第一次請客

::::::星期三::::::十一月七日:::::: 尋日雖然又發冷又發熱，不過都總算無事丫，今日探過熱都無燒，一於繼續正常運作！ 上個星期六買左咁多化粧品，今日一於試下先，其實我一直都唔識化粧架，今日...係我 第一次，化好晒之後，我連房門都唔敢出呀，怕出到去俾工人笑，因為...我覺得自己化 到好似一個花旦，做大戲果ｄ呀，雖然呀麻話我化得幾好，但我都係好驚，於是打俾呀 哥又打俾呀爸，睇下佢地可唔可以車我出去，我真係無信心一個人行出街呀，結果佢地 都係唔得閒既，死喇，我約左nathya 架，而家走去落粧又好似好白痴喎，唯有頂硬上 喇，拎定副黑超出街，最多咪扮下黑超女郎。 想唱lunch k呀，nathya又響九龍城果頭番工，於是就約左佢十二點響九龍城廣場門口 等喇，因為怕凍，所以今日拎左件褸放響袋，搞到個死人藏屍袋勁重，而且佢又係單邊 膊喎，我一向都係放響左邊，搞到左邊膊頭勁痛，好似擔完泥咁呀。個膊頭已經嗌緊救 命架喇，nathya 又遲遲唔出現，唉...我呢世女最怕人遲到架喇，我手提又無電喎，咪 唯有下下走過對面馬路間麵舖門口打電話俾佢囉，點知...佢話個電話已經停止服務喇喎 ，下...咁我咪即係唯有繼續等...如是者反覆以上動作幾次，等到一點，我終於再忍唔到 喇，邊有人可以遲到遲成一粒鐘，仲要電話一直唔通架，呢間neway lunch k唱到兩點 架咋，等到佢都無用喇，唔通唱一個鐘咩...激死我喇，我決定走喇，但係...女人始終係 心軟既動物，我都係再打左一次果個停止服務既號碼，搵到佢喇...佢話佢響neway門口 等緊我喎，反肚。lunch k 就實唱唔到架喇，於是我地走去麥叔叔度一人買一個包，再 去唱happy hour。 哇哇哇，好多千嬅新歌呀，野孩子同假如讓我說下去都有呀，我地足足唱左幾次呀，而 家我先知nathya 扮虎榮唱歌把聲都幾似架，嘿嘿，笑到我死呀。原本我地諗住唱到七 點先走架，但係我個心已經飛左去第二度嚕，我好想出旺角間esprit睇下仲有無平野執 呀，仲好想去red earth買唇彩添呀...結果得番nathya一個唱，好快佢都頂唔順嚕，我 地五點幾鬆人，撘亡命小巴出旺角，原來red earth 今日last day喇，我地再試右試， 嘻，總算都買到心頭好，但esprit已經無減價喇，見仲有時間，唯有去行下街喇。 其實我成日心思思想用捷毛液架，鬼叫我對眼生得細咩，雖然媽咪有支捷毛液，但係我 都係無乜信心，因為...我實在係太過眼淺，少少野都可以喊一餐，到時搞到塊面多左兩 行藍色線，我就真係呢世都唔敢再出街喇，聽nathya 講有ｄ透明既捷毛液喎，於是我 就買左支黎試下，結果...當然係搽左＝無搽喇...點解無人話我知，捷毛液係一定要有色 先至有果個效果...可能呢個常識真係得我先至唔知卦... 七點幾我地經過旺角百老匯戲院門口，咦？咁多人圍觀既，響人群中我見到曹眾呀，原 來係拍戲，之後我仲見到夏雨同鄧健泓呀，我又有帶相機喎，嘻，咪勁影勁影囉，人群 中得我一個響度影相咋，真係有少少白痴添，鄧健泓好nice呀，見我影佢，佢特登向住 鏡頭笑喎，不過可惜我手抽筋，張相震左，嗚。事後我先知，大果同鄧健泓係識左好耐 既好朋友黎架，佢之前都成日響鄧健泓面前談及我，大果知我果日見過佢，就同鄧健泓 講嚕，估唔到鄧健泓話記得喎，雖然值得開心，話晒人地都記得有個小妹妹係度影相喎 ，不過...響呢個咁傻仔既情況下...俾人認到真係有少少尷尬(滴汗)。 睇完明星我就要撘地鐵去銅鑼灣喇，因為尋日失左約，所以我同網友既約會就推到今日 喇。