三 月 十 九 日 星 期 一 | ||
|
我條頸流血呀！ 今朝七點幾就要起身喇，想早ｄ番去唔洗等下半場先有得睇醫生嘛，但係爸爸竟然叫左哥 哥車佢番工，於是我同媽咪就趁呀哥未番黎，去惠康逛逛。我買左兩包麥提莎呀，十蚊兩 包嘛，緊係老屈呀媽買兩包喇，嘻，正，又有朱古力食，上左車之後先發現點解我買左支 「嵐谷綠茶」既？好邪呀....不過道地同嵐谷比較，又好似嵐谷香ｄ既。 番到醫院已經成九點喇，我地排第二十六個呀，唉....睇黎都係下半場睇多架喇，哇哇， 趁呀媽簽緊名，我咪左右瞄下有無靚仔囉，呵~~哎呀哎呀，我見到上次我抽骨髓之後果個 靚仔呀....(其實呀咩今時今日既審美眼光，就係有頭髮就叫靚仔，因為平時覆診有九成都 係光頭既)我呢ｄ含蓄型，梗係無走過去同人認親認戚喇，不過我都好醒地坐左響附近。我 個位係近佢，但可惜只係對住佢「後尾怎」，佢又點會無喇喇擰過，而又咁好彩黎認得我 呢個蒙面超人喎(雖然上次抽骨髓，因為高八度既驚喊聲，而聲名大噪)。唉....好鬼悶呀 ，呀媽又去左做義工，幫ｄ病友量血壓，丟低我呢隻苦海小孤雛響度，咪唯有睇下東touch 囉，點知果個靚仔行過黎，坐左響近於我一尺既椅度，同我隔離個叔叔傾計呀，哇，即時 雙眼發青光，手心冒汗，但我又怕醜喎，一直就係咁(扮)睇書，其實隻耳仔伸到長一長聽 緊佢地講野，陰公囉，原來佢今日唔係覆診架，佢係唔舒服入院架，我聽到叔叔問佢「你 痛到好唔自在喎....」哎呀，唉....我不禁眉頭一緊，佢真係痛到好唔自然咁，九成係內 臟排斥喇....最後我都無同佢講過一句野，之後佢就拎住排版飄走左喇....唔知佢點呢， 希望無乜事喇。 好慘呀，真係要等到下午，我肚仔餓喎，但又唔可以食街野，雖然我成個袋都係野食，但 全部都係違禁品，朱古力、糖、積及橙餅....嘻，唯有好似上堂偷食野咁，啪一粒入口， 又即時望左望右咁喇，嘻，好似特別好食咁。等得超級悶，尋晚又訓得兩個鐘，所以就同 媽咪兩個訓左響廳度，訓訓下聽到叫我地入去等喎，咪行入去繼續訓囉，之後又話見醫生 喇喎，哇....我都係剛剛起身，所以曚下曚下，交叉腳咁行入去醫生房，醫生今次無講乜 野呀，不過依然都係貧血囉，扺抗力又跌到好低，所以媽咪都幾緊張。之後媽咪去拎藥， 而我又繼續留響廳度訓覺，因為已經無乜人喇，所以我直情係訓左響張沙化度，zzzZZZ.. ..都無乜試過訓街都可以訓得咁安詳，因為實在太眼訓喇。 三點幾，哥哥黎車我地去遊車河，坐呀哥架車，絕對係一場對持久力既角力賽，因為佢開 車無耐我就開始想嘔，平時坐林先生架車都唔會架，我呀哥轉彎果陣，仲可以完全唔減速 ，結果我同呀媽響後坐係左拋右拋，哇....大佬....你唔係當自己真係頭文字ｄ呀....我 地首先車左媽咪去旺角拎野俾人，唉....我超級想落車去行街呀，不過呀媽唔俾、醫生姑 娘唔俾，而我自己都唔敢，一個唔覺意感染，死左咪好唔扺，醫得咁辛苦。 媽咪話想去大埔滘互動自然中心喎，但又講唔到正確位置喎，所以就左兜右兜，經過雍雅 山房，媽咪好想去睇下，於是就話入去飲杯茶，但係因為果度係五、六十年代既超級拍戲 境點，所以ｄ野亦都超級貴呀，媽咪就好鬼豪咁話「難得一次，無所謂喇。」，陰公囉， 我睇到個餐牌就滴汗喇，難得呀媽仲從容不迫咁點左杯咖啡，敗家呀哥又點左杯凍咖啡， 剩番我同哥哥女朋友就好冷靜地無點野飲，哇....唔係喇fa，最平一杯野都三十八蚊，一 個奶昔要五十幾蚊，哇....我去麥記食杯香芋奶昔都係五蚊雞咋喎，隔離台仲點左個西多 士呀，哇....一定係大陸富豪喇，成八十幾銀一個喎。其實呢度ｄ野都幾污糟，又唔似得 酒店咁靚，只不過係因為出名之嘛，所以我就覺得唔多扺食，ｄ耆英侍應個個都好似狗眼 看人低咁，不過計落兩杯野飲一百蚊，除四都係每人廿五蚊，當係入場參觀費都扺既。我 地食完野之後就狂殺菲林，慌死蝕底，話晒都無乜機會再黎喇喎。
