大拗門

::::::星期一::::::九月十日::::::

爸爸尋晚話今朝一早用電單車車我入西貢練功喎,哇喇,西貢喎,一定好正呢。我地 七點鐘出發,經將軍澳入西貢大拗門,我都係撘慣綿羊仔多d,電單車硬係好似唔係 好穩陣,好驚好驚好驚。哇呢,空氣清新,四周圍都係好高既樹樹,好靚好正呀 ,我地行到最高,有個亭既地方練功,果度對住布袋澳,又對住個海,吹來的都係陣 陣涼風,可能因為又高又大風既關係,好多人響呢度放風箏架,如果可以日日都入黎 練功就好喇。

見到有個晨運既呀叔拎住個線碌,仲以為佢放緊風箏喇,咪抬高頭不停望下隻風箏響 邊嚕,哇...唔見既?唔通高到睇唔到,原來...佢唔係放緊風箏,佢只不過係見到個線 碌咁多線,捲番d線番屋企咋...好瘀添。

行左大約半個鐘頭左右就要走喇,因為爸爸要番工嘛,臨走果陣有個男人望實我,直 到我行過佢身邊,佢都仲望住我,於是我咪擰轉頭望番佢囉,於是佢就唔敢望喇,爸 爸話佢可能係漁農處d人喎,車,我又無毀壞郊野公園,做乜牛咁眼望住我喎。 番到屋企換番睡衣,走入媽咪間房同媽咪訓,嘻,開左冷氣嘛。 好野,今日媽咪放假呀,咁難得,梗係要佢陪我去行街街喇,咦?黎緊呢個星期有人 生日,又有人畢業,不如去睇公仔喇(好明顯係自己鐘意公仔,所以迫人地鐘意),所 以呢,第一站係太子既聯合廣場,我記得果度好多賣公仔既舖頭架。一落樓就走左架 1A喇,之後勁耐都無車,一黎就黎架無冷氣既,唔得咁喎,唯有再等下一架喇,好彩 好快就有第二架冷氣車。咦...十個月無出過太子,原來咩都唔同晒喇,d公仔舖頭都 唔見晒嚕,唉...無得乘機睇公仔添。

之後梗係行下花園街睇下有無平野執喇,但由於太多人,又焗又熱既關係,行多兩行又開始眼花花喇,唯有走去新世紀上面間麥記坐下,唔多舒服,所以淨係叫媽咪買杯朱古力俾我就得喇,但...細心既媽咪竟然買多左兩杯朱古力新地,哇...唯有頂硬上食喇!媽咪見我食得咁辛苦,就幫我食埋喇,嘻,我同媽咪都咳得好勁呀,嚇到隔離個學生哥好快咁食完野就閃喇。因為好少下午行街,所以好累好累,響麥記坐左好耐先肯走。好多人圍住金龍船揀月餅呀,哇呢...我都好想食月餅呀。本來黎新世紀既另一個目的係想去食西瓜味粒粒雪糕架,但頭先已經哽左半杯新地,所以...唯有等下次喇。新世紀入面有個新裝修既廁所,入到去真係好大,仲好多個廁格同洗手盤添,廁格無乜人排隊呀,但洗手盤就多人到密質質,d人唔係洗手,而係對住塊鏡畫番d眼耳口鼻,哇...呢個又對住塊鏡笑,果個又對住塊鏡撩鼻,我諗如果俾佢地d男朋友見到,一定以為自己撞鬼呀,今日時運低俾我撞到正添。

抖完繼續shopping,響花園見到d刻左一個單字既電話繩,我搵到朋友個名呀,但 可惜得橙色同粉紅色,好姣又好娘呢,最衰無個「咩」字喇,唔係我都買番個俾自己 。之後我地去左旺角中心睇耳環,嘻,不過太多人嚕,所以行左一陣就頂唔順,要閃 喇,今次真係唔好彩呀,等左好耐都無車,我又勁累勁累喎,架車一黎就勁多人,我 同媽咪要分開坐呀,番去既途中,週圍都係交通意外,經過九龍城果度,仲見到地下 有一灘灘血添呀,好恐佈呀。

切雞夏季聚餐

::::::星期三::::::九月十二日::::::

