|
::::::星期二::::::二零零一年十一月二十七日::::::
今日對我黎講係一個非常重要既日子，我會去一個一直好想去好想去既地方，可能會好辛苦，但我相信自己一定可以做到。
八點幾我就起左身嚕，行山仲走去化粧，真係好似離譜左少少，但而家咁既面色，唔化粧我真係唔敢出街架，無所謂喇，橫掂陣間行行下個粧都會溶架喇，哈，化左其實都等於無化，咁就一於化左先算喇。約左呀劍十點響彩虹地鐵站等，我九點撘八過少少先出門口呀，勁驚遲到，好彩一落樓下就有綠色小巴，撘十、十一左右就落到官塘撘地鐵喇，嘻，三個站就到彩虹，剛剛好無遲到。
其實呀劍係我既網友，我都係第一次見佢咋，計埋bee狗，佢係我第二個單獨約出黎既網友，其他網友多數係吉場ｄ朋友，所以都係成班一齊見丫嘛。係唔係搞笑左ｄ呢，第一次約人就去行山，去埋ｄ荒山野嶺既地方，哈，可能係我太易信人卦，感覺上佢係好人囉，呢ｄ就係年青人既弱點喇，咁好彩呀劍都真係好人黎既，係我好彩囉，俾呀媽知道實鬧死呀，哈。原本今日bee狗都黎架，可惜佢尋晚發燒，佢病到唔顏六色，出到黎見到佢就死咁既樣，我都唔忍心喇，所以最後都無迫佢黎，希望兩條友去行山都唔會悶喇。
我一出閘就認得呀劍喇，佢都認得我，睇過相架嘛，之後我地就一齊去撘小巴入西貢市中心喇，途中我地傾下呢樣傾下果樣，咦？睇相唔多覺，原來呀劍都幾靚仔架喎，哎呀，一見靚仔我又唔敢望人喇(係唔係好開心呢，其實我當做下善事咋)，哈。電話響，嘻嘻，係林叔叔呀，之前我地成日搵佢地成班的士叔叔接我地番醫院架，不過自從哥哥無做野之後，都無再聯略佢地嚕，之前陳叔叔同林叔叔都打過俾我架，問我地點解咁耐唔call佢地，當然佢咁問既意思唔係話點解我地唔幫襯佢喇，佢又要俾八折我地，都唔賺得多，佢地係其實想問候下我既情況，嘻，我好鐘意佢地架，以前撘的士都有傾有講架，佢地仲話我比起其他病友開朗得多，哈，我多野講丫嘛，今日林叔叔打黎又問下我決唔決定入院換骨髓嚕，我知佢係關心我想我換，我唯婉轉一點咁話唔換骨髓都有好多其他方法既，嘻，林叔叔仲話得閒用架的士帶我遊車河、睇戲添呀，嘿嘿，林太知道實吃醋呢。
十點半左右，我地就到達西貢喇，之前日日響醫院都係食麥當當既早餐，而家真係諗起都驚，可惜方原都無大家樂、大快活，我又唔多信得過地道茶餐廳既水準喎，所以...咪又係麥記囉。沿途呀劍講起一樣好令人震驚既事，佢話睇左我日記之後，覺得我鐘意呀龍喎，下？唔係喇fa，我雖然唔會將自己既事100%公開，但日記係自己寫低自己感受既記事簿，我係無需要響日記講大話，而且我知呀龍都唔上網既，如果我真係鐘意佢我先唔怕寫出黎呀，我做人無咁鬼鼠，亦都唔會響自己既網頁講大話，如果我真係唔想俾人知，我唔寫出黎咪得囉，點解要放上網俾人挑剔喎，冷靜ｄ冷靜ｄ...既然呀劍咁講到，可能我做出黎既野真係有可能令人誤會喇，雖然呀龍有時會打俾我，但我都擔心佢誤會(主要係佢唔會鐘意我，我驚佢以為我鐘意佢果下先死丫嘛)，所以我都成個月無打俾佢嚕，但我對朋友好，係問心無愧既，我有責任令佢地開心，亦會為佢地擔心，我知自己咁做係出於友情就得喇。
