一 月 十 五 日 星 期 一
覆診日
因為今日要早早起身返醫院覆診,所以尋晚就要早d收皮喇,點幾鐘我已經好乖咁返左入 房....打左一陣大富翁,但唔知點解會hang機,唉....無癮,而且又咁鬼凍,是但喇,都 係被竇最溫暖。但成晚典黎典去都訓唔到,無計,平日慣左四、五點先訓嘛,最終捔力至 三點,先訓得著。

今朝我七點九就自動起左身喇,不過真係好凍呀,天文台果然無放錯料呀,咁橋又會最凍 果日覆診都有既,真濕滯。仲有三個字,媽咪又未催我,幾大都嫘住張床先喇,到左八點 媽咪就入黎鏟醒我,唉....個地下又凍,我閂實d窗先敢換衫,顛架,d衫著落個身度凍 冰冰,仲凍過未著,真係想攬住張綿胎刷牙呀。八點幾出門口,等左成三個字先有的士, 我真係好怕等的士,因為我地企響紅綠燈附近,再加上番學番工時間,成日有車停響度, d人撘車無野做就梗係兩頭望,於是就會用成分鐘望住我,睇下我係咪外星人,再唔係呢 ,就係d師奶呀伯行過,行到過晒都仲要擰轉頭望,好辛苦呀,對我黎講三個字就好似三 年咁長,平日響屋企、響醫院,先可以抬高頭做人,我又唔係做錯,點解要咁望我喎。

番到醫院,又係好似平時覆診咁,抽血、照肺,就係知要照肺,所以唔著得咁多件衫,唔 係除衫都除到傻呀。之後去七仔買早餐,所謂既早餐其實係咖啡一鑵,其一七仔d野我有 好多都唔食得,其二係我無胃口嘛,一陣記得同醫生講。響個暖櫃度,雀巢d咖啡鑵鑵都 凍冰冰,得伯朗(好似係咁叫),係鑵鑵暖笠笠,好喇,就試下佢隻意大利咖啡喇。雖然今 日都幾遲黎,但人少少,好快就到我喇,原本上兩次我都係星期四覆診架,但果個乜鬼教 授都無野同我講既,問佢野佢又答得含蓄,喂,等左你幾粒鐘,山長水遠幾舊水的士,我 又唔係要你玩雜技我睇,我淨係想你講下我個報告點呀,你又聽下我講我有乜唔舒服先得 互動架嘛,唉....唯有轉番星期一,嘻,都係靚仔李教授多野講。不過佢今日趕住一點鐘 開會,所以都講到好似急口令咁,佢見我成個幾月都係血低又唔肯輸血,所以都無叫我輸 ,不過我真係覺得唔掂,所以無端端撻句野出黎「我想輸血呀。」,間房咁靜,好彩無走 音,佢問我係咪想新年去wet 喎,哈,唔係喇 fa,我唔洗食fing頭,個人唔夠血都wing wing地架喇,而且響屋企有乜好fing喎,撞到野就唔好喇,唔通跟麻麻去老人中心wet 咩 。好野,有得輸血,計過度過,輸完血就唔洗日訓夜訓,可以寫下日記,又可以寫埋個故 仔,有時間仲可以去打機,正,輸血好輸血好,但要配血既關係,要等到聽日先有得輸, 又幾百蚊的士,又成日時間....不過唔緊要喇,輸左血,精神好就有大把時間喇。

今日我好乖女呀,我決定上勞工署既網頁搵工,哈哈,係咪覺得我好老土呢,咁又真係無 乜後生女去勞工署搵工既,不過無計喇,我又想搵d可以響屋企打字既工,咁特殊,原來 我既分類係「傷殘人士」喎,哈哈,我都唔知自己係傷殘人士tim 。唉....登記左自己既 資料喇,話時話,如果俾勞工署做既朋友見到我d資料,都幾瘀,可能以為我醫病醫到屋 企無晒錢,要出黎搵工,哈哈哈。我搵工個理由都幾無聊,我響屋企又唔係無野做,打機 都可以打足一日喇,但我又唔想再有人問起我,有無讀書做野既時侯,我要答無野做喎, 好似即刻俾人睇唔起咁,我係有病唔可以外出,但我又唔想下下用自己有血癌黎答人喎, 一係嚇親人,一係唔信,不過俾我都唔信喇,你估做戲咩,邊有人有呢d病架。今日先有 人問我,我話有病之嘛,佢就話我有暗病,都癲架,前日仲衰,俾人問侯我死得未,唉.. ..我真係鄧佢呀媽慘,生舊叉燒都話有得咬下。

今日聽病友講起蘿白糕,正喎,不過叉燒同臘味我都唔食得,哈哈,點算呢,新年流流, 食下先有氣氛架嘛。下午返到屋企,麻麻問我想食乜,我係好餓呀,但又諗唔到喎,咪話 「蘿白糕!」,哈哈,麻麻就同工人落左官塘行街,順便買左個蘿白番黎。蘿白一買番黎 係好似成隻小腿咁大舊架,之後刨成絲,再....唔知點整整整整,整左好耐之後呢就放落 個大鑊度蒸,蒸呀蒸,蒸到六點幾,哇,我終於有得食早餐喇,哈哈,麻麻乜都無落,淨 係蘿白,但都好好食呀,無所謂喇,我之前食都係揀起d臘肉唔食既,剛剛蒸起既蘿白糕 真係無得彈,我一次過食左半碟,之後宵夜再煎香佢,食埋寧外半碟,果下真係覺得自己 好叻,可以食晒一隻小腿咁大既白蘿白,好似兔仔。

