二 月 十 九 日星 期 一
覆診日
尋日有朋友提醒我,叫我覆完記得打個電話俾佢,睇下骨髓結果如何,經佢一講,我先醒 起「係喎,聽日番醫院覆診,換骨髓換到咁辛苦,聽日就出第一個學期既成績表,留班定 係放監,都係睇呢舖喇。」咁即係我應該好緊張先係喇。死喇....訓唔著,其實個報告我 又唔係咁擔心呀,如果有bad news,佢前幾日就打左俾我喇,所以應該無事既,我反而係 緊張覆完診之後既事。因為聽日哥哥為車我地去玩呀,哈哈哈,媽咪話再去赤柱,今次玩 影相呀,好開心呀,我仲好白痴咁搵左d靚靚衫同裙,仲有....假髮!嘻,影相喎,唔通 黑布蒙頭咁去咩,我好誇張?無計喇,哥哥星期三之後就要返工,再無乜機會可以坐車出 去架喇。數下手指,由上年十一月入左去坐監到今日,我都算悶左三個幾月,終於有得玩 下喇....嘻....結果我緊張到成五點幾先訓得著。

星期一八點就要起身喇,今日又係林先生用私家車車我地去,嘻,不過今次唔同既係我地 會去藍田接埋呀祺姐姐同佢先生,因為呀祺又係今日覆診嘛,咁接埋佢地就可以share 番 d車費,一人九十蚊就可以番到醫院喇,嘻,有著數呀,平成六十蚊架。好彩今次我地係 叫車咋,因為未過海,已經響呢面隊道口塞車喇,原來東區走廊有連環撞車呀,所有車都唔俾行 東廊,要行西灣河,經太古、北角先上得番東廊,足足兜遠左成半個鐘呀,如果今次係撘 的士就痾拔甩喇,一路望住個錶起勢咁跳跳跳,真係細胞都死幾百個。我地又係九點幾番 到去,依然都係好多人向我微笑(恥笑),哇....成個星期喇喎,唔通d人真係仲記住我上 次抽骨髓發癲d瘀野?嗚~~唔係咁好笑呀,咁人地細路仔喊之嘛....唔好笑喇。

睇症既醫生一點鐘要去開會,要兩點鐘先返黎,唉....又要白白多等一個鐘,好心急呀, 睇完醫生就可以去玩喇,到左三點,終於到我地睇喇,嘻,一入到去,李醫生就叫我「淚 人」,哇喇,唔係喇fa,醫生,我成日笑你又唔記得,淨係記得我喊過果一次 (咦?睇番十月既日記,好似早有前科)....仲有.... 到底佢係講「淚人」定係「累人」呢。醫生話我個肝好左少少,但如果要抽肝組織,就要 忍住啖氣,俾佢生out out 咁響個肚度,有針篤一野落個肝度,抽組織,哇....俾支針篤 入皮都痛喇,仲要篤到入個肝度,仲要忍住啖氣喎,最高難度就係....我實喊架喎,呢啖 氣好難忍,醫生又話,我喊果陣扯住條氣,實抽唔到喎,呵~~係架,所以唔好搞我個肝呀 ,我我我....我又喊架。

好野,睇完醫生,哥哥就黎車我地走,我地又去赤柱玩呀,我襯架車上左天橋,即時戴起 個假髮,嘻,廢事嚇親人喇。其實戴番個假髮,我都幾似普通人丫,不過係面色唔多好囉 ,好似隻疆屍咁。剛剛駛過深水灣既時侯,cd機播著「沿途與他車箱中私奔般戀愛....」 好正呀個feel,兩邊都係大樹,而我地架車就響當中駛過。就快到赤柱時,哥哥見到前面 有報館既車,大聲同我地講「拍戲呀!」,我就好興奮咁叫佢駛過去睇,哇,可能見到希 希都未定架喎,經過時先見到有個道士,電燈柱度又釣住隻生雞,仲有幾個著白衫既人拎 住張好大既車頭相,先知自己講錯野....我地唯有兜番一個圈繼續向赤柱方向駛去,然後 我地又一次經過....我唯有合手拜拜拜「有怪莫怪,細路仔唔識世界。」

我地到左赤柱喇,媽咪陪我去換衫,換完衫我地就開始玩影相喇,嘻嘻,好開心呀,好耐 未試過可以扮靚靚喇,自從一年前開始化療之後,最長頭髮時都係得兩寸,扮女仔又驚俾 人笑我男人婆,一係話我男扮女裝,但最慘男仔打扮時,又俾人細細聲話我係tom boy , 嘻,今日戴左假髮,咁我就係長頭髮喇,咁就即係女仔喇,嘻,但如果有途人望住我時, 我又會回復自卑,總覺得人地知道我係戴假髮,知道我係一個病人....

