今晚有月蝕，好味呀。
呢幾日都有人黎吉場運吉呀，邊個咁夠膽響老虎頭上叮蚤？竟然係大雄個老友，佢不停 咁響留言板留左好多無意思既留言，害我刪留言刪到傻，不過是但喇，呀德叫我唔好理佢 ，ｄ無聊人見無人理佢，佢就會自動收皮架喇，但個傻仔都可以自己同自己玩左三日，佢 可能真係有ｄ自閉症，見佢玩得咁開心，是但喇，我呢度都係想俾到開心人之嘛，你又唔 洗我招呼，慢慢玩喇你。我個留言板多數都係熟人，好少其他人，尋晚無端端多左個"多事 人"喎，八掛睇佢email喇，原來又係大雄個老友，不過今次佢轉左名又幾有禮貌喎，仲同 我朋友搵mp3 ，見佢都唔似傻丫，咪同佢講。
「其實你唔玩人果陣都幾得人鐘意丫，不如做個朋友喇。」
「好呀~~~~~~~~~~哈哈~~~~~~好開心呀。」
之後我同佢同豆釘三個就化敵為友，成晚響個留言版度，當果度係chat room 咁傾計，好 搞笑呀。不過響零晨三點，奇怪既事發生喇，icq有人"哦噢~"我喎，果個icq fd send 左 massage 黎，講左句令人震驚既說話。
「我係多事人呀。」
多事人add 我唔奇，但果個人竟然係我識既，實在太太太過份喇，玩左我三日，嗚~~~~我 俾人出賣呀，不過知係 fd都好ｄ，俾人整蠱總好過同人結怨，我之前仲以為唔知得罪ｄ咩 三山五嶽咋，好彩，我都唔係咁乞人憎。我問佢點解要咁做，佢話「想升班囉。」，真係 唔知好嬲定好笑呀，不過唔好再搗亂喇問天先生，你想升班的話呢，就留ｄ有人睇得明既 留言，你成日留外星話，咁我好難做架嘛，我個網頁又唔係做俾外星人睇，再嘈call太空 總署ｄ人黎開你個肚架。
今日整左成個下午，終於整起傻尾尾個logo喇，不過好似都唔係好靚，唉....其實上次唔 幫penny 整banner都係呢個原因，呀咩一向品味怪怪，我鐘意的別人又未必鐘意，不過好 彩尾尾話整得靚唔靚都會多謝我咋，呼~~咁都無咁驚，等我學有所成，第時一定整個再靚 ｄ既俾尾尾。
尾尾請笑納。
好開心呀，雪糕蛋糕同豆釘響剪貼薄度，留左兩張可愛的圖圖俾我呀，一個係淚眼小白， 佢仲震震震震咁講「give me a meredith」呀，豆釘就畫左張扮羊咩咩的麥o麥 ，哈哈， 兩張都好鐘意呀，正到暈。
頭先無喇喇手痕，去抄櫃桶，我想抄番ｎ年前同楊千嬅張合照出黎威喇，因為影到我勁樣衰 ，而又影到佢超靚喎，所以我都唔知塞左去邊喇，反轉個櫃終於搵到喇，不過....鑑於影 得我真係太樣衰，所以好耐之前，我將張貼紙黐住自己個樣，唉....你話死唔死丫，我仲 謊死人地會"meet"我張貼紙咁喎，黐到鬼咁實，結果我都係放棄，轉移目標，搵相底！皇 天不負有心人，終於俾我搵到喇，嗚~~~~叫呀媽拎去晒先。點解會無喇喇同到佢合照呢， 話說，我果年仲係十五、六歲，同ｄfd去行HMV 喎，行到英文碟部，見到「咦？果個咪好 似係楊千嬅。」，哈哈，都幾難得呀，佢果時都未紅，我地都認得佢，佢一個人響度睇碟 喎，於是我地就好唔識趣咁走過去打擾佢，佢好nice呀，又幫我地簽名，咁橋我果時有相 機，於是我地就走左落樓下影相，事關HMV 唔俾人影相架嘛。我地一邊行邊傾計， 之後佢同我地遂個影晒相先走呀，我仲記得佢臨走前拎轉頭同我地講「遲兩日記得買我隻 新碟呀。」。遲兩日佢就出左第二張大碟「直覺」喇，千嬅隻隻cd我都有買架，佢唱歌真 係好好聽嘛，又可愛喎。
我個朋友仔send左首「我這樣愛你」俾我，起初無乜特別丫，咪苦榮唱囉，之後第二段， 點解變左leon架？哈哈，笑左陣之後，都無乜野喇，點知副歌果段....竟然係 苦榮同leon 一齊唱，哈哈哈，好搞笑呀，笑到我氣咳呀，朋友仔話係「苦榮響kellyly 樓下跑圈果陣 ，撞到呀leon搵緊lee ann 版。」喎，俾佢笑死，我問佢借左個版權，整左做rm，放響下 面播呀，你聽唔聽到呀。
今晚無端端拿番張圖畫出黎，呢張係之前幫中心做壁佈時畫架，無無聊聊拎左去上色，越 上越開心呀，因為我第一次響電腦幫圖畫加陰影咋，個效果又係好喎。油左兩個鐘，終於 油好喇，見佢隻色咁sharp ，一於順便整埋做banner喇。好搞笑呀，banner版本係公仔對 眼有個「咩」字，cool到暈呀。