爸爸十一點幾番到黎,佢響果間好鬼貴既日本料理店,買左兩碟刺身番黎呀,不過都唔關 我事喇,我都唔食得,我八掛一望,哇....生蠔得果幾隻都七十幾蚊,好彩....我一直都 唔鐘意食,都唔知佢貴D乜。
「爸爸你賺大錢呀?」我扮晒天真咁問。
「唔係,咁得閒都要"乙水"下你呀媽架嘛。」爸爸貫澈佢一向既木無表情。
唉....都唔見你"乙水"下我呀媽個女,嘻,爸爸緊係怕佢呀媽(即係麻麻)同佢個女(咪我囉) 吃醋,所以我同麻麻都分到好禮物,就係手套一對,爸爸仲懶細心咁話「對手套d手指可 以穿出黎,咁你咪可以打電腦囉。」,哈哈,俾呀老豆霖到tim ,我暈喇。




一 月 十 六 日 星 期 二
不要再望我
呵欠~~今朝又要早起身喇,好眼訓呀,最衰尋晚,有線無喇喇播「山村老屍」喎,又好似 幾恐佈咁,咪尼入房睇囉,d鬼樣真係幾恐佈架,嚇到我一個人響度v哇鬼叫,不過衰在 無特色喇,抄人地午夜凶鈴既,又抄得唔夠pro 喎,搞到鬼片唔似鬼片,反而似笑片。

又係差唔多九點出門口,又係響同一位置等的士,唉....對面馬路有兩個人等,都上晒車 走左喇,點解呢面等極都無架。

的士的意思係,你需要既時侯無,你唔要既時侯就有好多。

好唔開心呀,企響條街咁耐,俾人望足咁耐,邊面有車黎,我就擰第二面,再唔係就背住 馬路或者頭向下,我不停咁轉轉轉,都無的士,媽咪又心急,好多的士響對面都唔肯u過 黎,直到呢面終於有的士喇,媽咪好興奮咁截喇,但....佢竟然唔停車,佢係咪睇唔起我 ,唔想車病人呢....第二架、第三架都係唔停車,我望住媽咪,佢真係有幾下好似想衝出 馬路,截停架車咁,我地等左差唔多半個鐘,我都企左響度

,表演左半個鐘....我地見對面有架的士停響度,都唔理得危唔危險,淨係跑過去,跑到 過去,我地好無奈咁望住個的士佬刻意掛上「暫停載客」牌,果一刻,我真係好唔開心.. ..點解....我地又唔係俾唔起錢....點解....點解你地個個都唔肯載我....我個病唔會傳 染架....點解....麻麻同工人剛剛飲完茶番黎,見我地兩個截唔到車,於是幫手截,又有 的士喇,我同媽咪開心得衝前去,但的士沒有停在我們身邊,反而繼續多走幾步,去了麻 麻那裡,明明係我同媽咪截先,點解又唔係停響我地前面喎,之後我地又跑番轉頭,上車 ....終於上到車了。但我又好嬲好嬲,我嬲個的士佬點解唔停俾我地,我望住佢個「後尾 怎」,真係有一掙「窩」落去既衝動。
「頭先我地截你,你做乜唔停車呀?」我嬲到講野都震下震下。
「咁我見你地兩個後生嘛,梗係車個老架喇。」佢大大聲咁講。
「咁架車明明係我地截先架喎....」我再講唔到野喇,我覺得受到傷害,一架一架絕塵而 去既的士,響我心入面代表一個又一個的歧視,響街度俾人望左三十五分鐘,個個都對我 指指點點,我被一些既歧視傷害到了。以前我會鐘意番醫院,因為只有呢d日子,我先可 以望下呢個世界,但望真之後,我先發覺係依舊的千蒼百孔,我唔再鐘意番醫院,我討厭 面對人,即使係響屋企,我亦都唔想再俾人響icq 奚落,有病有乜咁出奇喎,你歧視我, 你奚落我,係因為你太幸福喇,但唔係個個人都會好似你咁健康架,你永遠都唔會明白, 被歧視的感覺,因為你未試過。

好唔開心呀,響架的士度我喊左好耐好耐。因為今日趕時間,我地行西隧,途中經過好多 街道,好熱鬧,但我都無乜心機去睇,平日多數係百七蚊咁上下,但因為要俾五十蚊遂道 費,所以要成百九蚊,唉....最衰爸爸又要返工,哥哥又未起身,如果坐佢地車,咁咪唔 洗企街企成七個字囉....又唔洗俾人望....