我地左影右影,乜都影一餐,之後我同媽咪去左行街街,行過一間舖頭,咦?果隻咪sony 貓貓?hihihi,貓貓呀貓貓呀,扯住媽咪興奮到不得了,睇真,原來係「手布偶」黎架, 毛毛毛毛架,有男sony貓貓同女sony貓貓添呀,不過再睇真,個頭就好正常,但個身好似 發育不良咁,我唔介意買翻版野,如果係翻得似正版的話,但果隻一望落去就知係雜種喇 ,算....我要做個精明既消費者,左手禁住右手,唔俾自己失控,唔買,走。

六點幾喇,玩左成日好累呀,雖然無流過一滴汗,但對我黎講已經係劇烈運動黎架喇, 最後我地去左行百佳,我見到一班衣著入時既青年,哇,即時睇下有無d識既,因為大一d同學多數都係咁打扮, 識就無喇,但有個男仔好索架,好似rejoice 洗頭仔架,哇,唔通真係佢?正呀,不過我都唔敢求証, 廢事太過活躍整甩個假髮,就算真係洗頭仔都無用喇,陣間佢拎支rejoice 過黎話要同我洗頭咪痾拔甩,點呀,除出黎俾佢洗呀?定係俾個光頭佢洗呢,哈哈。

後面就係赤柱o既美利樓喇 ~赤柱美利樓外面的樓梯,構圖都好靚呵 ~
牡丹綠葉,少一不可。

羊媽媽後加


 

二 月 二 十 日 至 二 十 八 日
逃走後的第三個星期
媽咪話俾我聽,佢星期二睇報紙先知,我地果日見到赤柱有人做法事,係因為前一日有駕車 剛剛撞正落條電燈柱度死左呀,所以個道士就吊住隻生雞響燈柱度,招魂呀....以我八八 卦卦既性格,再加上響屋企無野做,咪搵番星期一d報紙睇囉,原來係一班人去赤柱燒野食架, 之後唔夠啤酒,所以有四個人駕車去買,回程途中在就遇上意外,撞左落電燈柱度,當時四人 被困車內,騎電單車既朋友經過見到意外發生,好想救車廂中既朋友,但又無能為力,心裡好焦急, 眼見朋友辛苦掙扎都幫唔到手,唯有無奈坐在一旁痛哭,結果,前座乘客重傷不治。 睇完之後真係有點失落,雖然自己有病,好似好慘,仲有可能好易會死,但打開報紙, 有更多人無端端死於意外,一下子就離開了,雖然人好似比一隻小螞蟻聰明,但又因為科學的昌明, 而製造了更多的危機給自己,結果比一隻螞蟻死得更容易。

這些日子我發現我真係一個好幸福既人,前陣子我很擔心自己的病,所以變得消沉了, 連網也少上了,但我的朋友卻接二連三的來關心我。我收到bee 狗狗寄給我的一包可樂糖, 我一邊看信,一邊吃他給我的可樂糖,在信中他不停的安慰我,雖然我已經沒有太擔心我 的病,但看見他努力的想我開心,我真係好感動。我收到網友寄給我的健康符,小小的一 個符已經包含了很多關心。我又收到另一個網友的sony貓貓公仔,竟然是那天我在赤柱見到 那隻的正版,一定是很貴的了,好像有點過意不去。我一直都以為我的朋友沒有看我日記, 但一下子他們忽然不知從那裡走晒出黎慰問我,怕我有那裡想不開,連久久不露面既朋友都 寄來「情人節」卡,然後又語重心長的教我看開些。這一大堆關心,令我覺得自己實在太幸福, 以前會以為我病左,唔可以再出街,就會無晒朋友,但這個網路又將我們聯起來,在這裡我更 認識到多一班新朋友。以前人地成日話網上面既人好假,無一個人講真話,但我從來都無咁諗 過,我對人地講既野都係真話,我亦都相信別人唔會呃我,因為我覺得無呢個必要,然後我就 有了一些很交心的朋友。其實每當有好多人努力去令我開心時,我都會有點慚愧,因為說到底, 我真的不能夠給你什麼,我係一個怕打電話俾人既人,我不能常常致電給你,來維持我們的關係, 就連上網,我每次也是等別人叫我,我才敢和對方說話,所以我的對手,總要比我更出力去和我做朋友。 我不能給你什麼,但為什麼你願意無條件的關心我呢?為什麼你願意為我做這麼多的事? 是因為我是你的朋友嗎?我諗我可以俾到朋友既係,我會好鐘意好鐘意佢, 我會用心去鐘意佢,我會為我的朋友哭。我就只有這 些條件了,在現實的社會中,你想和我做朋友嗎?

