牛、遊、果

::::::星期三::::::八月十五日::::::

好緊張呀~~~~尋晚成晚都訓唔著咁滯呀,因為...我今日...(約左男仔呢?)唔好暫亂哥柄先,我今日...約左...網友...見面呀...我唔記得我幾時識佢架喇,但對佢好有印象,因為佢個名好古怪,叫做大果...嘻,從佢個名估佢應該會係一個深山野人,好似一 個筋肉人咁。有次佢寄左隻震震sony貓俾我,勁得意架。上次入院前好唔開心,佢仲 send email俾我哥哥,話搵千fa 黎探我添呀。大果就好似一個護花使者咁,成日失驚無神令人驚喜。

有一日,金蘭姐妹isiah打黎無端端問我「你識大果架?」,原來...isiah個同事小琳同大果係好朋友黎架,有日大果將我既網頁俾左小琳睇,先發現原來我地大家都識, 好勁呀,世界真細少少少呢。然後我地就打算搵日約埋金蘭isiah、小琳、大果出黎見 下面喇。

我問isiah「大果靚唔靚仔架?聽佢個名好似野人喎。」

isiah用高十六度既聲線回答「大果係女仔黎架,仲要係靚女呀。」

死喇...知道佢係女仔仲緊張添,話晒人家都係靚女,靚女通常好高不可攀架喎,好緊張好緊張...又擔心佢見到我真人,先知我係咁白痴,即刻對我扣晒分咪弊。
 

終於到約會既日子喇,我叫哥哥車我出去,見都有d時間,佢問我想去邊兜一兜,我當 然話去睇牛牛喇,之後呀哥車左我入西貢。wow~好free呀,一邊聽住林心如既趴喇趴 喇,一邊跟住佢唔咸唔淡咁唱,西貢真係舒服呢。哥哥話有個輪胎插左口釘,要去車舖 拔番佢出黎,駛到有一條路,路邊好多車舖,哥哥求其揀左一間,個老闆一知道有生意 做,幾鬼勇呀,一野飛左出馬路好似交通警咁截停後面d車,哇...你知西貢d小巴司機 個個都好似賽車手咁架喇,條路又得一條線,呀哥要轉架車入去都轉左成分鐘呀,我幾鬼驚d小巴佬贈d四字真言呀,嘻,好彩都有驚無險。
 

呀~~~~~~~~~~~~~~~~我用手蔗住個口尖叫,「牛~~~~~~~~~~~ 」嗚~~開心到想喊,好卡哇伊呀,實在太太太太太可愛喇,隻牛牛隻眼超大隻,響馬路 邊食緊草呀,佢果兩隻角生左銹,好得意呀,好想衝落車攬住佢錫佢兩啖(講下咋,佢成 身烏蠅,只可遠觀不可褻玩架嘛)。回程既時候見到有隻牛走左入停車場喎,咪叫哥哥駛 入去,等我可以慢慢睇嚕,哇...我同隻牛一米咁近咋,我好想走出車同佢黎個近距離接觸呀,但又驚佢衝過黎喎,睇真d,原來後面塊廢田有好多好多牛呀~~~~~~~~~~~ 有幾隻仲係牛仔黎架,一路跑一路跳,嗚嗚~~好得意呀。

睇睇下先知過晒時間,於是就叫哥哥踩盡油飛出尖沙咀喇,我地約左響家連威老道既基督教服務中心,果度係我第二個屋企黎架。sorry呀isiah、大果、小琳,結果都係遲左幾個字先到,好內疚呀,真係好唔好意思,第一次約人就遲到,好似好大牌咁...(下刪一 千字)原來大果係個靚女黎架,睇真d....仲好似楊采妮呀,嗚嗚~~我好鐘意楊采妮架, 所以都不自覺對大果產生好感,佢對眼好大,好似會發光咁「丁」一聲架,卡...卡哇伊呢。大果仲話我高呀,嘿嘿嘿,你坐響度睇我,我梗係高喇。最衰都係我遲到喇,所以傾左大約半個鐘佢地就要走喇,唔知幾時可以再見呢...
 