歧視不存在,世界更可愛。

返到醫院我都無晒心機喇,隻眼又喊到腫晒,淨係好想訓覺。媽咪見我唔開心,就特登走 去買左我最鐘意既可樂糖、菊花茶、仲有蝦片,不過買完佢就要去番工喇,得番我一個坐 響度等,原來包可樂糖個袋係閃閃閃架,好似d閃卡咁,一粒粒閃閃閃,嘻,見個袋咁得 意,我又開心番d喇。今日覆診d人,個個都講普通話既,都唔同channel ,唯有閃埋一 二角喇,本來帶左電腦、一本便利黎架,但我喊到好累呀....一個人響張椅到訓著左。

訓左唔知幾耐,我聽到姑娘嗌我,好彩無流口水咋,之後佢叫我揀張床輸血,好野,有得 訓得舒舒服服。其實果度係門診黎架,有三張床用布廉圍住,俾d人番黎抽骨髓,抽完訓 番幾粒鐘就走咁囉,所以都幾開陽,雖然我係訓最埋窗口位果張,但都係好鬼嘈,絕對有 訓街feel,佢俾左兩張「煎」我,我就好似露宿者咁縮埋一舊訓覺覺囉,個窗口係對住座 山,嘻,好想行山呀,心情又好好多喇。訓到咁上下姑娘又嗌下人,好衰架,佢仲話「哇 下~~綽姿頭先嗌極你你都唔應,嚇死我呀。」,如果你一嗌我,我就即刻瞪大眼應你,你 咪仲驚,傻既。之後lunch time又嗌醒我問我食唔食飯喎,醫院野....咪搞咪搞,到左兩 點幾三點先輸完第一包血,換第二包果陣,呀姑娘好瀟洒咁fit 左d血出黎,哇,仲要中 左我件衫,剛剛博頭位置,我嚇到差d彈起身,大佬....血黎架喎,我又唔郁得,佢又唔 幫人抹....我唯有趁佢走左,拿拿臨抹落個枕頭度喇,橫掂個枕頭都有血,幾鬼o拿o查呀 。姑娘打左支去水針,之後差唔多訓著,又要去廁所,去完差唔多訓著,又急過,激死呀 ,訓到五點,終於輸完兩包血喇,即閃喇。

平時撘的士有媽咪陪,今日無喎,點都有d驚,好彩個的士叔叔幾nice,又話我知邊度邊 度塞車,埋單一百六十幾,佢收我百六咋,哈,我咪多謝佢囉,真係好呀,媽咪話佢見我 細路女撘咁鬼遠的士,所以咪唔計我尾數囉,嘻嘻,其實都唔係個個人都咁衰丫,係有d 無知既人先會歧視我,算喇,唔同佢地計較。

響醫院訓左成日,仲唔夠,番到黎六點訓到十點,連飯都無食呀,不過麻麻就好細心咁, 煲定雪耳糖水等我起身食,sweet sweet 。




一 月 十 七 日 星 期 三
唔知唔知
明明輸左血,應該龍精虎猛先係架,但都係訓到成兩點,唔係夠鐘食藥我都唔起身呀,呵 欠~~刷晒牙又搵唔到野食喎,忽然想食奶醬多,於是又搵番前幾日整格仔餅d花生醬同鍊 奶,焗兩塊面包,整黎食囉,但d鍊奶滴到四圍都係,食到咁樣衰,所以都係食左二塊就 收檔喇,但我隻大食積又點會咁快飽丫,咪叫工人買左五包芝士圈番黎囉,好好食架,食 果d我又好開胃,食飯都唔見我咁開胃呀。

好喇,食完野係時侯寫番d日記,但唔知點解,我上左網成幾個鐘,都係發呆,打唔到一 隻字,我發呆呆到成五點,今日週身唔聚財,到底做乜鬼呢,唔通尋日要左人地d血,有 排斥?唔會呀,同一個血型既。話時話,每次姑娘輸血前,都會問我係咩血型,以前我會 大大聲懶精靈咁答「b+~」,但換完骨髓,之後我d血型就會慢慢跟左大佬,變左o型 ,但又唔係即時變晒o架喎,大約半年先會變晒,咁期間我係b+定係o呢,所以姑娘問 我,我都唔知點答好。

今日我睇左一個好靚既個人網頁呀,睇完之後頓時好迷惘,一時忘記左我點解要整呢個網 頁,忘記左自己既路向,唔知可唔可以算係我寫網頁既低潮呢。好想可以好似佢咁好,貼滿晒 自己所畫既公仔,但我同佢係兩種風格,一下子根本無可能完全變到佢咁,而且雖然我自 覺吉場比唔上別人的網頁靚,但呢個女始終係我親生,係我眼中係最好已經夠喇。我當然 想望女成鳳,但醜小鴨變天鵝都唔係一朝一夕既事,吉場同我一齊都係慢慢長大中,我想 畫好多畫放上黎,既然唔可以一日畫得晒,唯有叫自己唔好急,我無辨法做到完美,做到 人人鐘意,最起碼有我一個鐘意,因為我唔會厭惡自己。寫日記既同時,我都係想將唔開 心既野講出黎之嘛,所以日記唔會係我一個負擔。