好緊張呀,今晚約左班切雞同學去食飯呀,我地成年無見喇,唔知佢地變成點呢?記 得果時我地上堂玩得好癲架,雖然我地既背景都唔同,有d係中五畢業,有d係做緊 野,其中一個仲係做中學老師添,但我地一d代溝都無,仲玩得好鬼埋,不過可惜讀 左半年我就病左,之後就無再讀lu...不過佢地都無唔記得我架,有時都會成班約晒出 黎食飯,嘻,真係好鐘意佢地呀。

今晚係細拳負責約既,因為我好多野都唔食得,為左就我,佢就索性約去海港城間city super 度食,起碼我可以搵d自己食得既野黎食嘛,嘻。我地約左六點半等,我五點幾就出 門口喇,本來想撘架快d既巴士,但快果架又無冷氣喎,會唔會好熱呢,所以決定等 另外一架有冷氣既,原本諗住可以早d出到去,行下超級市場架,聽日番醫院嘛,買 定d糖請姐姐食,又可以買蛋糕粉,整定d蛋糕後日拎去朋友既畢業禮,點知去到尖 沙咀馬頭果度勁塞車,個司機又唔肯開門俾我地落喎,搞到無晒時間。

我地約左響page one門口等,一去到見佢地仲未到,即刻衝入city super入面搵下 有無我想買既野,糖糖我就搵到呀,但蛋糕粉就無我想買果隻,其他整左出黎又驚唔 好食喎,唯有聽日再搵喇。city super勁多人呀,我地成七個人,要搵張孖台先得喎 ,好彩我呢個師奶仔夠眼利,一下就俾我見到有兩張空台,咪即刻走過去,企響兩張 台中間,一隻手按住一張台,死驚人地坐左咁,有個呀嬸想坐架喇,我咪即刻微笑咁 話有人囉,點知佢即刻幾唔順超咁呀,好彩細拳收到我個電話,好快就坐左過黎喇。 好開心呀,有禮物收,細掌送左隻爆炸狗俾我呀,佢個頭髮除得甩架,好得意呀,佢 仲送左兩隻玻璃介子我,嗚嗚~~好開心佢記得我鐘意玻璃介子呀,嘻,唔捨得戴添 ,怕會整爛嘛,都係好好收埋佢,得閒就拎出黎睇下,開心下,嘻。

好邪呀,無端端響度撞到好耐無見既呀馬,即時忍唔住嗌左出黎,嚇親d師奶呀叔添 。哇呢...好想食炒麵餅呀,不過有蛋既,又唔食得,本來有d飯餐我都食得架,但係... 近呢兩個星期我日日都係食一餐,一餐都係食得兩啖飯,我一個人實食唔晒喇,行左 幾個圈之後,唯一比較食得既就係壽司,入面夾住舊青瓜,青瓜都算係生果呀,咁我 食得西瓜,青瓜應該無問題卦...見個個都食好多野,得我一個食咁少,真係好古怪呢 。聽佢地講起,先知pc home訪問我地個同學呀,哇,好鬼勁呀。city super果度好 凍呀,我又無帶夠衫,凍到我變左雪條咁滯喇,我地九點幾就閃喇,決定下個月又再 出黎一次,嘻,好呀好呀。

今次佢地個個見到我,都係講同一句說話,無夾過架,佢地個個都話我瘦左好多呀, 唉...鬼咩,又唔食得呢樣,又唔食得果樣,就快厭食症添喇。讀書果陣我成百幾磅, 而得得番八十幾磅,唉...就快風都吹得起喇。

我地其中一個同學係坐轆椅架,好厲害呀,原來佢上落扶手電梯係完全無問題架,話 咁易就得喇,而我就好似睇表演咁,不停拍手掌。我同細拳都係坐順風車番屋企,嘻 ,唔洗響巴士慢慢捱凍番屋企,真係好喇。

同學架車泊左響麼地道果邊呀,行過去果陣竟然見到對面街...千fa呀~~~~~~~其 實係見到千fa張poster呀,即時拖住細拳衝過對面馬路,一、二、三,行動!嘻,細 拳幫我撕左一張,我自己又撕左一張,嘻,千fa好靚呀...