之後我地左兜右兜，週圍搵究竟媽咪所講既大埔滘響邊，好彩響日落前都仲去到，哇.... 入去果個互動自然中心條路，兩邊都起緊樓，不過ｄ樓得幾層架咋，而且果種感覺係地盤 都好乾淨，可能因為係同嘉道理農場同一間公司起，所以亦都好田園feel。泊響我地隔離 架車，兩邊窗都無閂，哇....咁大頭蝦既。之前聽林先生講，入面間小白鷺餐廳好貴架， 所以我入去之前都同媽咪講定，唔好再食野喇，之前響雍雅山房已經俾人斬到一頸血，呀 媽既錢即係我既錢，所以我條頸都好痛。同媽咪去小白鷺餐廳門口，睇下係個餐牌係咪真 係咁貴先，哦....原來都唔係好貴，如果同頭先間野比，價錢都係一般西餐廳咁，仲有湖 境喎，扺！不過之前食飽左，唯有等下次喇。
入面間博物館淨係星期六、日先開，唯有齋響個窗度望下喇，之後我地去左有個露營既場 地，果度有個印第安feel既帳幕，好特別，而且又近湖邊，又俾野餐，真係正到暈呀。果 度又無乜人喎，勁踩板車都唔會撞到人。 五點幾，本來我想去又一城行街架，因為我想買電腦書囉，不過最後都係去左沙田行宜家 ，咁橋果度有個小型書展，咪睇下囉。之後行左成兩個鐘宜家，行到我腳都跛，勁想坐住 張轆轆椅當龍椅。我地買左好多蛋餅既盤盤呀，嘻嘻，正呀 番到屋企樓下，我地又入左惠康買野，點知行行下發現條褲濕左，死！第一時間懷疑自己 失禁，因為完全無感覺，但諗真又無理由架，連件衫都濕埋喎，嗚~~~~原來我響車飲左幾 淡綠茶之後，無扭番實個蓋呀，成支綠茶倒晒，個袋濕到滴水呀，咪即時拎番個電話出黎 先囉，陰公囉，我成身加成個袋都黐立立呀，唯有即時大洗喇。 | ||
| 三 月 二 十 日星 期 二 | ||
|
又要超龜速 有朋友俾左個網址我，我都係用佢網上屎驚毒架，又方便，又唔洗下載任何野，得閒我就 去body check架喇，網址係http://housecall.antivirus.com 今日七點做春風伴我行呀！半個鐘之前我就校好晒帶喇，因為聽susuky講今次係影我地學 校，仲要susuky有份做臨記呀，哇哇哇，我個老死喎，點可以唔睇呀，點知都唔係既，等 人地空開心一場，唯有再等多一個星期喇，記得捧場呀，好索架佢。 唉....我又唔出得街喎，一日到黑可以接觸到人既地方，就係網上面喇，無左部pc唔係上 唔到網，不過係用唔到寬頻，又要超龜速....而且upload野又煩左好多，唉....down到極 點呀，所以都無心機食飯，而且麻麻同呀媽都迫我飲湯，搞到我愈黎愈唔想食野，而家ｄ 胃口唔同左，我淨係覺得ｄ湯好似一ｄ加左油響面既水，見到就驚喇，想食既野又多數唔 食得，唔好味既野又迫人食，所以我開始好憎食野。之前成日嘔果排，一日都食唔到一次 野，但如果我食少少，呀媽同麻麻都會好開心，而我又覺得自己好叻，但而家我夾梗食， 你地又會話我食得少，我已經覺得好飽，你地又要我飲多碗湯，我真係好驚食飯，我愈黎 愈唔鐘意食野，日日都要俾人鬧我食得少，你地唔好咁貪心喇，咁我係食得咁多就咁多， 肚餓我都識搵野食喇。
我有個icq 朋友仔，佢用左我黎做功課，哇哇....初時佢話要用我黎作篇文，之前有其他
