一 月 一 日 星 期 一

新的世紀 呵欠~~~~為左慶祝除夕同元旦，尋晚我同朋友決定，夜媽媽響廳搬左部playstation 入房 ，好！一於打天光！我張床係有兩張床辱架，我地夾手夾腳搬左一張落地，之後軟林林坐 響上面一路打機，一路尼響被竇入面，不過無耐我就開左部電腦「話」要寫冬天的故事， 但係又邊寫到丫，ｄ打機音樂咁緊張，我齋聽都差ｄ聽到手心出汗呀，結果一事無成，打 機打到四點幾，我就投降喇，zzzZZZ...... 今日訓到成兩點鐘呀，仲好似好累咁，為左補償尋日掉底我個朋友自己去煮麵，而我就走 左去訓覺覺，所以我今日決定一盡地主之誼，整番個無敵愛心早餐俾佢喇，登登登登，貓 麵！唔係呀唔係呀，唔好見我日日整餅日日衰就咁話我喇，其實....響屋企未有工人之前 ，我成日整野食，仲幾拿手架，尤其係祕製芒果布甸，蔡瀾都話好食架(如果佢食過....) ，講番今日個麵先，其實係一大包十個果種蝦子麵，首先侵佢個頭落ｄ滾水度，侵死左佢 之後，就滴乾水，準備一個唔黐底的平底鑊(如果你用大大隻果ｄ中國鑊，你就真係大鑊喇 ，因為多多油都黐底，可能係我未睇說明書用喇。)，落油少許，再掉個麵落去ｄ滾油度， 炸呀炸呀，落少少豉油同蒜蓉，等佢"野"味ｄ，不過唔好不停炒喎，唔係ｄ麵會好濕架， 最好等佢自己煎下，咁就脆口喇，因為時間關係，我地整好一個豉油皇炒麵喇，好易整， 又好食。講左咁耐，你實以為係我整喇，其實都唔係我整....今朝係麻麻下廚，俾我整餓 死左lu。夜晚為左整個網頁，所以煮過一個俾自己咋，我都唔明，我日日整網頁整到三、 四點，但點解你日日睇到既野都係一樣，係個網主無鬼用囉。 今日係廿一世紀既第一日，新既一日我有一個希望，我希望今年可以返到學，即使係年尾 ，不過其實呢個希望都牽連好多野，因為我要無排斥喇、個病唔復發喇、扺抗力夠喇.... 先可以緊緊響年尾尾返到學，係好想囉，不過....唔可以的話，想下「如果」有呢日都已 經好開心，你呢，新的世紀，你希望你會變成點呀？食晚飯時，鏗鏘集講到(此連結已不存在)，有個細路仔 天生患有皮膚敏感，唔可以食任何人造調味料，包括糖同鹽，皮膚好差，有次仲爛到血肉 模糊，所以佢由細到大都只可以食屋企特制既野。學校搞生日會，其他同學笑佢連蛋糕都 唔食得，佢唔開心，佢問媽咪佢係咪唔應該黎到呢個世界，係咪負累左爸爸媽媽，睇到呢 度我忍唔住喊左出黎，我成日以為自己好多野都唔食得就係好慘，但原來有人有更多野唔 食得，佢仲係一個比我細的細路仔，蛋糕我都唔食得，但起碼我食過，我仲記得蛋糕的甜 味，大家都係有病，但佢比我更懂事。佢爸爸係著名的敲擊樂手，而佢都學得一手好捧的 敲擊樂，今次佢地兩父子第一次同台，響加拿大國際音樂節中表演，當佢地響台上面表演果一刻，我明白咩叫活出 彩虹，佢無因為過自己既病，而唔去做一ｄ自己想做既野，佢努力去做，仲做得比普通人 更好，佢敲出的聲樂係可以感動人心。唔得！我都要做番ｄ有功獻既野，我要響有限的空 間裡發揮得最多、最好，我唔要不停話自己有病，用呢個藉口而埋沒真正既自己，係呢， 咁你既「自己」又係點架？有無曾經為左一ｄ藉口，而唔去做一ｄ野呀，一個不到十歲的 小孩而經活出彩虹，我地仲等咩呀？即使做唔到好精彩、為人讚賞，但都要對得住自己， 無悔今生。 好驚呀，我俾人畫花面，鬚根仔入侵吉場，有人運吉呀！