上個星期我白白痴痴咁寄左自薦信去出版社,嘻嘻,其實一早就唔記得左lu,因為寄既時侯根本 沒有什麼祈望,只祈望人地唔會寫番封信黎鬧我白痴就夠了,但今日我竟然收到其中一間的回覆, 更是三間之中最出名的那一間「博益」,但佢封信係亂碼,我搞左成個下午,仲單撈埋南極星都 係睇唔到,唯有寫封信俾佢,話佢知我睇唔到佢封信喇,心情低落咁按下reply ,點知一下子就 由亂碼變回中文字,我好快咁讀晒成封信,內文大約係叫我回覆一下自己既履歷,同埋如果出書 ,會出咩類型既書,可以打電話俾佢或者e-mail俾佢都得,人地總 編輯都覆我封e-amil,仲寫得長過我,我好開心呀,我第一個就打左俾bee狗狗,幾驚佢上緊堂呀 ,點知原來佢無上堂,響度鋤緊大dee,我捉住佢狂講封信,又叫佢教 我點覆人地封信,哇哇哇,到時我真係出到書,一定會搵bee 狗狗寫序呀,話晒佢都係我 啟蒙老師喎,嘿嘿嘿,我已經開心到傻左喇,但都只不過係講左俾媽咪同bee狗狗知,因為始終未成事嘛,揚左唔得咪痾拔甩。

寫番俾總篇輯封信,我足足寫左一日,唔係因為我寫得多,係因為要寫得大方得体好難, 你知我平時寫野幾不修邊幅架喇。佢留左個電話俾我,雖然打去個效果可能會好d,但我 又驚到時驚得滯,口震震講錯野喎,寫信都話可以寫完叫呀媽睇下,修改一下嘛,寫完喇 ,我同媽咪一齊企響部電腦面前,緊張地按下「send」制,呼~~希望有回覆喇。

其實唔得都無乜大不了,因為起碼我有盡過力,唔係因為我懶而誤事嘛。有做過但唔成功 ,和什麼都沒做而唔成功,雖然結果一樣,但我會覺得前者的過程比較漂亮。

三 月 一 日 星 期 四
品味之作
呢幾排我都好晏先起身,不過因為要十二個鐘食一次藥,所以我最多都係一點就要起身喇 ,但覆診前幾日就要大約九點起身,因為覆診時大約早上九點要抽血,會驗下平日食既藥 會唔會太過重份量,咁所以前幾日都要早返d食藥,怕驗左出黎會唔準。今日我要九點就 起身喇,唔係因為食藥,都唔係因為覆診,係因為今日舅父要返醫院覆診,媽咪又想陪舅 父去喎,咁我就梗係趁呢個機會跟埋出去玩下喇。

其實之前幾日都講好左架喇,不過尋晚我又忽然唔想去喎,因為我update緊「虐兒實錄」 d相呀,整到興起,所以想加多d,怕遲左加會無人睇,其二就係....我唔想咁早起身, 嘿嘿....懶嘛,其三係最主要既原因,係我唔又想戴口罩出街,好似做show咁,話就話係 出去玩,但俾人當怪物咁望法,乜mood都無晒喇,所以非必要我都寧願自閉響屋企。

