isiah正一樣衰怪

::::::星期二::::::九月十八日:::::: 今晚約左金蘭姊妹isiah番尖沙咀中心呀，話番去傾上次響尖東搞band show，錄左ｄ cd同video點處理好，因為入左院，所以band show我就無份搞喇，但後期製作就當 然幫得幾多得幾多喇，話晒我都係一份子嘛(係唔係呀？isiah~)。 慘喇，今朝起身見到成個咀唇損晒呀，撞鬼嚕，都係我衰多手囉，個咀一甩皮我就忍唔 住手去"meet"佢，加上血小板低，一"meet"就流血嚕，不過今次最嚴重，死喇，出到 街人地實以為我同人打車輪打得激得滯，咬到損晒喇，呀~~~~~點得架，破壞晒我個 清純形像，唯有不停木起個咀，睇唔到睇唔到...無人睇到既... 呀哥唔洗番工呀，見時間尚早，咪叫佢帶我遊下車河先嚕，不過九龍無乜地方好去既， 所以今次都係入西貢逛逛，哥哥車左我去北潭涌，諗住可以去遊客中心睇下中華白海豚 既標本，點知裝修喎，我本來想入萬宜水庫，但原來私家車唔俾入架，個工作人員話「 好近之嘛，響呢度行五分鐘...就會見到間士多，之後再行多半個鐘就到架喇。」哇...聽 到都已經暈得一陣陣喇，都係閃番上車算喇。今日不在狀態，一起身就眼花花想暈咁， 行多兩行就腳軟，一定係又貧血喇，好累呀，響車訓下先喇。於是呀哥呢度兜下，果度 兜下，兜兜下就兜到黎尖沙咀喇，哇呢，好想行街呀，唔理三七二十一衝左出車，行左 十幾尺之後...點解咁多星星既？唔掂，都係番上車算喇，咁又係，今日都無食過野，實 暈喇，唔理喇！我要食蘋果批！本來唔俾食架，因為麥記ｄ野食係用牛膏炸架，但...再 唔食野我就死架喇，嘻，最後我都係食晒一個蘋果批，哇...幾個星期以來，食得最飽係 呢餐嚕。 差唔多七點，我同isiah一齊上尖沙咀中心，睇番band show既vcd，同埋聽下ｄcd錄 得清唔清，嘻，其實我地兩個淨係響度講下邊個男仔靚仔呀，邊個女主持發晒姣呀咁之 嘛，無計喇，兩個八婆聚埋一齊係講下是非架喇。今日我同isiah扮twins呀，嘿嘿，整 番個女校男生look，一齊打呔著裙仔咁嚕，人人都以為我地剛剛放學，真搞笑，本來專 登咁著去影卡卡架，但係今日行兩行都腳仔軟，家連威老道行去update mall對我黎講 實在係難事，等同要我用鼻哥飲晒一罐可樂咁難呀，唉...病人丫嘛，行得走得就唔叫病 人喇。 最後我地都係去左肯德基坐，樣衰怪isiah竟然響我面前食炸雞，太可惡喇，肥肥肥肥肥 肥死你呀，成日捉我日記ｄ錯字，哼，咁鐘意捉，去做對校喇笨，我都忍你好耐喇下... (下刪二萬字)我地經過金馬倫道，見到有個靚仔model響度拍廣告呀，一時拎住手提電話 ，一時拎住結他，好鬼型架，唔知幾時有得睇呢。咁難得我地今日twins look，無得影卡 卡唯有影番幾張相留念喇，嘻，幾嬌。