一 月 二 日 星 期 二

meredith豬 丫~~~~我終於榮升大學生喇，等我今日教下小學校低學年既小魔女同豆釘「快快樂樂學整 ra」喇~~我網頁既ra係由mp3轉wav再轉ra的，wav 轉ra呢，就要用呢舊 RealProducer Basic(此連結已 不存在) 軟件，用法好簡單架咋，如果整唔到，就問下我喇。 尋日講左咁多野，其實我真係有心做好ｄ架，但「做好ｄ」呢個動詞都幾空泛，到底我可 以做到ｄ咩呢，我想個個睇完我網頁都可以開開心心走囉，或者心煩既人，睇完我發up風 會諗清楚左一ｄ野，以後都唔洗再煩。我發現原來要吸引入黎既人睇我寫既野，係絕對有 難度架，好多人都係走馬看花咁，點解我會知呢，因為有人睇完我個網頁，竟然會以為我 係男仔，其一係我整蠱做怪，專登響info寫自己係伯父喇，但正常地，睇左ｄ相都知我係 女仔喇，雖然最近幾張都係短頭髮，但有兩張都著校裙呀，仲有張我同男仔朋友的合照， 佢唔係以為我係果個男仔呀....我諗佢地入黎無睇過ｄ字架，淨係睇公仔。我icq info都 係寫male架，我唔係刻意騙人架，不過寫male的話會少ｄ男仔search到，你知有ｄ人一見 你係女仔，就會講咸濕野，一係就係ｄ講一兩句就問你受唔受溝....變態，一ｄ品都無， 所以寫male有著數，又因為咁，俾更多人以為我真係男仔，唉....好彩吉場的羊仔羊女都 好有禮貌，不過有部份icq 既女仔就熱情得可怕，又問我靚唔靚仔呀，又問我出開邊玩呀 ，又問我拿相喎，有ｄ都幾驚架，見佢發晒姣咁電我，我暈喇....仲口吐白沫果種。實在 太多人睇完我網頁都唔知我係男定女喇，所以在此澄清一下，咳咳咳，嚴正聲名，我係如 假包換，童叟無欺，印有cute o麥標誌的女仔版呀咩，雖然女扮男裝既我係風度翩翩，迷 倒不少少女，令佢地當街尖叫，但我絕對係鐘意男仔既，唔信既話，我可以講一次「唔制 呀(高十六度)~~~~人地係女仔黎架~~~~~~~~~~(有尾音，說話時有玫瑰花襯底)」，信喇。 今日penny 姐又send左好多日本素材網俾我喇，正到暈呀，一定要放上黎同大家分享下， 我地兩個偷到失晒控，三更半夜仲唔捨得訓，真係中左果句「咁夜仲唔訓，尋晚做賊呀？ 」。唔得唔得，penny 對我咁好，我地決定將吉場同天堂結拜為姊妹網頁，而我地就係傳 說中，為報三年零八個月被日本仔侵佔之仇，月黑風高就會出動，四出偷日本素材，劫富 濟貧(扣除成本開支)，愛與正義既化身，著住雞仔o麥純羊毛內衣既大賊姊妹花喇。 呀咩次次出手，想改個新留言版少少野，都搞到 erorr晒，真係一個頂級 cgi白痴呀，但適 逢今日搵到幾十個新既公仔，又好想換左舊果ｄ去，於是明知山有虎，偏向虎山行，一於 膽博膽喇，用新單撈番黎既 cute html改下個cgi留言版，嗚~~~~幾經辛苦，我終於整左四 十六個公仔上去喇，好滾動呀，原來世界上係無蠢人架，淨係有懶人。 今日響勞工署做既好朋友isiah ，無端端話有野俾我喎，我咪估係「meredith羊」囉，因 為佢之前去旅行，買左一隻個身度寫住我個名「meredith」的小小豬俾我，我鐘意到暈呀 ，中心果個小組得我有手信咋，梗係，死黨黎架嘛，今次會唔會係羊呢，佢話唔係喎，開 估，原來係sony貓呀，好開心呀，開心有個朋友咁耐無聯絡，竟然都知我鐘意sony貓，嗚 ~~~~~~咚！(幸福得含笑昏倒了。) 就係呢隻刻有我個名的小豬喇，幾cute。

