午抽完血之後，要去做心臟核子測試，嗚嗚~~~~又要響手背打鹽水窿，我手的血管好幼 ，每一次都要打好幾次先打到，一諗到咁我就....嗚~~我一隻手拉住媽咪，一隻手俾佢拮 ，唉....左手右手篤過晒，篤左四次先篤到，嗚~~~~痛死我喇，佢響個鹽水窿度打左ｄ唔 知乜鬼幅射藥水入去，之後坐左一陣，就俾個醫生嗌左入房，訓響個打橫的桶桶度，之後 有塊大鐵板壓落黎，哇，果下真係幾驚架，訓響度望住塊板越黎越近，呀~~就掂到喇，鼻 尖貼住塊板，醫生哥哥，你唔好按錯掣呀。 下午又係去海怡半島，不過今次係去美心飲茶，我太魯莽喇，一開始就叫左個椒鹽魷魚， 又鬼咁大碟喎，塞飽晒個肚，哇，我同媽咪一人食左一個紫米露糖水，真係超好味呀，正 ！ 食飽飽之後又撘番小巴由海怡半島番瑪麗醫院，話時話，可能因為我係九龍人喇，我覺得 鴨利洲呢道幾搞笑，如果要響灣仔黎，就要首先過香港仔隧道到香港仔，再過一條大大橋 先會到，好似幾"格涉"。番到醫院等睇醫生果陣，又見到好多病友，唉....但都無乜同佢 地點傾計，無計喇，我平日去呢度玩果度玩、乜都食果ｄ"勇敢"野，連未見過我的人都知 ，今次復發，真係幾瘀皮囉，哈，嗚~~醫生話仲有一、兩個星期就要入去住lu，好！一於 玩足咁多日，玩盡佢。 唉....見完醫生，媽咪就挾持我去佐敦睇牙，嗚~~梗係誓死反抗喇，但最終都不敵....唯 有死死地氣去睇喇。果間牙醫係媽咪睇開架，我都睇過一次，係響唐樓上面，哎呀....諗 起個格局，真係有幾分似戲裡面非法落仔果ｄ地方，死喇....會唔會無牌架....去到睇到 個招牌，哇....係有註冊喎，不過唔知係非洲定矣塞俄比亞，死喇(滴汗)，一入到房，我 就開始流汗兼流眼淚，嗚~~好驚呀。結果，牙就無脫，補左三隻牙，但就痛到不得了。 睇完牙四點幾，同朋友響佐敦行返過旺角，經過廟街，見到以前返學成日買黎食的馳名鹽 焗蛋喎，雖然同果個大嬸鬧過交，仲差ｄ打交咁滯，但都忍唔住買左一隻黎食，張開口的 時侯，先記得我補完牙未食得野住，但美食當前，結果都係忍唔住，嘻。橫掂都入醫院， 九個月無得食街野，好，一於去旺角掃街！食左兩串魚蛋，都總算係了左個心願喇，但炸 大腸始終都係好想食，但又唔敢食。 七點半，嘻，約左展翅大使班好朋友響尖咀，萬聖節嘛，首先呢，去左海運食野吹水，九 點幾，我地出發喇，我地一行七個人坐響文化中心對開化鬼粧，嘻，我咁貪玩，緊係第一 個自告奮勇化左個全粧喇，哈哈，好好玩呀，之後就到同我一樣係女中豪傑的kerry 喇， 我地女仔咁勇，男仔反而又扭扭擰擰，但最後又點敵得過我同kerry 三寸不爛之舌，結果 個個都俾我地畫到七孔流血喇，哇，鬼呀~~~~通街都係，我地一路行去尖東一路大叫「 happy helloween！」，又一齊玩一齊顛，好似成街都係自己ｄ friend 咁，不過可惜喇 ，我地ｄ鬼樣太過cute喇，大人實嚇唔到喇，唯有虛張聲勢，遠遠一見細路就跑過去嚇~~ 細~~路~~哈哈，我地實在太邪惡喇，不過好多細路都唔驚，仲反過黎嚇我地呀。成個海旁 ，見得最多都算係「奪命狂呼」喇，而最深刻呢就係有pair人扮「毫七子」同「一分鐘」 ，哈哈，真係經典之作，我地仲同左佢地影相呀。一路上好多都打扮得好鬼專業，仲好鬼 nice，要同佢地合照，絕不say no，咁多鬼相，今次都算大收獲喇，一有時間俾晒你地睇 喇。 都十二點幾喇，係時侯落粧返屋企lu，我同kerry 都係化晒成塊面白色，不停捽都捽唔甩 果ｄ油性的化粧，哎呀，塊面都捽到大左喇，都仲係咁，真係反肚呀，時間無多，算喇， 唯有白住塊面撘車喇，坐最前咪無人見到囉，不過我呢個面青口唇白的樣，就嚇親我樓下 偷緊懶的看更，同埋我媽咪喇。 嘻，好耐未試過好似今晚咁，玩得咁顛得喇，不過下次都唔知幾時lu，多謝你地帶俾我呢 個好難忘的萬聖夜，我諗除左你地肯陪我顛，都無乜第二個lu，kerry、dick、tony、winnie 、翠、明，多謝你地呀。

