三 月 二 十 六 日星 期 一

覆診日 今日約左呀琪一齊撘車番去覆診，其實骨髓報告都出左，結果係我個病又復發，但仲未知 道下一步要點做，又或者已經無下一步....番到去見到好多病友都覆診，掛住傾計都唔記 得左ｄ唔開心野。之前有一個好多野講既伯伯，佢換左骨髓幾年架喇，不過一個月之前又 聽佢講又復發，我仲記得佢好大聲咁講「又番黎渡假囉....」，雖然佢係成日笑，但果一日 我的確係見到佢有一刻既失落，我又係復發，佢又係復發，但我覺得我都俾佢好運少少， 因為我換完骨髓出左院都係三個月，都無真真正正過番正常生活，我都仲係一個病人，所以我諗我會比較易接受，但佢好番幾年囉，以為自己可以完全忘記以前既事，重新同屋企 人好好生活，但又接到呢個咁唔好既消息。係，我係唔可以夾硬將自己同正常人相比，但其實我已經比好多人好運，起碼響我既病友當中，我唔係情況最差既一個，正如尾尾話齋 「不求與人相比，只求突破自己」。 今日我竟然係第一個俾醫生嗌入房，入到去之後淨係見醫生走黎走去，都唔知係冷氣太凍 ，定係我驚得滯，我不停咁震，醫生終於坐低喇，今日既驗血報告同上星期四相比，紅血 球、血小板、白血球....全部都跌，正常人紅血球係12以上，但我得8.幾咋，所以成日暈駝駝囉，媽咪問點解又復發，醫生話十個中得兩個會，我就咁好彩果個係五份一囉，唉.... 佢話ｄ血球係咁跌，好易會感染，感染左就好易命都無，所以要快ｄ排期入院換血幹細胞 ，醫生最快度到係今個星期四，但我真係好唔想入番去受苦，但醫生話拖都無用，淨係會 搞到個情況愈黎愈差，我真係唔知呀....我腦海淨係不停閃過換骨髓果個幾月既辛苦片段 ，唔好迫我呀，我講過我寧願死都唔會再入去受苦架，唔好迫我....我十八歲，醫唔醫都 係由自己簽紙，醫生都無我辨法，唯有叫我星期四再番黎驗血，睇下ｄ癌細胞生長得快唔快，如果快既話就無得再拖。 出番黎之後，我對眼淨係識得望住鞋尖，然後喊住咁行左去等升降機，我聽到一個唔識既病友靜靜的響我身邊說「努力呀....」，努力真係有用？一年喇....我病左一年，復發左兩次，我得一個呀哥，個天都俾我同佢既骨髓一樣，所以我先有命繼續醫，但醫左之後個天又要我復發，究竟個天想我生定死....唔好再玩我喇.... 番到屋企之後我無晒心機，走左入房訓覺，我個心好亂，唔醫就死，醫左又復發，我真係 唔知....我連買件衫都唔敢出主意，講到生與死呢ｄ問題，我真係唔識決擇....我當初病真係好有鬥志，但愈病我就愈驚，我再唔似以前咁樂觀喇，就算係抽骨髓，我以前根本唔 洗打咩「蒙仔針」，但抽左無數次之後，我而家一次比一次驚.... 有好多人好豪氣咁講「我唔怕死。」，自以為好勇敢，嘿，我都唔驚死喇，因為死係一秒間既事，但我覺得有勇氣去醫，先係勇敢，因為醫療既過程係長久而痛苦。我唔係一個勇敢既人，我無響十四樓窗口跳落去既勇氣，我怕我死左無人話俾我既網友知，咁個個人都會以為呀咩去左偷懶，我又怕我死左之後，見到我愛既屋企人、朋友為我喊，我會心痛， 我一定會後悔。我永遠都記得，我有一個病友，因為無適合既骨髓，所以白白響醫院等死 ，我見到佢媽咪一邊喊住咁講「養到個女咁大，都要走....」，我個朋友只係得十九歲。 我唔會要我媽咪同佢一樣。