一 月 三 日 星 期 三

豬你生日快樂 今日係邊個生日呢，咪就係成日響留言版「表姐、表姐~~~」咁嗌我果個kanry囉，你唔好 以為佢係讀小學，好鬼cute果ｄ細路女呀，佢....今日可以去影成人身份証喇，叻女既話 今年入大學喇，仲扮細，嗚~~~~我都係十八之嘛，成日嗌我表姐，嗌老晒人，唔怕！青春 無敵，唔怕你烏鴉口。你地得閒踩下佢個場喇，好多野睇架，一門雙傑，勁呀！ 好慘呀~~尋晚寫日記寫到半夜三更，就快寫好之際部電腦突然死亡，嗚~~我淨係響一半果 度save左一次咋，嗚~~~~呀咩好眼訓呀，唔好玩我喇，望下個鐘，如果兩點前，我會打去 關心一線，捉住個社工語無倫次，等心情好ｄ再寫，但已經成四點，我ｒ爆頭都諗唔到有 邊個朋友係做賊，咁夜都唔訓既，唯有好無奈喊住口咁，盡量背番剛剛寫過既野出黎喇。 為左唔洗搞到咁狽，今日的起心肝，要早早寫好日記，但呢個互聯網實在太多誘惑喇，睇 下小魔頭點殘忍咁塞隻老虎入scanner ，又睇下呀yuen響餐館Ｄ搞笑野，已經開心到有 虛脫，結果夜晚十一點幾，我「唔見棺財唔流眼淚」，呀咩終於要出手喇，而且聽朝要 七點起身返瑪麗覆診，開晒壇要作法既時侯，我大佬竟然扭計要玩ICQ ，唔好喇，乖喇， 係呢部先用到寬頻，可以隨時UPLOAD咋，我咪叫佢入我房玩NOTEBOOK囉，但佢又嫌無手寫 板，我部NOTEBOOK又成日中風(即係定格唔郁耍皮氣呀。)，我大佬搞佢唔掂就狂熄機，開 機、熄機....結果佢玩機不逐，無喇發爛，響我間房一野打落台面，佢呢個舉動嚇到我 呆左，即時變臉，變左青色，唔係喇卦，大佬呀，我成個台面都係我Ｄ寶貝，你咁大力打 落去....但如果我衝入房睇，我大佬實衝出黎霸番部機，咁我唯有個籮袖乖乖黐實喇，但 越諗越不安，我房台面有電腦，價值14Ｋ，眼眼一隻(CAM 呀)，價值數百元，尋日上過鏡 的MEREDITH豬，無價，好朋友送，玻璃介子，價值一個呀咩，爛一隻我桶自己一刀，死俾 你睇，嗚~~~~唔得呀，唔寫日記喇，我要保衛家園呀，好嬲呀「玩喇玩喇，你玩飽去喇， 最多今晚我唔訓囉，寫到聽朝七點去覆診囉。」然後我就嬲到喊住入番房，都唔係羊黎架 ，成日蝦呀妹，我無病之前佢仲狼呀，搵張椅黎掉我呀，有時仲癲到入廚房拿刀呀，我最 嬲佢有次鬧交，衝左入我房要丟我個CD架落街，我間房有三個CD架，每個成尺幾高架，裡 面有二十隻CD，當中唔知有幾多隻係簽左名，你癲架？好彩媽咪及時制止，結果佢都係要 亂發皮四，一拳打爛左我房的玻璃窗，下......我仲記得果晚係十號風球，響果晚，我學識左一個成語，仲親身經歷左一次，屋陋兼逢連夜雨。我最憎ｄ人平 日斯斯文文，但一發癲上黎就又斬人、又掉人落街，今日報紙先有個自閉症男人殺左自己 媽媽同契媽，我大佬三分面有少少似果個自閉仔，好驚....驚到好似淚眼小白咁響度震， 我驚我個頭會俾人斬左收埋響ｄsony貓公仔度呀。我前世真係同佢撈亂骨頭呀，唔係點會 日日新鮮鑊鑊金丫，仲有我得一個大佬，咁橋佢既骨髓就同我一樣，係佢捐俾我既，人地 幾個兄弟姐妹都未必有一個arm呀，我地兩個真係...前世囉~~ 勁嬲勁唔開心之下，喊住打左俾bee 哥哥，都唔理得佢聽日考試咁多喇，我起勢咁喊，喊 左半個鐘，喊到我大佬都有ｄ慚愧，我呀媽仲驚我自殺，好彩bee 哥哥好耐心咁聽我喊， 之後我地越講越遠，又開始討論人生的哲理，講講下都唔記得ｄ唔開心野lu。佢講俾我知 有隻新既整蠱人軟件，叫麥當勞呀，一開左你會見個好熟既ｍ字，之後好開心喇，再之後 你熄左佢如常玩你既icq ，睇網頁，過左大約十分鐘，無端端有野pop up，原來係ｄ好恐 布既鬼相呀，男人老狗都嚇到彈開呀，而且當你開左果個檔果一刻起，你唯有熄機，先可 以改變命運，朋友稱佢既驚嚇度比起之前既「比卡超」鬼樣過之而無不及，講到我同bee 哥哥毛管動，結果我地傾到兩點鐘，bee 哥哥聽朝仲要七點起身考試呀，嗚~~~~好滾動呀 ，我又忍唔住同佢講「我好鐘意你呀！」，佢臨尾都回我一句「我都好鐘意你呀！」，果 一刻好開心呀，我會好鐘意我身邊既朋友，我會鐘意一個女仔朋友鐘意到滾動落淚，但多 數都係我重視朋友多ｄｄ，就算係好friend既朋友都無咁同我講過，肉麻丫嘛，今次總算 係有番互動既感覺喇。我覺得朋友之間既關係就同情侶一樣，得閒要下對方，甜言蜜語 當然唔少得喇。唔得，我要大嗌多次，「義犬bee 狗狗！我好鐘意你呀！粉絲科呀花(註：friendship forever)！」

