中禾火節

::::::星期一::::::十月一日::::::

今日約左呀如同呀龍呀,不過呀龍要去打籃球比賽,呀如又要響屋企食埋晚飯先出得 黎喎,所以我就要響屋企等電話喇。以前每年中秋節,爸爸都會俾d表演我賺下錢架 ,例如去d嘉年華度織下草蜢,或者整下爆谷綿花糖咁呀,不過今年爸爸唔侵我玩喇 ,寧願叫其他人去做都唔俾我做呀,無計喇,鬼叫我病喎,今年又無朋友約我去賞下 月,好彩尋日約左呀如同呀龍咋,唔係大時大節響屋企發霉都幾無癮架。

一直等佢地電話等到五點幾,悶悶地咪訓下覺嚕,剛剛訓著無耐電話就響,我用低八 度既聲音接電話,係個男仔黎既,佢問「你做緊乜呀?訓緊覺呀?」,我話「下?我 訓緊覺呀,但又唔係訓緊覺....你係邊個呀?」呀咩開始有少少語無論次喇,佢一頭 霧水咁話「我係呀龍呀,橫掂呀如食埋飯先黎,我同你又未食野,不如我地兩個出黎 食左野先喇。」我就迷迷糊糊咁應左佢喇。收左線望下個鐘,佢約我七點三,而家都 成六點幾喇喎,即係要起身換衫嚕,呵欠,清醒少少既時候先醒起,死喇,同靚仔單 獨相處喎,弱項弱項,於是就打俾呀如,叫佢食完飯快d黎救我囉。

於是乎我就好準時到達新都城,原本都好緊張架,但見到呀龍之後已經唔緊張嚕,點 解?因為佢今日無尋日咁靚仔囉,同埋可能比賽完太累,已經無左響台上面既光彩嚕 ,嘿嘿,對我唔再構成威脅,佢已經變番個正常人喇,好彩好彩。

之後我地去左食粥,一坐底呀龍就話呢餐佢請喎,哇呢,唔多慣有人請添,平時同朋 友都係自己俾自己,搞到我即時唔敢亂叫野,其實好想食牛肉粥架,不過又唔食得牛 肉,唯有叫個白粥喇。見d白粥咁淡,咪諗住落d鹽嚕,樽鹽搖極都唔出,於是我咪 拎住佢一野拍落張台度,諗住整番鬆d鹽嘛,由於張台有塊玻璃響面既,所以....發 出巨響,當然第一個嚇親坐我對面既呀龍喇,兼且哄動成間粥店,咦?拍完之後我先 發覺,原來唔係d鹽塞住個孔,而係....根本我未扭開個蓋,哎呀,好瘀呀,個老板 娘見我響度發顛,即時第一時間拎過第二樽鹽過黎俾我,梗係喇,拎遲d佢唔驚我拆 左佢間舖頭咩。我地食左無耐呀如就到喇,哇,佢帶左好多隻玻璃介子俾我呀 ,嗚,好開心呀,多謝呀如!嘻,呀如知道係呀龍請之後,又叫左個芒果布甸,叻女 喎。食飽飽之後我地就撘村巴去呀龍屋企,諗住睇番尋日佢唱歌d vedio,正呀,睇 番d片段真係好正呀,仲好靚仔添,我咪不停指住個電視機同呀龍講「佢好靚仔呀! 」,當然,係「佢」靚仔,而唔係呀龍靚仔喇,噢,對住真人唔再觸電嚕。

之後呀龍又叫左尋日睇佢表演果個男仔朋友黎,我地四個人響度吹水,又睇下呀龍去 旅行、細個d相,呼,好舒服呀,雖然成日約朋友出黎,但好少可以咁無憂無慮咁坐 響地下吹水,呀龍又一個人住喎,無其他大人響度,所以可以傾得好暢快,雖然只係 一個好普通既約會,但已經令人好期待有下一次喇,原來生命中有好多小事都係可遇 不可求。

搵搵下相既時候,呀龍搵到一隻朋友響日本買番黎既咸超公仔,哇呢,好得意呀,佢 話隻公仔無乜用喎,所以借花敬佛送左俾我,嘻,好野,今晚收到玻璃介子,又收到 公仔,係我最鐘意果兩樣野呀!嘻,雖然呢個中秋無得食燈籠、玩月餅,又無得煲蠟 ,不過一樣開心,多謝你地,i love u all。

我地大約十一點鐘走,呀如累到散晒呀,哥哥黎車我,見今晚係中秋,又唔想咁早歸 家,所以跟左哥哥出去,因為佢約左我個好朋友nathya呀,撞鬼嚕,nathya明明係我 朋友黎架嘛,都唔知幾時開始同我呀哥仲friend過同我,出左去一陣我就忍唔住投降 喇,我都好累呀,都係番屋企嚕。