 

嘻,之後我地又同社工朋友吹下水,兩年前我係響呢度參加展翅計劃架,社工拎番一張我當時畫既畫出黎,我都不禁暗喊道「下?呢張畫我畫架?」,原來已經過左兩年喇, 時間真係過得快。
 

之後同isiah去左行街,好耐未試過lu,我地仲一齊買左件恤衫,諗住打條呔喎,嘻, 又會咁橋一齊想咁著既,果然係金蘭姐妹,我地仲係買同一個碼,唔知我會唔會爆鈕呢

九點幾左右,哥哥同個朋友黎車我地走,順便送埋isiah番屋企。之後我地又上左飛鵝山今次我地係行另一邊的山上,呢邊好多街燈既,同果次坐爸爸架綿羊仔上相比一d都唔緊張。沿途已經開始d有毛毛雨,仲行雷行得好勁添,死喇...驚驚地添,唔好劈我呀。 仲以為無人會行緊雷都上去喇,點知見到有幾條友仲坐響度,一邊食西北風,一邊食肯德基,哇...我企一陣都覺得凍呀,真係佩服佢地。除左大風左d之外,其實都幾正,上 到黎又無落雨,每一聲雷聲都好似戲院既立體聲咁,一個閃電劈落黎,好似將天空分開 兩半,當閃電既一刻,光得好似早上一樣。意外地仲竟然見到一顆好光既流星,淨係掛住嗌「流星呀~~~~」偏偏唔記得左許願,唉...白痴。呢度一覽無遺,成個九龍都可以 清清楚楚望到,真係好想大嗌「i am the king of kowloon!」(有病~)。

臨走時發現,隔離架車個車牌係8332,本來都無乜特別,不過我地架車個車牌係8223 ,邪呢。


頭髮護理

::::::星期五::::::八月十七日::::::

九月頭要番大陸拜神呀,即日來回,哇...病左咁耐都未試過出境喇,好開心呀。弊! 醒起我...無身份証架喎,過關果時會唔會遣返我架?唔好呀~~~~~係喎,點解我無 身份証既?話說...上年十月係我十八歲生日,諗住十一月十一號去影身份証相,貪個日子好睇d嘛,11-11-2000,但點知都未等到果日,我就病發入左院,之後一直都無去影,話就話係驚人多怕感染,但實情係我想留番長d頭髮先去影,話晒都用幾十 年架喎,影得靚拎出黎都自信過人,影到又光頭又樣衰衰,差人叔叔實以為我用假証喇。所以一直拖得就拖,都好呀,人地問我幾歲,我可以答人我仲未拎成人身份証,扮下細,呵~~~~

但今次避無可避喇,十八歲仲拎住張兒童証,實唔俾我過關喇,唯有局住去影身份証喇...唉...無頭髮點算呢,烏髮龍都無咁快卦,唯有出絕招.....假!髮!一秒鐘就成頭濃密頭髮喇。

好緊張呀,我有三個假髮,一個係媽咪買既,兩個係朋友送既,媽咪買果個就唔好提喇,個髮型正到...好似陳寶珠果個年代咁,朋友送果兩個,一個係佢戴過,一個係無用過既,無用過果個...齊陰,d頭髮厚到風吹都唔郁。結果我就揀左佢戴過果個,自然d,髮質又比較好。我拎住個假髮衝入廁所,戴好個假髮,開始...剪!我以前有頭髮果時都好鐘意自己剪頭髮架,不過多數都會剪到好騎呢,邊長邊短,古古怪怪,不過今次唔會失手既(次次都係咁講),首先呢,剪番d陰蔗下個額頭,再剪下左邊同右邊,有少少頭髮蔗下塊面,最後剪下後面,等佢唔好太齊太死板,搞掂!咁多髮碎當然要洗頭喇,乾乾淨淨戴起上黎都飄逸d嘛,落洗髮水洗完再落護髮素,哇呢,睇個死人頭仲歎過我咁款喎。今晚特登早d訓,以免大眼圈圈。

好唔捨得呢張用左七年既身份証呀。

 

我大個女喇

::::::星期六::::::八月十八日::::::