 

十 一 月 一 日 星 期 三

最後的歌 呵欠~~今朝又要一早起身，嘻，不過今日唔再係山長水遠返醫院喇，係約左民安隊的三個 老死，去將軍澳食早餐呀，幾鬼有情趣呀。九點鐘，因為我唔識去尚德村，所以我撘93a 入左寶琳村搵左四哥先，仲好鬼細心咁響車度打左個電話俾佢，提佢約左我架，點知佢仲 訓緊覺，唉....唯有響寶琳村散下步喇，經過麥記，咦？原來新出左隻栗米湯，唔知仲有 無機會試下呢。等左一陣就見到四哥好勇咁著住短褲仔出現喇，佢望左我一眼之後就衝左 入OK便利店，原來佢煙癮發作，趕住吸毒。幾經辛苦，行左幾條街，終於搵到一架的士， 去到尚德剛剛好十點鐘，呼~~好凍呀今日，食左一陣風，呀基同呀龍都到齊喇，好，食乜 好呢，四哥可能平日賣得牛奶多，同牛有仇，不停話要食牛扒，下？咁早，唔係喇fa，結 果無人和議的情況下，我地去左食粥。哇~~以前返夜校，我就最興一路上堂一路食碎牛粥 架喇，不過二月病左之後，此情就不再喇，今日終於又可以一償心願，今餐味道麻麻的碎 牛粥同油炸鬼，總算係一種恩賜。今日呀咩都算係幾大面子呀，龍哥係我地民安隊第一張 黑膠椅黎架，仲有呀基哥同四哥，就係第二張同五張黑膠椅，勁人黎架，我都算有面喇， 可以同三張膠椅食早餐，哈哈哈....勁呀！四哥一次過食左四碟炸量，而我就食剩半碗粥 同一條油炸鬼，相比之下真係....我地吹下水呀，互相問侯一番之後又開始我地的「第二 餐」--早餐後甜品，嘻，我地走左去麥記食雪糕呀，我就梗係例牌「唔該一個菠蘿新地， 多菠蘿、多花生丫(仲要懶可愛、懶有禮貌咁講。)」，食緊我的戰利品時，呀基一本正經 咁拎左張西貢地圖出黎，哇喇！好開心呀，佢話打算今個星期日去西灣行山，哇，係我一 直夢想可以去的地方呀，其實我都無奢想過響入醫院之前可以去西灣走一趟，但好滾動有 朋友記得我的心願，仲希望幫我達成，果一刻真係受寵若驚呀，口裡不停計劃果日的行程 ，但其實心裡都知，星期日....太遠的事喇，多數都無機會去lu。 十二點鐘，我地分手喇，四哥就陪我搭車，落車之後我由秀茂坪行左三個字返屋企，陽光 輕輕咁曬住我行緊果條好長好長的斜路，但一ｄ都唔覺得熱，好舒服好舒服，唔知幾時再 有機會行呢條路呢？ 媽咪怕我入醫院太悶，所以傾家蕩產咁買左部notebook俾我，番到屋企第一件事就梗係研 究下點上網喇，左搞右搞，搞到差唔多日落lu，今晚約左媽咪果面的親戚去荷里活廣場食 飯，五點幾醫院有姑娘打電話黎，通知我聽日入院，我拎住個電話呆左，淨係識得「哦.. 」，收線之後就開始喊到收唔到聲，我仲好想去玩，我仲有好多地方未去、有好多野未食 ，我唔要入去困個幾兩個月，之後成年都不見天日呀，我仲未有心理準備呀，嗚~~~~好灰 呀，點解要我有呢個病喎，如果我從來都無病，我以前男朋友都唔會拋棄我喇，如果我無 病，我而家仲好幸福咁讀緊切雞，好開心咁過我每一日，呢個病已經令我受左好多好多苦 喇，到左就快好番，到左我以為自己已經係一個正常人時，又話俾我知我復發，個天點解 要咁對我....點解....拎住個電話，我打左去「關心一線」，我係咪好古怪呢？其實我已 經唔係第一次打去，係，我係有好多朋友，但有時朋友的說話未必夠客觀，聽聽其他人的 意見都幾好，個社工叫我趁住今晚剩番的時間，去盡量做我想做的事，既然由聽日起，要 一年後先可以再食街外野，咁今晚唔食番一餐好，又點對得住自己。 結果我都係跟左媽咪去食飯，果間菜館的菜好好食呀，席間，仲有鋼琴師彈住一首一首流行曲，連哥哥的「大熱」俾佢彈一彈，都變得好柔和、悅耳，最令我難忘就係一首「祝君 好」，真係好好聽，每當諗起，弦尤在耳，真係好好聽。 「哭 也一話都不說 害怕 連累你一生日月 憾無缺 只差跟你曾遇過 給過你 太多波折 寧願沒擁抱共你能夠終老 任由你來去自如在我心底仍愛慕 如若踫到他比我好 只望停在遠處祝君安好 多麼想親口細訴....」   網友法蘭西斯小姐知呀咩好想去山，特登整左個呀咩行山團俾我呀，嗚~~~~實在太多人錫呀咩 喇，無以為報，唯有以身相許，多謝你呀法蘭西斯小姐。