俾呀劍嚇一嚇，真係驚無左個好朋友，搞到我都無晒胃口，個早晨全餐食得果少少咋，食飽飽之後呢，我地就去買野，買乜野？哈，最老土果ｄ囉，我地話去到西灣放風箏呀(放小魔飛機？註：小魔icq個名叫風箏)，我未放過唔識揀架，最後我地冒住俾阿富汗打既危險，買左隻美國國旗既風箏，希望唔會有隻阿富汗國旗風箏轟炸我地喇，咦？呢度仲有肥皂泡賣呀，既然老土，就要老土到最盡，好！我同你成支哽左佢，唔係，係成支吹晒佢！下一站我地就要去惠康買定ｄ乾糧同飲料喇，綠茶、一包「cheap實開」、一條oreo...夠喇卦。買晒野之後我地就去等穿巴喇，哇...如果錯過左呢班車，要等到兩點半呀...真係好彩我地無遲到，站附近仲有兩個人，一個係肥佬，另一個拎住鐵鏟，類似大陸ｄ泥水佬，佢地應該都係等緊車去西灣。十一點半，車好準時就到左嚕，我地四個一上車，司機就開車，十五蚊一位呀，真係同通宵小巴有得比。我初初以為架車入到北潭涌架咋，因為萬宜水庫係禁區，唔俾車入架嘛，但原來呢架車可以入埋去，唔怪得知咁貴喇。因為山路比較窄，所以係單線雙程行車，咁巧合地又有架大工程車響度舖緊路，哇，睇個勢仲要係有排果隻，等左一陣之後，原本跟住響我地後面架私家車都索性掉頭走嚕，唉...我地個司機唯有將架車停響工程車睇得到既地方，等人地知道「喂！我地等緊架！」，但結果前前後後都差唔多等左四個字，無計喇，人地舖緊路，舖完又要等個地下乾。
十二點鐘鬆ｄ，穿巴就到達今次我地既起點----西灣亭喇，咦？原來西灣亭就係我地上次睇流星雨附近果個亭呀，哈，忽然有ｄ感觸，原來我一早已經到過去西灣既起點喎。落車呀劍先發現，咦？支水呢？九成九係漏低左響麥當當喇，哎呀，唔緊要，我有一支綠茶，慳慳地兩份都夠既。同我地同車既兩個乘客，一早已經向西灣既山路行左去嚕，而我同呀劍就慢慢行，今日天氣真係好呀，又唔凍又唔熱，有少少太陽曬落黎暖笠笠，行行下見到路邊有一條小路，生滿晒樹咁，似乎都好耐無人行過架喇，再望真ｄ，哇！好驚呀，頭先響車拎住鐵鏟果個男人，響條小路入面唔知做乜呀，唔通掘緊寶藏？定係...藏緊屍呀！哇，我乜都見唔到呀，唔好殺人滅口呀！即刻捉住呀劍，快ｄ走喇快ｄ走喇，哈，呀劍，我救你一命喇，好彩佢無追上黎，哈，小心ｄ好嘛，呢個世界咩人都有架。咁我地一路行一路傾計，呀劍問起我媽咪做乜喎，我咪話我媽咪係賣繩結架嚕，然後佢就話佢以前響青衣城都見過有一間，下！果個咪即係我媽咪囉，哈，呀劍話佢仲幫襯我媽咪買左隻蝴蝶仔喎，哈哈，係唔係架，呢個世界真係咁細？行下行下，哇，好靚呀，右邊係好靚好靚既萬宜水庫，ｄ水係綠色架，加埋陽光射落黎，真係想呢世都記住呢一幕呀，嘻，而家唯有用相機記錄住先喇，之後我地又繼續慢慢行，行左好耐之後，前面係一條好長好長既樓梯，哇，唯有行幾級，又抖下咁喇。