消防員畢業禮

::::::星期五::::::九月十四日::::::

晨早七點鐘我就好醒目咁醒左喇,因為今日要去好朋友呀基既畢業禮呀,尋日去醫院 去到好夜先番屋,之後又要趕稿喎,所以都幾先夜訓呀,嘻,不過無計喇,friend嘛 。為左唔好失禮朋友,點都要戴番個假髮,我諗陣間唔會好熱卦,話晒都係大場面喎 ,打番條呔先。八點鐘,呀哥架車響樓下等我,因為要食藥,所以我沖沖忙忙咁拎左 支綠茶,落到去我將支綠茶放左響車頂,再將個超級多野既藏屍袋放響後坐,上車, 閂門,催呀哥開車,然後先記得...咦?我支綠茶呢?唉...如果仲響車頂就驚嚕。

原來呢個鐘數好塞車架,仲諗住八點出發,九點前一定去得到添,雖然十點先開始, 但我想早d去到,可以同呀基吹番兩句嘛,話晒都成十個月無見喇喎,而且佢話到時 會好多人,唔早d去會無位坐架。

大霧山條路好似比平時長左好多,之後仲遇上分叉路,死喇,已經九點喇,如果再行 錯埋路實遲大到喇,我記得我基同我描述過條路係邊條路架,好似係呢條...好...就行 呢邊喇。之前仲有好多指示去消防學校既路牌架,但駛過左分叉路之後,一直都再無 見過喇,行左十分鐘都唔見,唔通真係行錯路?

當我淆底緊係唔係行錯既時候,俾我見到兩個吊帶、熱褲(其實係背心同短褲)既筋肉 人出現,哇哇,原來係消防學校既學生呀,嘻嘻,無錯喇無錯喇,我地沿路上去,見 到好多車已經泊晒響度喇,哇...我仲以為無乜人黎既添,原來咁多人一早黎左喇,落 左車之後仲要上一條對我黎講幾長既樓梯,一見到我已經皺一皺眉頭喇,雖然心急, 但心裡面就叫自己「唔好急唔好急,慢慢行...」,好彩我都刻服到呢條樓梯,上到去 之後我又唔知行邊面喎,左望右望,好彩都俾我摸到去,哇...原來真係好多人架...觀 眾席坐到密密麻麻,不過我一個人都好易搵位既,求求其其攝去都得喇,我揀左個比 較高既位置,以為坐得高就望得遠喇,點知原來坐得愈高望得愈唔清楚。觀眾席上面 有個帳幕咁用黎蔗太陽架,不過...蔗左太陽,亦蔗鬼住晒d風,焗到我死呀,真係豬 丙呀,總之揀個前d既位喇。

我離遠見到呀基走出黎同佢d屋企人講野,之後好似想搵下我響邊,哈,咁耐無見, 佢竟然見我唔到喎,於是就見佢傻傻瓜瓜咁走左,電話響,佢問我響邊喎,我咪話響 佢屋企人既左上方囉,然後我又見佢跑出黎,去右上方搵我,呀...角度問題,所以大 家既左右都唔同左,搵完一輪佢又走番入宿舍打俾我,我咪話係另外一邊囉,哈,撞 鬼嚕,咁大個呀咩佢都認我唔到,佢好鬼忙呀,見到我之後,交低本場刊就飄走左嚕 。唔怪得知佢之前話驚我悶喇,原來單拖去真係好悶架,我無理由捉住隔離果個講「 呢,第二行第九個咪係我個朋友囉。」,唉...同佢屋企人一齊坐都好丫,起碼我地係 睇同一個人,點都有d野講喇。本場刊一到手,就俾隔離果個女仔「借」左去睇喇, 點解要扮晒好人丫,我都未睇。等到十點四左右,畢業禮就開始喇,今日有五十八個 消防員同十個消防隊長畢業,哇...政府部門果然係唔同d,操出黎果時都特別齊架, 佢地立正晒響操場上面等處長到,處長果然係唔同d,特別鐘意遲到,我真係有d鄧 佢地慘呀,陰公囉,咁鬼曬,俾蚊咬都唔俾郁咁,處長過左成三個字先到,一黎到就 梗係要講一輪肺苦之言架喇,呵欠,講快少少丫唔該,我個腦轉得咁慢好易死火架。

好彩聽完肺苦之言之後有表演睇,即刻醒神,第一part講有間屋仔都爆炸,然後火燭 ,跟住十個消防隊長就扮演好耐以前d消防員,戴住草帽加唐裝衫果d呢,走出黎救 火,好鬼搞笑呀。第二part就大陣仗嚕,有人響六、七樓窗口揮手,扮火燭被困,然 後幾架唔同樣既消防車就駛晒入黎,有d就救人,有d就救火,做得好鬼專業架,真 係好似有火警響自己面前發生咁,好正呀。