一 月 四 日 星 期 四

這裡有不知廉恥的人 尋晚勁發皮四，原本話唔寫日記架，但都係唔得，再唔寫唔記得左咪仲樣衰，結果兩點幾 開始寫，響無人同我icq chat之下，我三點幾就寫好喇，不過....怪事發生喇，我部電腦 又玩突然死亡呀，下？嗚~~~~我又係中段save過一次，結果好無奈咁又要將寫過既野，多 寫一次，咦？點解咁熟既，呢件事咪尋日發生過囉，唔係咁邪喇fa，忽然一陣陰風，一望 後面......點解....成四點幾五點架喇，唉....不禁搖頭歎惜，再咁落去，我想寫既冬天 的故事下集，要夏天先有得睇都似，鬼叫吉場個網主過度長氣，日日寫日記都寫晒ｄ時間 去。 我呀媽知我尋晚夜訓，所以成九點先叫我起身，今日我同我呀媽都好醒，撘的士果陣主動 扣上安全帶，罰錢罰乘客架喎，不過入隧道前，個司機發緊夢，入左個自動繳費的收費亭 ，當佢發現時即刻急急急急剎，果一刻我都係覺得勁瘀，成二百幾對眼啤住個司機點兜， 佢要退番後架車，再入番隔離線，一次過塞住兩條線十幾架車，好似封路咁。今日成十點 番到瑪麗呀，結果係排第二十五，包尾既，今日我無帶電腦返去呀，尋晚寫到五點幾，都 預左今日無精神架喇，我淨係買左本amy 慢慢睇，嘻~~~amy就係幾好睇架，無辨法喇，我 最鐘意既作者小嫻做篇輯喎。抽完血、照完肺之後咪響等睇醫生果度坐囉，呢度係骨髓科 ，個個都係無頭髮同戴口罩，今日到左而家呢刻，我先可以舒舒服服做番自己，因為呢度 先會無歧視目光。今日我又撞到我之前講過果位復發既二十一歲男仔，無意中我聽到佢同 其他病友的對話，原來佢做過兩次骨髓架喇，可惜都唔成功，佢話「打死都唔入番黎俾佢 玩第三次呀。」「咪慢慢醫囉，橫掂屋企又唔係等住我開飯既....」雖然覺得佢好串，但 我好鐘意佢第二句，我覺得佢「講」得好開，希望佢同樣睇得開喇。仲記得上個月有則新 聞係講果個廿一歲既男仔係華仔fans，所以華仔請佢睇「阿虎」首影，文中提及佢時，係 用「年輕的末期癌症病人」，果一刻，我首先擔心佢既病情，然後，我就希望我唔會有一 日，提及我時係用呢種稱號。醫生今日淨係講左三句野，問佢野佢又答得無乜所謂咁，我 響醫生房都唔夠一分鐘就俾人趕走左喇，唉....好壞你都講多兩句丫。 今日有個響遊戲雜誌做既朋友，問我有無興趣寫game評喎，哇！好開心呀，雖然佢話係義 務拍博頭性質，無錢都無所謂喇，嘻嘻嘻，不過其實仲係接洽中，無講過一定搵我寫架， 但我覺得被人賞識已經係一種榮幸喇，之後係點，之後先算喇。我成日覺得自己無用，寫 ｄ野又無無聊聊，又唔到人開心，如果我係一個魔術師就好喇，我會表演俾ｄ細路仔睇 ，因為佢地永遠都係最易開心，可以令到別人開心的話，我總算有番ｄ用丫。 晚夜，有個not in list 既人send左佢個網頁(此連結已過時)黎，我咪睇下囉，一睇....唔係喇fa....我 當場嬲到有ｄ暈(真架)，網主係一個十六歲既中國藉男子，佢竟然公然抄左我個count 既 格式，仲有抄埋penny播ram果頁，佢抄足晒penny ，連隻sony貓同個制制既顏色都無改， 有無搞錯呀，果隻所謂瘋狂豬仔，佢十六歲人，整到成個網頁，都無理由偷野，一ｄ都唔 改走去用賊贓架，我真係懷疑佢既智商呀，佢仲不知廉恥到send埋俾我睇佢網頁，good， 無得頂呀，佢明明係人身黎架，但點解豬頭既呢，唔通佢係豬八介？大家黎幫penny 評評 理喇。 好驚呀，呀媽今日整爛左廁所燈，唯有用ｄ小射燈照明喇，夜晚沖涼果陣，陰森得黎又帶 點浪漫，cool~~