行完長長既樓梯，又係另一番境像，原來上山既路行晒喇，嘻，為左獎勵自己，所以又響度抖下、影下相先。抖完我地就開始落山喇，哇，離遠已經可以望到少少西灣喇，好緊張呀，終點在望，而且又係落山既路，所以行得特別快。行行下，竟然見到鐵鏟響我地後面呀！哇，好驚呀，即刻再行快ｄ，但都唔夠佢快，條路又窄喎，當佢經過我地既身邊時，我真係好驚佢會一野扑濕我地架，好彩佢無做到...但點解佢行得咁鬼快既呢，哈，可能係我地抖得太多，所以俾佢追上左。前面有幾個鬼婆同細路仔行緊黎，佢地...仲養左隻小黑狗，哇，你唔好過黎呀，我嗌架，隻小黑狗可能就係見我驚到震晒咁，特登走過黎玩我，正衰狗！走開呀你，嗚...佢唔走開不特止，仲跟住我隻腳，大佬呀，我隻短褲架，你係咁哄個頭埋黎，一定係我隻腳香得滯，所以佢...忍唔住
左一下...哇嗚...你ｄ口水呀，佢個主人而家先黎制止，唉，我差ｄ俾你隻狗食左喇，結果果一撻濃度極高既口水積，維持左響我隻腳好耐都唔乾。
繼續行繼續行，就快就到喇，呀創話我咁驚狗，陣間要小心喎，哇...唔好嚇我呀，平時響市區ｄ狗通常都掂行掂過唔理人架嘛，我諗呢度ｄ狗都係咁卦。經過有幾間簡陋既屋仔，呀劍話呢ｄ係租俾人宿營架喎，哈，凍天都好ｄ，我諗夏天一定勁多蚊呀，可以響度住都唔錯，呢度無街燈，又遠離市區，夜晚一定好free，好多星星呀，好想可以同成班朋友黎住番晚呀！
行下講下又睇下，愈黎愈多屋仔，有ｄ出面放左幾張台椅，順便做埋餐廳，不過可能呢度偏僻喇，相對飲品食物價錢都較為貴，其實又貴得有道理既，人地都係響西貢買左，撘十五蚊車去到西灣亭，再用兩隻腳行入黎，有血有汗架。忽然呀劍講「你真係好彩，今日ｄ狗訓晒覺。」，狗？周圍都無狗呀，但睇真ｄ，原來真係好多狗訓晒響路邊呀，不過佢地唔郁，所以我無留意到咋，呼...真係好彩。
一下一下有拍子既浪聲，藍天、白雲、溫暖既陽光，我一步一步踏上西灣既沙上面，果種感覺真係好似發緊夢，我終於黎到我一直想黎既地方，海風一陣一陣咁向我吹過黎，我唔係發夢呀，我真係到左喇，呢度同我想像之中一樣咁靚，就好似麼麼茶既沙灘一樣。沙灘上面有好多小蟹洞，洞側邊有好多個小沙球，海風一吹，小沙球就會響沙上打滾，哈，我從來去過既沙灘都唔及得呢個咁靚、咁自然，一ｄ都唔人造，係最自然最自然，好感動呀，點解香港會有一達咁好既地方，但我生活左十九年終於有機會見到，我真係好鐘意西灣，但我又覺得唔係鐘意咁簡單，雖然我唔熟識呢度，但我覺得同佢好有感情，我地好似一直都相識，到左今日終於相見。原來有ｄ風景，有ｄ感覺真係唔可以用筆墨形容，只怕會講得唔夠貼切、唔夠好，但願你都可以親身踏足這裡，然後你就會明白。