三 月 二 十 七 日 至 二 十 八

我愛903 響幾年前，我好鐘意聽電台架，因為有一個朋友響104度做，不過之後佢又無做lu，所以 就無再聽電台。其實一直都唔係咁鐘意聽收音機，因為感覺上好似係老餅先會聽，又或者 係車衫果ｄ女工同小巴、的士司機聽。中五畢業果年，我屋企裝左互動電視，果時我見我男朋友成日睇「哇哇哇打到黎喇」，我咪又八八掛掛睇下有咩好睇囉，點知睇睇下又覺得 好正喎，不過播左幾個月之後又無播lu，所以我都無再"睇"電台喇。直到最近兩個星期， 有次坐呀哥架車番醫院覆診，果日都幾唔開心，哥哥響車度播住林海峰既「好世界」，聽聽下又幾搞笑喎，我最鐘意聽節目之中有個叫「經理早晨」既環節，呀jan 講野真係好搞 笑。果日既下午，我又聽「森美小儀dot dot dot 」，因為我中心個社工係同森美同一間中學架，而且我個社工個樣、身形同性格又好似森美喎，所以聽起上黎特別有親切感，好似聽緊我個社工講野咁。 果日森美同小儀講起，點解所有罐既蓋都係圓形，就算蛋卷鑵個盒係正方形，但個蓋都係圓形，嘻，你知唔知點解呢？其實我都唔知架，不過森美話原來係因為所有形狀，除左圓形之外，所有都會跌番入個鑵入面架，嘻嘻，搞笑既呢。 自從追聽左電台之後，日日都好似好忙咁，而且又聽多左好多新歌仔，可以update d，早 ｄ放晒上吉場。每次聽到播「病人」呢首歌既時侯，都有點自以為是咁講得，好似唱緊我 咁。呢幾日我不停咁諗ｄ白痴野，不如寄封信去環球，話我係呀東既fans，但又身患惡疾 ，叫呀東黎探我喇，又或者楊千嬅黎探我喇，哈哈哈....係白痴左ｄ，不過呢ｄ係病人權益黎架嘛，幾生人都未必可以身患惡疾喎，咁難得中左就梗係要洗到盡架喇，嘻，我有個病友都叫劉德華去探佢喇，「阿虎」首映會仲特登請佢去呀，幾鬼羡慕呀，有病真係大鬼晒咁喎。咦....好唔好呢，入左院send封email 去試下先，咁....楊千嬅好定呀東好呢， 嘻，定係兩個一齊呢，橫掂佢地都拍緊feel 100架喇，正~~ 我響我朋友之中，一直都係一個小人物，又唔係特別受歡迎，所以我覺得我既朋友係一定唔會黎睇吉場。病左之後好少同朋友聯絡，但有時同朋友傾開計，佢地好似都好熟識我既生活，我地好似從來都無分開過，仲比以前更加交心，漸漸我先知道，我既朋友都係含蓄地去關心我，雖然佢地唔會好似我咁，成日將「我好掛住你」、「我好鐘意你呀」掛響口 邊，但原來佢地都鐘意我架，嘻。就係認為唔會有人睇我「傻笑」，所以有時我會毫不顧 忌咁響度臭罵別人，點知....今日竟然有兩個俾我臭罵過既人，話俾我知....佢地有睇我 網頁....果下簡直係瘀到暈，死....忽然覺得自己好衰女，我響度寫出黎既時侯，無預左係好多人會知，我真係當私日記咁寫出黎架咋，唉....不過點都好喇，我起碼從來無同佢地扮過friend，因為我絕對唔會一邊講人壞話，一邊同人做朋友，所以即使俾人撞破時係有點兒滴汗....但都對得住自己呀。 我無可能每個人都鐘意，每一個都鐘意，就等於無一個鐘意，因為我係有血有肉既人，所 以我都會有唔鐘意既人，就正如人地抄我網頁，如果我可以毫不介意既話，唔代表我大方 ，但就代表我對自己既網頁無感情，代表我無出過一點力去做。 嘻，好開心搵到個新既播放器呀，之前一個唔係唔好，不過因為我俾左好多朋友，所以個個都一樣，今次終於可以唔一樣lu。呢個播放器我改左成晚呀，因為佢本身係播mid 架， 所以都幾麻煩，希望黎吉場既人都會鐘意喇。

