好凍呀...

::::::星期四::::::十一月十五日::::::

原本成個星期前,已經約好bee狗今日去城門水塘郊野公園架,去影風景相同埋野餐嘛,但今日寒流襲港,得番十幾度,勁凍呀,係完全淨係想尼響個被竇入面,而且天氣又唔係幾好喎,好多藉口之下,就決定取消行程,留響屋企乖乖寫日記喇。 但nathya 兩點幾打黎,話好想去行街喎,係...我都想去,不過真係好凍呢,於是就叫佢搵其他人陪佢去,如果真係搵唔到先叫我,結果...當然星期一至五係無乜人唔洗番工番學架喇,所以我都係約左佢六點響九龍城等,再去旺角行街街。

真係好凍呀,我著左件最暖既樽領冷衫,再披多件大褸先敢出去呀,1A經過九龍城架 ,所以索性約響車上面等,我架車就到九龍城既時候打俾佢,叫佢上車。哇呢...今日咁凍,都仲咁多人行街,花園街勁迫呀,行左一陣我已經覺得唔係好舒服,仲有d想嘔,哎呀...好辛苦呀,仲要有一邊耳仔塞住左,聽唔到野,每次一累就係咁架喇,都無晒心機行街嚕,今日都未食過野,頭先仲諗住去食魚蛋添,而家乜都食唔落喇,於是我地就去左茶餐廳坐下嚕,飲左杯熱檸茶,隻耳仔就無塞住喇,我諗最主要係件樽領衫索實條頸,呼吸唔暢順,所以想嘔。之後我地去左旺角中心同女人街,哎呀...行行下又開始耳塞喇,耳塞果種感覺真係好辛苦架,不停好似有個喇 吧響耳仔邊,聽住自己把聲,好嘈好心煩,好彩nathya 要去配眼鏡,於是我又坐番粒幾鐘,舒服好多嚕。

我響女人街睇中左個袋呀,細細個斜揹既,佢開價七十幾,最後五十蚊成交,嘻,都算有d收鑊喇。差唔多九點,nathya 話想去友誠下面間唔知咩寶石餐廳度食野喎,我都無乜胃口,淨係飲左杯凍檸樂咋,同食左nathay 少少飯嚕。食飽飽,去埋銀城影卡卡,睇下時間都十一點喇,咦?經過銀城隔離間鞋舖,見到有對矮矮地既尖頭鞋,好正架,仲要唔算好貴喎,即時想買左佢,不過媽咪又唔俾買,我自己買左佢實唔鐘意架喎,橫掂聽日媽咪放假,聽日再叫佢黎睇都得呀,嘻,尖頭鞋尖頭鞋...好靚好大個女既尖頭鞋...


兩年之前既我同nathya

跟媽咪買貨

::::::星期五::::::十一月十六日::::::

原本game評d稿要尋晚交架,但尋晚番到黎實在太累喇,所以較左鬧鐘諗住今朝一早寫,點知我又按熄左個鬧鐘繼續訓,結果起身既時候已經成十點喇,唯有再努力寫寫寫喇,寫到差唔多十二點先寫完,嘻,然後就拉媽咪出街喇。

媽咪今日想去深水"土步"買貨呀,我都好想跟埋去,因為可以睇下有無平既耳環、介指、頸鍊之類丫嘛,不過行左好耐都無乜收鑊呀,嘻,最後買左一卷包禮物既絲帶,一包木珠仔,諗住用黎穿頸鍊,仲有買左隻公仔,諗住星期日晚可以送俾同我一齊去睇流星雨果個朋友,原本睇中左隻狗面兔既公仔架,佢穿晒眼環,仲要擔住飛煙,勁搞笑呢,不過要成五十蚊呀,得拳頭咁大就真係貴左少少喇,唯有睇下算喇。

媽咪買左好多貨呀,行完呢間又行果間,行到我都好累嚕,大約六點幾左右,終於買晒貨喇,咁我地就可以出發去旺角,嘻,去睇尖頭鞋嘛,媽咪見對鞋唔算好貴,我又咁鐘意,就肯買俾我喇,好野,我揀左一對啡色既,媽咪又買左一對差唔多一樣款既黑色尖頭鞋,嘻,一人一對,皆大歡喜,不過我地兩個款都無貸呀,好彩可以落訂,但就要等多幾日先有得著嚕,我對腳要著39號呀,大腳八。