一輪大呼小叫之後，興奮既心情終於平伏左少少，哈，我地專登做左一個，響沙灘上大嗌既經典動作影相，唔知影出黎之後夠唔夠相像之中老土呢。其實除左西灣之外，我仲好希望可以一到鹹田架，我見過一ｄ介紹既圖片都會影住鹹田既一條小木橋，我就係好想去行下果條木橋喇，不過呀劍話由呢度行過去鹹田，再由鹹田走的話會好遠，驚我頂唔順喎，咁又係，有機會黎到西灣，我既心願已經完成左一半架喇，或者下次會再有機會去鹹田呢。既然決定左唔去鹹田，咁我地既時間就鬆動好多喇，呀劍就拎隻風箏出黎放，雖然好大風呀，一放手隻風箏就自己飛起嚕，不過放到咁上下，又唔知點解會跌番落黎，呀劍話係因為ｄ風向飄忽喎，上到去又俾ｄ風吹番落黎，見佢放極都唔成功，我咪周圍行下，睇下沙灘上面有乜野得意野囉，原來靜心望住ｄ蟹洞，會見到有蟹仔好高速咁跑出黎，再走左入第二個洞咁架，不過速度真係太過快喇，所以要好留心先見到嚕。行下行下，見到有一舊半透明既野，係水母黎架...應該係剛剛俾海水沖左上黎，然後死左響度嚕，我八八卦卦踢下佢，咦...感覺好似踢緊一舊大既"o者"喱咁囉，哈，響水就見得多，真身都係第一次見咋，可惜已經死左喇。繼續行，有時會見到一ｄ死魚，或者又係死左既水母，或甚至係魷魚筒，雖然屍駭偏野，不過點都好過公眾沙灘勁多垃圾呀，相比起呢度既屍駭仲比較可愛。沙灘盡頭係三個好高好高既岩石洞，但原來沙灘後面仲有一個湖架，哇呢，好靚呀，太陽剛剛射落去個湖度，湖水係閃閃下既金黃色，哇...我真係不自覺咁俾呢個畫面迷住，一心諗住行近ｄ，可以觸摸一下金色既湖水，點知...我而家先發現，沙灘上面有一隻中等身型既黑狗，向住我呢個放向行過黎，狗呀...救命呀！佢既目標真係我呀！係我呀！嗚...三米、兩米、一米...呀！！！！！佢起勢咁哄個頭過黎聞我部相雞呀，唔食得架，唔好咬呀，新買架，果一刻我真係有衝動放低部相機俾佢，然後我就逃離現場，不過佢知道左部相雞唔食得之後，都仲跟住我，嗚...我又唔敢跑，唯有狂嗌，但我走得太遠喇，呀劍掛住放風箏都聽唔到，我又擔心我嗌得太難聽，會嚇親隻狗，然後吠我，嗚...如果佢吠我，我諗我嚇暈都似，嗚...終於我驚得滯忍唔住喊左出黎，衰狗，見到我喊仲要跟住黎嚇我，好彩我同隻狗糾纏左幾分鐘之後，呀劍終於聽到我既求救，走過黎扶住我行，擋住隻狗，不過隻狗都仲係跟住我地，嗚嗚嗚，頭先嚇死我喇，諗起都腳仔軟呀。
之後我都唔敢再一個人走再去嚕，寧願悶ｄ睇住呀劍，不停重複放隻風上去，又跌番落黎，嘿嘿，但其實都幾欣賞佢既恆心既，呀劍話想放隻風箏上去俾我玩喎，嘻，感動呢，但好似放極都唔成功，放放下又有黑狗走過黎，哎呀，咁橋呀劍隻風箏又跌左落黎，隻狗就咁施施然坐左響條魚絲上面，初初我一見隻狗行過黎，都驚到彈開架，但見佢坐定左，又覺得好搞笑喎，呀劍因為唔怕狗，所以好有耐性咁坐響隻狗面前，慢慢想扯番條魚絲出黎，但隻狗一ｄ都唔覺得佢阻住我地，仲響度Ｒ痕添，嘿嘿，好彩最後都收得番隻風箏。
頭先想行過去湖果邊，但因為有隻黑狗，所以無去到，有ｄ唔甘心，所以今次叫呀劍陪我行過去，見ｄ沙咁幼，所以索性除左對鞋喇，哈哈，好free呀，我地仲好似荷里活ｄ明星咁，響沙上面打手印同簽名添呀，不過太大風喇，一陣就吹走左個字，所以我地要以最快既速度寫好，再影低佢，哈，夠晒經典喇卦。之後我地就赤腳慢慢行過去，嘻，我諗停拎ｄ肥皂出黎玩，但太大風喇，唔落我吹，佢自己都飛ｄ波波出黎，哈，好野，慳力水，好勁呀，勁多泡泡，開心到我狂笑，好似個細路咁，但係...