今朝一早就俾媽咪嘈醒,佢大嗌「飛船呀,飛船呀!」,我仲以為係見到飛碟咋,咁鬼緊張,原來係飛船...個波波寫住pt100,好得意呀。

早上九點幾左右,好...戴穩假髮,因為我以前係齊陰既,所以我都整到個假髮齊齊地陰,白恤衫,紅色裙,打左條紅色呔,其實我得一條校呔架咋,嘻,所以呢條係問爸爸借既。

影身份証果度響九龍灣,都算近,所以就咁響街截的士去,我、媽咪同麻麻三個人撘 的士去環貿中心,個的士佬亂咁行,媽咪提供路線,但個司機當聽唔到咁,媽咪再講多次,佢就話「爭果少少,哎呀哎呀,唔好嘈喇,計你十五蚊喇!」哇...我唔係豪唔起果幾蚊雞,不過如果係因為你行錯,或者刻意兜路的話,我就一毫子都想俾多你喇,你咁左兜右兜,點知你會唔會兜我地去山邊打劫架,佢好似唔洗我地俾果幾蚊就大晒咁,嬲嬲地問媽咪拎左支筆,好刻意地響佢面前抄低佢個名同車牌,點知你仲有咩絕招架,嚇下你都好。

今日都唔算好多人,但硬係覺得好多人望住我咁既,死喇...唔通我個假髮移位?無丫 ,準備好就要入攝影房喇,一、二、三、笑,死喇...媽咪話我笑得好硬,笑到皺晒眉頭咁...緊張嘛....話晒都係第一次....其實尋日媽咪打過黎講我既情況架喇,咁橋辨理我張身份証又係尋日聽電話果個人喎,所以佢就盡快幫我地搞掂好。

我改名呀...我決定響本名ng cheuk chi後面加多一個meredith,簽好名之後,meredith 就會係我呢世女既英文名,嗚~~好偉大呀!

死喇,張身份証影到我成個賓妹咁,好驚憟呀。

拎住身份証就可以過關,但拎住行街紙都係唔出得境架,所以要去藍田申請回港証, 好彩之前影身份証果位先生又打定電話去,叫佢地幫我快d搞掂,所以又好快可以走得。

媽咪今日下午一點要去尖沙咀半島中心幫爸爸整綿花糖派,呵~~我當然跟埋去喇, 又可以行下街呢。見都唔係好多人,媽咪就帶我過去隔離攤位畫人像畫,嘻,我都好鐘意睇人地d畫架,話晒佢都係出黎搵食,一定會畫得好專業呢(我估),佢問我想畫漫畫定係素描,嘻,梗係素描喇,素描先至易偷師嘛。原來坐響度俾人畫都幾辛苦架,又唔笑得,又唔講得野,又要望住佢,話晒佢都係男人黎架嘛,咁樣定住眼望實佢,我會怕羞呢。可能因為我唔係靚女喇,所以無乜人圍觀,畫左成個鐘終於畫完喇,呼~~嘻,畫得好似呀,但唔靚喎,因為畫得靚就唔似我喇,呵~~~

咁橋爸爸今日響尖沙咀中心做剪影,過兩個街口之嘛,所以我又過去八下嚕,順便叫爸爸幫我剪埋影。我仲勁食綿花糖添呀,雖然只係用普通沙糖製成,但食落去又唔係太甜,真係好似綿花咁架,細細個果陣次次食綿花糖都係「烏」個頭埋去食,食到成面都係糖,嘻,而家大個醒目d,正確應該係meet出黎再放入口,咁最多都係隻手 黐立立之嘛,嘻,好食。

呀明仲特登出黎搵我呀,玩魔術俾我睇,嘻嘻,每次睇親佢玩魔術我都好開心架,不停笑,有時佢仲會教番我少少,等我又可以去玩下人嘛,不過我無咁專業呀,又成日忍唔住笑,所以實穿煲。

之後哥哥黎車我地番屋企,食完飯之後又車左我、表妹同曲奇上去飛鵝山,睇星星喎 ,上到去星星就無喇,因為太多雲喇。今次係行上次我同爸爸坐綿羊仔上去果條路, 無街燈架喎,不過今次感覺完全唔同喇...因為係私家車嘛,支高燈又勁光,一d都唔 刺激,淨係比較驚呀哥既駕車技術。

途中又見到有駕貨車停左響度, 以為又係野戰隊喇,再行近d先見到,原來有個人響貨車則邊,訓左響兩張椅度,上面再掛住個蚊帳,哇...一條友,佢傻架?唔驚俾人打劫既咩?不如我地去打劫佢喇,但可能一落車都未行到埋去,就唔知邊度黎十幾二十 個筋肉人走出黎劫番我地轉頭都未定。

今日都唔知咩日子,勁多人行山,我地一行過d人身邊就大嗌「努力呀,加油呀!」 好似傻婆咁,嘿嘿。

苦中作樂<---->呀 咩 昔 日 發 傻<---->繼續嚕

 呀呀咩吉場 http://meredith.com.hk