之後哥哥又車左我地去尖沙咀,嘻,行嘉連威老道嘛,當然又有收鑊喇,不過行到好累嚕,又好肚餓,好想食上海菜呀,聽哥哥介紹話紅磡有間三六九好出名架,於是我地就去左果度食喇,不過多數都係得d小菜,無窩巴食呢,我地四個人,叫左一個酸辣湯麵、炸雲吞、炸曼頭、炒年糕,哇呢...果個炸雲吞呀,粒粒都大大粒,足足有成十粒呀,我食左一粒都飽左一半喇,可能係肥得滯卦,d炸 曼頭又係好滯,嘿嘿,結果食剩好多呢,埋單一百蚊都唔洗,哇,扺呀,第一次食上海菜咁平咋,如果d野食無咁肥既話會更加好呢。

食完野我地就一齊行去哥哥架車度,哇...原來紅磡既夜晚都幾陰深架,尤其經過殯儀館既時候呀...好彩!

流星雨之夜

::::::星期日::::::十一月十八日::::::

尋日番左醫院輸血小板,實在太累喇,今日成十二點先起身,一點就要出門口去學氣功嚕,所以都無時間食早餐,都唔知點解,逢星期日都特別累,嘻,可能係我懶卦。去到錦田學氣功果度,師兄師姐一見到我就問我「有無食野呀?」,唉,撞鬼...我無理由講大話架嘛,所以咪老實答佢無囉,然後又俾人話我好唔食野喇,嘻,佢地都係關心我之嘛。無野食梗係無乜力行喇,所以行下又抖下,行下又抖下,師兄都無眼睇呀,實係一睇就睇得出我番屋企無練功喇,所以一直都無教過我野,其他比我遲入黎既人都學得高等級過我嚕,我仲係次次番黎都齋行,有時真係有d慚愧。個肚仔又鬼咁餓,所以成日走去水機拎水飲,有同學話俾我雞批我食架,但我又怕太過滯,食左仲辛苦,所以都係無食到。四點喇,到左打坐既時候,原本諗住又可以偷偷訓一陣,但情況同上次一樣,一訓著就會向前或者向後跌,所以結果都係無乜點訓到,嘻。

五點喇,終於放學,今晚原本約好bee狗同呀豆去睇流星雨架,不過bee狗聽日要測驗,而呀豆就怕半夜無車番屋企,結果,兩個一齊甩底,哈,真開心,之前都搵過幾個朋友既,不過初初講起個個都好有興致,以為佢地實去喇,點知繼續講落去又話聽日要番工、番學,唉...差唔多約左六、七個,個個都係咁,真係有少少俾人耍既感覺,無計喇,呢d野你情我願,無得迫既,不過真係有少少唔開心,忽然覺得自己好似無乜朋友咁,可能真係時候不對喇。咁今晚點算呢,我就實跟住呀哥架喇,有車嘛,唔洗四圍撲巴士,而且而家都無人陪我去喇,哈。呀哥就約左呀華,佢地話入去萬宜水庫睇喎,因為果度係禁區唔俾車入,行都有排行,實少人喇,但呀華係響水務署做,所以就可以駕車入去喇,講到咁正,一定要跟佢入睇下。

