十 二 月 二 十 五 日 星 期 一
聖旦快樂
哇,今日係聖旦節的早上呀,merry christmas ,其實都唔早架喇,尋夜個friend黎玩通 頂,成五鐘先訓,一醒已經係十一點幾。平日懶羊羊的我,今日點都要一盡主人家的責任 ,煮番餐早餐,希望唔會食到我個friend上吐下瀉喇。登登登登,呀咩繼整餅乾,十四樓 掟落街都唔爛的記錄,今次又一力作,血淋淋聖旦肉醬意粉,當然唔係羊肉醬喇,咩~~因 為少落廚的關係,我係唔知淹肉的豉油、豆粉、糖係有次序架,意粉又無過冷河,仲有我 味覺鈍胎,所以試極都好似唔夠味,越整越咸....呼~~好彩,最後我朋友都有食晒,唔好 咁驚喇,其實我都覺得幾好食,不過我味覺鈍胎,食乜都好食架喇,哈哈哈,噓~~唔好話 俾我個朋友知,嚇到佢要食保嬰丹都似。
食晚飯時間,好肚餓呀,一出房即刻見到成張飯桌都係pizza ,下....唔係喇 fa,乜仲有 人唔知呢間屋的羊大小姐九個月都唔食得街野咩?原來係哥哥叫姑姐買上黎,下....我就 話唔出得街,你有手有腳,自己出去食喇,做乜要買返黎喎,佢地一見我望住d pizza, 就煞有介事咁叫我番入房,而家算點喎,買上黎引我?見我有得睇無得食就好開心?我嬲 到口到震埋「唔理呀,買得上黎我就有份食!」,拿拿臨拿左舊最細的入左房,我好嬲呀 ,我搵自己出氣,一路喊一路食晒成舊 pizza ,我覺得自己好似食得好慘,自從病左之後 ,我都無食過 pizza 喇,因為媽咪一直話有菌,我唔食唔會死,但我都係一個細路女,放 到響我前面的話,我就要食。


十 二 月 二 十 六 日 星 期 二
我的聖旦節的約會
呵欠~~哇喇,起身喇、起身喇,今日約左展翅大使d朋友仔上黎,要執定野等佢地先。哎 呀,幾經辛苦,我先響哥哥間房的上隔床,搬左部play station落黎,仲有果幾百隻game 碟的game碟套,呼~~原本諗住整定餅招呼客人架,但失敗率奇高,跟住就諗住整糖水,但 又怕佢地唔鐘意食,再跟住諗住整o者o厘,但又驚整唔切....結果諗得太耐,乜都整唔到 。兩點呀, karry、tony同呀dick上到黎喇,嘻嘻,我地又打機,四個人一齊玩「一級運 動會」,哇,癲架,超難玩呀,但好搞笑,tony憑住保齡球大勝,一直贏到落尾,佢一幅 書生樣,果然深藏不露呀,之後我地又分開男、女子組,玩晒成隻拍拍機2,哈哈,下次 一定要諗埋點罰,咁就好玩喇。
karry 要去睇醫神演唱會,所以早走,你就好喇,現場聽醫神,唔知佢個籮袖係咪真係咁 大呢。哇,我地由天光玩到天黑,打左五個鐘頭機呀,呼~~笑到好累呀,好開心呀今日, 下次又叫dfriend黎打機先。
其實聖旦無得睇燈飾、週街癲,真係有d約有所失的感覺,再加上一上網就成日有人問, 「你聖旦去邊玩呀?」,我唯有幽幽的說一句「無呀....」,然後對方就會講一堆點解、 乜你咁悶架、咁可惜丫、ok、oic...雖然別人只不過係好隨便咁問,但我仍會有一刻的唔 開心,不禁問自己「係呢,點解我唔出得去呢?」