十 二 月 十 三 日 星 期 三

我出冊喇，拜拜你條尾 哇喇，知道有得出院，開心到成晚都訓唔著，今朝一早就醒左喇，好肚餓呀，知道今日有 得走，所以爸爸尋晚就一次過用個垃圾袋入晒ｄ野食走，唉....尋日又無叫餐，所以無野 食，唔緊要喇，有得走，餓一陣又點話，今晚番到去一定要打邊爐慶祝下呀，話晒都成個 幾月無好野落過肚喎。好興奮呀，實在太興奮喇，開心到發晒癲之際，姑娘拿住一樽藥粉 走入黎，話我鉀高，要食晒之後抽血，再等埋個血報告就走得喇....下？唔係喇fa，我望 住果樽「去鉀粉」呆左，點算呢，之前又話我鉀低，要我日日食鉀丸，緊係鉀高喇，係咪 玩野呀？即係有心留難我喇....為左走，唯有屈曲求存喇， 方法一、溝水，哇喇，痴線架，好難飲呀~~ 方法二、溝豬古力奶，嘔....一飲就反胃，唔掂....ｄ粉又唔溶.... 十一點幾，媽咪都到左接我喇，但我就係堅持....堅持方法三，死嫘唔肯飲、大大聲喊， 結果喊左幾個鐘，喊到三點，諗出一條好橋，就係溝少少水，再將佢搓成丸狀，食得如火 如荼之際(其實食左1/10都唔知有無)，俾姑娘發現左，「哇！隻手咁污糟，食完實痾喇， 唔洗你食喇，我call醫生呀。」死喇....今次仲樣衰，食唔落就要響pet pet 塞ｄ藥入去 ，咁咪仲痛？嗚~~愈諗愈驚，最後天使一樣的護士長飄過黎話「醫生叫你唔洗食喇，你番 去飲多ｄ水喇。」嗚~~之前喊得咁緊要，一話走得梗係即閃喇，仲唔夠瘀咩，入左院咁耐 ，我都係第一次踏出自己房門口咋，好滾動呀，嗚~~媽咪仲感動到喊呀，咁又係，房就得 十間，間間獨立廁所、HIFI、vcd 雞、電視連錄影雞、電話，早午晚三餐有得揀食乜，楊 洲炒飯都有得食，日日洗房換床單....唔係換骨髓，都唔洗指意有呢種五星級醫院服務呀 ，下年有乜冬瓜豆付都唔會再入呢間病房架喇，除非大吉利是又復發喇，真係采采采呀。 舅父車我同媽咪番屋企，住左成個月，好似搬屋咁。因為我唔肯食藥，搞左幾個鐘，所以 無得打邊爐lu，唉....撘升降機果陣，個大嬸見我戴住口罩，好似驚我有瘋狗症咁，響果 架得九平方尺的升降機中，企到黐晒牆，喂！我唔會咬你架喎，幅牆成日有人吐啖，段估 我都乾淨過佢卦。歧視不存在，世界更可愛。 番到屋企，哇喇！咩都好似係新咁，我間房的公仔都消失晒，其他野就全部用保鮮袋入住 ，驚封塵喎。