阿咩大戰攝石人

::::::十二月二十八日:::::: 今日係sammy生日呀，展翅班同學仔話唱ｋ慶祝喎，哎呀，我最怕同一大班唔係咁熟既人唱ｋ架喇，因為...我唱歌難聽嘛，人少少就無所謂，咁多人面前唱到走晒音，仲要爆玻璃杯果種，好瘀架喎，所以決定如果食野既話就去，係唱ｋ既話呢，就寧願響屋企嚕，話晒食野都係落肚，扺ｄ嘛，但唱ｋ有份俾錢無份唱，齋聽，你估聽演唱會咩。 下午見到sammy上網，咪順便問下佢今晚搞乜嚕，原來佢都唔想唱ｋ，都係覺得食飯好ｄ，yeah！太好喇，sammy係壽星仔嘛，咁如果佢唔想，我諗無人會say no喇卦。其實我都仲係有ｄ擔心，怕佢地點都要唱ｋ，不過sammy響icq拍晒心口叫我放心，話總之今晚一定唔會唱ｋ架喇，呼，有人保証就得喇，我信你架喇sammy。jimmy本來有ｄ唔舒服，想唔出架，不過聽我講，話sammy保証係去食飯，所以先肯出黎咋。 哈，開開心心撘巴士出去，我地約好六點半響旺角中心門口等，差唔多七點先等齊人，有我、thomas、阿達、瑩瑩、vernon、阿may、大隻佬、大隻佬's女友，同埋一個唔知男定女、唔知叫咩名既同學，jimmy就遲ｄ先到，佢地不停話去唱ｋ，但sammy就一粒聲都唔出，下？唔係咁玩我嘛...頭先又拍晒心口，而家又唔出聲，咁即係昆我出黎喎，我咪唯有講我唔想去唱ｋ，不如去食野嚕，佢地個個都話唔好，sammy竟然...講「算喇，咪就下ｄ女仔囉。」，下？你明明都唔想去架喎，搞到好似我一個人響度發小姐脾氣咁，唉...我唔係激氣要去唱ｋ呀，我係激氣sammy保証過，等我出到黎佢又唔出聲，等我仲叫埋jimmy出黎，呢個人真係信唔過，估唔到我聰明一世，死響佢手上呀，好野呀，我都扼到。 無所謂喇，又唔係成日去，咪去聽下人唱歌囉，我地去左旺角中心間前衛，阿達同thomas都係放工黎，所以兩個著晒西裝，哈，thomas平時咁跳皮，著西裝個樣好搞笑呢，而阿達就好似酒樓侍應，哈，我入到ｋ房，見到阿達個背脊，仲以為佢係前衛ｄ侍應添...嘿嘿。我同thomas唔係咁熟，不過見佢幾玩得，等緊安排房果時我咪同佢講「好緊張，我同你第一次黎開房咋...」，點知佢唔識反應，怕怕醜醜咁，嘿嘿，太過開放，嚇親人添，之後入到房，佢咪除西裝褸嚕，咁我又除褸，我咪講「黎嚕，除衫嚕。」，嘿嘿嘿，玩死左。 我同瑩瑩一齊勁食佢ｄ生果盤同nuts，好食，ｄ哈蜜瓜好鬼甜，ｄ蝦條又正喎，哈，我梗係唔執輸喇，無得唱，食多ｄ扺番，之後叫左個餐，ｄ薯條新鮮炸起，勁好食呀。唱ｋ包兩杯野飲，我就飲左檸茶同什果賓治，嗯嗯，都算幾飽肚喇。 夜少少又黎左個唔知咩名，著西裝既同學，黎左無耐之後，sammy唱唱下歌，個電視無端端變左生日歌喎，達佢地仲響門口捧左個蛋糕入黎，哈，仲有香賓送呀，thomas開香賓時好驚險呀，勁驚個「質」會好似做戲咁飛出黎，佢仲要起勢搖左幾下喎，好彩...「卜」一聲就開左嚕，不過唔知點解個個都有得飲係我無，乾杯果陣得我一個係拎住杯檸茶，嘿。個蛋糕分得八件咋，嘻，好彩分到喎，嗯嗯，好食。切完蛋糕之後，果個西裝無名男子就走嚕，哎呀，jimmy醒起計左佢人頭，但佢無俾錢呀，於是咪追出佢嚕，點知佢出去之前竟然講「咦？等我立架生先。」，然後就響台面拎左把餐刀走出去，哈哈哈哈，笑死我喇，結果果個人走到無晒影嚕，喔噢。 阿達好似侍應呀 雖然我無份唱，但我都留意到現場係有三個咪，其中兩個咪係傳黎傳去，而有一個咪係長時間俾阿may攝實既，好勁呀果然，無論係男仔歌同女仔歌佢都包唱，仲記得初初識佢，佢話佢自己係幕後代唱，仲幫twins代唱過喎，成千蚊唱一次，人地咁講我咪咁信嚕，仲記得上完第三堂佢地去唱ｋ，我去左一陣，聽到佢唱歌都幾...