諗諗下都係唔想去,想同媽咪講,但又怕佢鬧,而且被竇好暖,出面又凍喎,都係訓醒先 算。媽咪一朝早就叫醒我喇,我超唔想起身,因為好凍,唯有迫不得已地講大話,話自己 ....唔舒服,所以唔想出街,死....唔講都仲好d,一講左話唔舒服,媽咪即刻大為緊張 ,又話要探熱,又話要叫白車,慘喇....佢仲話我唔舒服就更加要起身,可以順便返醫院 睇醫生(滴汗),唔係喇 fa,當我好後悔咁講,九唔撘八推辭既時侯,佢就用銳利既眼光望 住我,問我係、咪、唔、想、戴、口、罩,所以唔肯返醫院,哇....果然係媽咪,咁都估中 左,不過其實我係唔想戴口罩所以話自己唔舒服,而佢就以為我係唔想戴,所以唔肯返 去睇醫生。媽咪都無我辨法,因為又叫左車,無理由浪費左百五蚊架,所以就俾我唔戴喇, 嘻,扭計成功,即時彈起身換衫,出發!

今日又係林先生用私家車車我地去,我同媽咪一齊行過去佢架車時,先發覺前座多左個人 ,遠睇仲以為係女仔,點知上左車先知,原來係男仔黎架,佢好潚洒咁擰個頭過黎同我地講 「早晨....(迴音)」,哇....好索呀....原來我除左對大口既男仔有僻好之外,我仲好鐘 意男仔剪陸軍裝架,即係古天樂響「寵物情緣」果隻頭,嘻....可能似我咁,無乜頭髮卦, 所以特別有親切感。原來佢係林先生個細仔,二十一歲讀緊大學,今日假期所以就同呀爸出 黎遊車河,試下駕車,哇....二十一歲就有車喇,閒來仲會同林先生去健身,簡直係典型既 有錢屋企呀。

因為舅父以前都換過骨髓,所以同我一樣都係去「骨髓移植科」覆診,我又順便可以返去同 d病友傾下計,其實我真係幾鐘意返醫院架,因為除左屋企以外,唯有果度既人係唔會帶著 歧視既眼光望我。我留意到有個頭髮到膊頭,唔多似有病既女仔同朋友響度坐(哈,我 對眼唔係望靚仔就係望靚女),心裡暗暗想「佢就好喇,無病無痛又靚女喎,如果我好似佢 咁就好喇。」嘻,不過都無得唔扺得架喇。然後sandy 姑娘忽然拉住果個女仔過黎,話我 地性格都係差唔多,所以要介紹我地認識,佢叫做嘉嘉,今年二十一歲,換完骨髓大約一 年八個月,哇....原來佢六個月就可以出街,未夠一年就返工喇,而且一直都無排斥, 希望我可以同佢一樣,可以無排斥,又唔復發喇,我真係好想過返平平淡淡既生活,多過想 繼續做風雲人物。臨走前我地仲交換左icq ,嘻,好開心又可以識到同自己差唔多年紀既 病友。

之後另一姑娘又叫左我入去傾計,我成日聽到有人提起袁姑娘,但今次我都係第一次真真 正正同袁姑娘講野咋,佢問我今日係咪唔舒服喎,嘻,我咪如盤托出,話俾佢知囉,之後 我地又傾左好多野,佢問我有d乜野擔心,我咪話擔心第時無bb囉,佢就同我解釋停左抗 排斥藥之後,食番d荷爾蒙藥,生理就會回復正常,但都有少數人會回復唔到,嘻,即係 話第時我都有機會有bb喇,開心到想喊呀,因為我真係好鐘意 待細路仔,嘿嘿嘿。另外我又同佢講,我....覺得自己好樣衰,塊面又生左好多小毛毛, 成個賊咁既樣,佢又安慰我,遲d唔食藥,自自然然會好d架喇,嘻,希望快d好番喇, 我仲要出去行走江湖架嘛,好多兄弟等我出去同我洗塵架,嘿嘿嘿(叉腰仰天大笑)。