好緊張好緊張呀，佢叫聖天，我係第一次見佢架，佢係我打石器時代識既朋友，佢 成日都好關照我架，近黎我寫石器專欄，講真，我寫野就叻，打機我真係傻仔一個架咋 ，佢就成日幫我搵下有咩新料，又或者修正我對石器既常識，全靠佢我先做到呢個專欄 仔咋，所以見出左糧，我就請佢食飯報答佢喇。其實我咁大個女都係第一次請客咋，錢 幾多無所謂呀，怕請得人地唔夠痛快咋。知佢鐘意食意粉，就聽哥哥介紹，話時代廣場 對面有間叫「時代雅廚」既餐廳係專食意粉架，好，一於去果度喇！ 我差唔多八點先到銅鑼灣，仲要周圍搵櫃員機拎錢喎，死喇...原來時代廣場果邊既地鐵 出口係無架，於是唯有面蒙蒙走入去百佳買左包紙巾，拎左五百蚊囉，加埋我手頭上幾 百蚊，應該唔會唔夠喇卦。聖天睇過我網頁，就梗係知我咩樣喇，但我唔知佢咩樣呢， 第一次約bee哥哥出黎，我都睇過佢張相，成個傻仔咁，所以先無咁驚，但今次...毫無 心理準備喎，我當然無想像過佢會好似竹野內豐咁靚仔喇，就算佢係同隻猩猩一樣樣都 無所謂，朋友之嘛，但...如果佢出到黎先知佢真係一隻猩猩，我都唔怕同佢去食飯，但 我怕我見到佢時第一個反應會顯得太過震驚，就係咁我先更加緊張。頭先我同nathya 響肯德基預習過一次架喇，特登搵全間野最醜樣果個，認住佢，就當聖天係咁既樣喇！ 我諗多數唔會太過驚喇卦。原來好多人約響大電視下面等架，我到左都搵唔到邊個係佢 ，諗住離遠我見到佢先既話，我就可以有多ｄ準備嘛，結果兜左幾個圈都係估唔到係邊 個，於是就企響度等嚕，無無聊聊就諗，不如陣間有人問我係唔係呀咩，我就好cool咁 答唔係，玩下佢先，然後...我見到有人行過黎，我又望住佢，佢又望住我，哎呀，我忍 唔住笑左出黎，無得玩佢添，呼，見到聖天終於鬆一口氣喇，佢唔係猩猩，又唔係熊人 ，只不過係一個好普通既男仔樣，聽到佢講野既語氣，我就認得佢一定係聖天喇，嘻。 我地去左時代雅廚，一入去已經覺得唔對路，人有少，燈光又暗，張張台都係得支臘燭 仔，呢度似情侶黎多ｄ喎，坐低之後個侍應俾左個水牌我，話野飲買一送一，一睇，死 ...點解我唔學多ｄ英文，或者黎之前溫熟ｄ野飲既名稱，成張野我淨係睇得明...喜力... 汽水...水...多謝英文老師，我起碼睇得明呢幾個，好彩張餐牌係有中文，不過似乎食既 野種類唔多囉，呀哥又話專食意粉，成張餐牌先得一兩款...搵笨，好似樣樣野都唔多好 食，聖天同我諗法一樣，佢話不如去pizza hut 仲多選擇，我個心入面梗係十萬個同意 喇，不過我地都坐低左嚕，而家走...我怕人地會睇我地唔起，以為我地細路仔無錢食咋 ，所以我就違良心咁話「第一次黎，咪試下好唔好食囉。」，於是就叫野食喇，聖天叫 左個例湯，買晒，咁就唯有叫個洋蔥湯喇，再叫個ｘｘ意粉，意粉買晒，下？專登黎食 意粉，你話意粉買晒？對面有百佳喎，過去買都得喇，唔通你ｄ意粉真係意大利運黎既 ？我咪話我地特登黎食意粉嚕，於是就順理成章走人。 最後都係去番大家食慣既pizza hut，嘻，原來pizza hut都有黑牛食架，我同聖天一 人一杯，我地仲叫左一個pizza、一個湯、一個意粉。呢度既氣氛好好多，無之前咁局促，食起野上黎都求其ｄ，於是...我切緊碟入面既pizza時，竟然因用力過度而令隻刀 飛脫，把刀亦好清脆咁「叮」一聲著地，呀...即時靜一靜，個個侍應都望住我，死喇， 仲諗住用刀叉會比較有儀態，好彩聖天都知我為人大頭蝦，仍然保持冷靜咁遞左佢把刀 俾我，嘿嘿...(面紅)，埋單二百幾，當然俾得心甘情願喇。 時間都係九點幾咋喎，其實想去影卡卡架，但又唔敢提出喎，於是呢就捉左聖天陪我去 sogo 搵生日熊仔呀，嘻，聽佩琪講佢淨係搵到朋友ｄ生日，送過好多俾人呀，但自己生 日果日就搵極都搵唔到，但係無理由買生日熊俾自己架嘛，梗係朋友送先perfect架喇 ，所以我就決心要搵到黎送俾佩琪喇，離遠我已經見到好多人圍住喇，但我點都鑽入去 搵喇，嗚，人地就收工喇，我都仲搵唔到，聖天就走過黎問我要搵幾多號，我咪話佢知 嚕，點知我一講佢就搵到喇，嘿嘿，係嚕，點解我搵左咁耐都睇唔到既呢？仲有兩盒添 呀，咁我梗係揀靚ｄ果盒喇，於是就開開心心咁離去喇。 重新做人::::::聽下::::::