人又約唔到喇,於是就叫埋呀爸呀媽去喇,呀媽就無問題呀,呀爸今晚要去飲,飲完先黎得,嘻,都好呀,家庭樂。媽咪佢響石硤尾附近,於是我地就由錦田去左石硤尾先,哎呀,成六點鐘喇,我仲未食早餐呀,第二站就係即刻飛去深水"土步",入麥記醫醫個肚先,撞鬼,明明係好肚餓,但食左幾條薯條就好似好飽咁,仲以為自己成日無食野,係可以一次過食番一日咁多添。食完就去左西九龍中心間惠康同零食物語,執番d乾糧嘛,唔係今晚又凍又眼訓既時候點捱呀。當我同媽咪行緊去收銀機既時候...有兩個細我少少既女仔望住我,因為當時我只係戴住頂冷帽,心諗「望咩望,未見過人無頭髮戴冷帽既咩?」,然後就去俾錢喇,果兩個女仔無端端走過黎,果一刻我仲以為撞到成日黎吉場d網友,好瘀呀,哈哈,原來佢地想問我我扣響個衫領果個qoo心口針響邊買,哈哈,其實係哥哥個女朋友仔專登飲qoo送俾我架,係唔係好正呢?於是我就話俾佢地知係響邊買qoo飲品送架喇,呼...嚇親添。

哥哥話深水"土步"有間電腦舖,有得買dv轉入電腦既software 呀,我一直都好想將萬聖節段video轉入電腦,可以俾多d朋友睇嘛,哥哥話果個software 六百幾蚊,咁又唔算好貴,都仲買得起,點知去到先知,我果款要用貴果隻,六百幾蚊d質素會好差喎,貴果隻要成千幾蚊呀,唉...買左部dv同dc都唔夠一個月,果度都用左成萬蚊嚕,真係唔係好想再洗咁多錢,於是唯有唔買住囉,車,等我無喇喇發左達一定買左你,咦?但係我又唔賭錢,點會無喇喇發達喎,唔得,要bee狗教我點賭馬先,錢呀...

差唔多九點嚕,搞掂晒之後我地就去新蒲崗會合呀華喇,呀華佢仲帶左佢呀妹,同呀妹男朋友黎,加埋我地一家四口,今次總共有七個人呀,都算幾多人喇,嘻,然後我地就由哥哥架車,轉過去坐爸爸架小型貨車,由呀華做司機,車晒我地入西貢。哥哥同呀華擔心入到去無爐燒野食,所以入到西貢市中心佢地就去左搵喇,可惜都搵唔到呀,唯有聽天尤命喇。今晚真係勁凍呀,我諗得十幾度咋,不過響車入面因為空氣唔流通,所以就暖笠笠喇,嘻,我仲叫呀哥買左杯軟雪糕俾我食添呀,真係好過癮架。

我地架車一路向住北潭涌進發,我既心情真係好緊張呀,唔知陣間會唔會搵唔到地方睇呢?駛到萬宜水庫門口,呀華拎張水務署証出黎話「水務署呀。」,d人都唔洗認真咁睇,就俾左我地入去喇,沿途只有微弱既街燈,同偶爾幾個拎住一袋二袋,趕住入去睇星既青年人,繼續入我地就遇上兩條分叉路,一邊去東壩,一邊去西壩,雖然今晚響東面睇會最正,但果邊一早已經俾漁農署既人封晒路喇,淨係俾人行入去咋,哇...行成粒鐘喎,入到去仲要同人迫,我地就梗係唔制喇,於是就唯有去西壩睇下有無其他好地方喇。

呢段路起已經係無晒街燈架喇,唯有靠車頭燈照明,路非常之咁窄呀,仲要係單線雙程行車,路邊就係幾百尺高既山涯,因為無月亮既關係,望出窗淨係見到黑色一片,前面既路大家都唔知道係點,所有電話已經完全接收唔到,我地好似已經同外界隔絕喇,心情愈黎愈緊張喇,忽然呀華個妹嗌「哇,好靚呀。」,望上天,哇...好多星星呀,今晚個天好清,直情連星座都可以一個個咁睇清楚呀,我咁大個女都係第一次見咁多星咋,仲多過太空館個天幕呀,因為太過留意星星喇,所以緊張既氣氛總算舒緩落黎,只有興奮既心情。呀華同呀哥沿途都留意緊路邊有無磚頭,可以用黎撘爐嘛,但一直都無,淨係見到有度放左好多個,圓柱型中間通窿既大石屎,哈,我諗就係郊野公園d人放響度,準備響附近整燒烤場既,於是呀哥同呀華就夾手夾腳拎走左兩個,哇...果舊野又大又重,要兩個男人先搬得郁呀,哈,真係唔知撘唔撘到爐呢。