一 月 五 日 星 期 五

扭彈sony貓 今朝我大佬好有興致，晨早流流整早餐喎，前日同佢仲吵大鑊，今日又如常一樣喇，梗係 喇，有得食喎，我係好無性格架喇，醫肚要緊，唔醫飽ｄ邊有力喝盡喉朧嗌交呀。佢今日 整蒜蓉包呀，用超市果隻法國長麵包整，雖然切開一片片搽ｄ蒜蓉醬，再掉入焗爐就搞掂 ，但切包都好講技巧架，我就係試過個豬仔包硬得滯，搞到塊塊都切得好厚，焗完就唔夠 脆喇，今次佢整得幾好食，不過其實都唔係好關佢事，功勞應該響樽蒜蓉醬身上。 好慘呀，換左骨髓兩個月喇，ｄ排斥開始出現，我ｄ皮膚出左好多粒粒，唉....以前塊面 好滑架，而家有ｄ好似沙咁細的粒粒，又唔敢搽double white，因為係化學野，塊面燴爛 都似，暫時最慘烈既都係腳板底，前日唔知點解腳掙起左一個大泡泡，好大個架，按落去 又軟林林，好似一隻腳多隻個波鞋ｄ air咁，見唔痛咪用較剪響中間開佢囉，但無左個 "怎"，腳掙薄左好多，尋日都仲無乜野，今日就開始痛喇....唯有成日左腳腳掙唔掂地行 囉，成隻鬼咁，飄出飄入，我諗要搵對彈公拖鞋先得，唔知nike出左未呢。 嘻嘻，呢兩日吉場又同恐龍客棧既傻尾尾，仲有 麵包屋既麵包姐義結金蘭喇，加埋penny ，現在有三個....不過仲掙一個，好緊張呀，好似向人表白咁，我怕被拒絕咋，佢係邊個 唔講得住，不過總之我地四個人網頁風格都相似喇，一樣咁卡哇伊，好緊張呀。 好開心呀，星期二isiah 話有野送俾我喎，估左三日，今日終於知係咩喇，嘻，isiah 好 鬼有心思呀，包到成粒糖咁，一打開~~~~原來係扭彈sony貓呀，前兩個星期我響便利睇到 ，覺得勁得意，我仲記得當時嗲媽咪話「哇~~sony貓貓尼響台底呀~~~」(嘻，我唔係扭佢 買，我係迫佢扮sony貓同我玩。)，嗚~~~好滾動呀，isiah 竟然同我心有靈犀，送左俾我 ，嗚~~~~我成日都話架，isiah 係我識最靚女既好朋友(擦下鞋先，呵~~)，不過真係好開 心呀~~~~咚(偷笑住幸福得昏倒了。)！我好鬼開心咁拎晒五隻扭彈入房，諗住遂隻同佢影 相，影好晒喇，但房部電腦發皮氣，跟住仲中埋風，好難好難咁我先迫佢嘔番兩張相我放 上黎，嘔完俾我之後，佢....佢....就變左「植物電腦」喇，嗚~~~~唯有聽日叫個朋友上 黎醫下佢喇，唉.... 今日小小幼稚園既校長 add 左我呀，成日都覺得佢個網頁好靚架，佢話俾我知剛剛睇左我 個網頁兩個鐘呀，哇~~~~果一刻真係有少少老懷安慰呀，嗚~~~~我偶像睇我ｄ野喎，即時 覺得自己升左level，嘻~~~~小魔頭果招「塞公仔入scanner影相法」，都係響校長度學番 黎架，唔得，佢地兩個都係scan跳跳虎，等我又scan瘦豬先。好慘呀瘦豬，俾我塞到個鼻 都扁左(註：圖三)。 尋日話介紹我寫game評果個朋友，今日問左我個好怪的問題。 「你爸爸係咪響深水步做野架。」佢問。 「點解咁問呀？」我心諗，唔係咁邪呀。 「我響西九龍識有間舖頭個叔叔，佢俾過卡片我，佢同你都係姓吳架。」佢話。 「哇，咁你咪有我屋企電話....」真係好邪呀。 個世界真係好細呀，我問爸爸，爸爸都記得佢，原來佢地兩個人一齊研究魔術，佢話我爸 爸玩繩同環好叻，我爸爸就話佢玩銀仔好好睇，嘻嘻，可惜兩個既表演我都未睇過。 扭彈sony貓 瘦豬話今個冬天唔怕凍喇，因為我左跳跳虎層皮黎做頸巾呀，呵呵~~~