早午晚，走三場

::::::星期四::::::十一月八日:::::: 尋日就約左nathya同聖天，分日、夜場，今日仲威，分別約左三個朋友，分早、午、 晚場，嘻嘻，人紅自然旺場架喇，九點幾我就起身喇，畫樣丫嘛，佩琪話我化綠色眼影 會好睇喎，好，等我今日又試下先，死喇，好驚化到變左青光眼，好彩都接受到，是但 喇，死就死喇。尋日左邊膊頭揹左個藏屍袋成日，今日痛到抽晒筋，如果今日仲揹既話 一定肌肉發炎都似，所以我搵左個ｎ年前，中學時代既藍色背囊，咦？都幾襯我今日個 look呀。因為懷恨在心十九年都無得著嘛，所以之前日日都係著住件背心，今日終於頂 唔順喇，所以著左件新買既...童裝衫，嘻，我見個公仔得意嘛，又著得落，有咩所謂喎 ，著左落去長袖變左中袖，仲好，唔怕遮住ｄ手鍊，又唔怕食飯夾菜會整污糟，yeah。 第一站係撘地鐵去黃大仙呀，約左民安隊既kenji，出黎食午飯，就快去到黃大仙打俾 佢，佢話同媽咪、妹響茶樓飲緊茶喎，接我上去一齊飲，哇下，我未有心理準備見伯母 喎，於是我地就一齊行番上去茶樓，經過零食物語，kenji話要買糖俾個妹，叫我俾ｄ 意見喎，九歲...即係著重外表喇，好！一於揀hello kitty喇，番到上去佢媽咪走左嚕 ，kenji遞左包糖俾佢呀妹，話「姐姐送俾你架，快ｄ多謝姐姐喇。」，下？哇...咁都 得？嘿嘿，咁佢呀妹就多謝左我喇，嘿嘿...(傻笑)我又唔肚餓，於是就埋單走人喇，原 來kenji ｄ朋友叫佢去踢波呀，咦？都好喎，我又去睇下佢地踢波先，我無所謂呀，kenji 又無所謂，咁去嚕。我地由黃大仙行番去kenji屋企，等佢換好衫，再由佢屋企行左去 樂富踢波，哇呢，行到腳仔都軟呀，去到都一點幾嚕，睇左一陣，一點九我就閃喇，話 俾kenji聽我約左朋友要走，嘻，其實我係想早ｄ走去吉之島搵生日熊呀，哇...離遠都 見到成班人圍實晒喇，班學生同OL起勢咁揀，我企響後面裝呀裝，都裝唔到，前面個 師奶揀完都特登企響度，要等埋佢ｄ同事揀完喎，我咪唯有繼續裝囉，終於俾我霸到一 個有利位置喇，可惜搵完又搵，都搵我唔到我想搵果日，嘻，不過揀左半個鐘之後，都 俾我搵到媽咪同另一個朋友既生日熊，總算係有ｄ收穫喇，哈，我都幾勁喎，由好多人 揀到得番我一個都仲揀緊。 我約左佩琪兩點半響樂富月台等呀，於是我就拎住吉之島個膠袋，開開心心咁行去地鐵 站喇，點知...我撞到kenji ，哎呀，好瘀呀，俾佢知道左我原來早走黎買公仔，講左兩 句我就拿拿臨走喇，嘿嘿...約左人約左人...佩琪今日好靚呀，平日見佢都係"立"實個頭 ，今日無"立"反而自然ｄ，仲有ｄ似梁詠琪添呀。我地出左尖沙咀厚福街間甜蜜蜜食甜 品呀，哇呢...甜品係少女殺手，我梗係死響佢手上喇，叫左隻香蕉船，正呀...肥死都扺 喇，佩琪呢樣又想食，果樣又想食，於是就叫左杯野飲先，陣間再叫野食。嘻，我送隻 生日熊俾佩琪果陣，佢好開心呀，嘻，見到佢咁開心我又好開心，即時覺得搵幾耐都扺 番晒。四點幾左右，佩琪電話響，佢勁話「收唔到收唔到...」，於是就走左出去傾喇， 然後...我見到再行番入黎既唔係佩琪呀，係咪咪呀！小小幼稚園既咪咪校長呀！睇相我 就睇得多，但真人都係第一次見咋，所以...