其實我舅父仔好後生架,三十幾歲咋,仲好有型架,嘻,佢今日同bass姐姐一齊黎,bass 姐姐係做保險經紀,我好鐘意同佢傾計架,因為我覺得佢唔會當我細路仔囉,佢之前睇過 我網頁,佢同我講估唔到"我都識咁諗野喎",嘿嘿....我地呢d細路係鐘意扮下老積架喇 。之後舅父車左我同媽咪去佢屋企坐,舅父住響旺角近海皮果度,佢屋企好靚架,勁似宜 家傢俬d示範單位,因為係一個人住,所以無間房,咁就顯得更加闊落喇。我覺得最特別 係廳中間放左一張矮矮的四方桌子,我地三個人就圍著桌子的坐在地上,一路聽住雀巢咖 啡首廣告歌「意猶未盡」,一路品嘗舅父既蒸漏咖啡,我飲慣左即溶咖啡,所以總覺得蒸 漏咖啡的味道怪怪的,我地仲食左媽咪煮既鍋貼,不過我比較鐘意食煎得脆脆的,嘻,細路仔係咁架喇。

窗旁邊有一張玻璃桌子,上面放左一個VAIO既薄mon,一個VAIO keyboard,仲有一個VAIO 既mouse....哇.....勁呀,一set架,我呢個連線女皇梗即時飛過去,哇....window me呀 .....個mon仲要係闊銀幕果種,我屋企係上有線寬頻,所以好慢,但舅父係上網上行架, 哇....真正極速既享受呀,響呢度睇自己個網都好似特別靚d咁架,玩下電腦時又可以望 下街,因為呢度係六樓,所以望得好清楚,前面又無起樓,可以望到好遠好遠,又望到好 多人放學行番黎喎,哇....好正呀....哇....(我個口就黎甩"較"喇)如果第時有錢,真係 要買番部番黎,上網上足二十五個鐘都似。

我地仲玩舅父部健身單車,哇....好好feel呀,如果有得一路聽歌,一路踩,你話幾正。 我好似一個鄉下婆咁呀,嘿嘿,真係玩到不亦樂乎,舅父因為有腳傷,所以短時間都唔可 以踩單車住,所以就話借俾我喇,不過太大部,所以今日拎唔走呀,要等呀哥或者呀爸得 閒黎車,嘻嘻,今日真係好開心呀。如果一直響有品味既環境下生活,一定會培養出一個 有氣質既人呀....(一邊幻想自己有宮庭式生活,一邊像少女漫畫的女主角般,兩眼閃出星 星,仲要有粉紅色碎花襯底,完全係羅你命)

 

三 月 二 日 至 四 日
好人無好報
放響廳果部電腦,係1999年年頭買架,買左番黎咁耐,除左深夜時份,會趁我打緊日記又 無save時突然hang機,同我玩下之外,我同佢既關係都唔差既,有時我都搵d正既wallpaper 番黎,同佢扮下靚靚。呢排開始部機成日都開唔到,明明係有電架,結果等左一陣又開到 喎,初時以為佢週期失調發下皮氣,點知前幾日就開始,等幾耐佢都唔肯開喇。

我呀哥搬走左部電腦俾佢朋友肥基整,咁我就唯有用notebook上住網先喇,用左成個星期 都好地地,所以部pc整耐d都無乜所謂。果部pc足足整左二千幾蚊,哇....雖然唔係我俾錢, 但我都好肉痛呀,番左黎之後又上唔到寬頻喎,叔叔上黎幫我整,但都整唔到,唯有叫番 呢部電腦既經手人肥基上黎整喇。

唉....d高人係忙d,結果等左幾日先上到黎整,因為佢係放工先黎,所以黎到都成十二 點幾,我又緊張部電腦,所以成晚坐響度睇佢整,結果三晚都整唔好,其實都無乜所謂, 因為我仲有notebook玩,不過網頁既野同好多重要野都響pc,點都會緊張。

福無重至,禍不單行,我一定係破壞王托世,到部notebook又玩突然死亡,今次仲要係開 唔到機,唉....灰到暈呀,唯有用廳果部pc上住56k先喇,連線女王怎可以一有無得上網 喎。部電腦跛左隻腳,我又心急想肥基快d上黎整番好喎,但佢就一日堆一日,本來講好 有一晚凌晨兩點上黎,結果我等到三點,佢先話唔上,好....高人嘛....係大牌d既,不 過得佢整得好,咪唯有忍下囉,佢話第二日放假,一早上黎,咁我就歡天喜地去訓覺,結 果第二日我就由一朝早,等到佢夜晚....最後....係甩底。果一刻我真係好嬲,因為notebook 已經死左,pc又跛左隻腳上唔到寬頻,求極人地都唔肯幫,應承左黎,但結果又甩左我兩 次底,呢個人真係太過份喇,我仲記得剛剛有電腦時,叫過佢黎整機,點知佢就copy左我 個icq list走,冒認我send massage去鬧我d朋友,之後仲整張三級相上網頁,sned俾我 icq fd,話網頁入面既人就係我,我知道玩我既人就係佢,之後我都無嬲,仲教佢整網頁 ,佢問我借乜我都借俾佢,點知原來好心係無好報架,我當人地係fd,點知人地就當我白痴。