灌湯餃的恩賜

::::::星期三::::::十月三日::::::

今日難得媽咪放假,梗係嫘佢出街喇,佢上個星期開柴灣新翠呀,好好生意,嘻,所 以今日行街買野媽咪全包,一於將媽咪由正資產買到變負資產!買到媽咪破產!yeah !嘻,今日呀哥要出去買汽車零件,所以呢佢又可以車埋我地出去,唔洗慢慢等巴士 ,原來太子果邊好難搵車位泊車架,所以哥哥車左我地出太子之後,佢就泊番架車去 啟德,然後再撘車黎。而我同媽咪呢就上去敦煌霸定位飲特價茶,其實食點心都係其 次,我最想最想就係食灌湯餃,雖然無上等既材料,但好懷念果種味道呀,就好似街 邊碗仔翅,比起真既魚翅更令人難忘,以前每一次同爸爸媽咪黎,我一定要食番兩碗 先夠皮,病左之後無乜機會再黎嚕,淨係上年黎過一次,就係為左食灌湯餃,不過味 道已經不及當年喇,今次黎食既,已經唔係食灌湯餃既味道,而係食灌湯餃既回憶, 懷念曾經好食得令人不其然笑出黎既感覺,可惜,這個小小的心願可能以後都無法完 成嚕,因為原來灌湯餃已經無賣半年。曾經以為食灌湯餃係理所當然的事,只要我俾 得起錢我就可以食到,而家我先知道可以食到自己鐘意食既野,已經係一種恩賜,世 界上所有既野都唔係應份的。

食完野之後呢,我地就分頭行街,我梗係拉住媽咪去睇衫喇,我呀,十八年都係未著 過背心呀,就算著出面都一定披多件衫,鬼咩,肥嘛,隻手同隻腳無乜分別,眼白白 睇住susuky成日著背心、吊帶,真係羡慕死呀,不過我最近瘦左好多,所以終於可以 解開我十八年黎既情意結喇,趁天氣仲未凍得晒,入多d背心先,其實我仲想著埋吊 帶架,但係條喉仔剛剛響鎖骨果個位,無得著嚕,唔緊要喇,有得著背心已經好happy 架喇。今日仲要買褲呀,原本上年換骨髓之前買過一條牛仔褲既,果時好著得好fit ,腰帶都唔洗用,但係而家....唔單止要用腰帶,仲要鬆到除褲可以唔洗除鈕同拉鏈 ,哇....即係以前條腰既闊度等於我而家patpat既闊度(滴汗)。

而家咪好興果d有個單字名既電話繩既,我覺得好鬼得意架,最衰無個「咩」字喇, 生肖果d就有個「羊」字,不過無咁靚嚕,可惜可惜,有得訂做就好喇。今日仲有另 外一個重要目標架,就係想買果個好大個拉鏈既袋,初初我響西九龍中心見到,仲以 為好少有既添,點知每次同朋友講起,都未講完,佢地就可以形容晒個袋係乜樣喇, 哎呀....原來通街都有得賣呢個袋架,仲要勁多人用,不過我第一眼見佢就鐘意左佢 喇,而且我又唔係跟潮流,所以我唔怕,嘻,結果都係買左,好鐘意呀,不過其實個 袋都幾重下,雖然得意在係條大拉鏈,但最麻煩都係條拉鏈,勁難拉喇,朋友話我拉 得多實手瓜起展,不過我鐘意佢外表嘛,唯有接納埋佢既缺點喇。

由太子行到去油麻地,好累呢,唉....老喇老喇,以前由太子行到去尖咀都唔累,而 家連以前一半都無,於是就call哥哥黎接番我地,不過佢又要撘番車去九龍城先過到 黎,等左差唔多粒幾鐘呀,上左車抖番一陣,呼....好好多喇,下一站唔該尖沙咀丫 ,我地向加連威老道進發!行到差唔多九點,我地就去金龍船買左三個千層蛋糕,好 食好食,嘻,最後我地去左西九龍中心,因為呢我睇中左個靚靚麵包既按摩公仔,諗 住送俾朋友,知佢番工辛苦嘛,做完野番到屋企就可以按摩下嚕。

哇呢,自從上年十一月換完骨髓之後,我都係第一次行街由朝行到晚咋,仲去左咁多 地方添,嘻,shopping力量真係無限大呀。

之前開心歡笑<---->呀 咩 昔 日 發 傻<---->難忘吉場聚會