我又唔係好肯定喎，我腦入面一片空白，直 到佢行到埋黎張台側邊，我先知道我要搵台詞喎，於是就好傻瓜咁講左句「你剛剛經過 呢頭呀？」，哈，係唔係問得白痴左ｄ呢，哈哈，咪咪好似響部電腦入面走出黎咁，由 卡通既咪咪，變左真人既咪咪。 咪咪坐左響我隔離呀，佢一望住我我就即刻緊張起黎喇，嘻，話晒咪咪係我偶像喎，哈 哈，估唔到有得見偶像，仲有禮物收添，佩琪送左個狗面兔既ｖ仔電話套俾我呀，最衰 我唔係用ｖ仔喇，不過用黎裝飾都唔錯呀，而咪咪呢就送左條狗面兔既電話繩俾我，咦 ？乜我鐘意狗面兔既咩？哈哈，不過係朋友送既，我乜都咁鐘意。之後我同佩琪又強迫 咪咪即席畫畫喎，哇哇哇，真跡呀，嘻，我地迫咪咪畫左兩個，一張我既、一張佩琪既 ，嘻，哎呀，我不仁佢不義呀，之後又到咪咪要我畫喇，咁禮尚往來，要既要既，唯恐 畫得太差失禮人咋。我地三個師奶仔吹下水，影下相咁就五點喇，可惜唔搵唔到人拎相 機同我地影合照喇，唯有自拍喇，不過唔驚，我地三個一定會有機會再影過既。 到夜場喇夜場喇，我約左呀如今晚去睇戲呀，事關佢有兩張睇戲既贈卷，而我又好想響 戲完睇恐佈片喎，夠晒驚丫嘛，於是我地就約好今日去睇「不速之嚇」喇。五點九去到 戲院，呀如已經買左六點鐘既飛喇，於是我地就跑去七十一買野飲，再跑番黎戲院買爆 谷，入場，哇呢，全場二十個人都無呀，嘻，所以可以揀個最好，最無遮擋既位坐，正 呀。套戲好好睇呀，不果如果響屋企睇就可能會好悶，因為主要最出色既都係驚嚇位， 成套戲係講個婦人同對仔女住響間大屋入面，成日以為有鬼搞佢地，到最後先知，原來 佢地本身先係鬼呀，佢地以為既鬼就係人類，係ｄ人類想趕走ｄ鬼呀，哇，真係耐人尋 味呀，一野咁扭轉晒成個故事，好好睇呀，有一part好慘，睇到我喊添呀，哈，睇鬼片 都喊，我諗我都係第一個。 睇完戲先八點，不過我已經好訓嚕，可能今朝太早起身既關係喇，而且我又食爆谷食飽 左，於是就同呀如一齊撘車番屋企喇。嘻，今日雖然時間緊迫，不過好開心呀。 咪咪表演畫畫::::::睇下:::::: 咪咪表演講日文::::::睇下::::::

媽咪放假

::::::星期五::::::十一月九日:::::: 媽咪今日放假呀，媽咪放假大晒既，約會通通要取消，因為媽咪實在難得放一日假呢 ，做女既梗係想黐住呀媽喇，嘻，又可以去shopping 呢。之前張身份証唔見左，再 補領番，今日就可以去拎喇，好野，唔洗再拎住張行街紙出街喇，不過今次呢張依然 係影得我好黑，好似賓妹...(滴汗)。哥哥車我地去拎完身份証，第二站就梗係將軍澳 新都城喇，因為我要去搵生日熊，今次有媽咪一齊搵唔怕搵唔到喇卦，其實今次主要 係搵一個朋友既生日，我就快會見到佢嘛，咁就可以好快俾到佢喇。一入吉之島我就 四圍望，梗係喇，睇下有無又一大班師奶圍住丫嘛，發現目標，好野，無人揀緊呀， 呵，於是我就拖左媽咪過去陪我揀喇，不過...成堆生日熊係無分月份咁亂放架，唯有 遂箱遂箱咁搵喇，睇左既呢就放埋一邊，搵晒呢度唔怕無喇卦，但其間都有ｄ師奶走 過黎八八卦卦咁揀下，車，都唔係有心買，幾驚俾佢地整亂左，我要由頭搵過呀，我 同媽咪搵左一大半都唔見，唉...好灰呀...忽然媽咪大嗌，呀！搵到喇，嗚，差ｄ想喊 出黎呀，我就拎住盒生日熊開心到響度跳，嘻，簡直唔可以相信呀，哇呢，拿拿臨俾 錢先，呢盒野就係我架喇，嘻。 廣場果度賣緊好多韓國既食品，仲有ｄ即場燒起既魷魚同紫菜，哇...香到...嘻，媽咪 鐘意食燒魷魚，我就鐘意食紫菜，於是就一樣買一包喇。電話響，呀龍打俾我呀，原 來佢同佢媽咪到響新都城行街喎，哎呀，可惜呀哥架車響樓下等緊我地，所以緣慳一 面嚕。 