一 月 六 日 星 期 六

歡迎~~歡迎~~ 今朝起身，牙都未擦就上下網先，睇下個網頁有無人留言嘛，一睇之下，見到呀德同我表 妹留左好多口水響個板板度，究竟咩事呢，原來佢地鬥升班升得快呀，真係頂佢地唔順， 拿拿拿，你地唔好響我度展開撕殺呀，什麼「吉場勁爆鬥快打字比賽」呀，「o匕o宅留言鬥升級 比賽」呀，唔係我呀咩搞架，打字打到你地崩左指甲，吉場唔負責任架。 好勁呀，我一起身(即係十二點幾)就有一百一十人喇，今日成日都成日有十幾隻狼響吉場 坐，我淨係響門口用純正國語講「歡迎~~歡迎~~」，都講到甩甩地較，係呢，點解咁多人 架今日，係因為小小幼稚園的校長，幫我響佢既網頁頭頭頭板，落左件廣告呀，仲讚到呀 咩飄飄然，呵呵~~唔得，偷左POST上黎先，以下係校長既一番訓話： 有日校長去踩場，竟然亂打亂撞走入一個吉場，最後被俘虜了。都怪自己太天真。:) 可能，很多人認識這個網頁，是因為網主的病。 但是，當你真的用心去了解她時，你會明白， 她吸引人的地方是她對快樂的態度、對生命的堅持、熱愛和尊重！ 有點覺得，她像一個快樂的太陽，照亮別人也帶給別人快樂和力量。 哇，第一次俾人咁讚咋，不過又好似有少少受之有慚，我都好想做一個快樂既太陽呀，不 過好似力不從心咁，點努力都帶唔到快樂俾人，結果自己首先就獨自煩腦起來，咁樣計一 計，響帶俾人開心之前，我已經帶俾一個人唔開心喇，果個就係自己，咦？咁咪好唔扺， 嘻，算喇算喇，初初整呢個網頁都係娛己，可以娛人已經係一種榮幸，唔好咁貪心喇。 尋日我講起既一頭「親事」，女家已經有答覆喇，嘻嘻，佢就係小魔女魔法陣既小魔女， 為隆重其事，所以我今次係特登讀錯佢個名既，好開心呀，吉場咁就多左四個姐妹喇，你 地要錫住呀咩呀，多Ｄ黎踩場呀。 唉....尋日我部NOTEBOOK突然響房不支暈倒，同佢做左好多次心外壓都無反應，淨係塊面 黑晒咁，本來我都唔係咁著急，諗住今日有個fd黎睇下佢點，但佢黎到之後，notebook都 係無乜反應，開始奄奄一息，最後我可以做既野，就係問佢拿番尋日果幾張sony貓既相， 拿完之後....佢....佢就好安詳咁去左喇，嗚~~~~夜晚，我望住摺埋左既佢，有少少沾仰 遺容既感覺，我仲記得佢係十一月頭出世，響醫院果個幾月，佢一直不離不棄咁陪住我， 今日佢帶病咁走，可能係幫我擋劫呀，講到自己成個神婆咁，唉....你去得安息喇，我搵 人幫你借屍還魂。 我果個響遊戲雜誌做既朋友話我知，原來如果傾成左俾我寫game評，會有稿酬架，聽到又 開心左，有薪金，咁咪即係「職業」囉，好野，唔洗再俾人話我做地質測量喇，仲有呀， 靠寫野維生，咁咪即係「作者」囉，哇哇，咁我咪同小嫻、望峰同level~~~哈哈哈，仲有 呀，原來佢係介紹我俾 pc home呀，哇，好出名架喎，雖然我好少睇，哇哇哇，我暈喇， 如果睇中我就好喇。其實我有信心架，如果佢俾我試寫一篇的話，我平日係講野唔係好用 腦，成日淨係嘻嘻哈哈咁，但十八歲人，輕重我都仲識既，如果俾我做，我會努力咁去做，盡力做到最好， ，不過唔請我都唔緊要喇，只少我都開心左好多日，賺左喇。不過一諗到下次icq ｄ人一 問我有無做野返學，我就可以抬起頭大大聲講「有，我係一個作者！」，咁就好喇，我唔 會再俾人睇唔起。學呀羊千fa講「我無乜野叻，淨係心口有個勇字，thank you！」 我見果套sony貓扭彈咁靚，放晒響電腦頂，今日裝番隻眼眼果陣，唔小心整跌左其中一隻 落地下，我好驚整花呀，嚇到暈一暈，然後跌坐地上，哇，乜我ｄ反應咁堅既？我都覺得 我有少少似做戲扮暈呀，但其實係我血色素低，所以真係嚇到手震震，結果之後我隻手太 過震，所以申手響電腦後面插制時，插左好耐先插到，哎呀，我又暈喇。 今日有朋友send左果個「麥當勞」俾我呀，夜麻麻梗係唔開喇，點知佢會唔會好似貞子咁 爬出黎架，但我又八喎，好想知係點，最後我都係唔敢開，我血低呀，又暈過都似。本來 想放上黎俾大膽人士單撈，但我scan過，佢話有不知名病毒喎，所以都係唔放喇，有興趣 者可以跟我接洽，我send俾佢睇下。 呢幾張就係notebook臨走前，留低俾我既....遺物，嗚~~~~我影呢輯沙龍係咪正呢。 好潚既機械人先生，今日就係佢玩跳樓。 sony兔呀，好cute既表情。 sony狗一隻，呆呆滯滯，好似 [醫跌神] 呀。 sony青蛙仔，響度品緊神咁。 主角！sony貓貓！反晒台尼響台底做乜鬼呢？

