::::::十二月十七日至二十三日::::::

上個星期六去完展翅之後，就俾人迫遷去A2喇，撞鬼嚕，一生人之中，第二次住男病房，男病房入面會有幾間細房仔，細房仔入面既都係女病人，所以起碼唔會轉左轉右都係ｄ呀叔呀伯嚕。呢間房之前係放兩張床既，但床位緊迫，所以放左三張床，迫到可以手拖手訓覺。可憐我一直高燒唔退，都係三十八至三十九度，成日都無乜力同精神，去個廁所都震震震，最想梗係呀媽響身邊喇，可惜媽咪響工展會租左個位，唔擺又唔得，果一刻真係好唔開心，覺得病都好似無人照顧，日日就係眼光光，我又唔捨得叫媽咪買雜誌喎，所以呢，我每日既唯一娛樂就係望住個門口經過既人，左行去右，右行去左，偶然會有個好似陳冠希既病房助理經過，就算係一次bonus，哈，始終望靚仔都係最好睇既。響房出面，隔住四張床加一條走廊有一部細細既電視雞，如果開左又開得大聲的話，都會無咁悶，不過有時無端端俾人熄左，然後就再無人開番嚕。其實住院我好怕人地落晒ｄ窗簾，果種感覺好陰森，又好似俾人困住響間密室入面，好似就快窒息咁。

過左幾日都係燒，條喉仔種唔到有菌，但醫生話如果都係燒既話就要拔喉，下？唔係喇fa，無菌都要拔？入手術室整架喎，無左佢...以後抽血、打藥、輸血、輸血小板就要下下都篤手，我抽血都喊到死喎，而且之前打豆響手背，過一、兩日就會腫，每次打藥仲會痛到上手臂，我而家既情況，一個星期最少輸一、兩次血小板，無左條喉，我怕我會喊乾ｄ眼淚。

除左第一次入醫院會通知好多人之外，之後大大小小入院我都好少會去叫人黎探我，因為到時未必有精神招呼到佢地，雖然佢地有時會話「唔緊要，睇住你訓都得架。」，但我真係唔係好慣俾人睇住訓嚕，廢事我流口水果ｄ樣嚇親人喇。今次我主動叫左念慈姑娘黎探我，因為我有份生日禮物要俾佢，時間關係無包到花紙，係咩？咪就係果對simson爸爸拖鞋嚕，就算真係唔適合佢用，搏到佢一笑都算值得喇，嘻，念慈收到既時候好開心呀，佢話會響護士宿舍度著喎，而佢都帶左好多禮物黎，好似聖旦老人咁，有一隻可以響雞蛋度種植物既小盆栽喇，有林以諾牧師「笑裡的祈禱」既VCD，仲有一大包許願卡仔，嘻，念慈真係一個天使，遇到佢係我福份，我略略講過我想食好立克麥片，之後有一晚佢真係搵到買黎，仲驚我食唔到野，買左個芝士蛋糕俾我，拎左ｄ野俾我之後佢又要趕番上去K20病房開工嚕。

響呢度真係食唔到野，其一係呀媽唔響身邊，唔係話想食乜就食乜，雖然媽咪開工前同收左工都會買野食黎，但朝朝都係腸粉...食到唔想食，夜晚選擇比較多，因為工展會有條食街，乜都有得賣，食得最多係鴻星既雞絲翅，哈，真係魚翅黎架，不過做展覽，所以只賣三十元。

有日下午，有個叫jimmy仔既人打俾我，我記得佢就係上次上堂好似女仔果個，咦？但係點解佢會有我電話既呢，寒喧左幾句之後，佢話佢睇過我網頁，我即時打個突，然後佢話知我病，下...想瞞都無得瞞喇，唯有大方承認嚕，而且有病根本唔係一個錯，亦唔係咩野唔見得人既事，之後幾日我地都有傾過電話，我就梗係尼響個被竇入面傾喇，搞到人地經過都唔知我做乜響度自言自語，可能以為我燒到傻左，不過有時姑娘黎探熱、量血壓之類，就算傾緊都要暫時停止，而且唔通姑娘同我講野我唔應佢咩，但jimmy仔就顯得有點不耐煩，哈，我都控制唔到架喎，同jimmy熟左，其實佢都幾似一個小朋友，成日都會做出一ｄ令人莫名奇妙既事。