第二站係旺角，呵呵，拉呀媽去行花園街先，哇呢，好迫人呀，都揀唔到野，原本想 買冷織頸巾既，但又揀唔中喎，行晒成條街都係買到一件衫，好閃架，主要係媽咪鐘 意，嘻，所以就買左俾我喇，但咁閃既衫，我諗去飲先著得喇。其實我係想睇尖頭鞋 架，不過媽咪話著得隻腳唔舒服，所以唔俾買，嗚。之後我地去左旺角中心，超級多 人呀，哇...好難先迫到入個檔仔入面睇野，點知有兩個學生妹拎住我背囊個公仔響度 睇，佢地...以為我個公仔係掛響度賣架，嘿嘿，最後買左個好得意既士多啤梨袋仔， 嘻，卡哇伊呢。 六點幾，呀哥車埋我地去尖沙咀，佢就要走喇，因為佢今晚約左人呢，不過我地都係 得個行字，行飽左就撘巴士番官塘喇，原本諗住去打邊爐架，但係唔食得牛肉，打邊 爐仲有咩意思喎，所以決定去食上海野，嘻，我鐘意食嘛。上左巴士之後我就係咁訓 ，呼...好累呢，訓到落車先識起身呀，當我同媽咪行去上海舖既時候，我見到一對著 住校服既男女，咦？個女仔係讀我以前間中學架，於是我就繼續行喇，點知果個女仔 叫住我，一望之下先知佢係我以前讀書個老死呀連呀，呀，當堂嚇左一跳，好開心呀 ，一時之間我地都唔知講乜野，之後佢就話再聯絡喇，哇...我地真係好耐無見喇，我 畢左業之後，我地既圈子就唔同左嚕，而我地都係被動既人，所以一直都無主動搵對 方，但其實我一直都好懷念同佢一齊上堂既日子，以前我地成日一齊放學架，逢星期 五仲會一齊去街，去到夜晚，有錢的話就去pizza hut ，無錢就係哈迪斯，然後再一 齊撘同一架巴士番屋企，會考果陣我地仲朝朝約好一齊食早餐添，我地可以話係孖公 仔咁架，每次我想去邊，佢都會遷就我，如果我地而家仲係一齊讀書，我相信我地都 仲會係好朋友，雖然一直無搵佢，但我都仲好掛住佢架。 左邊既係呀連，中間既係我最愛既李sir，下面既就係susuky，右邊果個咪係我囉。 我同媽咪叫埋爸爸黎食，嘻，我就梗係要食窩巴喇，而媽咪就例牌叫左個炒年糕，之 後仲叫左個辣辣蝦仁同炸雲絲卷，嘻，好好食呢。

民安隊聚會

::::::星期六::::::十一月十日:::::: 今日係「展翅大使迎新日」呀，響呢日之前我已經緊張左好耐喇，連isiah都叫我到時 要冷靜ｄ，點解咁嚴重既呢？因為...以前響民安隊有幾個女仔打我，而果幾個女仔既 同黨都係展翅大使之一，即係極有可能出席今日既活動呀，所以我就擔心見到佢，佢 又會用唔知咩招數黎陷害我喇，唉...雖然好似有ｄ己人憂天，但上次既不快遭遇實在 令我有恐懼嘛...唯有安慰自己，件事過左咁耐，而且俾人打既係我，只要我表現得大 方ｄ，同佢都可以做番個點頭之交呢。 出門口前我預備左極度充裕既時間，可以慢慢畫樣，其實都有少少擔心架，日人地覺 得我化粧即係等於發姣、壞女孩，但其實我只係想面色唔好咁難睇咋，如果我無病， 根本就唔需要咁做，以前我從來都無化粧既習慣既，希望其他人唔會對我印像唔好喇 。因為太多時間喇，所以我一路睇尋晚錄既「生命因愛動聽」，一路畫畫畫，點知掛 住睇，一望個鐘原來已經到左出門口既時間喇，先至識急急出門口，好彩無遲到咋。 約左呀dick一點響鑽石山地鐵站，一齊食完野再去，但今日度度都好多人呀，又唔想 食肯德基同麥記喎，去到味食廣場又搵唔到位，但就快夠鐘喇，唯有買左杯珍珠奶茶 ，再買多個麵包，一路行一路食喇，好彩原來鳳德社區中心離荷里活廣場唔係好遠， 離開始既時間早一ｄ我地就行到喇。一去到就派左件「展翅」衫，我揀左件黃色細碼 ，不過依然都係好大件，果個都唔知咩碼黎既，簽到既時候，我順便咁睇下有無果個 民安隊既女仔個名，咦？無喎無喎，呵呵，早知唔洗擔心咁多喇。我同呀dick坐定定 之後，竟然見到...呀明呀！我地係上年既「展翅大使」而識既，一直都好friend架， 哈哈，真係唔知佢今日有份黎喎，於是我地就三個一齊坐喇，開心開心。 