你都係呀,唔好再為網頁既野煩喇,佢係你既朋友,唔係你老闆呀,佢又唔會出糧俾你, 所以你都唔需要為左討好某些人去做,自己開心就得喇。

麻麻夜晚又走左去食飯喇,唉....麻麻知我唔去得,所以都無同我講,我估呢....好似係 麻麻生日呀,我都問唔切佢就走左喇,又係得番我同工人撐台腳。話就話整好晒d咩魚咩 肉呀,但都無胃口....又勁大陣被拋棄既味道喎,所以我淨係飲左碗湯,之後就無食飯喇 ,反正工人都唔會干涉我架喇,而且我係被遺棄....大晒既,嘿嘿~~趁工人去左涼沖,我 又偷食d平日唔俾食既野,係咩就無謂講喇,免得大佬篤灰,斷我後路,其實工人都唔會 講架喇,但我又心虛喎,硬係覺得做錯事要尼埋黎做,所以我以最快速度食,嘿嘿,又得 米。果五包芝士圈陪伴我到夜晚,食到我有d喉朧痛,好爽呀我,成晚響度打「虛擬人生 2」,好彩我有秘技,嘿嘿,睇個電腦點折墜,之前蝦得我咁爽。

呀哥又話番黎整洋蔥圈我食,一番黎就衝入廁所嗌肚痛,之後就「蕉」一聲飛出街,又唔 知去邊玩喇,激死呀。等到兩點幾,我都訓喇,入房睇下有咩電影睇,咦?新野喎,「鬼 片王之再現凶榜」,唔係喇 fa,年尾流流又播埋d死人片,個心又恨睇,但夜晚喎....好 唔好睇呢....唔驚!咪生人唔生膽喇,我開住燈睇,哈哈,但真係幾驚,最驚就係佢影個 廁所,同埋拎住把刀追殺人果d境頭,嚇到我搵張被遮住自己,死喇,唔掂,好驚喎,打 俾呀哥先,又要響張床度起身,行去插番條電話線先打到,驚到我丫,點知....怪事發生 喇,我按極都按唔到電話制呀,死喇,點按都無反應,嚇死人喇,唔驚唔驚,一定係平日 我訓覺,有人打黎時,我成日跌佢落地下跌到shot左,唔邪唔邪。無得求救,唯有尼番入 被竇喇,睇完之後我都唔敢熄電視黎訓,開住個新聞台先,新聞台夠正氣嘛。奉勸各位唔 好夜麻麻一個女仔睇鬼片,唔係驚起上黎真係叫天不應,驚到龍馬精神架,恭喜恭喜。


一 月 十 八 日 星 期 四
愛你在心口難開個名好肉麻呀,打個冷震。
尋晚煲淨半隻「虛擬人生2」,今朝繼續煲,煲成兩日呀,果然係一隻「老火game」。今 朝都無乜野做過,其實本來係要寫番d日記架,但....玩埋先喇、玩埋先喇,都就爆機囉 ,嘿嘿,麻麻知我鐘意食蘿白糕,今日又整喇,原來煎既同蒸既又唔同整法架喎,煎既呢 要落多d粉,整硬d,整好等佢凍,再切佢一片片出黎煎,蒸既呢就相反,蒸好就食得。 我媽咪鐘意食蒸,我係細路仔,梗係鐘意煎煎炸炸喇,不過如果係去茶樓呢,我好鐘意食 煎芋頭糕,再落好多甜醬同麻醬,yeah~~正到暈呀,但響屋企食既話,甜醬邊度先有得買 呢?我成日叫麻麻買甜醬,麻麻都話無得買既,所以我就諗出面街d甜醬可能自己搵d沙 糖開水,再撈d唔知咩落去,一定係呀,嘿嘿嘿。今日個蘿白糕唔係咁好食,咬到一舊舊 粉團既?一定係工人整既,麻麻無理由失手,好怪呀....但我都好有志氣咁食左半大碟, 隻碟好大架,用黎食飯裝送果d喎。

電話響喎,原來係稀客isiah ,佢一打黎就話「xxx(我全名,無謂講喇),你響勞工署 搵工呀?」,嘿嘿....前兩日都話如果我d資料,俾響勞工署做野既長~~舌~~婦~~見到(拿 ~~完全唔係講緊你囉,薛小姐~~),就會瘀架喇,真係唔好彩呀,嗚~~不過佢唔係真係見到 我d資料,佢係睇到我日記咋,咪打黎奚落我一番囉,佢仲一路睇我d日記,一路同我傾 ,哎呀,俾佢知道左我之前唔小心保管佢送俾我既sony貓扭蛋添,嘿嘿....(以笑遮醜)。 我地又無喇喇講起以前響尖沙咀中心d搞笑野,我同佢係展翅計劃識架,我就前佢一期響 尖沙咀中心上堂既,之後我留番低做義工搞搞震,就識到遲我一期既isiha 喇,不幸既事 發生喇,我地第一日就好friend,最主要緊係我平易近人喇,其次就係佢世界女囉,嘿嘿 ,仲一齊講人壞話,女仔就最興架喇,唔咁做唔似女仔(其實係八婆仔),到左第四日,我 地已經到達濃情化不開既階段喇,仲齊齊去澳門茶餐廳食宵夜呀,諗起都溫馨。我地最記 得,社工曾經講過「如果玩糖黐豆呢,實有兩個人一路拖住手,一路走住咁叫其他人『你 唔好過黎呀,你唔好過黎呀!』嘿嘿,果兩個人實係isiah 同呀咩。」個男社工仲要扮埋 d型樣,諗番起都記憶尤新。其實我仲好鐘意尖沙咀中心,我當果度係我屋企,果度有 我鐘意既社工,有我鐘意既朋友,就連樓下看更伯伯既慈祥樣子,我都仲記得。我諗我好 番,可以重獲自由之後,我除左會去讀書,其次就係會返尖沙咀中心,繼續我的小組「teen 國」,聽講佢地四月會搞街頭band show ,而家都係籌備當中,我好想幫手呀,但始終我 離得太遠,我又唔可以去開會,唯有暗地裡祝佢地成功喇,呢個小組我都有份,我真係好 想做番d野,証明我仲係其中一員,同埋証明我係殘而不廢(但我又成日講廢話喎~~)。