呀咩扮泡泡龍呀。

今朝成兩點鐘我先起身，我真係好耐無試過咁威喇，記得以前響醫院，朝朝七點鐘都會俾 ｄ呀姐嗌醒食早餐架，不過耐左知道朝早少電視睇，夜晚多ｄ，我就開始改變我響醫院既 生活習慣，就係晚晚睇電視睇到十一點幾，再開始煲電話粥，點幾兩點先訓囉，朝頭早再 無呀姐嗌我喇，因為佢地都知我唔食早餐，要訓覺，可能又驚我變臉呢，咪俾我訓囉，醫 生巡房無乜事都唔會叫醒我，於是我就可以訓到十二點幾午飯時間喇，有時我仲會傻更更 到問姑娘，醫生做乜唔黎架？醫生就會答「我嗌左你好多次喇，你都可以完全唔應我。」 ，哈哈，瘀皮。朝朝成十二點幾先拎住牙刷走出房去刷牙，果下真係幾威架，個個病人都 問我有咩心得，可以響醫院都訓得咁好呀。

一朝早都無乜可以做，咪寫番尋日欠落果個日記囉，煮左個米粉，食得果一半，聽下電話 之嘛，轉頭又無胃口喇，我真係懷疑個肚生蟲呀，邊個住九龍成果頭呀，幫我去啟德同呀 陳伯買包「金織散」丫，唔該。好喇，寫完日記就走去同bee 狗狗傾左陣電話，我又一次 爭住認叻話要同佢整logo，其實我唔係覺得自己整得靚，我就係覺得整得唔靚，所以搵多 ｄ人俾我做實驗，哈哈哈(奸笑)，而且bee 狗狗之前無logo架嘛，無得比，咁我整果個咪 最靚囉，yeah。但傾左好耐，都未講到個design。
「不如叫"咩咩bee bee車"喇。」天真的bee狗狗說。
「唔好！人地以為我地兩個有咩關係呀。」
「咁"bee bee 床"喇。」
「唔得~~好似咸濕網頁咁。」
結果我地用左成粒鐘都係響「不如....」同「唔好....」之間徘徊，到左五點，bee 狗狗 要落去買送，我咪叫佢諗到再打俾我囉。一收線我就撻左落媽咪張床度，呼~~~~好眼訓呀 ，不如訓陣先整喇....今日對我黎講，天光既時間得三個鐘，因為我兩點先起身，五點又 訓過，之後我矇矓間聽到好多次電話響，我心諗「工人你快ｄ聽電話喇，仲有唔好嗌醒我 呀，變臉俾你睇架。」

