::::::星期三::::::八月二十二日::::::

好緊張好緊張，今日唔止約左一個網友，係約左好多好多個(我都唔知有幾多個)，不 過唔知點解好大壓力呀，可能係因為今次係我提出，所以連出到黎做乜，都係我決定 ，唔好問我出黎做乜喇，我...真係無諗住有歌舞表現、獅子跳火圈、聚餐、雀局、棋 局、天九局...我諗住大家見下面架咋，我覺得已經好開心架喇，點未必個個咁諗呢， 可能佢地出得街多，我出得街少，所以我易滿足卦...

哇哇，我好早就起左身喇，因為bee狗狗今日黎接我出街嘛，講到好似老佛爺出巡咁， 其實係因為bee狗今晚要番工，去唔到我地個吉場聚會，所以早ｄ黎陪我行陣街，行到 差唔多時間佢就番工，我就去聚會嚕，各自各精彩。呵~~bee狗都算幾叻狗，話晒佢 都住響ｄ鄉村地方，好少出黎大城市架嘛，但都認得路，好快就黎到嚕。

仲諗住叫佢去零食物語買辣辣魷魚黎請我食添，但佢買唔到呀，不過買到西瓜糖，wow ~我最鐘意食西瓜架喇，嘻。

我今日諗住戴假髮呀，諗住睇下佢地認唔認得我嘛，咁bee狗又黎到我屋企嚕，咪叫 佢陪住我「上頭」嚕，點知我都未戴好，佢就不停話「好核突呀！」，哇...我係醜， 都未至於好核突呀？俾佢打擊到我自尊心添，我咪一路「話唔係呀唔係呀，未戴好咋 ，梳好就好好睇架喇！」，但佢都係話好核突，仲叫我唔好戴喇，咦...咁我想戴嘛， 梳好晒之後呢，佢又話好睇喇喎，都話架喇，嘈住晒，好彩我堅持。嘻，今日打左條 藍色既呔，著左條牛仔裙，bee狗梗係無陪我換衫喇，佢咪拎住本pc game wave 響度捉我錯字嚕，衰狗，我有個壞習慣就係寫完日記又好，寫完game評又好，都好 少翻睇一次，唔知呀，睇番自己寫ｄ野會覺得自己好白痴...不過本書出左之後我都會 睇一次既，睇下有無可以改進既地方嘛。

哇...我執左好多野去呀，好似去露營咁，uno喇、數碼相雞喇、即影即有相雞喇...好 ，出發！嘻，第一站去鑽石山廣場，果度有個展翅show呀，嘻，我咁多朋友仔玩展翅 ，又咁多朋友仔響勞工署做，順便可以一次過探晒，而且我又想玩多年展翅呢，一去 到就見到勞工主任呀翟喇，哇哈哈，佢好nice架，所以我都好鐘意佢，我地平時都會有email 聯絡，見到佢我開心到響度跳呀，但又驚佢見到我會笑我...個假髮喎，嘻，最後都係 忍唔住走左過去，佢見到我即刻呆左，淨係識得講「你點解響度架？」，嘻，我咪話我 黎報展翅嚕，點知佢唔俾我玩呀，嗚嗚~佢話我未醫好喎，唉...當堂成個down晒，點 知仲有個傻仔仲走過黎sell我，我咪即刻尼響呀翟後面，指住佢話「佢唔俾我玩呀。」 ，呀翟就話我係佢條"o靚"喎，呵~~我幾時多左個大佬架？唉...無得玩展翅...仲諗住 又可以去識多ｄ朋友添，唔開心唔開心...

之後我地去左沙田呀，行無印嘛，開左咁耐都未有機會行下，不過話時話，ｄ野貴左 成倍呀，我以前鐘意食既乜片乜片都無得賣，文具果度又超級多人喎，所以我淨係買 左個噴噴水樽仔咋，bee狗又買左一個，不過就大我一個size既，點知佢果個噴出黎 正好多，好似霧咁架，而我果個...一滴一滴咁，咦...衰狗，哼。行完之後都五點幾， bee狗要走嚕，嗚~~狗~~你要好好照顧自己呀！

去到尖沙咀都六點半嚕，呵~~我地約左響五支旗干等，點解約呢度？因為夠經典囉， 呵~~哇~~好開心呀，原來有大拳、呀豆、小倍、小魔、kk、我呀哥，而哈哈同尾尾 就遲ｄ黎匯合我地，可惜曲奇同獸獸都黎唔得喇。我今日有禮物收呀，呀豆送左隻粉 紅色既懶羊羊俾我，好大隻呢，佢個樣訓緊覺咁，好卡哇伊架，好似真係抱住個bb咁 ，仲有夜光星星貼紙呀，呀豆特登響韓國帶番黎既星星呀，嘻，異國星星果然係大ｄ、 光ｄ，又可以補充一下天花板既星星嚕。小魔送左張我偶像既親筆簽名相俾我，嘻， 寫住「呀咩」架，係邊個？總之唔係千嬅，自己估下喇。

我地一齊去哈迪斯食野，行到入海運之後，哈哈剛剛黎到，大拳就走左去接哈哈，嘻 ，佢一走，我地即刻尼埋晒，諗住玩下佢，嘻，我都係第一次響商場玩捉迷藏咋，忽 然覺得自己young左好多添。

好慘呢，見到佢地個個都食炸雞，我又唔食得雞，又唔食得牛，連炸過雞既油都唔得 ，所以即係連薯條都無得食，唯有食蘑菇飯喇，咦...ｄ飯似米多ｄ。我地八個人坐一 張圓台，好親蜜呢。

 

八點左右尾尾就黎到喇，呵~~我地九男女一齊去左影貼紙相，咦？見部機後面塊幕 好多人寫野喎...我都唔執輸先，靜靜雞寫左「吉場」兩個大字(其實都幾揚)，哇~~ 咁多人一齊影貼紙我都係第一次咋，ｄ頭迫到好似九宮格咁，有一張個size好細，得 我一個影咋，佢地個個申晒隻手出黎，好搞笑。

 

之後我地繼續響海運入面玩，嘻，左影右影，笑到我頭都痛呀，佢地話我今日個look 似李彩樺cd封面喎，所以叫我整個跪地cool樣黎影相，嘿嘿，細拳又做左一次，好性 感呀，我地七個女仔仲手拖手扮七姊妹，嘻~~玩到十點左右我地就散嚕，好唔捨得添 ，好似好難得先見一次，唔知下次幾時先有得見呢，嗚~~