「係呀,你病丫嘛,連樓下都唔去得,何況係人咁多的地方。」然後另一個呀咩就回答。 「哦~~係喎,但點解成條街咁多人都無病,係我一個病架,最起碼日日響icq ,問我聖旦 點解唔去玩果d人,點解佢地唔知病無得去玩係會唔開心架,仲要不停話我悶....」我不 解的問。
「因為佢地無病,所以咪唔知囉。」呀咩理所當然的答我。
之前會覺得聖旦節呢幾日好難熬,但其實又唔係丫,雖然無得成班friend週街癲,不過我 d朋友都特登上黎深山拜侯我,住天水圍、沙田都黎陪我打機,令我不至於變成獨居老羊 ,嘻,真係甜到由個心笑出黎呀。仲有呀,我都唔係無得睇燈飾丫,屋企窗口望過去維港 係遠d,但都仲可以望到中銀、會展、長江大廈同山頂呀。嘻,我要響聖旦節完之前,睇 一次燈飾。今晚我拿住媽咪的望遠鏡,自得其樂的坐在窗前,睇清楚長江大廈外牆係咩字 ,睇左好耐,終於睇到喇,係「SEASON」、「GREETING」同埋一棵超巨形聖旦樹,嘻,即 使我有無病都好,聖旦節都沒有離開過我,我仍然可以接受聖旦的season greeting ,我 仍然可以望到長江大廈的聖旦樹,嘻,我又見到聖旦節對我笑喇。
「下年我可以在長江大廈下面看聖旦樹嗎?」我問。
「嗯,可以呀,下年聖旦我在那裡等你。」聖旦節臨走前對我說。
又到我講故的時間喇,我一路講,你可以一路想像當時的情境,怎至想像一下你就係女主 角----呀咩,黎喇,我地將時間校番去二千年前的最後一個聖旦....
冬天的故事<中>
「聽日係聖旦節,我地去邊玩呀....」我問。
「唔知呀....聽日先算喇。」男朋友答。
「我有個心願呀,我想試下響長江大廈下面睇住佢倒數呀。」我天真地說。
平安夜果晚,佢送到我番屋企,已經係三點幾喇,屋企人都訓晒,到左我一個人靜下來, 先係我真正面對現實的時侯,到底我想點呢,應該點做,一向依賴的人都要走了,我一個 人,可以點做。望住對面海長江大廈外牆,上面快樂的倒數著「6 days to 2000」,聖旦 節又向我笑了,我係咪都要笑住去倒數離別呢....畢竟,用6 days去再建立一段感情,係 無可能的。
聖旦節的下午,佢上左黎我屋企,我地兩個好似好朋友咁,講晒以前對對方的不滿出黎, 唔知點解,講左出黎反而開心左,終於唔洗屈住,聽完後有d想拉佢入後巷打一身的感覺 ,但反而傻傻瓜瓜笑起上黎,淨係覺得,現在呢一刻的感覺,係我地一齊咁耐最自然,最 不裝模作樣,呢個先係鐘意玩、鐘意笑的呀咩,要成日扮良家婦女一向唔係我強項。
呀諾、呀秋同呀彬三個都算唔話得,知我聖旦前同男朋友分左手,所以專登打黎約我上太 平山山頂玩,但我又一早約左男朋友,咁點好呢,朋友至上,唯有帶埋男朋友出去喇,希 望呀諾佢地唔會打起上黎喇,到時真係唔知幫邊面好。
我約好佢地七點山頂等,時間緊迫,唯有分頭行事,男朋友細心地為我將長長的頭髮夾曲 ,再塗上定形水,而我就專心地在眼蓋上塗上閃粉,哇喇,不得了,已經六點幾喇,但頭 髮還有一邊未夾呀,唯有草草的將另一邊的夾曲,出發喇,我地去玩喇!