最後差唔多有六、七十人黎到，個個都乖乖坐定定聽廢話，唉...悶到我死呀，果個由 勞工署請番黎既講者，講野真係好悶。第一個可以俾我地郁動下既活動，係搵支筆去 篤ｄ唔識既人，再不停互相問對方野，哈哈，我總共篤左四個，第一個係呀明囉，第 二個係個男仔，都幾搞笑既，第三個係個女仔，第四個...咦？係個好yeah下既男仔 ，但佢一講野先知，原來...係女仔黎架！哇，我即時大叫「你好有型呀！」，嘿嘿， 佢同我解釋佢係女仔黎架，我知呀，但佢著衫同髮型都好型呀，我仲忍唔住勁讚佢靚 仔添，嘻，搞到我ｄ白痴野出晒黎。之後聽講坐果陣，我眼尾見到果個好型既女仔成 日望住我呀，咦...唔通...唔會卦，哈哈。 之後又講一輪廢話喇，第二個活動就係分組答問題，初初分左組果幾秒，係無人講野 架，就連我地三個都係識得既，都唔敢主動出聲，然後就有兩個互不相識既男仔打開 話題喇，嘻，佢地講野都幾搞笑架，不過我地唔係討論問題，而係一開始就講我地第 時熟左可以搞咩活動、去邊玩，哈哈，好friendly呢。第三個活動係兩個人一組，我 就梗係第一時間捉左呀明同我一組喇，佢扮盲公，我就要帶佢行一段路，嘻嘻，今次 仲唔有仇報仇，我帶住佢跑呀！好high呀，哈哈，仲講笑咁話叫佢企響個電梯門，然 後不停閂門夾佢夾佢，哈哈。其實我又唔係話好偏激咁話今次搞得唔夠好既，只不過 係同上年既「展翅大使」首次活動比較，今次真係比較遜色囉，因為大部份時間都係 得人講，無我地講，我地呢ｄ熱血青年點會忍受到喎，但我覺得從遊戲中學習，氣氛 會融洽得多。 雖然只係首次見面，但臨走都有點依依不捨，下次見面要到十二月八號呀，到時響文 化中心有個講座，希望可以快ｄ到喇。 五點嚕，我約左三個民安隊既好朋友，四哥、呀基、呀欣今晚見面呀，但打俾四哥， 佢先至響荃灣食緊野，叫我六點半響旺角恆生等佢，哎呀，仲有粒幾鐘，見呀dick唔 趕番屋企，於是我就拉左佢陪我去旺角行下街喇，有ｄ肚仔餓添，但又唔知點解想嘔 喎...哎呀...我知喇，一定係今朝杯珍珠奶茶唔消化呀，呀...好辛苦呀，坐底屈住個肚 就好少少喇，本來想去食豬腸粉架，但又好似污糟左ｄ，於是就去左海景粥店度，都 係食豬腸粉，哈，感覺上乾淨ｄ嘛。 食完差唔多六點半嚕，咦...男仔通常都遲到既，慢慢行都仲得，不過星期六既旺角實 在太太太太多人喇，迫得好辛苦呀，唯有捉鬼住呀dick擋路喇，哈哈，佢咁瘦，撞散 佢都似。落到地鐵站仲多人，多人到好似透唔到氣咁，本來都幾凍下，但呢度好熱好 焗，救命呀，你地快ｄ到喇，好彩呀基好準時，等多一陣四哥都到左喇，但呀欣要成 九點幾先放工呀，於是我地就企響度諗下去邊好喇，呀基話好肚餓，四哥又話好急， 所以決定上去大快活食野先，不過好多人好難搵位呀，四哥唔肚餓，我又想嘔想嘔喎 ，所以就一齊望住呀基表演食野，男仔真係叻呀...望住佢一大碟扒＋飯，唔洗一陣就 食到清碟喇，佩服佩服。 食飽飽之後就要諗下去邊喇，唔知點解響兩個高大既男仔面前，平日多多野既我都靜 左落黎，怕講錯左ｄ乜會俾佢地覺得我細路女卦，佢地話想去睇美國處男２喎，咦？ 第一集都幾好食，不過同兩個男人老狗去睇，會唔會尷尬左ｄ呢，嘻嘻，笑到唔敢笑 得咁大聲，不過可惜喇，星期六，要買即場飛真係幾難，結果得番晒ｄ頭位，哇...自 從上次同bee狗睇人妖打排球，坐第一行之後，我真係幾怕坐得前睇戲喎，於是大家 都唔係好想睇既情況下，我地決定去行女人街，哈，多人都嘔呀，我得八十磅，又生 得矮，梗係俾人撞到飛埋一邊喇，好彩有四哥巨大既身形，嘻，捉住佢當擋箭牌。行 到近街尾既時候，呀基無端端話想食臭豆腐喎，原來佢從來未食過架，哇...