同isiha 傾完電話,我就繼續打機,我已經打到忘我狀態喇,到左六點幾,我終於打爆機 喇,嗚~~~~好滾動呀,覺得好似完成左件創舉咁,兩日打爆機,正呀,嘿嘿,不過好似又 有d失落,打完機唯有打日記喇,慘,對住部電腦一粒字都打唔出,都怪我貪玩之過,玩 創左個心,要食保嬰丹先得。

今日同小魔女響留言版講起Barbie,令我諗起細個既事。細個住響秀茂坪架,果時我覺得 自己屋企好窮,屋企好細,五個人住,我連床都無,要等個個訓晒,我就訓果張可以開出 黎做床既大木椅,嘿嘿,其實我係有床架,不過係同呀哥兩份,既然係兩份,又點及得果 張大木椅寬敞喎。下午我會走過去d隔離屋,睇下麻麻去左邊間打麻雀,搵到之後我會好 開心咁同佢講「晏晝!」,然後申出手板,其實「晏晝」兩個字既意思,即係拿錢買零食 ,之後我會拿住三蚊,再加埋自己既私己錢五毫子,去士多買可樂飲,本來可樂響超級市 場要3.8 架,但士多個老闆為左留住我呢個客仔,所以三個半賣俾我,嘿嘿。雖然覺得自 己係活在一個好窮既環境,但我依然任性地扭買玩具,我記得我有一副 lego,兩個Barbie ,仲有好多好多公仔,我仲有Barbie既化粧台,你知唔知呀,果個年代Barbie化粧台係貴 野黎架,但都俾我玩到唔見晒 lu。諗到呢度,我真係覺得自己太幸福喇,可以活響呢個家 庭係我既福氣,其實我真係響一個溫室中長大,從來要風得風、要雨得雨,想要既物質, 屋企人都俾到我。我記得爸爸問過我,如果將自己個病俾其中一個家人,我會俾邊個,我 答係哥哥,爸爸就笑說我真係同大佬有仇,但而家我唔會喇,因為換著係我,我真係未必 會好似我哥哥咁勇,去捐骨髓俾佢,講真捐骨髓果下就唔驚呀,入手術室麻醉左就乜都唔 知,但之前成日要黎醫院抽血,又唔知點抽幾多公升血出黎備用,又要打好多唔知乜鬼針 ,俾著我咁怕痛....如果真係佢病,我真係可能救唔到佢,所以我病就最適合架喇。

我會同鐘意既人講「我好鐘意你!」,我會同鐘意既朋友講「我好鐘意你!」,但點解我 又唔敢同屋企人講「我好鐘意你!」既呢?無計喇,慣左響其他人面前厚顏無恥,但對屋 企人反而....怕羞,都幾驚,可能係病態。

今晚我專登諗住煲糖水俾媽咪食,以表愛意嘛,但....我一話整糖水,工人就好落力咁去 煲水、洗豆,見佢咁掂,我都無謂插手喇,結果我都係負責食既,仲要媽咪幫我搯,真係 ....有點兒那個,媽咪I love you,霖唔霖呀?掂!一句扺番晒。


左邊"咩"個袋響前面,有隻大公仔果個白痴妹就係我喇,中間企到成條蛇咁既咪就係傳說 中,勞工署既isiha 小姐囉,公開左係咪令在場男士失望呢,嘿嘿,右邊牛仔褲爛左,就 係A級品味既呀馬。



一 月 十 九 日 星 期 五
我的堅持
尋晚同三號仔講起杯麵,佢話佢食緊合味道既海鮮杯麵,咦....粉藍色,淨係見個面都覺 得怪怪,所以我對海鮮杯麵一直有偏見,但唔知點解個個都鐘意食海鮮味,就連我屋企, 買親都係海鮮味,呢個現像都幾卡哇伊,有邊個可以話俾我知,點解咁多人鐘意食海鮮味 ,我反而鐘意食咖喱味,因為香噴噴囉,另外蟹柳味呀三號仔話流野喎,一d蟹味都無, 但我又記得果隻好似有紫菜,好似都幾好,不過我對杯麵無深入既研究,覺得同一個牌子 既味都差唔多。不過公仔(好似係)出果隻正方形碗既炒麵王都唔錯,仲有合味道既炒麵都 好好食,不過重點推介係蠔油味,其他既就....不願置評。三號仔問我有乜即食麵好食喎 ,我都唔好呢味既,唔係咁清楚喎,你有無d好介紹話我知呀?最衰佢唔鐘意食甜品喇, 甜品係少女既至愛,我就最清楚喇,比較易買既呢有「楊協成芒果布甸」,我細細個就鐘 意食架喇,惠康有售,仲有「雀巢檸檬茶果凍」,好香檸檬茶味架,正,七仔有售。