換左藥之後燒開始退喇，精神都好ｄ，媽咪響零食密語買左兩個半透明公仔，入面可以放一ｄ糖果，有日李醫生經過就問我呢兩個野用黎做乜，我就答佢嚕，然後佢就話遲ｄ買糖黎俾我放入去，嘻，李醫生真係好錫我，可能成人病房係我最細，同埋我病得耐喇，過左幾日佢真係買左兩包糖黎，哈，只要想像到一個大醫生去七十一揀糖個樣，真係又好笑又令人心甜。佢成日都會同其他醫生講，我好叻架，因為我電腦叻，仲寫game評咁話喎。見ｄ燒退左，我根係想請假星期六番展翅喇，因為係last一堂，但問題就係星期六晚我朋友又買左胡桃夾子既飛話請我睇，我真係好想好想睇架，我覺得無睇過呢套芭雷舞劇，等於無過過聖旦，而且佢仲係買最貴果隻320飛，屈指一算，我請假要由一點，請到夜晚十點左右喎，但有隻藥係八個鐘打一次，點算呢，唔理喇，不如同李醫生講我要出院喇，咁起碼我果日唔洗咁趕嘛，於是我就響李醫生提出喇，可能佢果日心情唔好喇，我都係第一次俾佢鬧，佢話對我已經人至義盡，總之就唔俾我出院，同埋一定要中間番黎打果一針，我梗係唔敢出聲喇，唯有扁住咀囉，但佢又鬧我「你仲扁咀喎。」，大佬呀...俾人鬧仲可以有咩表情，唔通仲笑笑口咩，佢地左我咪尼埋喊嚕，之後菩薩醫生(因為佢最順得人意，我想點都得)經過，我就叫佢俾我轉口服，唔洗打針，因為打針既話，我就去完展翅要即刻番黎打，再即刻出番去，佢聽我咁講，索性話俾我出院，我咪話李醫生唔俾囉，因為菩薩醫生係under李醫生架嘛，但佢話李醫生交得個病人俾佢，就係佢付責喎，哈，而家又俾出院，梗係開心番喇，點知轉個頭李醫生又番黎，結果梗係無得出院喇，無計喇，唯有果日趕ｄ囉，好過無得去嘛。

其實我咁趕住出院，都係因為我唔想響醫院過聖旦，上年換完骨髓，聖旦、除夕都已經係留響屋企過，我唔想今年要響醫院過。有一晚，有一班醫生、義工一邊唱聖旦歌，一邊慢慢行入病房，果一刻真係好溫暖，雖然就快聖旦，個個都忙，但竟然有一班人唔怕俾人笑走音，走黎令我地開心，太偉大喇。仲有有一朝早，我仲訓緊既時候，K20既妹姐忽然響我耳仔邊講「你估下我係邊個？」，哈，我又好醒訓喎，迷迷糊糊咁答佢「你係妹姐...」，嘻，我梗係乘機偷襲喇，妹姐塊面好滑架，嘻，佢又襲擊番我，哈，好開心呀，佢特登走黎探我。仲有以前響K20做既病房助理呀明，調左去B2，佢有時又會黎探我，吹下水咁嚕，佢成日扮我喊住果個樣講「我要出院呀...」，嘻，真係唔知好嬲來好笑。以前響K20做既男護士呀強，咁橋又係響A2做，我同佢有玩icq架，所以特別熟，我響醫院成日訓覺，我仲記得以前有一朝，佢入到黎我房見我仲係訓緊，就細細聲咁講左句「睡魔！」，哈，又俾我聽到喎，我地就係咁不打不相識喇。因為呢個係男病房，所以特別多男護士同男病房助理，有ｄ係粗粗魯魯架，不過有ｄ又幾好，好似貌似希希既病房助理喇，同埋另外一個肥肥地既病房助理，有日我響廁所沖完涼，臨出去先發現扣錯鈕，諗住出去張床度先扣番好，點知...果個肥肥既病房助理成日行黎行去，望住佢我唯有好尷尬咁笑喇，嘿嘿...有一晚希希同我量血壓喎，佢第一次同我講野咋，佢係講「小姐，量血壓呀。」，嘻，原來係我羊小姐...但...佢同隔離果個呀婆量血壓既時候，都係講「小姐，量血壓呀。」，滴汗。仲有一個"four暈屎"姑娘，第一次見佢，佢好大聲咁同隔離個病人講野呀，死喇...惡死姑娘呀，之後佢睇我ｄ牌板時，我見到佢有個大藥丸公仔心口針，咪撩下佢講野嚕，「姑娘，你個大藥丸心口針嚇死人喇。」，嘻，之後就發現"four暈屎"姑娘其實係非常好傾，仲對病人好好架，佢同呀婆大聲講野，係因為呀婆撞聾咋。有朝早"four暈屎"姑娘仲拎左一大包響迪士尼買番黎既糖糖，哇呢，開心死，嘻嘻。真係幸福呀，去到邊度都有姑娘錫。