佢甩我底果晚我好嬲,我呀哥又要幫實肥基,佢仲要對部pc發皮死,我即時好緊張保護部 pc,之後我呀哥又推到我彈開,佢識發嬲,我都識嬲架,但佢嬲就可以打我,咁我嬲可以 打邊個呀,我已經覺得俾人玩架喇,而家仲要受呀哥氣,有無搞錯呀,我呀哥次次發癲都 可以唔理d野係幾多錢買番黎,好豪咁一野打爛去,咁點解我唔得呀!我好嬲咁走番入房, 一野掟爛左呀媽響宜家五百幾蚊買番黎張椅,我憎左呢張野好耐架喇,一d都唔好坐,又 迫人坐,我發癲狂嗌狂喊,我真係好嬲呀,佢無病無痛就可以打我,又或者走左去,但我 呢?我就由細到大淨係俾佢打,心情幾差都無能力走左去,佢發皮四就可以用呀媽買番黎 d野出氣,我就樣樣都唔捨得整爛,心痛呀媽要洗錢,嗚~~~~個個都蝦我,蝦我病。

果晚我連藥都無食,心情超級差地睡,第二日一起身我就唯有繼續用56k上網,但好多野依然都係用唔到,爸爸話 今晚帶個高人上黎幫我整,哈,好囉,我今次真係超嬲,我寧願洗晒部電腦d野,都唔要肥基整, 而家有人肯幫我整,即係唔洗再對肥基客氣喇,佢都玩得我耐喇,我即時打左個電話佢鬧佢,講完即時收線,呼....總算下左啖氣。

夜晚爸爸就帶左個朋友上黎整,不過因為我唔小心洗左d野,所以搞到好夜都整唔好部notebook ,而個高人就響電話度同對方講「佢個千金又洗左d乜乜乜呀....」,千金前千金後咁稱呼 我....唉....高人係串d架喇,鬼叫有求於人咩,如果俾我識整都唔洗求你喇,仲要笑住咁俾你串。

三 月 五 日 星 期 一
覆診日
星期一覆診係分上下兩場,中場醫生會休息一粒鐘,所以下半場睇果d好唔扺。我地今日 又約埋住響藍田既呀琪一齊去,咁又可以share 番車費喇,不過佢唔想等下半場先睇,所 以就叫我地早d去接佢,哇....七點要起身喇,平日都無咁早起身既,所以無乜食慾,淨 係食左四粒公仔牛肉,咦....生竹牛肉無「急汁」邊好食架,所以就連埋d「急汁」一齊 蒸,咁先食得咋,因為乜都要過火嘛,之前我食腸粉又諗唔起可以蒸豉油喎,咪叫工人煮 囉,哇....倒晒成碗豉油落個鑊度煮,煮完d水蒸發左一半,所以鹹到死,一d都唔似豉 油呀,唉....想食得好味d都咁難。

雖然今日要七點起身,對平日十二點幾起既我黎講,好似好早,但其實我又有乜所謂喎, 因為七點醒同九點醒,都係未訓夠架喇。嘻,媽咪又俾我唔戴口罩呀,既然唔戴口罩,見 到個樣喎,所以即刻著得in番d。食完野之後林先生就打電話黎,叫我地落樓出發喇,我 地又係去接呀琪同佢先生,再一齊番瑪麗。