一 月 七 日 星 期 日

熊貓吉場 尋晚同四點幾，一寫完日記就打俾BEE 狗狗同佢傾電話，佢真係唔話得呀，為左要教我倉 頡，所以特登走去學左快碼先，話第時教我易溝通喎，可以同我講「呢~~倉頡呢度又同快 碼差唔多。」，哈哈，佢真係有心思呀，令我諗起Ｄ外展社工，同Ｄ金毛、藍毛一齊去 WET，為求大家CHANNEL。其實我同BEE哥哥個CHANNEL都幾架，一樣都係樂觀既人，一 傾電話就可以傾到眉飛色舞，因為我地兩個對「快樂」都有同一睇法，我地又會一樣好怕 同Ｄ太悲觀既人傾計。我都試過好多次呀，有朋友要我開解，但佢又偏偏執意著「自己係 世界上最慘既人」，自怨自艾，我響身邊睇住佢，都覺得唔夠佢講，無奈地睇住自己朋友 繼續唔開心，我都好似幫唔到Ｄ咩，我哭著怪自己無用，但響客觀睇，唔開心既人既然執 意著「自己係世界上最慘」，咁就由佢喇，唔通佢要死唔俾佢死咩，俾佢自己冷靜下，當 無人再安慰佢既時侯，佢就會學懂安慰自己，千萬不要太寵朋友。我成日都怪自己唔記得 BEE 哥哥個樣，但尋晚講番起，原來我地見過三次咋，咁唔怪得我唔記得喇。結果我地傾 到七點幾，哇，天光喇，我走出房去廁所，見到呀麻起左身，本來想扮剛剛起身，但又心 虛，忍唔住笑左出黎，好彩無人睇到咋，噓~~~~ 點幾鐘我就醒左喇，呵欠~~好想繼續訓呀，但又訓唔到，隻眼又淚水長流，真係好累呀， 我諗要改番早Ｄ寫日記先得喇，唔係遲Ｄ變「熊貓吉場」呀。一起身手痕呀，想畫畫畫畫 喎，於是拿左幾支鉛筆同MARKER，響電腦台前面畫左成兩個鐘，本來都好似幾好架，但唔 知點解手風唔係好順，「屎驚」左入腦之後，開始上色，哇，唔上由自可，一上簡直係.. ..核突到非筆墨可以形容，唉....都無晒心機喇。平日多數早上同夜晚回留言板ｄ留言， 因為早上無乜野做嘛，同埋夜晚「磨爛席」唔願寫日記時就會喇，但今朝一早起身，真係 嚇一嚇我，呀德同表妹又響度大鬥法，又玩鬥升班比賽，俾佢地兩個激死，真係唔知好嬲 定好笑呀，不過係良性競爭的話，呀咩都無乜所謂喇，又多ｄ野笑下囉，佢地兩個都幾君 子架，雖然一直都叮噹碼頭，但重來唔打爛仔交，有時呀德會多表妹一篇，表妹又會多番 呀德一篇，見佢地兩個成日你一句我一句，但暗地裡又禮讓對方，果種感覺真係幾溫馨， 不過細細聲講，其實佢地兩個入黎，都無睇呀咩既日記架，因為呀德唔識睇廣東話，表妹 由細玩到大，見面傾都得喇，所以佢地兩個都當呢度係chat room 多，激死。