係唔係屋 村長大架你，我細細個已經食喇，哈哈，於是就決定試下食喇，我就負責影底佢第一 次既實況，不過佢唔知我唔食得臭豆腐，竟然買埋我果份喎，禮貌上我都係食左既， 難得佢咁高興，我梗係捨命陪君子喇，肚痛咪當清腸胃囉。我問佢對臭豆腐有咩感覺 ，佢竟然話...好似食屎呀，哈哈，不過好唔好食見仁見致既，我就覺得好好食喇。不 過今次行女人街我都有得著喎，嘻，上年我買左隻錶好鐘意架，好大個錶面，有條彩 虹，寫住rainbow girl架，不過因為係cheap cheap 錶，所以話咁快就撞到花晒喇 ，一直再搵唔到有得買番，所以花晒都照戴，咦？但我今日發現女人街有得買呀，仲 平左添，嘻，於是我就買番一隻喇，雖然有少少唔同，但都已經好開心喇，嘻。 時間都八點幾嚕，呀欣響九龍城番工，所以我地決定去果邊等佢放工，再一齊去食野 ，於是我地就撘小巴去左九龍城喇。 見仲有時間，我地三條茂利就去左九龍城公園坐下、吹下水，可能四哥今日心情不佳 喇，好少出聲，兩年前民安隊果陣，佢鐘意左個女仔，就即係今日差ｄ出現，同我有 仇既展翅大使囉，可能佢聽我提起過佢，所以又成日諗住卦，我都唔明佢，追左人地 咁耐，人地都唔受，就收手喇，點解要搞到自己咁賤喎，我都唔會揀一個連自己都睇 唔起既男仔喇，咁樣做除左自己辛苦，果個女仔都感覺被騷擾喇，鐘意一個人係想佢 開心，而唔係一定要擁有佢既，如果佢係一齊左大家都唔開心，又有乜野謂...唉...我 講又講過，有時真係嬲到喊，嬲佢咁自暴自棄、咁作賤自己。 之後呀欣黎左，沉靜既局面都係持續，唯有去食野喇，我地去左地茂館，好多野食呀 ，我要左一個紅豆沙，呀欣要左一個綠豆沙，四哥一黎就要左一個香蕉班戟同芒果班 戟，勁呀，而呀基就仲飽緊，所以唔食住，大家都無乜點講野，其實都預左架喇，咁 耐無見，而且生活圈子都唔同，好難有共同話題既，唔通仲講番兩年前民安隊ｄ野咩 ，所以我今日出黎都係志在見下大家，無抱住出到黎會好好玩，其實見到就已經夠、 已經好開心喇，我地個個食晒之後，呀基唔聲唔聲咁又叫左一碗甜品，哈哈，而家先 開始發力喎，然後又再黎多碗，哈，真係每次都俾人驚喜。 走既時候我同呀欣一齊行，互相講下大家既近況嚕，嘻，可惜我既近況都係唔好喇， 好似有ｄ嚇親人，而四哥就同呀基一齊行，我地行到去巴士站就分別喇，呀基同呀欣 都係住香港仔，所以佢地一齊走，四哥住將軍澳，所以就可以順便送埋我番屋企，上 左車之後，四哥顯得有點唔開心呀，佢話頭先呀基不停鬧佢，鬧佢今日唔講野，咁悶 早知唔出黎喎，哇...我聽到都好唔開心呀，出唔出黎係自願性質架嘛，邊有話包好玩 架，但今次令任何人唔開心，我自己都有責任既，早知我做下醜人，講多ｄ野喇，今 次搞到大家都唔開心，唔知我地仲有無機會見呢... 男仔真係叻::::::睇下:::::: 呀基的第一次::::::睇下:::::: 試眼鏡::::::睇下::::::

中學同學聚會

::::::星期日::::::十一月十一日:::::: 好眼訓呀，尋晚玩得太夜喇，完全係唔願起身呀，但karry之前俾左兩張明愛賣物會既 飛我，逢星期日都會有，不過次次個場都唔同地點，我逢星期日都要去學氣功，以為 實無得去喇，但今日呢場會響荃灣呀，即係我早ｄ出門口咪可以去左賣物會，再去元 朗學氣功囉，呵，好野。於是我就急急叫呀哥起身車我去喇，早餐都食唔切呀，求求 其其拎左兩個蛋撻，買左杯凍檸茶就上車喇，上左車呀哥問我「你記唔記得拎飛呀？ 」，哈，撞鬼嚕，唔記得左添，連電話我都唔記得拎，所以又急急番上屋企拎嚕，真 係愈急愈撞板呀。 差唔多一點幾先到荃灣，好眼訓呀，完全唔想行，但一場黎到無理由唔行架，哇...行 左出車一陣咋，已經熱到死咁滯喇，仲要個入口勁遠，原來...