今朝早餐緊係食番個杯麵喇,咖喱味既,不過掛住玩電腦,焗左成五分鐘先記得,所以索 晒水,發脹到好似闊條麵咁,嘿嘿。今日俾人找晦氣呀,有個女仔話我....個網頁搶佢男 朋友呀,嗚嗚~~~~唔好潑我漒水呀,為左保住塊面,今次點都要認下衰仔,係我....個網 唔好,佢太過索所以瘋魔到你男友,拿~~我真係有誠意架囉,所以我特登搵均全屋,為求 搵到一塊餅,影番副沙龍黎博紅顏一笑,真既我就搵唔到俾你喇,但我地出黎行,講雷氣 架嘛,所以我都搵左以前做黎交功課既「百力支」出黎,係咪好似真既呢(唔准話唔係呀, 好難落台架。),唔好咬呀,中鉛毒架會,嘿嘿嘿,其他唔關事既人就睇住呢個version先 ,當事人就可以click 入去睇我既新年限量版喇,邊個係當事人?男既自問成日睇我網頁 而唔理女朋友,女既就自問有恐嚇過我就睇喇。

雖然「虛擬人生2」已經俾我打扁左喇,但我依然都係懶,無心機寫日記,反而響網上面 週圍行,哇....今日我見到好多唔同風格既網頁呀,真係好靚呀,有時我會好怕睇人地既 網頁,因為好容易會睇到沉迷,見到人地呢樣好果樣靚,我可能會傻得走去樣樣跟足人地 ,然後就失去自己做網的方向,有時要做到參考而不抄考,真係幾難。最怕就係抄,但又 抄得不夠好,抄到不倫不類,破壞了自己的網頁,也破壞了自己的風格。別人既網頁真係 有好多值得參考既地方呀,但自己網頁都不太差呀。不過某程度上我都有我的堅持 ,我會堅持日記一定要寫,我會堅持自己色彩永遠都係咁「燦」眼,這個就是我的風格。

癲架,都唔明點解咁眼訓,幾日日記都未打,我都可以好夠pop 咁走左去訓晏覺,一定係 睡魔上身,其實都唔算係晏覺,都成六點半先開始訓,訓到八點幾九點,一醒左麻麻就話「煲左雪耳糖水你食呀。」,好野,我好鐘意食d爽口既雪耳架,其實應該落埋紅棗,但紅棗補血,算係中藥野,所以我又唔食得喇,麻麻真係細心呀,見我無食飯所以煲定糖水等我起身食,yeah~~錫晒麻麻。

今晚我一早收皮喇,星期六、日係假期嘛,梗係要休息下喇,所以一早熄左部電腦,免得媽咪偷睇我日記,響房睇電視既時侯,chatham 仔長途電話黎喎,咩事咩事咁嚴重?嘿嘿,原來佢幫我搵到容祖兒既「痛愛」呀,真係滾動到暈呀,些些你呀(國語)。




一 月 二 十 日 星 期 六
整角仔
今朝成三點先起身,唉....我明明淨開眼才十一點幾,諗住再訓一陣就搞到咁喇....我淨係覺得我日日都係焗醒,我間房一天光就開始有太陽晒入黎,咁我唯有唔開眼咁"中"過去 落簾,希望唔會一個唔小心"中"埋落街,落完簾又繼續訓,訓到咁上下就開始又焗又熱,太陽晒到成間房到熱晒,又一滴風都吹唔到入黎,嘿嘿,講到個情況咁差,但我都可以訓到三點,我真係好懶訓呀。醒左見到麻麻同工人包緊油角(即係角仔喇),我好鐘意食麻麻整既角仔架,不過上年新年,當我地包角仔包得如火如荼之際,呀哥突然劈出一句「我唔記得落糖。」,下?咁咪無味囉,結果我地唯有捱無味角仔喇,當時覺得好可惜,因為一年先可以食一次,但偏偏因為無落糖,所以整得唔好食,唔緊要,而家咪有得食囉,好野,一年又過喇。年年包角仔果日都會成屋人,姑姐、姑媽同三嬸都會黎幫麻麻手,我細細個好鐘意整架,但就係整極都整唔到角仔果條花邊,嘿嘿,不過唔緊要,有「包油角器」,係木造架,一個木夾咁,唔知有無人見過呢,整出黎d角仔細細隻,好cute架,不過近幾年都無試過整喇,最主要既原因係張台太細,姑姐、姑媽、三嬸、呀麻都霸晒d位,同埋我既position係細路仔嘛,細路仔唔准搞大人野既。

好慘呀,三點幾先醒,準備煮野食既時侯,俾麻麻阻止,佢話我而家食左今晚又唔洗食飯喎,咁又係呀,我呢排個胃真係愈黎愈唔掂,唔食野都飽,我上次番醫院磅重,輕左四磅呀,但塊面依然圓碌碌,我諗瘦左響腳址尾,唔理喇,點等到七點半先食早餐呀,唯有而家照食喇,我聽penny 仔話「都一烏冬」好食喎,所以叫媽咪買左兩個番黎,但點整先好食呢,是但喇,整得黎都五點喇,唔好搞咁多花臣喇,就咁落水煮黎食算,我食左一碗仔就飽喇,唉....遲早厭食呀。