人都咁做過，但睇完之後就有點好
今日呀哥買左一個咕臣，同埋一隻sony貓貓既公仔俾我呀，個公仔可以打開佢，放個暖芯
入去做暖手袋架，個樣仲要得意到暈呀，嗚~~~~好滾動呀，因為哥哥好少買野俾我架，通
常都係我勁扭勁扭，先可以響佢手中拎走一樣野，不過又有少少肉痛，因為哥哥剛剛無野
做嘛，應該唔好亂洗錢既。嘻，我真係超級鐘意隻sony貓貓呀，多謝哥哥，啜~~
| ||
三 月 二 十 一 日 星 期 三 | ||
|
沉到谷底 雖然成七點先訓得著，但一早就俾電話嘈醒左，呀哥走入我房話有位李sir 搵我喎，下！ 李sir ？佢係我中學最崇拜既老師黎架，即時彈起身飛過去接電話，不過俾李sir 飾穿左 我訓緊覺，所以講多兩句之後佢就話唔阻住我喇(真係唔阻喎....)，唉.....可能李sir驚 我變臉卦。 因為太興奮，所以訓唔番，哥哥問我去唔去遊車河，本來唔多想出 架，因為出面又熱，我又眼訓喎，但難得有機會，唔好咁懶喇，好！換件靚衫出發喇。其 實哥哥係想車佢女朋友番工，同接埋佢放工架，所以中間就有幾粒鐘free，又唔知做乜， 咪同我出去兜下風囉。嘻，一點幾起程，哥哥首先兜左去跑馬地放低佢女朋友，於是佢就 問我想去邊喎，我最想梗係探下我ｄ朋友喇，咁耐無見....探邊個好呢，港島區....呀如 ？isiah ？呀基？個個都想探添，但佢地都響商業區喎，咁多人實無得落車喇，最後都係 決定去上環探susuky。susuky做緊人口普查員嘛，但佢隻野又點會勤勤力力做丫，所以留 左響果一區既人口普查center度，我咪去果度搵佢囉。數下手指都有幾個月無見喇，susuky 緊係又索左喇，「壹本便利」仲叫佢去參加「天網」既唔知乜鬼野選舉喎，嘻，証明佢真 係索架。 下一站同哥哥由上環去左赤柱，買左ｄ野食同野飲，之後去左石澳，呼....好靚呀，又少 人喎，呢度令我諗起一大堆野。我記得中五之後果個暑假，我同過一個鐘意既男仔黎呢度 游水，但其實我係唔識游水架，所以佢就捉住我隻手(呵~~俾我博晒蒙)，慢慢扶住我行出 ｄ行出ｄ，除左好細好細個果時，去過沙灘游水之外，我都再無去過喇，所以果次我笑到 癲左(滴汗)，雖然去沙灘游水係麻煩，但比起泳池真係正好多倍。石澳個灘好平，所以行 到好出都仲係好淺水。之後去果一次，係中秋節既夜晚，都係同果個男仔，但唔同既係我 地已經一齊左lu，仲一齊響石澳沙灘上晒月光。最近一次去係之後果年既中秋前，同展翅 既朋友仔去，成晚傾心事，睇流星，放煙花，嘻，三次既回憶對我黎講都係咁重要。 之後我地去左大浪灣，又去左鶴咀，哥哥話入面有個唔知乜野自然保護區喎，點知入去條 路淨係得ｄ爛車同工廠仔，人都唔多隻，入到有度寫住「私家路」，都無咩自然保護區， 不過呢度都幾恐佈，山上面有幾隻ｘｘ電訊大大鑊，對面山又有幾隻，隻鑊大到有少少外 星人基地既感覺，仲要電話完全收唔到，哇....閃喇....最大收鑊我諗都係睇到有隻鷹， 企左響一棵好矮既樹上面，隻鷹個樣真係同「鷹牌花旗蔘」果隻一樣架，之後佢仲響我地 車上面低飛，張開隻翼都有成米闊架....(迴音) 之後我地仲去左歌連臣角火葬場，其實呢ｄ陰氣重既地方媽咪實唔俾我去架，不過我又八 掛喎，我仲叫呀哥車我去赤柱監獄喇，同埋污水處理廠睇下添呀，今日果然增廣見聞呀。 