夜晚，「呀芝，你起身食飯喇，今晚有銀雪魚呀。」唯獨是對住呀麻，我唔敢成日變臉， 唉....食飯對我黎講再唔係樂趣喇，因為近呢個星期個胃都飽飽滯滯，成日有胃氣，又成 日作嘔喎，媽咪嚇我話可能係個胃排斥呀，死喇，姑娘話ｄ大腸、小腸、十二指腸、胃等 等等等排斥得厲害既話....要照腸鏡、胃鏡架，聽到我都毛管動呀。
幫呀包同尾尾整左個同盟banner之後，又學多左野喇，死喇，即時覺得自己果個好唔掂， 唔得，整番靚ｄ先，整左成晚終於整好喇，呼~~~~總算係咁喇。

今日penny 話買左本書俾我呀，嘻，好開心呀，唔講唔知呢，我係愛書之人黎架，我記得 之前買左本書叫「交換日記二」，今日penny 睇番我ｄ舊日記，知我話呢本書正，就走去 買左本「交換日記四」，咦？唔知佢果本好唔好睇呢。我記得之前入醫院，好期精神好一 點時，我每朝都會拎果本交換日記出黎睇，睇完心情當堂好左，因為書中兩個作者既遭遇 實在太搞笑喇，就算唔搞笑既，經佢地寫出黎，都會變左係一件有趣既事情。如果話我鐘 意佢既故事，倒不如話其實係我欣賞佢地既樂觀既性格，我欣賞從佢地眼中看出來的世界 。我都希望我可以有令人快樂既力量。我同penny 每日寫日記，嘻，其實我地都可以出本 交換日記(hong kong version) 喎，唔知有無出版商向我地招手呢。

ps：話說今早起身，隻眼仲係一條線既時侯，撞到小小幼稚園既校長咪咪，佢即時指出呀 咩寫錯字！死火喇，寫錯字係常有既，點解咪咪會咁緊張呢，原來....我竟然將右下角的 「熊貓」，寫錯左做「態貓」，嗚~~~~好狽呀，無計喇(又開始賴喇)，我個係1024x768嘛 ，我隻眼又因為唔夠訓，經常一條線喎，校長，唔好罰我得唔得呀。

一起身，小小幼稚園既校長又有訓示喇，佢話一向唔參加webring 呀，但竟然加入了「彩 虹泡泡糖同盟」，哇，好開心呀，真係有少少受寵若驚既感覺，原來佢係俾呀咩作既一段 介紹吸引到：
你有聽過彩虹泡泡糖嗎？那是一種傳說中的糖，
吃了會令人快樂，是一種長久心靈上的幸福感覺，
你有吃過嗎？我可以給你一粒，
但你必須用一種不幸去跟我換。
怎麼說呢，究竟係我表達能力差既問題，定係睇既人領悟錯呢，「但你必須用一種不幸去 跟我換。」你會覺得係咩呢，好多人一睇就覺得係用自己既唔開心去換開心，哇，你都傻 架，香港地邊有咁著數既野架，如果你係女仔又信既話，就要小心俾人扼喇，其實原作者 既意思係，你要選擇一種不幸的事去承受，我就會俾一粒泡泡糖你。聽左個真相又覺得好 唔扺？其實當你遇到不幸，你先會知道幸福的感覺；有天黑的寒冷，你先會明白天亮的溫 暖，如果你從來都係幸福下生存，你根本唔知咩係幸福，你淨係會身在福中不知福。我想 唔同既人對呢句說話都有唔同感覺，從人唔同既睇法，就可以知道其實佢幸福與否。你既 想法唔同我一樣都唔代表係錯呀，可能錯既係我，你有權去編輯你既想法。你呢，你睇到 既又係一個點樣既版本？
無止境的追求，其實一早已經擁有。

penny 今日寄左本書俾我呀，佢話個郵差抄我個名果陣呆左，問penny ：「下？叫呀咩呀 ？」，哈哈....真搞笑，有時call朋友都幾驚....一時之間唔知留咩名好。
「呀咩丫唔該。」我怕佢以為我玩佢咋。
「呀may call機主....」佢好自然咁講。
「唔係呀may ，係呀咩，口羊，咩。」我尷尬咁講。
「呀咩call機主....」佢一定係以為我整鬼佢喇。