咦?我眼尾望到麻麻炸緊角仔囉喎,以前年年我都第一時間走入去拿黎食,但年年都俾佢鬧我熱氣呀,所以今年唔敢郁....但好難忍,雖然我對眼好似望住部電腦,但其實我係一 直留意緊麻麻既一舉一動。哎呀,有無搞錯,工人都響廚房一路炸一路食,我係吳家既千 金喎,唔得....忍....年年都會將角仔放入一個好大既玻璃樽入面,今年都唔例外,果個 玻璃樽真係好大架,有成尺幾高,咁大個樽載咁多角仔,咁就梗係唔係我地食晒喇,唔係 食到出年都似,呢樽角仔係姑媽、姑姐、叔叔都有份食架,佢地一人會拎好多走,所以就 要整咁多喇。我好似細路仔偷食咁,望下麻麻,麻麻又望下我,我就心虛咁笑,然後一步 步移近裝角仔既樽,麻麻就問我係咪想食呀,嘿嘿,緊係想喇,佢就拿左一隻出黎俾我, 唉....點解係佢拎俾我,而唔係我自己拎呢,我心諗,一定係揀隻包得核突既俾我食喇.. ..見麻麻又無乜反應,我就好似個細路咁,一路傻笑一路繼續拎黎食,嘿嘿....點解今年 d角仔....咸咸地既?唔好問咁多喇,有得食就食喇。連麻麻都覺得d角仔咸咸地,係喇 ,點解呢,據麻麻既分柝係佢用左d「咸脆花生」黎整,唉....咁又一年喇。

如果下年既角仔好好食既話(好食既意思係指味道正常),我諗我會講「唉....三年未食過 d正常既角仔喇....」,然後出現好似味吉陽一果d畫面,好好食呀~~~

悶悶地諗住打俾susuky,點知係遺言信箱....佢話佢自己返左大陸喎,唉....死喇,一時 心掛掛添,響呢度自言自語得多呀,但響電話又口窒窒,我淨係勁同個遺言信箱講「你去 左邊呀,我好掛住你呀。」,唉....總之寫定台詞喇,一分鐘咁又浪費左喇。我麻麻聽到 我講埋d肉麻野,咪問我打俾邊個囉,一定以為我打俾男仔呀,嘿嘿。

今晚睇華裔小姐,好恐佈呀,完全係俊男與野獸囉,俊男就梗係希希喇,望住希希響二十隻野獸間穿插,真係有少少膽心希希俾佢地揩油呀,e神....你小心搞到希希呀....你粗 身大勢。

慘喇,我養成一個唔係幾好既習慣,就係靜靜靜靜的,我先可以專心打日記,搞到今晚又 夜一夜都未訓得,眼見部pc成日想hang機,真係一額汗,今晚都restar二兩次,我淨係開 nptepad 打日記之嘛,咁都hang機,完全唔合乎情理,慘喇,又要響等佢重新整理既時侯浪費幾分鐘....個博頭超累呀,有人幫我鍊下你話幾正,靈機一觸,我拎左隻意粉羹出黎搥下個博頭,又幾舒服喎。我都幾有童真架,當正隻意粉羹係我既神仙棒,以前我成日將佢掛響背囊,嘿嘿,我自己覺得幾型架,因為佢夠sharp ,又無人諗到我真係會掛隻意粉羹出街架嘛,都幾癲呀我。有次我買緊野,好專心地格緊價之際,個老闆娘騷擾我,問我呢隻咩黎,我咪好認真咁答佢,係把梳囉,嘿嘿....或者我會答係不求人,我個社工見到 ,都不禁驚歎「果然係讀切雞呀....」。我真係好鐘意呢隻意粉羹,一見到佢我就由個心 度笑出黎,所以佢係我既神仙棒。

就係我手上綠色果隻喇,我覺得好得意架。




一 月 二 十 一 日 星 期 日
邊個篤灰?係咪你!
尋日我又再下一城,叫工人買多十包芝士圈,好味嘛,而且呢幾日食唔落飯,嘻嘻,所以又食多左零食。冬天真係一個叫人懶惰既日子呀,我淨係想好似蛇咁,食完就冬眠,訓到春天先出黎,蛇王一下,嘿嘿....但我覺得自己都係比較似豬多,咁多日都唔肯寫下日記 。其實日記又真係好難準時....今日發生既事,又要今晚十二點幾先可以講,早左寫又好 似「今日都未過完」,咁又唯有第二日寫喇,我又訓到三點幾喎,起身屋企永遠都係咁熱 鬧,熱鬧係好,但我又要靜靜咁先記得番之對做過乜....你都咪話唔信我呀,你知喇,我 日日都係響屋企過,如果我日日出街既話,我都仲可以數得出「星期一旺角、星期二銅鑼 灣、星期三太子....」,繼而記得番做過乜丫....日日響屋企,日日都一模一樣,嘿嘿, 不過又怪在點解我仲可以咁鬼多野講,因為....我長氣囉,嘻。