番到黎第一件事就係開電腦，哇，個keyboard同個mouse 都好似係新咁，果 種又熟識、但又陌生的感覺好得意，好似見番一個舊情人咁，欲言有止。 我一路沖涼一路望住個窗口，望住維港的風景，原來已經聖旦節喇，對面海燈火通明，好 靚、好熱鬧，仲記得入院果日，我仲係著住短袖衫，今日番到黎，已經要著厚厚的大衣先 夠暖，原來我離開左呢個世界都有一段日子喇，我去完第二個星球番黎喇。 嘻，好邪、好開心呀，今日竟然有兩個民安隊的好朋友打俾我要我地址，話要寄聖旦卡俾 我呀，多謝左先。

十 二 月 十 四 日 星 期 四

好悶呀 哇喇，今朝一早就醒左喇，無計喇，訓唔慣屋企張床，實在太舒服喇，而且我好醒訓架， 媽咪入黎睇下我，佢一開門我就醒喇，哈哈，驚聖旦老人入過黎唔知嘛。今朝早餐食左三 個蛋治，麻麻整架，好好食，我好似響ｄ落後國家俾人領養返黎咁，食乜都嗌住「好食！ 」，其實好飽呀，但又食極都唔夠，不過化療完ｄ味覺都係怪怪咁，唔咸唔夠咸。入院住 果四十日，除左頭果幾日食到野之外，化療左之後就開始一日嘔幾次，之後口痛，要打「 媽啡」止痛，哈，痛就小小都無減喇，不過由朝訓到黑，兼嘔得更加勁，個口爛到去食道 ，再爛到落個胃，無野食嘔乜好呢，就係嘔黃膽水喇，同個胃又積左一肚瘀血喎，所以仲 嘔埋血呀，唉....一食就嘔，四十日之中，我有三個星期食唔到野呀，嗚~~真係有血有淚 架，初初食番野，個胃唔適應又嘔喎，而家食少少都飽呀，唉....講番起都頸背都涼一涼 呀。 第一日響屋企，好似無所事事咁，平時ｄ姑娘一日入黎十幾次，又要量血壓又要探熱，而 我就由十點幾開始睇劇集「楊門女將」、「寵物情緣」、「千里恩緣兜錯圈」、「碧血劍 」、「妙手仁心」、「FM701 」，哇，咁都去左五個半鐘喇，但好奇怪地，一番到屋企我 又唔多鐘意睇電視，多數都係一起身就攬實部電腦，上足一日網，乜都悶喇。 無意間搵到一幾隻好聖旦feel的cd，好想將佢放上網頁播，整左成個下午，先轉到做rm檔 ，點知又放唔到上網喎，唉....激氣到想喊呀，索性發皮四，掉低部電腦走入房訓覺算。 叻friend penny話online game「樂園」好玩呀，於是乎就叫爸爸買喇，唉....買左番黎 搞左成晚都玩唔到，嗚~~~penny呀，點算呀。