街上面好大風,我著左一件毛毛的白色上衣,我覺得佢最有聖旦feel,雖然香港無雪,但 毛毛好似雪一樣,降落響我衫上面,我仲著左一條紅色格仔裙,企響樓下等巴士果陣,風 一吹,我就明白咩叫扺冷貪潚霜。其實上山頂,應該係落官塘撘地鐵去中環,但我鐘意撘 巴士,所以撘左601 去金鐘。
撘巴士係慢好多,但沿途望到咁多燈飾都係值得架,落車果陣已經係七點幾八點喇。 「我地要跑過去中環馬頭先得喇。」我說。
「好呀!」佢笑住咁拖住我,響途人不多的金鐘道上向中環跑。
「我要愉快 祝我愉快 請拖著我手
你要愉快 給你愉快 請拖著我手
但求像一塊木頭 不必比水晶球通透
別要走 直到天使會愛上木偶....」
我地穿過好多座掛上聖旦燈飾的大廈,跑到中銀大廈旁的一條無頂的天橋時,我地的腳步 放慢下來,呼~~平日遠遠的望住中銀大廈覺得佢好細小,無諗過原來響佢隔離欣嘗佢,係 會咁壯觀架。中銀隔離有座大廈,同中銀差唔多高,每個窗都有一盞大光燈,望上去唔覺 得似咩聖旦燈飾喎,忽然全座大廈的燈一閃,「6 DAYS」,又一閃「TO」,然後再一閃「 2000」。
「咦?呢座咪係長江大廈?」我好雀躍的說。
「係呀。」佢笑住咁回答我。

十 二 月 二 十 七 日 星 期 三
多謝望峰
哇,好開心呀,梁望峰響我個留言版度留言呀,嘻,雖然我唔係咩痴心小fans,但我一直 都好鐘意睇佢寫既野,我同哥哥差唔多有齊晒佢所有書呀。仲記得97年書展,我果時得十 四歲咋,我抱住望峰的書,排隊俾佢簽名呀,哇,諗番起果時真係一幅痴心小fans look 架,嘻,望峰簽名果陣"他他條條",又食野又飲水,一邊同我地傾計一邊簽,仲唔會一簽 完就趕人地走,望峰問我要佢響本書面寫d乜,唉....天真可愛的我(即係無乜腦喇),竟 然答....「可以做望峰女朋友。」,而家諗返起真係面紅。不過對望峰最深刻都係,佢同 我都係住同一區,有一次響樓下的超級市場見到佢買野,嘻。
今日我將成隻「樂園」send俾左bee 哥哥呀,成二百幾 mb,我覺得寬頻的發明真係好偉大 ,唔洗半個鐘就send完,我俾左個account 佢玩,無所謂喇,我又唔玩得咁多,而且呢個 月又唔計錢,嘻,bee 哥哥玩得好開心呀,佢開心我咪開心囉。
係喎,你有無去過工展會行下呀?呢~~金鐘添馬艦呀,媽咪響果度有個攤檔,係買手工藝 品架,去開記得探下我媽咪呀,不過....我媽咪好惡架,唔好亂摸佢d野呀,會好驚既事情發生架。媽咪 今晚番黎就話想買豆漿機,九成係佢日日對住檔賣豆漿機架喇,唉....俾我估中左,佢話 個豆漿機好正架,不過媽咪同麻麻成日都話唔好飲咁多涼野,豆漿好涼架喎,我地全家都 無乜邊個係好鐘意飲豆漿,結果一致反對,計我話呢,成八百幾蚊,不如買過部新的焗爐 仲好喇,雖然而家呢部只係買左三個月,但因為無得校溫度,所以成日都焗到d蛋糕面熟 裡面唔熟,拿拿拿~~所以呢~~我成日整餅失敗,都未必係因為我笨手笨腳架。
今晚明珠台播<巴哈音樂夜>,好開心呀,佢播左兩次 G弦詠嘆調,好好聽架,我諗好多人 都會聽過,我最鐘意佢頭果段,實在好好聽....好好聽....