終於到左星期六喇，但放假前要輸左血小板先，每次輸血小板，我都要打好鬼眼訓既防敏感針，但今次可能興奮得滯，所以無訓到，搞到個人wing下wing下咁。今次無叫呀哥黎車我呀，因為響紅隧塞得太勁喇，索性撘的士落去中環，再撘小輪過去尖咀，媽咪就送到我去天星碼頭嚕，因為佢要番工嘛，我一個人拾下拾下咁上左船，打俾sammy，點知佢仲未到尖咀喎，咁我就約佢響文化中心等喇，死喇，我好似飲左迷暈黨ｄ迷藥咁，飄下飄下，飄左去文化中心，真係好唔掂，開始眼花花，唔理得咁多喇，學ｄ呀伯坐樓梯喇，坐低當堂舒服晒，起碼無咁暈喇，sammy終於到左喇，但佢又話要去廁所，想叫佢去到課室先去，因為我唔係好企得，但佢又話好急，我唯有一個人響男廁門口等佢喇。

行去課室果段路，真係好鬼辛苦，就算見到平時傾開電話既jimmy仔，都無心機打招呼，因為實在太暈，一入到去，我見到呀dick已經到左，我就即刻衝過去坐響佢隔離，自己人嘛，呼...舒服晒。之後上堂都仲係好似遊緊雲咁，一直都唔出聲，搞到俾人話我唔投入、怕醜，撞鬼嚕，第一次俾人咁講。我地組成十個人，要搵一個人出去講野，咪用「何媽」黎揀人囉，點知...得我一個出黑，死喇，淨係講三句野，但我記黎記去都記唔到，到我出去果時，我拎住個咪，疆硬左咁，淨係識得笑，最衰ｄ男仔又響度嗌「咩姐」，搞到我好鬼瘀，好彩我果組有個女仔走左出黎幫我講，呼...

落堂之後ｄ同學話去唱ｋ，我都好想去坐下呀，不過我要趕番醫院打針，唯有又即刻撘小輪過番中環，然後呀哥響中環車我上瑪麗，好趕呀好趕呀，一番到黎就催姑娘同我打針，打完我又上番呀哥架車，叫佢車我出尖咀，我約左呀劍七點三響文化中心等，但我又想去搵班同學，去到尖咀時間已經係六點九，我匆匆咁去到ｋ房，真係椅都未坐暖就閃嚕，之後呀哥就車我過去文化中心，好彩，無遲到，好緊張呀，第一次睇咁貴飛，好正呀，ｄ舞台效果做得好好，好精彩、好靚、好真，ｄ音樂演奏得好好，梗係喇，葉詠思做指揮喎，臨尾仲玩野，謝幕左幾次，玩死葉詠思，嘿嘿，而我地就拍手掌拍到手軟。

完左之後門口有精品賣呀，我同呀劍都買左一個細細個既胡桃夾子公仔，嘻，好得意呀，個口可以郁架。媽咪響大堂等我地，因為要接我番醫院嘛，咁我地一行三人就去左大家樂醫肚先，咁橋我班同學又行到黎附近喎，所以順便探下我，食完飯我又想同班同學仔聚一聚，所以呀劍就同媽咪傾住計先，我就去搵班同學。點知...當我剛剛出現時，呀明又無端端唔知響邊彈出黎喎，哈哈，佢地咪話我地兩個係一齊囉，今次真係水洗都唔清呀，哈，其實呀明係約左朋友響大家樂食野，咁橋之嘛。之後我同班同學仔就棟左響星光行果度吹風，佢地又諗唔到去邊，棟左半粒鐘左右，佢地話去文化中心傾計喎，雖然有兩個女仔，但果兩個女仔都唔理我，搞到我一條友跟住佢地行，勁尷尬，所以索性走嚕，搵番媽咪之後就勞煩爸爸車我地番醫院，哇...番到醫院差唔多十二點喇，媽咪陪我沖埋涼都成點嚕，我就玩得開心，辛苦晒媽咪嚕。