好食到嘔呀

::::::星期一::::::九月二十四日:::::: 今日又要覆診喇，七點半，上左的士之後仲要去九龍城接埋另一個病友，佢係一個十 九歲既男仔黎架，每次都係佢媽咪陪佢覆診既，唉...兩個呀媽聚埋一齊就開始煩架喇 ，我媽咪又勁響度數我點點點唔食野，於是呀鄭太就響個袋度變左幾條香矛、幾舊泰 國疆，仲有幾樣不知名既菜菜，然後就開始教我媽咪整酸辣湯、香予豬扒...哇呢，聽 個名真係好鬼吸引呀，不過可惜呢，我媽咪平時要番工，所以...煮野食既質素係比較 唔穩定架，而且就算跟到足整出黎都未必好似街買果ｄ咁好食喇，唉...愈聽愈肚餓添 。 八點幾就番到醫院喇，抽完血我就攝埋一二邊，訓覺。平時出街襯衫都襯成個鐘，但 番醫院就最快手架喇，求其呢件衫果條褲，戴埋頂漁夫帽就行得，有幾次我都想戴個 假髮番黎俾ｄ朋友仔睇架，但係覆親診我都訓覺，仲要係訓到反轉又反轉果種，我驚 訓訓下會甩左個假髮呀，移位都唔好喇，一醒成個貞子咁，所以結果一次都未試過戴 番醫院。車，醫院都無靚仔，扮咁靚俾鬼睇咩，戴住個口罩個個都一樣樣架喇。 朦朦朧朧間，我見到送假髮俾我既janny姐姐呀，但眼前一黑，又訓番嚕。好勁呀， 響超級多人既廳度，我竟然可以昏迷左兩個鐘呀，訓醒精神晒嚕，咦...媽咪又週圍同 人講我唔食野喇，一起身個個都轟炸我，janny媽咪仲特登買左奶茶、吞拿魚三文治 俾我添呀，杯奶茶好好飲呀，不過個三文治就...慘喇，我真係就黎厭食喇。 我成幾個星期都係一日一餐喇，唔食野得耐，個胃而家直情唔識肚餓，就算係餓，都 唔食得好多，以前食晒一個公仔麵好易，而家，我食四份一個已經飽到想嘔喇，唉... 原來食唔飽除左會暈之外，仲會成日都唔開心架，為左食野我喊左好多次喇，最近仲 咳埋添，連雪糕都無得食，我從來都唔會覺得自己會死架，但而家日日都食唔落野， 我就成日都覺得我好似就黎死咁，好辛苦呀，好彩janny姐姐同鳳儀姐姐陪我傾計， 傾下呢樣傾下果樣，嘻，即刻又睇開晒嚕。 睇完醫生臨走果陣，個個病友都走黎叫我俾面佢，食多一啖飯，嘻，咁多個人叫我食 ，咁我咪要食好多啖飯？嘻嘻，可能因為果度我係最細個喇，個個都錫我，好幸福呢 。 本來今日覆完診去銅鑼灣飲茶，銅鑼灣廣場一期有間茶樓好正架，但媽咪又想上山頂 探二舅父喎，所以哥哥就黎接我地上左山頂喇。媽咪有張Haagen-Dazs既coupon， 嘻，可以有一個甜筒呀，於是我就揀左個綠茶味既，好食好食，不過一路食一路咳。 舅父響淩霄閣開左間Kodak既沖晒店，嘻，我地去探佢，順便搞搞震，影左張合成相 ，呢張野好勁架，因為影完之後既後期制作係我整架嚕，ｄ邊都係我執架，嘻，我仲 執走左塊面粒墨，勁呀，請我喇請我喇，嘻。 打搞完舅父之後，哥哥又話有個朋友響Haagen-Dazs做喎，於是我就同佢入多次去 黐野食喇，話晒我都係細路女嘛，請埋我都無所謂喇，點知...一入到去我呀哥同佢個 朋友講「我呀妹呀，靚女黎架！」哇！即時走都走唔切，逃離呢間舖頭既範圍，梗係 喇，你話我樣衰都好ｄ丫，人地可能會覺得「都唔係好差既...」，但你話我靚，人地 實覺得「唔係喇fa，咁都叫靚，咁余慕連都係靚女喇。」，唉...真係俾呀哥一句玩謝 呀。一個人走左出黎，媽咪又走左去廁所喎，忽然咳得好勁，咳到想嘔，忍住忍住， 哥哥拎左雪糕番黎，見到咁好食，又忍唔到口唔食喎，係碎朱古力同芒果呀，不過食 左幾啖都投降嚕，可惜可惜。去停車場拎車走嚕，一上車我就起勢咁咳，架車駛到停 車場口，我就...「媽咪...膠袋...」，噢，好好味既綠茶、碎朱古力同芒果雪糕呀，全 部都嘔番晒出黎，陰公嚕，咳到嘔，之後仲好似窒息咁，抖左一陣就好ｄ喇，嘻，我 呢ｄ飽歷滄桑架嘛，嘔慣架喇。結果番到屋企再嘔多鑊，行入房果陣仲腳軟跪左響個 地下度，哎呀哎呀，我暈喇。