當我地就快行到去個湖既時候，我就再笑唔出喇，今次，有兩隻黑狗跑過黎呀，呀...上次1vs1，今次2vs2，死喇，好驚呀，即刻捉住呀劍，果兩隻狗又走過黎哄我地，然後呀劍就拎ｄ肥皂出黎，好彩兩隻傻狗一見ｄ泡泡就開心到追住走左，但佢地係走左去個湖邊，即係...我始終都係無得去個湖度，唉...其實諗諗下，可能個湖係佢地既地頭，所以每次當我地想行過去，佢就會走過黎，我估架咋，咁我唯有放棄喇，離遠影左張相算嚕。當我地走既時候，果兩隻傻狗竟然打起上黎(其實係玩緊)，打還打，你唔好打到過黎先得架，佢地一路打，一路跑，突然衝上黎響我地前面互咬喎，哇，嚇死我呀，好彩佢地好快又跑左去第二度玩，呼...西灣係好靚，但太多狗喇，我諗我要練到唔驚狗，我先可以再黎。
著番鞋，我地行過去西灣既另一邊，哇，原來呢邊都有一個湖架，地圖上面叫雙鹿石澗，ｄ水好清好清，可以清澈見底架，一見到我就急唔住除鞋走落水喇，哇，好凍呀，哈哈哈，好舒服呀，嘻，我地梗係要好老土咁玩下踢水喇，響水玩完一輪，有ｄ累嚕，響湖邊坐坐下，真係好想響度訓覺呀，時間已經係三點幾喇，其實都差唔多係時候折返西灣亭撘車走嚕。我地見到有一隊行山人士經過，佢地望住我地兩個喎，咁我地咪笑住同佢地揮手嚕，呀劍就問佢地係唔係鹹田，佢地話係呀，呀劍就話不如一齊行嚕，佢地就話好呀，一路行一路等我地，哈，於是我地就傻傻更更咁著番鞋，匆匆咁想追上佢地，但我體力太差喇，又唔行慣山，淨係見佢地一支箭咁飛走左，哇...佢地真係行得好快呀，但原來由西灣行去鹹田既路都幾辛苦架，因為無乜樹好曬，而且又係上山既路呢，呀劍見我行得咁辛苦，就提議不如都係唔好去鹹田，但眼見已經行左一段路喇喎，放棄，行番轉頭咪好唔扺，於是就死頂落去，行左兩個山頭之後，我地仲要行過一段沿涯既路，哇...側邊又無樹喎，一望落去，即刻覺得失重心，好似想跌落去咁，真係好恐佈呀，段路仲要係幾長下，呼，好彩...有驚無險，我地終於到達鹹田喇。
哇...好感動呀，呢度既沙比西灣仲要幼，感覺比西灣更加自然，而且仲有我最鐘意既牛牛呀，有幾隻牛牛懶羊羊咁響草地上面食草，哇，好靚呀，可惜時間關係，我地唔可以響度逗留太耐，但係鹹田既橋，我一定要親身行一次，嘻，條橋好恐佈呀，雖然側邊有條繩可以扶住，但條繩太低喇，而且有時又會離開好遠，好驚險呀，條橋既木板好窄，真係有少少行獨木橋既感覺，好驚呀好驚呀，我唔想跌落水呀，行到一半，咦？我發現左ｄ野，我扶住條柱彎低身睇真，呀呀呀！彈塗魚呀！有兩隻彈塗魚響舊石上面，哈哈，好得意呀，睇完又繼續行嚕，幾經辛苦，我地差唔多花左五分鐘，終於行完呢條橋，然後，我地先發現原來唔係好遠，係有一條路可以過到黎呢邊架，哈，唔緊要喇，有機會踏足鹹田，仲要戇戇居居之下行埋條橋，我既心願總算係完成晒嚕。