今日我成五點先食早餐呀，幾威呀，我仲要係食炸薯條，真係無得頂呀。一路食一路幫bee 哥哥整logo，本來話今朝俾佢架嘛，bee 哥哥話要粉藍同粉紅喎，風騷得佢丫，終於整好 喇，係「bee bee房」，「bee bee」兩個字搖得好似bb床架，嘻，希望bee 狗狗會鐘意喇 。

之前有朋友話好想要「苦榮響kellyly 樓下跑圈果陣，撞到呀leon搵緊lee ann 版」既我 這樣愛你喎，但因為個版權係我朋友既，所以我唔敢亂借呀，我地呢ｄ出黎行既，講口齒架嘛，但我問過之後 佢又俾喎，好喇，如果有人想拿番屋企聽既話就拿喇。
作曲：Choi Sun Wo
作詞：林夕
編曲：何志偉/ Chatham
主唱：黎明/苦榮
 黎明版<------------->苦榮版   (羊媽媽只搵到這兩個獨唱版，你地只好分開聽喇。)

今朝起身，隻眼一條線咁飄出廳，咦？有個文件袋喎，唔通係....個公文袋係penny 做野 間公司黎架，哇，一打開，嘻，係penny 送俾我果本書呀，叫做「跟快樂來一個擁抱」， 嘻，好野，無得行書局，但有新書睇，多謝penny ，啜~~

「世上只有一個人可以決定你是否快樂--那就是你自己。」

兩點幾食完早餐，呵欠~~好眼訓呀，又去左訓覺覺，醒番既時侯已經係七點喇，其實唔係 我想醒。
「呀gi，食飯(注意，佢係講到鬼鬼地咁講既)。」工人走入房嗌我。
「唔食喇~~~~~~(有尾音)」差ｄ要變臉。
過左幾分鐘，佢又走入黎。
「呀gi，食飯(注意，佢係講到鬼鬼地咁講既)。」同一句，響上面copy落黎。

「得喇....(有尾音)」唉....激死，無氣變臉喇，唯有死死地氣起身食飯，望晒成個廳都 唔見麻麻，咪問工人麻麻去左邊囉，佢指出窗口，向住秀茂坪果個方向，無理由上左去打 麻雀架，都咁夜囉，問多次佢都係指向果度，是但喇，可能去左姑媽屋企食飯喇，於是我 一個人好lonely咁用筷子篤住果碟魚，唉....都唔想食，又嗌人起身，我食晒一邊既魚肉 就收皮喇，食淨好多飯呀。唉....無心機呀，夜訓又無精神，日日響度放蚊(即打呵欠)， 日記？唔寫喇....人地累丫嘛....咁我病，病就梗係要休息架喇(其實係懶)，明明想寫架 喇，但我一起身行開下，我呀哥就「片」埋黎，坐左我個位，唉....果個我風水位黎架， 真係唔係我唔想寫囉，係我呀哥坐左，咁我「唯有」閃入房打機喇，有機玩，即時由喪屍 變超級剎亞人喇。嘻，我最近煲緊「虛擬人生２」呀，真係好玩架，玩玩玩玩玩到成十二 點，咦？點解麻麻仲未返既？媽咪就開始著急喇，死喇，你問我我都唔知架喎，原來麻麻 今日參加左老人中心ｄ活動呀，有得去食自助餐，哇....正喎，但點解咁夜呢，老人中心 應該好早放人先係架，死喇....樓下好鬼靜架，嗚~~我好鐘意我呀麻架，但我又無幾千萬 贖金，點算呀，十二點幾，媽咪週圍打電話，問麻麻ｄ床雀腳，麻麻去左邊，忽然有人打 開門，呀~~~~麻麻返黎喇，好野！麻麻邊會食得咁夜喎，一定係去左wet ！唔預我。老人 中心ｄ活動唔好搞咁夜喇，真係嚇親我地ｄ後生架。