十 二 月 二 十 八 日 星 期 四
覆診日
呵欠~~人都癲呀,尋晚睇呀哥打盜墓者,睇到三點先捨得訓,今朝一早七點幾就要起身喇 ,有街去咁好?係呀....又要過海番去瑪麗覆診呀,好彩今日唔係好勁太陽,唔係媽咪就 會迫我戴果副"盲俠鏡",唉....烏蠅鏡就戴得多,要我戴果副,一定俾人以為我係盲架。 八點幾到醫院,都要排到第十三呀。嘻,不過今日唔怕悶,因為我帶左部notebook去,我 實在欠下太多日的日記未寫喇,雖然我地之間無咩承諾,無話我一定寫、你一定睇,但我 有責任貫徹始終,遲寫好過無寫嘛。有個病友帶左個女黎,佢個女好鬼得意架,不過有左 病之後,我對細路仔的熱愛情度大減,因為通常當我怪物彈開的,多數都係師奶同細路。 但可能因為佢媽咪都係病人喇,所以佢唔驚我,見我玩電腦仲走過黎睇,雖然心裡暗喊「 嗚~~死靚妹,我趕緊日記呀,姐姐唔同你玩喇....」,但始終忍唔住開左個「踩地雷」出 黎同佢玩,佢真係好鬼得意架,成日「嘻嘻嘻....」咁笑,把聲好似小苦妹,佢又唔怕羞 喎,一見我又走過黎,最衰無帶個cam 去喇,唔係就可以影低佢個靚樣,媽咪生返個女就 好喇,可以俾我玩,不過如果生左個仔出黎點算呀?掉佢落街囉,哈哈哈,講笑咋,係都 煮左佢黎食喇,冬天暖下胃。醫生今日無乜野講呀,淨係話我d血色素低,正常人十二, 而我就得八點幾,問我輸唔輸血,梗係唔輸喇,一包血要輸幾個鐘,輸完兩包都天黑囉, 重點係今日無靚仔睇,好悶架嘛....
要打冬天的故事,又要打日記,打完之後竟然hold機,嗚~~~~唔緊要,notebook有備份, 叫哥哥幫我入房,幫部notebook上網喇,佢又唔知搞咩喎,搞到陪野好似中風咁,呆響度 眼光光,嗚~~哇哇~~~~今次真係叫天不應叫地不聞喇,響我就快暈低時,有個 not in list 人「au噢」我喎,哇!佢第一句就話我個樣好似 tom boy ,問我係咪果d喎,已經唔開心 架喇,仲俾人激一激,見佢大過我,我咪贈佢一句「姐姐」囉,之後佢又繼續講我似tom boy ,今次我真係嬲呀,唔係化療我都唔會無頭髮喇,你知唔知由光頭到長到一寸長之間 ,我受左幾多歧視?因為一直化療,果一寸長的頭髮,已經要大半年,無頭髮又俾人以為 我有傳染病,有頭髮又俾人話我似 tom boy ,嗚嗚~~點解佢可以咁hurt人喎,我解釋俾佢 聽,咁樣講係無禮貌,點知佢好寸咁話「如果響 icq 講野都要就住就住,咁咪好假?」, 聽完佢咁講,我真係鄧佢呀媽慘,生左個女出黎傻架,成二十歲人仲蝦細路女,如果口不 擇言、講野都唔經大腦,就叫做「真」,顧及別人感受、諗過先講就叫「假」,我諗我係 一個好「假」的人,因為我唔想一句說話,而令人唔開心。其實我都好鐘意同人icq chat ,但如果係無禮貌的人,我就會用九年免費教育,學番黎最恨毒的字句鬧番佢,之後趁佢 未回得切,放佢入ignore list ,等佢無仇報,嘻,我係咪好陰毒呢。