張飛...即場賣兩蚊咋， 入面又熱又迫又多人，ｄ野又好似好舊好污糟咁，根本無心機睇，唉...為左四蚊作賤 自己，都係早走早著呀。 上車已經一點九喇，要行快ｄ先得喇，結果...去到學氣功果度，足足遲左四個字呀， 好彩仲有好多人都係剛剛番黎，唉...好累好眼訓呀，根本都唔想行，結果行下抖下咁 ，終於捱過左兩個鐘喇。到第二part，就係打坐喇，嘻，本來諗住可以坐響度偷訓一 陣，點知唔知點解一訓著，就一係向前跌，一係向後跌，搞到我不停釣魚咁，死喇， 唔知有無俾人睇到呢，實俾人笑死都似，好彩我無一野咁跌左落個地下度，唔係俾師 兄見到...唉...學位不保。 幾經辛苦終於五點，收工喇！當然即刻飛番屋企喇，今晚約左班中學同學去食飯呀， 嘻，我地都勁耐無見嚕，唔知佢地變成點呢？番到屋企即刻換衫，七點鐘出門口，呀 哥車去旺角，七點半就到信和門口喇，咦？真係估唔到，最準時既竟然係我同susuky ，其他人都遲到，哈哈，之後呀海、呀峰、君君同靈靈都到埋喇，susuky 就嫌人少 ，所以臨時打俾兩個同學！叫佢地即刻出黎，哇...估唔到真係有人同佢癲喎，於是我 地個聚會又多左呀榮同edmond喇。 成班人，多數都係去happizza 架喇，不過勁多人等位呀，咁又係...星期日，仲要係 響旺角，實多人喇，所以最後決定去蕉葉咖喱屋食，嘻，勁多位喇。上年夏天我同切 雞班同學黎食過，咁橋原來我有個小學同學響度做架，佢唔認得我呀，但我就好認得 佢，因為佢個樣根本無變過，嘻，結果我地相認左，好彩佢仲記得我個名咋。估唔到 今年黎佢仲響度做呀，咁耐無見梗係雞啄唔斷喇，講起ｄ舊同學，先知有個男同學結 左婚，生埋仔，仲離埋婚添呀，哇...做得同學都唔會大我好多卦，再講落去，先知原 來連佢都結左婚喇...哇...係唔係我太遲呢，個個都結晒婚咁既，佢仲話介紹個好男仔 我識喎，哈...(滴汗) 班中學同學個個坐底都淨係響度傾計，坐左好耐都無人有意思落單叫野食，哎呀，呢 ｄ野通常男仔做架嘛，今次唯有我黎話事喇，再坐落去真係唔係幾好意思，八個人... 我搞盡腦汁先諗到六個菜咋，原本都驚唔夠食，但係...佢地個個掛住傾計，我覺得食得最多果個係我囉，哈，唔想浪費左ｄ野食嘛，最後埋單每人都三、四十蚊咋，梗係喇，都無人食野既，點知呀峰話我難得出黎，所以佢俾埋我果份喎，哈，病都有好多著數，多謝峰哥！之後君君同靈靈就要番屋企喇，而我地六個就去左銀城影卡卡，之後再去仙棕林飲野嚕，尋日飲完珍珠奶茶成日都想嘔，所以今日都係唔飲珍珠喇，就咁齋香芋囉。 哥哥架車泊左響旺角等左我好耐喇，我都唔忍心要佢等，雖然好唔捨得班中學同學，但大約十一點幾左右我地就要分別喇，唔知下次幾時可以再見呢。，真係好懷念以前日日番學既日子呀... 雖然聽朝一早要番醫院覆診，不過我又好想快ｄ屎驚左ｄ靚靚貼紙卡喎，屋企個屎驚 拿又壞鬼左，爸爸響新蒲崗個工業區租左個倉，個倉入面有晒電腦同屎驚拿果ｄ呀，媽咪爸爸一向都唔俾我去架，話果度污糟喎，但今晚都係偷偷地去左。果度無電梯架，於是呀哥就揹住我行上四樓，嘻，真係唔話得呀，之後我又勁想去廁所喎，不過成坐大廈都好陰深恐佈架，女廁又勁遠，而男廁就正正隔離，橫掂無人，於是我就叫呀哥陪我去男廁喇，嘿嘿，結果搞到十二點幾先番屋企呀。呀哥開緊車果時響度話可以幾多分鐘飛車番到屋企，點知...原來佢唔知點樣按到個電話打左番屋企，咁橋俾呀媽聽到晒，嘿嘿...真係瘀死呀。 咁耐無見會講ｄ乜呢::::::睇下:::::: edmond又靚仔左喎::::::睇下:::::: 傻婆susuky同以為自己好靚仔既edmond::::::睇下:::::: 講人壞話::::::睇下::::::