北上消費

::::::星期四::::::十二月六日:::::: 媽咪話朝早七點會跟梁生梁太去晨運，咁鬼早，我仲發緊夢呀，唔好預我，所以醒既時候得番我一個響張床度，尋晚臨訓無拉窗簾，一起身就見到有個男人響對面間屋個外牆度整野，哇，死喇，咁我個訓覺樣咪俾人睇到晒？即時響被竇度飛過去閂窗簾，然後再上番床典多一陣，然後就起身嚕。係喎，無帶牙刷黎喎，媽咪話...佢頭先都係用手指刷牙咋，哇，咁勁既，我就唔得喇，所以問梁生拎左支新牙刷，但點解支大陸版既黑人牙膏，ｄ牙膏會係黃色既...響滿心懷疑不安底下，我都係求求其其刷兩下就算喇，容乜易中毒呀。換好衫，畫好樣，可以去食早餐喇，三個大人問我想食中式定西式，哈，梗係西式喇，尋日都飲過茶嚕，今日試下第二樣嘛。於是我地就行去山莊入面既西餐廳食早餐，我要左個煎雙蛋加麥皮，食左兩隻蛋都已經唔想食嚕。 食完野之後，梁生梁太好有興致咁想周圍行下，原來山莊擁有一個荔枝山響旁邊，收成既時候，每個住戶都會有兩蘿荔枝，正呀，除左西瓜之外，我最鐘意食荔枝架，嘻。之後我地去睇左幾個示範單位，ｄ裝修好靚呀，我最鐘意有個複式單位連天台，哇...響天台燒下野食，又或者日落既時候坐響度吹吹風，都不知幾鬼過癮，可惜我地未中過六合彩喇。其實我都無乜心機行，因為實在好凍呀，尋晚番風，得十五度咋，今日又無太陽喎，我淨係想快ｄ番去訓響張梳化度抖下咋。回去途中，見到有一家人既花園特別大，再睇真，哇...果個人起左個大泳池響花園呀，仲要勁深勁深，差唔多有兩層樓咁深呀，足夠跳水呢，真係厲害呀，有錢係唔同ｄ。 番到屋之後，見無乜野做，梁生就搵陳慧琳ｄ卡拉ok碟出黎俾我唱喎，雖然話音響設備都幾正，但一條友響度唱總係怪怪地咁，而且ｋ房都係黑蚊蚊架嘛，而家咁鬼光，好唔慣呀...哈，所以唱左幾首就無心機唱嚕，到媽咪出動喇...佢就梗係唔係唱陳慧琳喇，佢唱粵曲呀，呵欠，愈聽愈想訓覺，之後梁太都一齊唱，救命呀，好嘈呀，下次都係自己拎ｄ卡拉ok碟黎，大人就打麻雀，小朋友就唱ｋ，嘻，幾溫馨。其實我同佢地三個上黎既目的真係有ｄ唔同，佢地就諗住上黎悠閒悠閒，我就諗住上黎搏老命shopping，嘿嘿，都係同埋哥哥一齊好ｄ，起碼有佢陪住我去shopping嘛。 唱到兩點幾，佢地終於罷休喇，媽咪約左哥哥五點鐘響東門等，都係時候走嚕，我地撘車出去樟木頭，再撘番果架三十蚊車去羅湖，梁太話想買番個假既名牌手袋，叫我帶佢去買喎，哈，於是我就帶左佢去羅湖商業城嚕，梁太數口真係精，百八蚊可以講價講到八十蚊，我都要好好學習一下先得。之後梁生梁太就過關番香港，而我地就撘巴士去東門同哥哥匯合。我發現左有一個好奇怪既現像，唔知點解有多人望住我對腳，媽咪話係因為兩隻腳太瘦喎，膝頭大過脾，話口未完，又有一個女仔行過黎第一眼就係望住我對腳，仲眼都唔眨添，下？唔係咁嚴重呀。嘻，今次有咩收獲呢，我買左三對襪、一條西褲同一對拖鞋，三對襪之中只有一對係買俾自己既，其他果兩對係打算送俾朋友，點解送襪咁奇怪？因為可以俾佢響屋企著，唔洗踩住冷冰冰既地板囉，好凍既時候你試下著番對襪丫，真係暖好多架，而且送襪又唔同送頸巾、手襪咁普通呢，仲有對毛毛拖鞋，我第一眼見到就鐘意左喇，係simson個爸爸黎架，個樣好鬼得意，嘻，所以決定買黎送俾念慈姑娘做生日禮物，對鞋咁cute，起碼可以搏念慈姑娘一笑嘛。呀哥仲威，佢買左一有半個人咁高既forever friend熊熊，諗住送俾女朋友做生日禮物喎，原本佢諗住買果隻仲大呀，成個人咁高，但...香港地寸金尺土，我諗屋企唔係幾千尺，都幾難放得到，咁ｑ大隻送俾女朋友？你似同佢有仇多過似愛佢喎...俾佢訓左張床，你女朋友咪要訓地下？所以響我同媽咪極力阻止下，哥哥就買左隻細一半既熊熊喇(但都好大隻)。 連埋個盒，咬住兩個冬甩 大家都有收獲，開開心心撘車番羅湖食飯，我地去酒樓開左位，放低ｄ戰利品先，然後我就拉左哥哥去買野...嘿嘿...nathya響羅湖買左個假prada銀包，好靚架，入面ｄ格格又實用，又可以放相喎，所以我都想買番個，但當然唔係恨佢係prada喇，最好佢無prada個logo響度，廢事俾人以為我想充大頭。於是我就去果ｄ賣手袋既舖頭，逐間問有無prada銀包，咦...原來佢地將ｄ冒明牌冒到一模一樣既產品，收得好密架，有ｄ舖頭淨係俾ｄ相我睇咋。終於搵到一間有果個款既銀包喇，我話想買既時候，個職員即刻反轉其中一張梳化椅，哇哇...原來佢地響張梳化底整左條拉鏈，入面有好多好多銀包，一盒盒咁放晒響度架，哇...第一次見識咋。nathya買六十蚊，我仲諗住可以買五十蚊，番到香港有得威下添，但個sell屎企硬七十蚊喎，我咪話我個friend買六十蚊，如果我買得貴過佢會俾佢笑囉，哈，最後六十蚊成交！ 我係唔係好索呢 番到酒樓，哥哥又拉左媽咪去睇頸巾，得番我一個響度，片皮鴨到黎喇，佢地仲未番黎，個師父響我隔離片隻鴨，個個都望住呢面，但我張台又得我一個，搞到好似我一個人食晒隻片皮鴨咁，哎呀...仲未番黎，為左唔好歎凍晒隻鴨，嘻，所以我唔客氣喇，一條友響度起勢咁食，食左幾件之後媽咪同哥哥先捨得番黎，今次食片皮鴨有ｄ無癮呢，可能因為太少人一齊食，無人爭就唔馨香卦，得我地三個，我淨係食片皮鴨都食到飽晒嚕，哈，不過可以食自己鐘意食既野食到飽，果種感覺真係好幸福。 九點幾我地就過關番香港嚕，打俾爸爸，爸爸話同呀華兩個響倉度執緊野，可以叫呀華黎接我地番屋企喎，嘻，好野，於是我地去到九龍塘，就有專車送我地番去喇，唔洗拎住一袋二袋撘地鐵、再轉小巴，嘻。