三 月 二 十 九 日星 期 四

覆診日 因為我唔肯入院，所以醫生要我密ｄ覆診，所以今日又要番醫院喇，我個病復發左都有一 個星期喇，雖然都係唔開心，但心情都比之前好一點，我成日都驚入番去會好辛苦，不過都唔驚得咁多喇，到左辛苦果時先至諗囉，最重要係現在呢一刻，我仲未入去嘛，而家開心咪得囉，無理由船頭驚賊，船尾驚鬼架，唔諗得咁多喇。 因為呀哥撞左架車，所以媽咪都係叫林先生黎車我地，嘻，今日林先生又係同埋佢個仔一 齊黎呀，呢呢呢，上次剪陸軍裝、好索果個呀，雖然兩次都係望住佢「後尾怎」，但就係因為睇唔清佢個樣，所以更加覺得佢索。嘻，今日仲勁塞車呀，天助我也，俾我響入院前幻想多幾十分鐘。 今日心情比較好，所以不停同ｄ病友傾計，而媽咪見我無乜野，又走去幫ｄ病友量下血壓 。其實我知今次都入硬架喇，但仲有少少接受唔到又要再辛苦一次，話晒都入去成個月， 辛苦成個月架，唉....以前無病無痛，就成日出夜街唔返屋企訓，而家病左先識掛住屋企 ，都係好笑呀。今次點都好過上次換骨髓既，因為係響血科住，唔係響骨髓移植科，血科自由好多，可以叫晒ｄfriend入黎陪我玩uno 都無問題。上次淨係俾食醫院野，今次就可 以叫屋企人拎ｄ湯黎都得。血科每間房有兩張架，希望住窗口位果張喇，因為窗口位又有 個大大窗台可以放好多公仔喎(嘿嘿，可以帶晒ｄsony貓公仔去)，又近電視，可以晚晚睇 到十二點都唔怕嘈到人，又或者可以帶埋playstation去玩， 窗台又放左部hi-fi(醫 院架~~)，可以聽cd喇，又可以駁md，又可以聽收音雞，最重要係可以....炸機！仲要炸粗口歌！望出去又有無敵大海景喎，嘻，不過都望到樓下一望無際既墳場景(滴汗)。唯一擔心同房會唔鐘意，我成日霸住條電話線上網。愈講愈開心，好似講到入去渡假咁， 其實除左會辛苦同痛之外，都幾似既，不過如果好似上次換骨髓咁辛苦既話，就算呀東＋千嬅黎晒探我，我諗我都無心機呀。 今日等醫生，等到我同媽咪訓著咁滯，個個病友都睇完走晒喇，得我地個醫生仲未黎，姑娘話醫生「一陣」到喎，仲以為係等多一、兩個字，唉....點知醫生既「一陣」係代表一 個鐘或以上....(滴汗)搞到我地又唔敢行開去買少少野食。見悶悶地咪又聽下收音雞囉， 無喇喇播起一首不知名既歌，歌詞係咁「請問仲有幾耐先到....請問仲有幾耐先到....請問仲有幾耐先到....」哇，即時打個冷震，因為首歌極似「喃嘸歌」，唔係喇fa....睇下 有無牛頭馬面先，哇！鬼呀！原來係醫生黎喇，呼....邪.... 今日既血報告明顯地係比三日前又跌左，我、媽咪、醫生心裡都知唔可以再拖喇，於是醫生又拎番個日子表出黎度，最快係星期六，即係後日....我喊住咁擰頭，我都係唔想咁快 入黎呀，但下一個日子就要等到四月中，醫生話「我驚你等唔到呀。」，咁又係....血癌個名咁恐佈，我諗真係會死人架，醫生有點不奈煩咁問我係咪唔想醫，只要我點一下頭就得喇，咁就以後唔洗我番黎覆診....我不停擰頭，梗係唔係喇，我知....如果我真係唔入 ，我諗我連四月中都過唔到....最後決定左係四月四日，兒童節就係我再上戰場既日子喇 ，希望今次可以贏番一次喇。

跌到谷底<---->呀 咩 昔 日 發 傻<---->繼續睇嚕

© 呀咩吉場 http://meredith.com.hk