嘻,其實呀琪上左車之後,我都即刻戴番個口罩,因為怕俾呀琪話我嘛,之後番到醫院, 咁多病友都戴,我就更加唔敢唔戴喇。我地響覆診果度坐,然後有一個女病友坐左響我 隔離,佢不停咁咳,而且媽咪上次話佢個身有陣好難聞既味,所以搞到我好驚,但我無 喇喇走開又好似好明顯咁喎,我愈坐愈驚,果個女人剛剛換完骨髓出黎就去街架喇,仲 食麥當勞添呀,哇....講到明起碼半年唔俾出街,九個月唔俾食街野架嘛,佢就樣樣做 齊,哎呀....好恐佈呀佢....之後媽咪就話同我調位,呼....調開左都無咁驚。 今日要照肺呀,去到見到有兩個懲教署既職員,同一個應該係女童院生坐響度,之後有 個猥猥瑣瑣既男病人響度問懲教署個職員「佢係咪犯錯呀?(原文輯錄)」,哈哈哈,我 真係好想笑呀,點解佢講野係語体文既?d懲教署職員個樣cool到震,梗係唔理佢喇, 哈哈哈,頂癮。我入去照x光果陣,放左d衫入媽咪個袋度,照完之後我咪拎番件衫換 囉,一路換一路聞到好大陣咖啡味,哇....原來係呀琪俾媽咪包咖啡粉既香味呀,我放 一陣件衫入去之嘛,咁都感染到喎,好香呀....

今日我上半場就睇到醫生喇,唔洗等到傻,我問醫生食唔食得紫菜、朱古力....通通佢 都話唔食得,之後我又問去唔去得少人地方行街,佢又話唔去得,咦....其實問黎都多 餘既,因為個個姑娘講既野都唔同,姑娘同醫生又唔同,總之乜都係一個話得,一個話 唔得,呵~~我都幾少理,呵~~總之記住晒食得同做得既野,如果又有第二個話唔得既話 就唔理,嘿嘿,為食嘛....

因為呀琪要「聞氣」,所以我地自己走先,所謂既「聞氣」,其實係要吸一D預防白肺病 既氣体,不過普通人吸得多,到左真係有白肺病既時侯就會好難醫,所以聞氣通常都係幾 個病人入晒一間房入面聞,家人同姑娘都唔會入去架。我響醫院都聞過一次,哇.. ..果次真係幾難忘,因為果時又想嘔喎,但仲要塞條管入個口度,不停用口呼吸,直到 吸晒D藥為止,一路吸個口就一陣藥味....吸完個口成日都係果陣味....嘔....個個都 係三個星期要吸一次架,不過扺抗力好既話就可以轉做食肺藥,嘻,好彩我有得轉咋, 唔係吸到塊面變左藍色都似。

番到屋企見到個網頁計數器壞左,ERORR晒,即時心急如焚,因為尋日有成361個人呀, 係吉場有史以來最多人既一日,但今日就跪低左喇,死喇....我又登入唔到個ACCOUNT 喎,驚到我面都青,怕俾人DELET 左,雖然可以申請過另一個,但我一D都唔記得總人 數係幾多幾多,我覺得果個數字係好重要架,因為佢代表左吉場既歷史,我又唔想段估 作個數出黎喎,因為都唔係真既,如果真係救唔番,我寧願從零計過喇。好彩夜晚又無 事喇,呼....驚左我一日呀。

三 月 六 日 至 十 二 日
大狼狗咬羊
之前個計數器壞左,最尾又整得番,雖然係虛驚一場,但已經嚇到我反晒白眼架喇,如果 俾佢再嚇一嚇,真係命都短幾年呀。好彩師父邦邦出馬,救我一命,嘻,佢搵左個cgi 程 式番黎幫我整左個計數器呀,我俾左我放cgi個account,同平時網頁個account 佢幫我整 。第二日訓醒,一上吉場就....哇....我d計數器既圖圖唔同晒呀,仲要變左粉紅色,襯 晒個網,哇....好開心呀,嘻,邦邦真係厲害呀,好似聖旦老人咁偷偷幫我個網頁整好, 我個祈願版版,同右下角個線上人數計都係佢幫我整架,嘻,佢好叻架,係教我整網頁既 師父仔兼好朋友,連html咁難佢都教到(嘻,當然另一半係因為我聰明喇),嗚~~~~好滾動 呀,今次佢又從火海中救我脫險喇....(好似誇左d,不過都近架喇)