天都開始微暗喇，我地匆匆離開鹹田，打算經過大浪凹去赤徑，撘船仔去黃石碼頭撘車走，但由鹹田去大浪凹呢條路呀劍係未行過架，所以佢都好擔心唔知要行幾遠，行之前我見到周圍ｄ山個個都高到頂住個天，心諗我應該唔洗行到咁高呀，點知...原來真係要行，嗚...我條大脾已經痛到想爆炸咁喇，唯有用手一邊按住一邊行喇，前面既路又唔知仲有幾遠，個天又愈黎愈暗，我同呀劍都好驚呀，但呀劍梗係無講出口佢驚喇，因為佢知道如果佢話驚既話，我會仲驚。死頂咁行左兩個山頭，落番山，終於到左赤徑喇，但...點解無船既，嗚...我地就估應該今日唔係假日，所以無船仔黎，咁...點算呀！無船去黃石碼頭，咪用腳行番過去囉，我暈喇，太陽都落左山嚕，全身既筋骨都隱隱作痛，尤其係大脾，好驚天黑呀，但無時間再驚喇，唯有繼續行先有可能番到屋企。赤徑雖然有好多屋，但都好似無人住咁既，經過呢條死寂既村莊，我地繼續走向山路，初初我都無咁驚，因為偶然都會有一支街燈，但再行遠ｄ就再無街燈喇，時間係下午五時多，但天已經變得深深既藍色喇，之前我都仲會不停停落黎抖下，但而家即使再累、再痛，我都唔敢停落黎，寧願行慢一點，因為我怕天黑，我怕天黑會見唔到前面既路，呀劍見我咁驚，就不停安慰我就快到喇，初初真係有一點振奮作用，但之後我已經唔再信真係就快到呢，我淨係知，仲有好遠，我好驚...天已經係深藍色，幸好仲有月亮既光，我驚會有野豬、野狗、獅子、老虎、大笨象...呀！見到街燈喇，我見到對面座山有街燈呀，我諗我地可能就快到公路喇，行到六點三左右，我地終於行到出馬路，但原來馬路係無街燈架，我地用手提電話既微弱燈光照住巴士站既巴士時間表，幾經辛苦先搵到有架車係平日開既，最後一班係六點半，哈，好野，幾驚無車呀，我同呀劍既電話，由今朝入西灣到而家依然都係收唔到，好彩無出事咋，唔係都唔知點求救，呼，我地兩個好似電波少年咁坐響馬路邊等車，哈，我坐唔低呀，因為坐到一半，大脾太痛，我要用手按住地下，伸直隻腳先坐到呀，嘿嘿，實有排痛都似，過左一陣，又有對青年男女黎等車，睇黎佢地都係行完山。
因為條馬路無街燈，所以每一次有車經過既時候，都好震憾呀，哈，好彩真係有巴士黎，嗚...終於可以番屋企喇，響車上面，回想今日發生既事，真係好似發左一場夢，我都估唔到我竟然可以行到咁遠，仲有好好彩我遇到一個好好既拍擋，呀劍一直都支持住我，有狗既時候又好彩佢響度，今日真係有笑有淚呀，好難忘，當我地打算去鹹田既時候，真係無乜點諗過後果，淨係知道好想去，哈，呢ｄ就係後生仔既衝動同不顧後果既做事方式喇，好彩我地都仲撘到尾班車出西貢。
今日真係好開心，我諗我呢世都會記得，多謝你呀呀劍，多謝你送俾我既西灣同鹹田，我會好好保存響腦入面。
呀劍事後做的行程動畫
完成心願的播放清單(羊媽媽後加)
就快到喇::::::::::::
好靚呀::::::::::::::
d浪湧緊埋黎::::::::
自言自語::::::::::::
雙鹿石澗::::::::::::
鹹橋::::::::::::::::
睇過情書既人就明我做乜喇::::::::::::
回頁首
| 