結果我要番 返四頁前，先搵到最舊果個留言，再一個一個回，回左兩、三個鐘，忽然好崇拜自己呀。 媽咪今日響工展會打俾我，話俾我知有我既朋友去探佢喎，初初以為係bee 哥哥喇，因為 尋晚佢應承我去工展會影sony貓俾我睇，但媽咪又話係個女仔黎架喎，死喇，係邊個呢， 佢話當時情形係咁。 「你係咪呀咩媽咪呀？」女仔走過黎問我媽咪，但點解佢又知果個係我媽咪呢。 「係呀，你係呀咩ｄ朋友呀？」媽咪問。 「係呀，我拎左ｄ野黎俾佢呀。」女仔俾左袋野媽咪。 「不如我俾張紙你寫低你係邊個喇。」女仔寫完俾番張紙媽咪。 究竟係邊個呢，諗黎諗去，諗到媽咪番黎，俾張紙我睇，哦~~~~原來係一個成日睇我網頁 既女仔呀，嘻，佢話唔准我講佢個名喎，怕面紅，總之就多謝晒喇，好開心呀，有人咁又 我心，我一睇到個膠袋，就估到一半喇，你估係咩，唔係sony貓呀，個袋係九巴地圖，一 開~~原來係九巴仔呀，嗚~~~~想當年我都想買架，但嫌貴所以無買到，幾年黎飽受相思之 苦，今日終於可以重逢喇，多謝你呀zo..... 今日哥哥拎左隻龍蝦仔番黎呀，發達喇，媽咪問我點整好喎，梗係芝士焗喇，但我同媽咪 都唔識整，哥哥又出左街，但又恨食喎，唯有由廚技同我同分既媽咪出手喇，佢用牛油煎 下隻龍蝦，再整兩片芝士落去，炒下炒下，有得食喇，咦？比想像中好食喎，味道仲好似 響酒樓食果ｄ，好正呀，下次一定要整番個芝士龍蝦伊麵底，個重點響個伊麵度，i like it！ 尋日我話同bee 狗狗整logo，其實係想搵佢小試牛刀，點知今日尾尾又叫我整喎，咁咪即 管試下喇，可惜我笨笨的，一直都唔係咁滿意呀，唔得，聽日要整個靚既，尾尾，你等我 呀，遲ｄ可以既話，我都想響度開個小販檔整「流狗」呀。 成點喇，我呀哥一番到黎又話要玩ic蕉喎，一陣好喇，但未寫日記既我，兩手空空，我一 不知所措就會玩手指，於是拿左個指甲鉗，對住我呀哥剪指甲、腳甲，為求有一兩把「圓 月彎刀」車中佢個頭，或者飛入佢隻眼，等我可以寫日記，但計劃失敗，下次要諗新招。 失敗作品呀。 九巴仔同瘦豬夜麻麻都陪我打日記呀。 上左色勁唔知點，可能個公仔著得太IN，有d嚇人。 未上色靚d，都係我上得樣衰。

上個星期<-----呀 咩 昔 日 發 傻----->繼續嚕

© 呀咩吉場 http://meredith.com.hk