十 二 月 二 十 九 日 星 期 五
又講下舊史先
死喇死喇,呀咩變左睡公主呀,近呢兩個星期,我日日都可以訓晏覺,仲一訓就訓到天黑 黑先起身,唉....成日就咁俾我浪費左喇,夜晚得番少少時間,打得日記黎又打唔到冬天 的故事,嗚~~~~仲諗住三日打晒成個故仔,但而家仲欠個下集,希望唔會欠野欠過年喇, 好唔吉利架嘛。話時話,我成日訓都有得賴架,我血色素低丫嘛,所以個人咪易累囉,累 就要訓下,唔係會對個病唔好架。我有少少記上年呢個時侯,我都好似係成日訓晏覺,訓 到無晒時間做野,係咪冬天的關係呢。
好想返學呀,我由細到大都鐘意畫公仔,為左實踐小小的理想,我一次過讀左兩間設雞。 仲記得上年中五畢業,正所謂初生之犢不畏虎,都唔知辛苦係乜,首先走去報左大一設雞 學院,返二、三、四,每個星期返晒四堂先上得四、五個鐘,咁咪好多時間淨?唔怕,我 盲中中,中左去佐敦,報埋香港設雞學院,讀夜校,返一、三、四夜晚,得三堂,哇,好 似仲有好多時間淨喎,點算好呢?有計!susuky響太古城間肯德基度做喎,咁咪可以去玩 下囉,仲有佢照住,實無死喇。點知,入左去做頭果三日,susuky都係返得一日,之後第 四日佢仲俾人炒鬼埋,嗚~~~~今次真係叫天不應叫地不聞喇,好彩我聽聽話話,所以個個 都好錫我。其實做呢份野唔係為錢架,十五蚊個鐘,靠佢開飯就餓死喇,而且仲響太古城 咁遠,一來一回都無左十幾蚊lu,不過真係做得幾開心,每次番工我都係好好笑容咁「歡 迎光臨,買野食過黎呢邊丫(高音)。」,以前男朋友一同埋d同事黎探我,我就會偷雞俾 好多野食佢地,仲有呀仲有呀,我記得換公仔果排,有個嬸嬸日日特登買三十幾蚊野食黎 換公仔,我見佢咁慘,索性就咁賣兩隻公仔俾佢,噓~~~~俾經理見到實炒左我都似,不過 見佢笑住咁走,我又覺得值得既。最幸福就係可以食到剛剛炸起,熱辣辣的薯條,真係好 好食架。我返工多數都係收夜,一個人要洗晒成個counter 呀,洗到隻手臭晒,放工都十 一點幾lu,之後由太古城撘地鐵出旺角接埋男朋友,佢再送我返屋企,呼~~咁就一點鐘喇 。呢份工做左兩個月,到十月就無再做喇,係就係好開心,不過九月之後請的新人,起薪 點竟然有十六蚊,下?咁咪即係多我一蚊?我要教佢做野,佢人工仲高過我,好鬼嬲經理 之下,我就不辭而別 lu。而且返兩間設雞,d功課又開始多,再唔俾自己休息下,我真係 會好似芝ci姑bi 咁精神分裂呀。
今晚歡樂今宵有陳冠希呀,一見到佢,我竟然好似鬼上身咁,不由自主去錄低佢唱歌喎, 我隻左手明明勁打我隻右手,叫佢唔好錄架喇,佢係都要錄,我仲企響電視機前,陰陰咀 咁對住陳冠希笑呀,我見到自己笑得好恐佈呀,個咀笑到45度角斜架,哎呀,好似返番去 中學時代,見到暗戀既男仔咁呀,死喇,唔係喇 fa ,我一定係鬼上身呀,呼~~又有一陣陰風喇,一定係喇....