難聽(其實可能或者係我唔識欣賞)，因為我好快就走左，當時仲以為自己聽錯，但今次...無得頂囉，點能夠相信twins唱歌，會令人聯想到殯儀館既「ｄ打佬」，我諗我真係太過俗氣喇，唔識欣賞，唔識欣賞，不過我唱歌都難聽，又無資格話人既...但起碼我無搶住個咪黎折磨人嘛。佢唔單止咩歌都唱，仲要係唔識既都要唱，好似twins首「有所不知」，明明唔識唱，就跟住ｄ字幕再自己作個音咁，唉...咁又何苦呢...勉強無幸福嘛。其實在場既同學們都開始不滿，細細聲講架喇，於是連我都忍唔住，同大隻佬's女朋友＋瑩瑩，三個女仔一齊搶左個咪，哈，俾我搶到我打死都唔俾番你架喇，一到下一首，我即刻大聲講「呢首我飲歌呀！」，雖然唱歌其間阿may起勢咁哄個咀埋黎我個咪度，但我地都成功咁唱左三首歌！哈，太有成功感喇，響攝鐵手手上搶到個咪。原來佢唔單止係攝鐵手，仲係攝石人，本來我地想三個女仔影幅相，但佢係咁攝過黎，唉...救．命．呀... 果位唔知係男定係女，又唔知叫咩名既同學，我同瑩瑩都研究左一段時間，見到佢唱「愛情當入樽」，咪估佢係女囉，點知班男同學叫佢阿強喎，下？女仔唔會咁前衛叫阿強喇卦，原來...佢係男仔黎架，即刻毛管動，好彩無叫佢一齊去廁所咋。 左起：阿強、大隻佬、大隻佬's女友、vernon、sammy、阿咩、阿may、瑩瑩 多左個jimmy 專登唔影攝石人 thomas同阿達因為阿may長期搶左個咪去，頂唔順ｄ殯儀館氣氛，所以好無癮咁早走，而我地就唱到十一點，之後我地就企響地鐵站，討論仲有邊度好去，最後決定去百老匯對面間麥當當吹水。jimmy上次送左隻回力標俾我，所以今次我送番一隻響「可愛天國」揀既黑白牛牛俾佢，而sammy我就送左張自己畫既卡同手襪做生日禮物。我地響度吹吹水，講下笑咁，話咁快就十二點幾一點嚕，媽咪同哥哥緊係不停催我番屋企喇，換骨髓之後成年幾我都無出過夜街喇喎，搞到我都有少少擔心自己一個唔掂添，於是我地就一齊走嚕，經過唱片舖，我地走左入去睇，哎呀，千嬅演唱會呀，嘻，買左番屋企聽先，之後我地又經過一間賣小食既舖頭，哈，我同vernon即時有頭一個想法「食野囉！」，我買左一底格仔餅，一路行一路食，然後響先達門口撘通宵小巴番官塘嚕。話時話，我呢幾日食多左野呀，頭先唱ｋ已經搏老命食喇，搞到我好似死驚蝕底咁，剛剛仲買左成底格仔餅，因為呢...我唔食野媽咪會鬧喎，所以一唔食野我就有罪惡感，覺得對唔住媽咪，不過食多左野個人令捨開心，希望可以肥番ｄ喇，唔係出街好凍呢。最好可以響條街度一邊行一邊食，仲要係一邊手拎一樣，左一啖右一啖，咁就係我既目標喇。 我送俾sammy既卡同禮物 撘車番到官塘之後，哥哥約左我響康寧道間24小時惠康度等，見佢未到我咪入去行下嚕，買左條橙味雪條，坐左響度食，哇...凍到入心呀撞鬼，我仲見到惠康有成坐山咁高既qoo毛毛發聲公仔，哇哇，卡哇伊呢，哥哥話已經買左一個俾我喇，嘻，多謝晒。之後我地一齊撘的士番屋企，唔知點解咁夜一男一女撘的士，總係覺得人地會諗我地係唔正經人家，但個的士叔叔好好人呢，去到之後仲特登u turn，停響禁區俾我地落呀，哇...麻煩晒呢。 唱生日歌::::::睇下:::::: 開香賓呀::::::睇下::::::

　

帶狗中環散步