最後我地去左大潭郊野公園，我好鐘意果度架，因為中三果年，李sir 搞到個camp係響學 校入面宿營，其中一日下午，我地就係去左呢個郊野公園玩，夜晚七點幾再開始行夜山， 由頭到尾行晒成個山呀，超級正，仲見到好多螢火蟲添呀，不過就恐佈左少少囉，因為響 個山度，黑到伸手不見五指，但又要繼續行喎，真係一個好難忘既經驗。雖然往事已經過 去，但今次可以重遊舊地，都帶俾我不少快樂既回憶。 夜晚叔叔搬番部電腦黎屋企整，我就梗係八八掛掛睇住架喇，無端端醫院打電話黎，話俾 我聽醫生叫我聽日番去，原本好好既心情，一下子沉到落谷底，一定係血報告有問題.... 醫得咁辛苦，我唔會再入番去架，我就算死我都唔要再入醫院，唔會.... | ||
三 月 二 十 二 日 星 期 四 | ||
|
今日好少人覆診呀，都無乜邊個識既，有種冷冰冰既感覺，好似電視劇中既老土橋段咁， 收到壞消息之前，總會有些緊張音樂陪襯。李醫生同媽咪講，響我既血液中驗到有唔好既 細胞，初步懷疑係復發，今次番黎主要係想抽骨髓驗清楚，我聽到後成個人好似被重重打 擊左一下咁，然後慢慢行出走廊，深怕不小心知道一些可怕既事實。媽咪出番黎既時侯， 我再問多佢一次，因為我知道媽咪始終會用比較溫柔既方式，黎解釋一次俾我聽，然後媽 咪所講，同我剛剛不小心聽到的差別都不大，首先第一步就係要抽骨髓驗清楚。 我同媽咪坐響大堂，今日比平時覆診少了一點熱鬧，因為喊左成晚隻眼好累，所以我伏在 媽咪既膊頭上睡著了，然後聽到姑娘嗌咪叫我入去抽骨髓。今次我要求梁醫生幫我抽，因 為梁醫生抽過一次係唔太痛，因為我成個慘樣，姑娘都不敢惹我，靜靜地幫我call了醫生 ，梁醫生響電話吩咐姑娘，先俾粒「鎮定藥」我食左先，嘿嘿....可能係我抽骨髓既喊聲 太出名喇，梁醫生果然醒目。 我訓左響床上面等，等等下藥力就發喇，所以我就沉沉睡去了，之後既事我都唔係咁記得 ，之後媽咪講番一次俾我聽我先知，食左藥之後我訓得好安靜，醫生黎左我又唔知，除緊我 條褲準備抽又都唔知，直到姑娘叫左媽咪出去等，我就醒左，仲不停喊住叫媽咪，醫生唯 有好無奈地叫姑娘去拎「矇仔針」番黎。可能姑娘係響樓下借都未定，因為對落七層都係 精神科。打左「矇仔針」之後醫生就開始打局部麻醉針喇，媽咪話醫生抽緊果陣，我又識 嗌痛，又識嗌腳痺，但個人又迷迷糊糊咁。可能因為又食左「鎮定藥」，又打左「矇仔針 」，雙重藥力，所以我之後訓左好耐，仲訓得好安靜。 「呀芝，你睇下邊個黎左？」聽到呢句之後，我慢慢睜開眼，好似仲發緊夢咁，原來係卿 姐呀！卿姐係我響血科最鐘意既呀嬸黎架，佢好錫我，我又好鐘意佢，以前我住院，佢一 番親工，我就會成日跟住佢行黎行去架喇。我好開心呀，但又暈駝駝，淨係勁講「我好掛 住你呀....」，嘻，我最錫卿姐。 醒左之後就閃喇，個骨髓報告最快聽日會有，不過個心都知道凶多吉少架喇。之後我地坐 哥哥架車，車媽咪去元朗執番開工ｄ野走，一直我都無乜心機呀，我淨係知我呢個病係關 乎生命，復發唔醫既話會死，死之前既一段日子會行步路都無力，會死得好辛苦，但醫既話 ，黎緊既日子又會好辛苦，又要入番去化療。我仲記得上一次換骨髓，我四十幾日都唔可 以踏出自己間房，朋友黎只可以響門出面用電話打入黎，好似探監咁，一點自由都無。三 個星期我都食唔落少少野，因為食左又嘔，唔食又嘔，每日我都嘔幾次，後期仲嘔到兩隻 眼爆晒，兩隻眼都係血紅色，我連行去廁所既力都無，一日到黑都要吊藥，個口又爛，食 道又爛，胃又爛，連口水都吞唔到，夜晚訓覺要不停起身吐口水，仲要成日嘔血....對我 黎講，呢四十幾日係我一生人中最辛苦、最不敢回想既日子，佢係我一生人中最惡最惡既 惡夢.... 你唔會明，因為痛既唔係你。 | ||