十 二 月 十 五 日 星 期 五

愛隨頭髮脫落了 七點幾就醒左喇，今次唔係有人嘈呀，係因為尋日買左隻「樂園」，一直未玩到，所以心 掛掛。一早就醒左，即刻衝出廳，開機試下玩唔玩到喇，唉....結果又係令羊失望，都怪 自己笨，之前玩「石器時代」都知呢間代理商樣衰，信譽一向都差差差架喇，欺騙我感情 同時間，好羊不吃回頭草，今次真係失策，一路鬧、一路走番上床繼續訓埋下半場。 之前一直話唔俾食芝士，所以成年無食過pizza ，今次病房ｄ姑娘又話食得喎，唔理喇， 一次過食左三個芝士治，報仇咁報呀，不過好滯呀，一直滯住....滯住....滯滯下就訓著 左喇。 一覺訓到四點幾，一走出廳，無喇喇望下張飯桌，竟然發現兩大封寄俾呀咩的情信！哈哈 ，好開心呀，一張係民安隊六尺一的呀高的聖旦卡，不過佢裡面寫ｄ字同佢底色太太太黐 色喇，睇到我鬥雞眼咁滯呀，嗚~~第二張係俾"meredith ng" 的掛號信，唉....都怪樓下 個對講機壞左的關係，所以要自己走去郵局拿，激死人喇，好心急想知係邊個寄黎，又好 心急想知係乜喎，唔通係聖旦老人？唔通係一支生髮水？死喇，個頭無頭髮，凍到傻左。 好開心呀，之前上黃巴士個網，睇中左一條頸巾，今日咪叫媽咪順路去睇下喇，兩舊幾水 呀，不過好鐘意，好cute，多謝媽咪！記得上年聖旦，我仲係頭髮長長，但因為平日都係 低低能能咁，所以個樣好細路女，以前男朋友又鐘意女仔長頭髮，所以我就買左個電髮夾 ，專登將ｄ頭髮夾曲，我仲記得出街之前，佢會幫我將頭髮一小束一小束的夾曲，再塗上 定形水，雖然每次未返到屋企，頭髮都打回原形，但我地都好享受夾頭髮果一刻，因為唯 有果一刻，佢係對我最溫柔，而家諗返起，可能響果一刻開始，他就已經異情別戀，佢鐘 意的唔係曲髮的我，而係一個曲髮的女仔，哈，多可笑，第三者竟然係自己的頭髮，化療 之後，我無晒頭髮喇，而佢都跟著我的頭髮走了。 今晚打邊爐呀，哈哈，我係咪好勇呢，不過ｄ肥牛滾成個字先俾食，哎呀，無牙咬呀，結 果，極品肥牛我都係食左好少，今次似齋鍋多，我淨係食左好多菜，今次真係清腸胃囉。 就係呢條cute得令羊心動的頸巾喇~~(有回音)