我唔敢亂搞個計數器呀,因為d cgi好惡既,少左一點都load唔到,哇....如果咁快又俾 我整壞左,簡直係有辱師門,無面見師父呀。之後師父同我講,可以改做俾人申請果種, 哇....好似好好玩咁喎,既然下左旨,我咪放膽去試囉,改下呢度改下果度,嘻,整左一 日,雖然好簡陋,但都可以面世住先喇。我見人地d申請計數器,個個都有規則架喎,我 響個file入面搵黎搵去都搵唔到,但我諗個個都係一樣,所以就求其去左一個網度抄,仲 有我係用html寫網頁架,唔識點show原始碼,所以無計喇,一定要抄人先得。臨訓之前我 個計數器又壞鬼左喎,但因為太眼訓喇,所以用住之前響bika house申請果個先,於是就 安心地訓覺覺喇。

第二日一起身,發覺個計數器error晒喎 ,死喇,前一晚明明無事架,但我都心知不妙, 於是咪試下去登入囉,又登入唔到,唔通俾人洗左?尋晚臨急臨忙整kika個申請器,但又 唔記得放人地logo,可能真係俾人洗左喇,但佢都幾絕喎,一野就delet 我個account , 好彩之前我有抄低個總人數,唔係咪一鑊俾你玩死?算喇,都係自己唔好先既。

我個email 發現有兩封新信,有一封個主旨係「你都好過份喎!」係bika寄黎,我心諗, 唔係喇卦,唔記得放你個logo咋,我都delet 左我喇,唔洗落閘放狗呀?信既內容大概係 講我既規則同圖都抄佢,話我非常過份,如果唔改就周圍唱我個網喎,佢既態度仲好惡同 好無禮貌,我覺得其實規則個個都差唔多,我又唔係見你果個特別好先抄你,而且我又唔 信佢果d係自己作架,佢咪又係抄人,我d圖又唔係響佢度拎,就算係又唔係佢整既,係 都係d日本網站鬧我喇。另外一封信我屎驚過,竟然係一封毒郵件,又係bika小姐寄俾我 既,哇....我乜野都無講過,你就係咁吠我,仲要send埋毒過黎,洗唔洗咁誇呀?我又唔 係有心抄到你,我又無講過我唔改,而且我整左一日,根本就未整好。好嬲呀,覺得俾人 屈,仲要話周圍唱我,哇....好黑暗呀,佢好似黑社會呀。我聽晒LMF 成隻碟之後就好好 多喇,算喇,佢要唱咪唱囉,公道自在人心,咪當佢同吉場賣下廣告囉,呵~~

為左唔想俾騷擾,所以我即時學用邦邦俾我果個dreamwaver,整左一日,我終於改晒喇, 拿拿拿,我即改架,証明我真係無心抄佢喇。之後我繼續收到佢既信,每次都係買二送一 ,一封鬧人一封就係毒,佢不斷追住我黎咬,我都改晒喇,佢仲係都要鬧人,佢又話封野 無毒喎,但真係屎驚到有毒喎,我差d就信佢開左喇,段估hotmail 都唔會扼我卦。佢話 我有d細節仲係抄佢喎,哇....話明係細節,一個豆號又話我抄你、一個句號又話我抄你 ,唔係喇 fa,我咪唯有叫佢點列出黎俾我改囉,因為佢要d乜。之後佢就叫我自己抄番原 註,哇,佢所謂既原註得一、兩句咋喎,我就真係唔信佢全部都係自己作呀,俾佢煩左幾 日,我淨係覺得佢好煩,無事搵野黎搞,又無禮貌,今次真係貞子纏身呀。佢仲要我delet 留言版上面,對佢不利既留言,哇....講過既野唔算數,我仲洗出黎行既?哇....香港有言論自由架喎。

其實同一個意思,響中文字入面,最多都係得幾個講法,而且我又係寫中文,佢又係話寫中文, 唔係咁樣就叫抄呀?究竟係咪要我改晒做非洲話,佢先會話我唔係抄佢呢,呢一刻 ,我淨係想息事寧人,因為佢真係好似貞子。

自從收左佢好多毒email之後,我個email account開始成日開唔到,之後....仲話我密碼 錯誤添,死喇....唔通係貞子?哇....你話我抄你規則,就勁send毒黎,仲hack埋我account ,如果我係抄你個網,你咪hack埋我個網,兼踩上門淋油寫大字?變態。



 

睇左未呢<---->呀咩昔日發傻<---->跟住點呀

© 呀咩吉場 http://meredith.com.hk