::::::十二月二十九日:::::星期六::: 今日要一早起身，扮得靚靚咁出去呀，因為醫院義工馬太響黃大仙既癌病中心搞左個party，，好多病友都會去架，咁難得可以響醫院以外既地方見面，梗係要去喇。媽咪要番金鐘工展會，本來佢可以響樓下撘巴士直接去到架，不過佢又唔放心我一個喎，所以就同我一齊撘地鐵，送到我去黃大仙佢先走。我約左鳳儀十二點響票務處等，但遲遲都未見佢，反而遇到另外一個病友，佢又係約左鳳儀既，嘻，佢唔認得我架，但佢認得我媽咪，因為我媽咪陪我覆診果時，成日都會響度織野嘛，於是我就同佢一邊傾計一邊等，大約撘三左右，鳳儀同miss mo都黎齊喇，但我地四個人之中，無人知道癌病中心響邊，結果我地搵左差唔多九個字先搵到，哇...行到我想死咁滯，佢地都算係康復者嘛，但我仲係病人，行左咁多路，又行得快，隻耳仔又塞鬼住，好彩經過零食物語買左盒軟糖，趙下趙下隻耳仔就唔塞喇。 miss mo係其中一個病友，佢姓毛，所以大家都叫佢miss mo，佢話對我完全無印像喎，無理由架，雖然我地好少傾計，但覆診都成日撞口撞面，佢知道我叫「阿姿」之後，就話記得另外有一個又係叫阿姿既媽咪，成日番到醫院就成日織野...下？果個咪係我媽咪嚕，哈哈，原來佢唔認得我呀，咁又係，每次番到醫院我就尼埋一二角起勢咁訓，而且每次番醫院都超級求其，無計喇，七點幾就起身喎，有時仲牙都未刷、面都未洗，眼耳口鼻都執齊添呀... 好開心呀，見到好多病友，慧芬同佩枝仲帶埋個女黎，記得有幾次慧芬同佢個女一齊番黎覆診，佢個女又唔怕人喎，勁同我玩，好可愛架，估唔到咁耐無見，佢仲記得我喎。食野果陣，慧芬個女女成日走黎除我隻耳環，然後戴落自己度，嘿嘿，但隻耳環太重喇，佢搖兩下就甩左嚕，佢仲拎左我部相機黎影我添呀，如果有個咁可愛既妹妹都幾好，不過今日我地都有ｄ似姊妹，因為我地化左個差唔多既粧，一樣係綠色眼影，嘻，佢個衰妹好鬼貪靚架，玩左無耐就叫佩枝幫佢補下ｄ眼影，之後又叫jenny幫佢補下ｄ胭脂，真係俾佢笑死呀。 慧芬個囡囡 幾貪靚 前兩日唱ｋ、買左隻cd、又睇戲又食野，今日淨番五十蚊帶出街咋，洗鬼晒嘛，頭先買左盒糖，同買左支橙汁， 已經用左廿幾蚊嚕，而party又要每人夾三十幾蚊喎，死喇，無錢添，好彩馬太話我無乜點食過，所以唔收我錢，呼...其實唔係我唔餓呀，而係ｄ野食唔係咁合胃口，可能因為個個病友都係大人喇，所以多數係ｄ好正經既食物，例如飯、麵之類，而且無野飲，齋水，雖然有ｄ食物係大家樂到會，但都係雞、牛，雞我又覺得太多油，牛我又唔食得，睇住個個讚ｄ咖喱牛腩、薯仔好食都無得食，好慘呀。食完野之後先兩點幾，原來仲有下半場係同「心血會」既會員，再一齊食多一次架，今次係「心血會」搞，所以食過其他野，好野。「心血會」既party未開始之前，有人派左ｄ form俾我地填，有張係「心血會」入會，咁又無左廿蚊嚕，另外一張就係申請做殘疾人士既form(哈，唔記得叫咩form)，申請左之後過關番大陸有得行秘密通道架(即係偷渡？)，仲有得半價享用政府既康樂設施，同埋半價響文化中心、大會堂買飛，哇哇哇...咁多優惠，梗係申請喇。 由「心血會」搞既下半場，ｄ野食好鬼正呀，有芒果布甸、o者喱、燒賣、椰汁糕、咖喱角、春卷、腐竹糖水...應有盡有，哇呢，殺呀！ｄ春卷同燒賣勁好食呀，一大盤燒賣百幾粒，眨下眼就無晒嚕，好彩我都食左兩粒，諗住食下甜品喇，之前仲見到成兜芒果布甸原封不動，轉個頭就淨番個兜，喔噢。食完野玩問答遊戲，玩到我瞌眼訓添...好彩之後有抽獎時間，一開始以為得幾份禮物，但抽極都仲有，哇...「心血會」真係幾有來頭架喎，竟然搵到讚助，雖然禮物得三款，相薄、燉盅、廚具，但有禮物收喎，係人都開心架喇。我地有八十幾個人，但禮物就有七十幾份，抽唔到果個都真係幾唔好彩，而我...