我地架車繼續向前進發,已經差唔多黎到盡頭喇,果度有個亭,好多人泊晒d車響側邊,然後就坐響個亭度睇星,聽呀華講,原來有好多個政府部門既人,只要拎住張証都可以駕車入黎架。呢度咁多人,我地見仲有一條路係轉落去唔知邊度既,就去睇下囉,落左一陣就到盡頭嚕,盡頭有個閘寫住「水塘重地」,見有個轉彎位都幾闊,而且又近盡頭嚕,都無乜車會落黎卦,於是我地就索性響條馬路度撘爐燒野食、睇星。

佢地將個鐵網夾住響兩個石屎圓柱桶中間,放d炭響上面,就開始透爐喇,不過透左好耐都唔著呀,原來係因為無空氣響個爐下面入,於是我地又搵左幾舊大石頭黎墊高個底,嘻,總算都搞掂喇,開始燒野食!一邊燒就梗係一邊望住個天架喇,但除左有好多星星之外,都唔見有流星既。燒左一陣我就飽飽喇,呀華真係周到呀,專登拎左d膠地板黎切響個地下度,然後先至放睡袋上去,咁咪唔會俾d碎石"銀"住囉,嘻,於是我就尼響個睡袋入面睇星喇,呼...我著左兩件衫,三件褸呀,其中一件係綿衲添呀,好舒服呀...

時間已經係十一點幾喇,黎左十幾個青年人,佢地好嘈架,又講晒粗口咁,真係破壞晒睇流星既氣氛呀,佢地仲要坐得好近我地呢,講咩都聽得好清楚,不過佢地都幾威,成班入黎可以人連電筒都無帶,衫又著唔夠,淨係帶左一張沙灘蓆,十幾個人就咁坐晒響上面一邊吹風一邊吹水,係好有情趣,不過一定好凍。之後陸陸續續都有人駕車黎到呢度睇星呀,睇黎想靜靜地都無乜可能架喇。我聽到隔班年青人中,有個男仔響度講「而家我地玩八蚊富翁,而家係一毫子題目...」,哈哈,佢地無聊得黎都幾搞笑喎。話晒我都係訓響馬路上面,其實都有危險架,因為我隔離就係一條斜路,成日都有d司機駛架車落黎睇呢條路 係落去邊,有個的士佬載左個客落黎,見無路咪要響呢度調頭囉,佢又好似好勞氣咁喎,咁我以為佢實夠位調頭架嘛,咪繼續訓響度唔郁囉,點知佢技術差,見到有個人訓響度都駛埋黎,我咪坐響身囉,驚佢見唔到我嘛,點知坐左響身佢都係咁駛過黎,駛到差唔多響我前面一米左右,媽咪佢地就叫我起身俾佢調左頭先,我咪唯有響個睡袋度跳番出黎囉,仲俾佢車爛左一格膠地板呀,哼,死的士佬。

十二點喇,呀華同呀哥要開車出去水塘閘口接爸爸入黎呀,於是淨番我、媽咪、華妹、華妹男友四個,原本架車剛剛好響個爐側邊,但而家無左,我怕有車會見唔到直接駛落黎呀,好彩都唔係好多車又落黎調頭,佢地大約半個鐘就番到黎喇。華妹同佢男友拎住兩個睡袋訓左響我側邊,而爸爸食左少少之後又走過黎陪我訓下,隔離班年青人嗌晒肚餓咁,唉...好心既媽咪竟然 叫埋佢地過黎食喎,哇...你估開善堂咩,佢地十幾個人呀,不停咁食,好似當左係自己咁,我覺得佢地太唔客氣喇...呀華個妹即時面色一沉,彈番起身走過去,控制住班飢民,我地分開兩樽蜜糖,有一樽係唔可以搽牛肉架,唉...真係擔心佢地會調亂,不過咁多人,調亂左都唔奇喇...爸爸其實仲未食飽架,不過俾其他人圍住晒個爐,佢都唔想迫埋去食喇,都唔明呀媽做乜忽然咁豪...幾個就無所謂,而且呢班人似乎太唔客氣喇...原本呀華仲帶左個gas爐黎,諗住打邊爐架,但太混亂都係無打到,淨係用左黎煲茶煲咖啡,華妹又買左四隻好大既東菇諗住用黎燒,聽講好難買架,好彩無俾果班飢民食晒咋。爸爸聽朝仲要番工,諗住響車訓一陣喇,但班飢民太嘈喇,根本訓唔到,聽朝爸爸仲要駕車架,激死人喇。