十 二 月 十 六 日 星 期 六

聖旦老羊 哇喇，今日終於有得玩online game 「樂園」喇，起初玩又覺得幾得意喎，好似石器時代 咁，行黎行去，得閒又打下怪物咁，又升level 喇，又有錢賺，哈哈哈，好開心咁玩緊之 際，無喇喇有個player過黎放火，一秒都唔洗，我就燒到變左一副骨，嗚~~~~實在太殘酷 喇，大家出黎求財，唔洗一野做瓜人呀....我ｄ錢仲要俾佢拿晒，哇！咁同劫殺無乜分別 喎，有無搞錯呀，我死左仲要燒我副骨，無人性架，警察叔叔！有人烹屍呀！拉佢終生監 禁喇，嗚~~~~好嬲呀，但一路鬧，一路話唔玩唔玩，結果都係忍唔住走去玩，唔得！我要 報仇，我要練到好鬼高level ，俾人燒極都唔死！唉....最後呀咩都係響死左又番生，番 生又俾人追殺死左中渡過，玩得多真係心理唔平衡呀。 今朝麻麻幫我上秀茂坪拿郵包，好心急呀好心急呀，究竟會係咩呢，不過麻麻最後都係空 手而回，郵差叔叔話個郵包未送到喎，嗚~~~~玩野咩....好心急呀，咁大個女都未收過郵 包。 今日都十六號喇，呀咩要好好努力，開始努力寫寫寫聖旦卡喇，無呀，聖旦卡唔係買架， 係自己搵兩張白卡紙畫架，寫好個涵，再用針線聯起佢，哇....聯線的時間仲多過我畫公 仔同寫卡卡呀，聯到我滿頭大大汗呀，呼~~好夜喇，先寫得兩張，哎呀，聽日要好好努力 喇，無計喇，呀咩平日得罪人多，稱呼人少，都係ｄ朋友大量，成日照顧我，我先可以有 手有腳活到今日咋，以身相許我又嫁唔晒俾咁多個，唯有響節日花花心思，聯針聯到十隻 手指頭都「必」晒血到扺架。 呢張係其中一張的外表，內涵仲正呀，不過就梗係秘密喇。

十 二 月 十 七 日 星 期 日

你們聽到我播的歌嗎？ 激死人喇，前幾日學整realplayer唔成功，我首好鐘意果首swing 唱的1984又播唔到，唔 通想播自己整的rm真係咁難？唔得，我係呀咩，無野難到我架，今朝一早開始鑽研番ｄhtml ，呼~~掉下penny 一個人去打機，強忍唔去玩樂園，好努力好努力咁，黃天不負有心羊， 終於俾我響吉場播到自己整的rm了，嗚~~~~滾動得想哭呀，其中有范曉萱的一張聖旦歌專 輯，仲有雪人喇、冬天的故事、最後的歌....呢ｄ歌湊湊埋埋，就係呀咩過聖旦的背境歌 曲了。 「好冷 雪已經積的那麼深 Merry X'mas to you 我深愛的人好冷 整個冬天在你家門 Are you my snow man? 我痴痴 痴痴的等」 好傻瓜呀，無喇喇走去seach番以前男朋友個icq，但一見到佢online，我又驚到delet 左 佢，哈哈哈，真係無鬼用呀，忽然覺得自己好無聊、又好無膽，add 番佢又唔係喎，哎~~ 唔好諗喇，庸人自擾，於是乎我就走左去整曲奇餅，一開波我就乜都掉晒落去，整整下先 覺得....咦？唔係好妥喎，我好似掉轉晒ｄ次序喎，是但喇，搞埋咪又係一「pet」 野， 但越整就越唔對路，我落多左隻蛋，結果要落好多麵粉，落晒成包麵粉都唔夠呀，但我兩 隻手都係麵粉漿，嗚~~~~覺得自己好可憐呀，狼狽死喇，最後餅就整唔成喇，因為一開始 太心神彷彿喇，但最終目的我都達到左，嘻，我無add 番佢喇，既然大家生活都不錯，我 都無謂再打擾他的寧靜喇。 今晚工人放假，麻麻親自下廚整炸矮瓜呀，超好食呀，homan ，嘻，係呀，我係好刷得架 ，無病之前我好少響屋企食飯架，一直都覺得屋企飯味道不怎麼特別，但自從要長時間食 醫院飯之後，我就發現屋企飯係好好好好食架，而且今次仲住左成四十日，四十日裡面日 日嘔，食野又無晒味覺，個口又痛，根本想食都食唔到，個肚都未暖又嘔番出黎，唉.... 受過呢少少的苦，我總算明白，原來要對身邊滿足，人才會活得快樂，因為食得訓得，其 實對好多人黎講，已經算係奢侈喇。

不敢回首<------------昔日發傻------------>又是一條好漢