十 二 月 三 十 日 星 期 六
貪新忘舊
尋晚為左畫果張「哈皮扭腰卡」,搞到成五點先有得訓呀,嗚~~~~最衰我又唔識電腦繪圖 喇,搞到核核突突咁,呢個已經係我既極限喇,唔得!要的起心肝學電腦繪圖,但邊個軟 件好呢,你有無介紹俾我呀,唔好介紹小畫家俾我呀。晏晝我收到貓貓送俾呀咩的公仔呀 ,嗚~~~~靚到我當堂暈一暈,裡面仲有令呀咩心動的sony貓,嗚~~~~卡哇伊呢~~相比起呀 咩新畫的邪惡版「狼披羊皮」公仔....真係....唉....自愧不如,貓貓,你咁即係踩場, 搶我 fans喎,嗚~~~~唔制呀,嘻~~不過真係好靚,你用電腦定親手畫架?偷下師先。 今日我決定要同 heha分手呀,雖然我同佢一齊左七個月,由吉場初初五月幾,得十幾個人 黎,到而家有二百人次,我地一齊捱到十隻手指頭都掘晒(其實係我d手指頭),我係唔應 該變心,但最近真係好難頂,佢以前好善解人意無廣告架,而家越黎越貪錢,成日彈個 banner出黎,熄左佢唔夠三秒又彈番出黎,陰魂不散架喎,所以我的起心肝,響二十一世 紀前飛左佢。我的新歡就係NBCI,即係以前既 xoom,不過佢無 cgi ,所以申請埋 hypermart.net 實行享下齊人之福,呵~~呵~~~~
呢幾日penny整左個cgi留言版呀,超正呀,初初頭四次留言,會係幼稚園生,之後留言越 多,就會越高班,嘻嘻,好好玩呀,見penny 玩得咁開心,呀咩就拜托佢幫我整番個喇, 嗚~~~~~不過 penny整完之後,俾我搞壞左三次呀,唉....一定係我隻右手尋晚拎過個遙控 黎錄陳冠希呀,所以撞左邪,一定要搵祿袖葉洗手呀。penny 不厭其煩咁幫我搶救左佢三 次,嗚~~~~為左多謝佢既幫忙,我本來諗住整個招牌俾佢架,不過整起上黎先知有難度, 第一係唔知penny 的喜好喇,第二係如果我整得核核突突,佢都要迫住放上去咪慘,唉.. 結果呀咩都係寧願做一次衰女,無好好報答佢,唯有當天立譬,第時呀咩post上黎的公仔 ,有penny 鐘意的話,我一定第一時間整個靚招牌俾佢。
結果今日一次過,告別左舊的網頁供應商,同埋一個用左半個月的留言版,雖然話新野有 新鮮感,但新野始終都有舊的一日,而且正所謂「新不如舊」,舊既人同舊既物件一樣, 都係有一種不能言喻的感情,一段不為人知的過去。

卡哇伊版可愛羊咩咩。

邪惡版披羊皮的呀咩。


十 二 月 三 十 一 日 星 期 日
謝謝你的愛
尋晚為左趕番好d日記趕到五點,無法喇,"責"過年好醜怪架嘛,今朝十二點幾響張床度 典黎典去,掙 左幾個字,終於都係要起身喇,因為我要努力寫埋個「冬天的故事」,哎 呀,幣!唔記得約左朋友上黎陪我過除夕,唔得~~要招呼客人喎,點好呢,結果我以尋晚 整網頁整到好夜為理由,趕佢自己去煮麵,唉....真係有少少過意唔去,佢特登買左兩個 出前一丁,新出的「極辛泡菜湯麵」上黎諗住一齊試,但我又懶訓,結果我訓醒走出到廳 ,就見佢一個人好lonely咁食麵,佢....佢..仲「斯斯索索」....喊緊呀,唔係喇 fa,大 節流流,唔好喊喇,佢噴住火同我講「d麵真係好辣呀....」,哦,原來係d麵辣得滯, 前車可鑑,我都係唔試喇,佢見我得得戚咁笑佢孖潤腸,竟然迫我食喎,嗚~~~~最後我都 係八八卦卦飲左啖湯,哇~~~~癲架,一啖湯都可以咁鬼辣....呢個麵真係....(以下一則廣 告)如果你自言係一等辣級高手,我誠意推薦呢個麵俾你,佢既麵條係加入左辣椒粒而成, 再加上香滑湯底及秘製辣醬,食後輕則變一孖潤腸,重則喉朧燴爛,七孔噴火,試食員一 致認為佢係比辛辣麵辣上數十倍,兩個幾可以有如此味覺挑戰,簡直係扺呀,不過係「冬 期限定發售」,所以趁冬天買番個黎試下喇。