算喇,唔好理人地喇,專心d睇星,今晚真係好多流星呀,當然唔會多到好似星願咁喇,如果真係咁,我諗世界末日嚕,偶然又一粒,偶然又一粒,最記得係十二點左右,睇到一粒超巨型,條尾好長既流星劃過半個天空添呀,佢條尾係綠色、黃色、綠色咁架,其他細d既流星既尾都比起平日既長,粒粒都絕不欺場,好靚呀,不過可惜喇,初初見到既第三、四十粒,淨係識得嗌「哇!」,同埋興奮到響個睡袋入面彈,都唔記得左許願,但今晚實在太多流星喇,當第四十幾粒出現既時候,已經無再大嗌,反而好冷靜咁許願,唔知同一個願望許左幾十次,會唔會特別靈既呢?天文台話兩點幾至三點幾會係流星雨高峰期,差唔多有五千粒流星響天空掠過,嘻,肉眼梗係見唔到五千粒咁多喇,不過都睇到一次好精彩既,就係連續七粒一齊閃過,哇...真係不枉此行,嘻,我d朋友叫極都唔黎係佢地損失嚕,因為要等三十三年先有一次咁多流星既流星雨呀。

大約三點幾,睇睇下我都滿天星斗,然後訓著左嚕,再醒既時候已經係四點幾喇,因為聽到爸爸話要載果班年青人出去閘口喎,哇...雖然佢地走左幾個,但都有九個人,咁即係我地響度吹風,等爸爸送晒佢地先走得?本來訓左既媽咪都即刻彈起身,因為我d地貴重物品都響車上面,佢地成班飛仔咁既樣,好危險架嘛...唉...點解爸爸咁好人架...咁我地幾個咪要響度吹多半個鐘頭風先走得?雖然話由呢度行出閘口足足要兩個鐘,但人地成班有本事行得入黎,就有本事行番出去架喇,唉...原來爸爸話一次過車晒我地出去喎,下?我地加埋有十六個人喎,架車之可以載七個人架咋,咁咪好危險...但呢d野大人話事,佢地決定左都無法喇,俾人捉到逐個人頭罰錢咪又係我地俾...於是我地十六個人就迫埋響架車仔入面,好似表演雜技咁。d星星轉左去第二個方向,所以天上面既星星少左好多,不過個天比頭先更加清,仲有好多流星不停咁飛過,哈,真係睇到慣左嚕。

爸爸車晒佢地出北潭涌先放低佢地,然後爸爸就駕電單車番屋企,而我地就由哥哥做司機,繼續送我同媽咪番屋企,駛過北潭涌不遠,見到佢地成班行緊,哇...佢地話無錢撘車喎,諗住由呢度行番出去西貢市中心...哈...年青人...做事真係無乜諗過後果。

番到屋企五點幾,我同媽咪輪流沖涼,再等哥哥去新蒲崗拎埋架車番黎,沖埋涼,時間已經係六點幾喇,想訓?好難喇,星期一既活動先至由而家開始呀,我地要落樓番醫院覆診呀...響架車度我梗係訓到不醒人士喇,七點幾番到醫院,嘻,今次排第一呀,過左幾分鐘陸續都有病友番黎嚕,而我同媽咪已經昏迷咁訓左響梳化喇,尋晚真係好似發左一個夢,夢到一個好浪漫既流星雨之夜,感謝我仲行得走得,可以擁有一世都會記得既經歷。

黑暗中透爐::::::::::::
咁多車架...::::::::::::
呀華表演用口透爐::::::::::::
又講番起吉場bbq果次...::::::::::::

 

都算係開心嚕<---->呀 咩 昔 日 發 傻<---->好耐未食過自助餐