我諗ｄ血色素真係幾低呀，個人成日都好累，訓左十幾個鐘都無精神，好難集中到，坐低 起身又見暈喇，好辛苦呀....唔得，咁樣唔化算喎，一日訓左成十三個鐘都唔夠訓，終日 放蚊，我呢期日日都係白粉婆look呀，慘，唔得，聽日覆診一定要叫醫生放兩包血俾我， 我地呢ｄ出黎行既，講兩句野又放蚊，又「私私縮縮」，好似好寒酸咁，唔得咁架嘛，新 年緊係要龍馬精神先update，吉場要大吉大利....(開始精神錯亂，下刪二百字。)

上年十一月，入醫院換骨髓，剛剛入院就梗係要威ｄ，個朵響ｄ先有勢力架嘛，哈，我都 算威喇，第一日抽脊髓，我就放盡黎嗌，放盡黎喊，free到震呀，不過真係痛架嘛。要令 ｄ住緊響度既人知道有我呢朵小花入黎住，有咩方法呢，哈哈，我就叫姑娘將我email 俾 有響病房上網既病友囉，結果同一個二十歲既男仔做左朋友。我同佢都係見過大家一眼咁 多，因為住院成個月都唔俾出房架，而我地既溝通方法就係icq 。當時佢係住三號房，我 係住二號房，所以順理成章地，我叫「二號仔」或者「喂」，佢就係叫「三號仔」喇。我 同佢都覺最得意既地方係，相隔沒有一米的距離、背對背的坐著，好近好近，但 卻在廣闊的互網上傾計。不過自從我食左四日化康藥之後，個人就開始無精神，行步路都 覺辛苦，就再好少上網lu。果種化療藥值得一提，佢係細細粒，但好咸，一次食二十七粒 ，一日食四次，即係一日食一百零八粒，加埋其他藥丸，果四日每日食大約一百二十粒， 哈哈，係呀係呀，成日流流長，百幾粒係碎料，食之前我都係咁諗，但一次幾粒，飲水都 飲飽喇，最終我既下場係食到嘔，真係好辛苦。三號仔已經唔係第一次換脊髓，所以比我 堅強，好多野都一早料到，仲常常安慰我，到後期我有精神時，就到我安慰佢。因為房間 有個高高的大窗可以透過隔離房，有時望到佢房的燈好夜都仲未熄，我又會暗暗想「唔知 佢係咪好辛苦呢？」。十二月中，我出院喇，我無同佢講再見呀，唔知點解覺得佢係我icq fd，都係保持神秘好。我地約定，出院後九個月，一齊去樂華村食宵夜，嘻，雖然係好耐 之後既事，但我地都有同一個希望，係可以做返一個正常人。

聽日番醫院，咪問下佢想食乜喇，佢話魚蛋喎，哈哈，即係為難我喇，最後佢話想食魚肉 腸，嘻，咁就易喇。希望佢快ｄ可以出院喇，三號仔，等緊你去食宵夜架，出黎行既，講 口齒架，你唔准遲到呀。

我以前好鐘意食格仔餅架，最好介紹就係廟街近油麻地街頭果檔喇，話得佢好食，就梗係 大牌ｄ，夜晚八點幾九點先開檔，有時心情唔好仲唔開架。夜晚見到爸爸拎左好多花生醬 同鍊奶番黎喎，第一時間諗起，唔通爸爸今日做show整格仔餅？哇喇哇喇，唔得，死嫘要 食，哈哈，爸爸都無我辨法，唯有開左八底既份量，夜麻麻整俾我食囉，好彩麻麻明明訓 左都起番身等食，媽咪、哥哥又食，唔係我今次就慘喇，食到變左格仔都似。剛剛焗起好 香呀，唔似街邊賣的軟淋淋，不過都好呀，香口香口，嘻，媽咪幫我搽花生醬同好多鍊奶 ，好食呀好食呀，雖然味道同街邊既唔似，但都可以過下口癮嘛，好開心呀，唔洗等成年 之後先有得食。哥哥又溝左ｄ朱古力醬落ｄ餅醬度，整左一底朱古力格仔餅，佢又搽左好 多鍊奶，食果陣流到成隻碟都係鍊奶，爸爸都忍唔住笑罵佢樣衰。其實呀哥邊似「至激殺 人犯」王喜喎，今日睇獎門人王喜咁有型。