| 三 月 二 十 三 日 至 二 十 五 日 | ||
|
多謝關心 我成日都覺得好似周身痕咁，又覺得個口有ｄ痛，我好驚呀，我唔敢將沖涼廷遲，因為我 知道如果皮膚排斥的話，沖涼會好痛，我唔敢將刷牙廷遲，因為我知道口爛既話，想刷都 刷唔到，我唔敢唔食飯，因為我知道如果我再要化療，幾好食既野，想食都食唔到.... 我覺得自己好似就快要死咁，我好驚呀....我唔想上網，我知道好多朋友擔心我，但我唔 想再解釋咁多，每一次既解釋，就好似要我再面對一次現實，我寧願同一ｄ唔知我有病既 人傾計，因為佢唔會時時刻刻將我既病掛在口邊。朋友既關心令我壓力好大，每當我收到 別人的massage ，佢地總係講「你去左邊呀，我好擔心你呀。」，我知你係對我好，但唔 開心既係我，血癌醫極都唔好既又係我，收到你massage 一刻，我仲要牽強笑住咁安慰番 你「我無事呀....」，我講呢個大話係講得幾吃力，我明明係有事，但偏偏要勉強我說一 些令你好過的說話。我想我既朋友可以体諒我，唔好再迫我，唔好不停問我野，唔好不停 叫我唔好唔開心，因為呢句野好廢，俾著係你血癌，我諗你都唔會開心卦。關心，一句就 夠，不停問我野，我會覺得你似娛樂版記者，純粹係未見過血癌既人，想八下我係咪三頭 六臂，你過份既關心，只會造成我既唔開心。 星期六晚零晨兩點，我呆坐電腦既時侯，接到呀哥既電話，佢好急咁叫爸爸聽電話，我都 心知不妙，所以沒有放下話筒，偷偷聆聽佢地既對答，哥哥好急咁講「撞左車呀，個頭凹 晒」，媽咪就問哥哥有無流血，原來哥哥係指架車既車頭凹晒，我好驚，但其實哥哥每個 星期六都出去鬥車，都預左有呢日，之後本來訓左既爸爸，好嬲咁起左身，響電話質問哥 哥既情況，原來哥哥響大埔同人鬥車，對方刻意響哥哥前面急煞，哥哥架車撞左埋去，然 後對方就夾埋成幾十人圍我呀哥一個，要佢賠錢，ｄ人好喊打喊殺咁，爸爸話呀哥好驚，驚俾人打，我響側邊 聽到成個人震晒，我都好驚，因為我知呀哥係響屋企對我惡、打我，但響出面就好細膽， 成日俾人蝦，所以我好驚呀哥俾人打，呀哥叫爸爸入去大埔救佢，我又擔心爸爸為左保護 呀哥，又俾人打，我驚到個心跳得好快，但又唔敢講出口，唯有尼左入房，一邊喊一邊偷 偷打左俾 bee狗狗，當時已經係零晨三點喇，bee 狗狗都訓左喇，但我就捉住佢係咁喊， 我真係好驚呀，我又怕呀哥俾人打，又覺得ｄ人整爛晒我地架車，仲要屈錢，蝦我呀哥， 我又驚呀哥飲左酒，差人會拉，不過bee 狗狗同我講左一輪我都無咁驚，收左線之後我繼 續偷聽爸爸同哥哥既對話，原來我地架私家車撞到無得救喇，因為架車係爸爸既，所以爸 爸好嬲，我見到爸爸嬲我又好驚，又唔捨得架車，因為我知道架車係一件好貴既野。ｄ衰 人要我呀哥賠六千蚊，唉....我地架車都無晒喇，仲要我地賠咁多，分明係人多蝦人少， 呀哥又無錢喎，我媽咪即刻用電話過左六千蚊去呀哥戶口囉，唉....好唔開心呀，好似俾 人打劫咁，一晚之間，無左六千蚊，又無左架車，唉....我喊左成晚，最好彩都算係呀哥 無受到傷，我本來想等呀哥番黎架，但等到六點幾都忍唔住訓左lu。 第二日唔知點解，我唔敢面對呀哥，可能係我自己唔開心喇，因為我唔搭得公共車，無左 架私家車，我就等於無左隻腳，無得再出去玩喇，唉....我開始体會到，唔想親人有事既 感覺，我寧願ｄ唔好既野都發生響我身上，橫掂我而家都咁大鑊架喇，我淨係希望我愛既 人都健健康康。 | ||
|
|