送給你一個石澳

::::::星期五::::::九月二十八日:::::: 最近呢兩個星期都唔係好掂呀，一行就腳軟、暈，本來上個星期揀左日無乜月光既， 諗住同呀如兩個去睇星星架，不過咳到暈咁滯，結果都係甩左底，好過意唔去呀，所 以決定今日點都要去一次，但今日初十二喇喎，個月亮仲大過個西瓜呀，咁...唔睇星 星，當提前賞月囉，又得喎，嘻嘻。 上年中秋之前我都約過成班朋友仔一齊黎石澳玩架，果次凍到我變雪條呀，所以今次 我拎左冬天最暖果件褸，怕凍嘛我，仲有要拎md雞、提子、拖鞋、毛巾、沙灘席， 最重係箋燈呀，今次真係要帶個XL既藏屍袋先夠載喇。 太好喇，今日哥哥得閒，可以車我地去石澳，我仲擔心左幾日，驚一個人撘地鐵去筲 箕灣會行得太遠，又驚會好多人，話晒都成年無撘過地鐵喇喎，隨時響側魚涌蕩失路 都似。 呢幾日飲左ｄ咳藥水，勁訓勁訓呀，好似安眠藥咁，車，食左都係咳既，而且成日都 神智不清，唔好話寫稿喇，日記都寫唔到呀，所以今日決定唔食喇，食左我驚響沙灘 會訓到一隻豬仔咁呀。 約左呀如五點，響合和中心接佢，哇呢，佢買左個朱古力號角俾我呀，不過中間ｄ忌 簾係香蕉味架，好甜呢。 嘻，去到石澳時仲未天黑呀，哇，即時放好張膠席，然後趁個天仲光光地，衝落水玩 下先，哇...好正呀，石澳仲係咁靚，真係好鐘意呢度呀。個天好快就黑晒嚕，好彩我 拎左箋燈，勁光呀，成個沙灘最光係我地呀，嘻，我地玩蠟燭、玩煙花、食野、傾密 計、大笑大叫，好開心好浪漫呢，平時都係響茶餐廳、麥叔叔吹水，而家竟然可以一 邊吹海風、一邊傾下心事，真係好舒服呀，之前唔開心既野都好似一掃而空咁。沙灘 上面比平日多人，可能因為就快到中秋節喇，響不遠處有十幾個同我差唔多年紀既後 生仔女，我見到有四、五個行埋一邊，然後拎個pizza出黎，插支蠟燭上去，然後大 家一邊唱生日歌，一邊走向其中一個女仔身邊，哇...俾著係我實滾動到喊出黎都似呀 ，唉...咁多年生日都無試過有朋友同我慶祝架，可能真係無乜邊個朋友好重視我喇， 嘻，可能呢個就係我好驚生日既原因之一，每年都係自己諗節目，自己主動去搵人同 自己慶祝，嘻，真係有ｄ瘀皮呀，生日就到喇...一諗起就煩，唔想生日呀！唔想十九 歲呀，呢年我乜野都無做過，我唔想咁樣一年一年浪費晒ｄ時間呀。 我同呀如兩個訓響沙灘席上面，一邊睇星、一邊傾計，嘻，得閒可以用申起隻腳，踩落個天空到，又或者用手摸下個月亮，嘻，好好玩呀，我地玩到九點幾左右，哥哥就黎車我地走嚕。由於呀如恐嚇我唔可以登佢ｄ玉照呀，所以ｄ相張張都係得我一個傻婆。 今晚，真係好正呀，唔知幾時可以再去石澳呢，好想將呢個咁好既地方，送俾我每一 個朋友。 呢張相似唔似響個天度放煙花呢？(話似喇！)