我咁醒目仔,梗係無食果個辣死羊既麵喇,結果我食左個penny 推介的福字牌五香牛肉粉 絲,咁大個女我都好似無食過粉絲,淨係以為粉絲同米粉係同一樣野,我將佢煮煮煮,咦 ?點解d粉絲變左透明既?食落好似碗仔翅果d「翅」呀,佢一d都唔"林",爽口到有少 少硬,結果我啖啖都唔係點咬過就吞,哎呀....搞到個胃有d唔舒服,小朋友唔好學呀。
原本諗住寫埋d日記,就同朋友打playstation 架,但花左成個下午,我一粒字都無寫過 ,淨係週圍搵軟件係將mp3轉wav,搞到五點幾,我終於將十幾首wav轉左做rm ,再放上網 頁播,嗚~~好聽嗎?雖然我無份唱,但整完都好滾動。
十一月到十二月中因為入左醫院,所以都無update過吉場,出院努力到今日,本月有五千 四百幾人次喇,剛剛多上個月二千人次,好開心呀,而家吉場每日都生意興隆,聖旦假期 仲一直高企,一日有二百幾人呀,有晚一小段時間,吉場仲有成十五隻羊仔入左黎玩,嗚 ~~好滾動呀。響我病左呢一年,我覺得關心我既人多左好多,有d係新識,有d就係識左 好耐,其實佢地一直都存在架,但我無留意到,因為我覺得佢地對我好,都係應該的,直 到我病左,先知道原來有好多野唔係應份架,我唔可以再細心將長髮綁起,因為我根本無 頭髮;以前出去玩,玩到天光唔肯返屋企,但響醫院,我寧願邊度都唔再去,我想回家,我想番屋 企;化療嘔足一個月,媽咪買左好多我鐘意食既零食,我淨係可以望,就連每日基本的三 餐,我都食唔到,三個星期無食過野,淨係吊營養水,果一刻,我好想食野。由細到大屋 企都寵我,要乜有乜,但有左病,我要求的唔係要去食酒店食自助餐、唔係要媽咪俾我去 宿營....我只係想食到一碗麵,我只係想可以一直留響屋企。一年前我唔知,但我而家終 於明咩叫身在福中不知福,即使你覺得我好慘,好折墜,但我覺得我已經比好多人幸福。 每日都有二百人圍住我,佢地一個一個咁問我:「呀咩,你今日點呀?唔好放棄呀。」。 每日我就響度訴說自己的生活,開心同唔開心,我都會同你講,透過meredith.hk.st,你 成為左我既朋友,你每日都響我身邊,當你笑果一刻,我都響你身邊一齊笑喇,即使你係 笑我傻,但可以令你咀角向上彎的人係我,我希望你快樂,因為你係我朋友。
十二點鐘喇,我同朋友一齊坐響窗前,遠遠望住長江大廈外牆的倒數,「10,9,8,7,6 ,5,4,3,2,1.....2001!」,雖然距離尖沙咀好遠,但我仍可以聽到人群興奮倒數的 歡笑聲,麻麻同工人都訓左,屋企好似無乜新年氣氛,但十二點之後,打黎同我講 「happy new year」的電話,好似東華壽款咁響過不停,嘻,好幸福呀,響呢個特別的日子, 好多朋友都無將我忘記。
呢個就係傳說中的辣麵,認住包裝上果個外賣仔,辣親就打佢一鑊,與本吉場無關。


 


岩岩出院<-----呀 咩 昔 日 發 傻----->繼續嚕


© 呀咩吉場 http://meredith.com.hk