回想起嚟,我雖說係你嘅同班同學,但好慚愧我係喺吉場先完全認識到你!!我想記得我同你同susuky係喺中四先同班,當時識嘅你係一個畫畫好叻不過就唔多出聲嘅女仔!!當時好多女同學都以為我係嗰D壞份子唔多理我,當然你都唔例外啦!!

其實我當時非常欣賞你!仲記得有一次全級壁報比賽!由設計到完成釘裝都由你全權負責!到結果我哋好似得第二or三,只知你好唔開心!!!

眨眼間就兩年,大家都畢業,各奔前程!記得有次行經太古城,知道susuky喺肯德基返工諗住去探班啦!點知我喺我舉頭找緊susuky之制,突然有把驚訝又可愛嘅聲喺度叫"咖喱呀,點解你喺度嘅?"我找兩找先見到你!你當時着住制服我差D認唔到你!!

之後工作關係都好少見囉!還記得有一日收到個同學打俾我問我知唔知你發生咗咩事,我先知你有事!當時我都四圍打電話想知你咩事!起初susuky點都唔肯講,最後佢俾咗吉場個網址我叫我自己睇!

其實我一路都想去探你,我都應承過你好幾次!不過因為我做運輸呢行,自己都唔知收工收幾點,就算收早我都唔想成身臭 汗過嚟,我唔知自己有D咩菌喺身,感受到你就唔好啦!!有幾次你出院我話去你屋企探你,不過你話唔好之嘛!!

到了01年11月你話你可以出嚟叫我約D同學,當然冇問題啦!不過我知有D同學你唔想見,所以當晚只得小貓幾隻!!雖然人少不過個個見到你都好開心!!

之後我重同你相約校慶返慕光添!!到咗校慶當日我就好麻煩噤俾人趕走,我就知你同呀連玩得好開心!!!但估唔到嗰次會係最後一次見你!!

之後我同你間中都會傾吓電話,後來我轉咗工就冇傾過電話!但我每日點都會到吉場行吓!!見到你同班網友發生嘅事!我都好開心!!

有日我唔想發生嘅事終於發生咗!還記得當時我開緊工susuky打嚟,佢仲哭緊我就心知不妙,到佢講俾我知嗰時真係接受唔到!!到我收工即刻飛奔返屋企上吉場!當時我都想唔係事實!到我翻看中五畢業嗰本紀念册先發覺原來我無俾你寫!真係好後悔!

而到你個歡送會我又嚟唔到!我都好想見多你一面!!不過有吉場喺度就等同你喺度!你雖然個人不在,但你同我嘅回憶永遠都喺我心度!!你個icq都仲喺我icq個list度我係唔會删除你!!!!我永遠嘅朋友呀咩!!!

羊媽媽,我唔係好識寫嘢!我同呀咩嘅回憶我寫咗出嚟,你都知有D感覺係筆墨好難形容!!希望唔好見怪!!嗰個係我call機已經冇用啦!我就冇同呀咩嘅合照!只有一張成班一齊影嘅卡!我 send埋俾你啦!多謝你一路以嚟撐起吉場!俾我有個地方回憶呀咩!!繼續努力!!!!雖然我冇留言但我係默默支持吉場!!!

Scottie

　

　

　

想從前 ~~~~~~~~