好朋友的好男朋友

::::::星期六::::::九月二十九日:::::: 最近都無睇過中醫嚕，因為響浸會睇中醫好鬼貴呀，而且果時覺得飲左ｄ中藥都好似 無乜特別，但而家個身體愈黎愈差，氣功我又無做，真係好似等死咁喎，所以呢，決 定都係睇番中醫，大吉利是講句，起碼無死得咁快嘛，拖得就拖喇。 今次唔睇侵會，唔睇太古城，係去灣仔消防局隔離睇，其實我未換骨髓之前都係睇呢 個張教授架，不過睇睇下個病又復發，入左醫院換骨髓，之後就無再睇嚕。其實我好 鐘意張教授架，佢成日都笑容滿面，見到佢好開心架，嘻。哇，今次佢開左個紫河車 俾我呀，好驚呀，我一直以為會係血淋淋，一個bb咁既樣架，但係，原來只係一舊 黃黃地色，硬硬地咁，媽咪話呢，有人日日沖水飲，後生成廿年呀，哇...正喎，我個 樣咁鬼殘，係時候補下喇，女人唔補好易老架。 下午姑媽黎左我地屋企喎，佢話去對面茶餐廳食野，我即刻好開心咁話要跟埋去，嘻 ，茶餐廳ｄ野食點都好食過屋企果ｄ卦，其實我都好想食番多ｄ野架，再唔食野落去 ，我真係驚我會厭食症呀，我從來都未試過得八十幾磅咁輕架，我病之前仲係一百二 十磅既肥妹仔黎架嘛，唔食野又會暈，又會腳軟，仲會唔開心，無力笑架，我要食野 ！我唔要再唔開心呀！我叫左一個雙蛋通粉，仲有凍檸茶，好好食呀，平時響屋企， 我最憎食熟蛋，平時響屋企，ｄ蛋要煮熟到乾晒水咁，一ｄ都唔好食，今次隻蛋少少 生，咁先好食架嘛，平時出街都唔俾飲凍檸茶，媽咪話ｄ冰係生冰喎，我好耐無飲過 喇，原來凍檸茶真係好好飲架，雖然食得唔多，但終於可以食自己鐘意食既野真係好 開心，嘻。 今晚我約左susuky呀，嘻，佢話帶佢新男朋友出黎俾我睇下喎，哇...我死黨既男朋友 喎，梗係一定要俾我見下喇，睇下佢夠唔夠好，配唔配得起我死黨嘛，我咁錫susuky ，梗係唔俾其他人唔錫佢喇。我印像中我所有朋友都鐘意遲到，所以我千叮萬囑叫佢 唔好遲到呀，我唔企得好耐架，跟住susuky竟然話佢一向係唔遲到架喎，哈，又真係 喎，七點半準時響尖沙咀地鐵站九龍公園出口出現，難得難得。 當我行緊去九龍公園既時候，我竟然撞到呀如呀，哇呢，尋日又見，今日又見，聽晚 又約左佢，哇...一係唔見，一係日日都見，好邪呀。 之前幾日susuky問過我鐘意食乜，我就梗係鐘意食上海菜喇，原來susuky都鐘意架 ，不過可惜佢男朋友唔鐘意，所以最後決定都係食泰國菜，susuky本來話去黃珍珍， 點知原來尖沙咀係無黃珍珍架，噢，結果去左蕉葉咖喱屋，我好似好麻煩呢，又唔食 雞，又唔食牛，本來諗住好好食番餐，但唔知點解一食就咳，最後我淨係食左一隻咖 喱角同半串燒蝦肉，我怕我繼續食落去會咳到嘔呀。 我同susuky男朋友都叫左杯椰汁涼粉，佢見我咳得咁厲害，竟然拎開我杯野飲話「好 甜呀，你唔好飲喇，飲水喇。」，然後遞左杯水俾我，哇...細心到暈呀，susuky今次 應該無揀錯喇，嘻，佢談吐都幾大方架，仲幾靚仔幾迷人添，唔好話susuky喇，連我 都鐘意佢呀，susuky，你男朋友咁正，小心呀，嘿嘿。 食完飯之後諗住去許留山食甜品，但我去開果間執鬼左嚕，所以提早閃嚕，嘻，廢事 做咁耐電燈膽喇，佢地兩個一齊陪我等巴士，我地一行到過去巴士站，企響我地前面 條旺角女即時將susuky由頭望到落腳，車，少見識，未見過靚女呀？我咪大大聲同 susuky講「哇，將你由頭望到落腳喎。」，susuky又大大聲話「哦，前面戴假tiffany 鏈果個呀？」，我即刻忍唔住笑「下？原來真係有假tiffany鏈架？」，嘿嘿嘿嘿，笑 死我喇，無計喇，我地兩個都來自官塘出名既band 5學校，性格係比較率直架喇，唔 小心篤穿左人地戴假野添。 都唔知係我黑仔，定係我個樣白痴，所以特別吸引傻人，上次撘巴士就撞到界刀狂人，今次有個手抽筋既婦人就坐正隔離，初初我幾鬼驚呀，點知佢會唔會無喇喇扯我兩巴架，唉...我差唔多由頭站撘到尾站，同佢一齊足足坐左成粒鐘，原來佢仲落車遲過我，好彩今次都係有驚無險。