表演完之後就係每班既消防員同處長合照喇,今次醒目喇,揀左個好位諗住幫呀基影 番張,點知左邊個肥妹愈迫愈埋,迫到就快去左我前面咁滯喇,我咪唯有縮去右邊囉 ,但右邊又有個男人喎,手肘剛剛好對住我個心口喎,哇...咁我咪好危險,咪唯一邊 手肘頂番住個男人,一邊手拎相機嚕,死肥婆!唔好再迫過黎喇,我企硬架喇,唉... 總之搵多個人黎陪我喇,起碼唔洗俾人夾到扁嘛。

撞鬼嚕,今朝出黎都唔熱架,而家愈曬愈熱,有d眼花花添,影完相之後就唔見左呀 基嚕,週圍都係人,個個消防員都係著果件制服,都係唔搵住嚕,去坐下飲杯水先。 嘻,搵到呀基喇,不過佢同屋企人傾緊計,咦?尷尬尷尬,唯有企遠少少,唔好阻住 佢地團聚喇。好熱呀好熱呀,熱到我成塊面都變左紅色,好狼狽添,同呀基傾左一陣 ,佢就叫我走先喇,唉...唔開心添,唔通佢覺得我丟佢架?咁當然我都好通氣既,我 都唔想阻住佢同其他同學見面。我咪唯有一個人走埋一二角,打俾哥哥叫佢黎車番我 走嚕,仲要電話無電...真係禍不單行呀,好彩都仲打到俾哥哥。

有d唔開心添,咁遠黎到元朗,偏偏講唔夠一陣就要走,咁都唔緊要呀,我怕因為我 太過樣衰,丟左朋友架咋,一心諗住執正d,識番幾個靚仔消防員架嘛,點知搞成咁 ,唉......唔開心唔開心。

呀豆聽日生日呀,而且佢又住元朗喎,所以約埋bee狗同呀豆慶祝下,離開消防學校 先至十一點幾,bee狗仲要響旺角篤緊波,呀豆又要成四點幾先放學,咪叫呀哥週圍 兜下先嚕,元朗八鄉一帶路邊都係廢車廠,哥哥去睇汽車零件,我就響車訓覺,bee 狗成兩點幾先到呀,於是我咪同bee狗去元朗廣場間肯德基坐嚕,陰鬼公,成間肯德 基都係賣雞,好彩仲有粟米同雪條我係食得既,我地兩個吹水吹水,由晴天吹到落雨 ,由落雨吹到停雨,由停雨吹到天黑,呀豆終於黎喇,嘻,呀豆唔知我地知佢生日架 ,我咪扮傻拎自己張身份証出黎,俾佢地睇嚕,睇完就要呀豆拎番佢張身份証出黎, 然後話「咦?九月十五號生日?今日十四號喎,咁咪即係聽日生日!」,嘻嘻,我咪 扮晒野咁講「我剛剛買左個爆炸狗既襟章呀,見你生日我又無野送俾你,就送呢個俾 你喇。」,然後話「咦?我剛剛又買左條爆炸狗既電話繩呀,送埋俾你喇。」,嘻, 然後又話「咦?我又寫左張生日卡俾你呀,送俾你喇。」,哈哈,然後又話「咦?我 整左隻狗面兔公仔呀,送俾你喇。」嘻,無喇,係咁多喇,隻狗面兔公仔係我尋晚趕 完稿,漏夜整起架,真係有血有汗架,希望呀豆唔會嫌棄我手工差,整到好似老翻咁 喇,嘻。之後我地一齊玩天下太平呀,我同呀豆兩個夾攻bee狗,梗係我地贏喇,我 地仲捉左隻烏蠅,用個杯黐住左響塊玻璃到,嘿嘿...走果時雞咁腳咁走呀,驚俾人發 現我地既傑作嘛。我地仲影左好多相呀,因為影得多嘛,所以都唔叫人地幫我地影嚕 ,索性叫bee狗拎相機自拍,咁咪可以三個都影到嚕,呵~~~呀豆生日快樂!

率之可以自由喇<---->呀 咩 昔 日 發 傻<---->都係苦中昨樂