梗係抽到喇，係廚具系列，三份之中最巨型既，足足三盒藍罐曲奇咁大盒呀，淨係個份量都贏晒喇，嘻，收大份禮物係特別開心既，不過係讚助既關係，所以有ｄ入面唔係咁齊架，有其中一個病友，入面有六、七個食物盒，但蓋就得一個，哈，而另外一個就有幾個「哨機」，好彩我果份樣樣齊全咋。 五點幾，見個party就快完，咁早番屋企又有些少無癮喎，所以就周圍搵人，睇下有無朋友仔今晚得閒喇，可惜今日係星期六，個個都有晒節目嚕，忽然，電話響起，原來係bee狗仔呀，佢剛剛響大陸買完年宵ｄ貨番黎呀，我咪問下佢今晚得唔得閒嚕，佢話好想同我去据扒喎，而且難得大家都得閒，雖然剛剛番完大陸好累，但都決定捨命陪君子，多謝，果然係好兄弟...唔係...係好狗，好狗。我約好bee狗響工展會等，咁我就可以放低袋大禮物響媽咪度，然後同bee狗仔行街喇，點解又係去工展會？因為我想食阿波羅雪糕囉，哈，呢四日食左三次喇，好食嘛。於是我就抽住一大份禮物，同ｄ病友一齊行過去地鐵站撘地鐵，可悲，原來...黎果時我地再兜右兜，行左成粒鐘先搵到癌病中心，但而家由癌病中心行番過去，只需五分鐘...好一個五分鐘... 去到金鐘第一件事梗係去提款雞拎錢先喇，驚唔夠錢入場嘛，之後咪去搵媽咪嚕，順便又睇下隔離檔口整手蠟，果個男仔真係好掂，成日都引到ｄ女顧客鬼咁開心，不過佢有時都幾cool架，如果ｄ人唔幫襯，但又阻住晒，佢就會話「唔幫襯就行開少少喇。」，正常既，我媽咪有時仲串呀，要搵食架嘛。 bee狗仔好快就到喇，估唔到佢仲霉過我，帶左四十蚊出黎咋，嘻，我剛剛拎左錢，可以請佢食雪糕，嗯嗯，好食呀，又係我最愛既菠蘿＋西瓜味，之後我又拉左bee狗去「可愛天國」個檔口度睇公仔，嘻，今次我揀左隻河童公仔，佢背脊揹住個類似東菇既物體，好得意架。呢度咁多賣野食既檔口，好想食炸大腸呀，成兩年無食過喇，最多同bee狗一人兩舊囉，點知行到過去見到ｄ油浸住ｄ豬腸，但ｄ油又唔滾喎，咦...好肉酸呀，即時唔想食，點知bee狗仲特登加多句「食喇，食喇，唔係好想食既咩？」，哎呀呀，玩我。 合巹交雪糕 貼左支旗響塊面度 bee狗好想去佐敦据扒呀，但我又唔食得牛，睇住佢食好無癮架喎，於是就迫佢去大家樂食囉，果度ｄ扒無咁正，無咁引人丫嘛，嘻。我地七點幾左右離開工展會，兜大圈行去中環方向，過左幾條天橋，經過金鐘廊先行到大家樂，我地一邊行一邊影相，bee狗部相雞有得捕光呀，佢等ｄ車經過左之後先影，ｄ相好得意呢，雖然我部相雞無得捕光，但正在感光度高，響唔係好光既地方，影出黎都會好光好清，各有各好嚕。我地兩個響條街度玩到癲晒，嘻，開心嘛，主人同狗難得一聚喎。 bee狗話呢張好有「冬日少女feel」喎 後面條光線其實係架巴士黎架 聖誕樹呀，幾有聖誕feel 去到大家樂得番一個唔知咩魷筒扒餐，其他都賣晒嚕，加一蚊多個芝士龍蝦伊麵喎，於是我就要左杯汽水，然後食佢個伊麵同酥皮湯嚕，嗯嗯嗯，好食，我地仲特登揀左個窗口位呀，對住工展會同維港，仲望到對面海添，正！我地慢慢歎，食到得番我地一台咋，哇...乜九點幾就收工架，見人地都執野我地都好識趣咁走人嚕，剛剛好媽咪收工，bee狗就送我去巴士站，將我交番俾媽咪，而佢就去接朋友收工，嘻，祝你好運喇下。 番到屋企，我將果一大盒廚具送左俾麻麻，麻麻不知幾開心呀，同阿的兩個拆出黎逐樣睇，嘻，真係好呀，一份禮物令到咁多人開心。 据呀据... 酥皮湯，正呀 番到吉場，竟然有網友問我今日係唔係去過黃大仙，哇哇哇，佢話佢響地鐵站口見到我呀，哎呀哎呀，如果當時我地相認就好喇，我從來都未試過響街度撞到網友架，不過香港話大唔大，話細唔細，咁都俾我地相遇，真係有緣呀。 佩枝同慧芬個囡囡::::::睇下::::::