今日一起身,見到麻麻同工人兩個人響度整年糕,嘿嘿,我地屋企好在家有一老如有一寶 ,麻麻識整好多好多野食架,節日食品當然更係拿手喇,一到大時大節我地就有口福喇。 不過好搞笑,年糕上面通常有一粒紅朿,然後有幾粒瓜子圍住咁,平日食瓜子都係用口咬 之嘛,但要放上個年糕喎,咁樣唔衛生嘛,麻麻就用個鉗鉗開佢,今次真係考起麻麻喇。

果一大樽角仔我唔敢話要食呀,我驚麻麻鬧嘛,麻麻雖然唔係好惡,但一鬧起上黎好長氣架,我就驚喇,所以想食都係唔敢拿黎食。工人落左街買野之後,麻麻走過黎話「喂,食幾隻角仔喇,你又成三點先起身,食得多夜晚又唔洗食飯呀。」,嘿嘿,於是我乍驚乍喜咁露出難以至信既樣子,斜起一邊咀笑,心諗「咁著數?」,一陣麻麻就拎左一堆角仔黎俾我食,嘿嘿,有得食喎,唔理喇,跟住佢就講「我唔係唔俾你食呀....芝....不過工人 響度,佢又密密咀食喎,咁d角仔仲要俾d親戚架嘛,我咪叫"你地"唔好食咁多囉....」 麻麻真係鬼馬呀,原來係為左唔俾個工人食咁多,而又唔好意思話佢,所以就鬧鬼我囉, 等工人知呀大小姐都唔敢食,佢咪又唔食囉,嘿嘿嘿嘿,鬼馬鬼馬。

之後麻麻又繼續講野,真係有少少覺得被騙,原來果幾隻角仔,係要收賣我乖乖坐響度聽 野。好,我又聽下麻麻有咩良言,咦....麻麻同我講番,上個星期有晚去左食飯,唔係掉 低我喎....又解釋一大輪....無理由麻麻知我響日記講過架....唔通佢學識上網我唔知? 嘿嘿,諗諗下....係喎,今日三嬸好似打過俾麻麻喎....三嬸都有睇我網頁架,嘿嘿嘿, 仲唔俾我捉到你?三嬸....恭喜發財,利是豆來,嘿嘿嘿....

激死人喇,剛剛申請既靚靚人數計,唔知點解較極個時間都係唔差,再唔係呢就顯示昨日得一個人黎過,唔係喇fa,我一日都唔只黎睇一次場喇,究竟佢係幾多點開始計斫一日呢,如果有人入黎吉場係頭果幾個既話呢,就講聲我知個大約時間,等我較番準佢,唔該晒 。

今晚睇中文金曲,好野,又有希希喇,仲唔係2001新人王?唉....慘喇,今次仲唔斷正? 唔得唔得,陳冠希,我點都唔會鐘意你架,因為....我係呀東既痴心小歌迷,咦....但係 你地都係姓陳,近親喎,咁我過檔都唔會咁核突丫,噓....等我偷偷改左個info去,無人 知既。嘻,不過希希一定同唔到千嬅比,係係最好既,icq 果條友知我鐘意千嬅,即時奚 落千嬅,話佢得d cheap獎,車~~其實有得睇到佢上台都夠晒喇,而且重點係,我係鐘意 千嬅d歌,唔係鐘意佢獎多。千嬅係唱少女的祈禱所以最近好紅,但肉麻d講句,我鐘意 佢,佢響我心目中根本一直都咁紅就夠喇。死喇死喇,我講野講到好似d小fans咁,不過 有人仲肉麻過我,isiah 鐘意安仔架嘛,佢info寫住....「如果安仔係安安,我就係佳佳 。」哈哈哈( isiah,呢三聲罷明係笑你既),不過~~安仔d歌又係幾正既,身為呀咩既朋 友果然有眼光呀,梗係喇,我地金蘭姐妹黎架嘛(呢句係有惡勢力迫我講既)。

原來甜醬既係海鮮醬呀,好野,我無乜見識嘛,唔該晒你話我知呀,好野,等我叫媽咪買 。媽咪今晚成十一點先返,佢仲一個人拎左好多袋野喎,正,等我以為係野食,上前迎接佢 喇,點知幾十袋野都係酒黎既....佢話原來洗錢係好開心喎(鬼唔知咩),然後佢就響度講 番頭先既事。
「唔該xx酒幾錢支呀?」媽咪問個惠康姐姐,酒名我就唔記得喇,我都唔飲既。
「2xx。」唔買開,幾錢我都唔係好記得。
「咁俾一箱我喇?」媽咪好豪咁講。

媽咪番到黎仲依然好興奮呀,上氣唔接下氣咁,我諗佢唔係豪在俾得起錢買一打,係豪在 佢竟然可以一個人響樓下拎十二支酒番黎,媽咪,我直情要向你致敬喇,無得頂。咦.... 咁我d野食呢,媽咪話多得滯,所以叫人送貨喎,下,唔係喇fa....會唔會新年之後先送 到黎架,唉....你拎十二支酒番黎,又唔係即刻飲....嗚~~轉過頭一陣之嘛,果十二盒酒 已經放到遍佈客廳既每一個角落,嘿嘿,你地唔好再丟低我一個細路響屋企呀,好危險架 ,我傷心起上黎,會一個人"隊"晒你d兩舊幾水既酒架。




睇返前面<-----呀 咩 昔 日 發 傻----->繼續睇嚕


© 呀咩吉場 http://meredith.com.hk