| 媽咪生日快樂 |
|
::::::十二月三十一日::::::星期一::::: 今日係媽咪生日呀，我同哥哥尋晚一撘入十二點就唱生日歌，再捧個蛋糕出黎，係脆脆芒果蛋糕呀，好吃好吃，嘻，睇下媽咪幾開心。
今晚係大除夕呀，本來想約karry佢地架，但karry要同屋企人一齊，而今年展翅班同學仔又話出去玩喎，於是我就跟大隊，睇下有咩搞作喇。前兩日我地幾個響電話討論去邊好，決定去韓國燒烤，佢地幾個一係住荃灣，一係住青衣，一係住屯門，總之九成九都係新界區，所以就話響荃灣食嚕，但係除夕流流，響荃灣好似怪怪地喎，梗係響尖沙咀、銅鑼灣迫下先似樣架嘛，但佢地又話荃灣燒平ｄ，只需百幾蚊，車，尖沙咀都係百幾蚊之嘛，如果係計平既話不如黎晒官塘燒喇，七十幾蚊之嘛，唉...想近自己之嘛。如果響荃灣我都唔係咁想去，因為去荃灣一定要撘地鐵，而上次平安夜撘地鐵，我差ｄ暈響度呀，諗起都打個冷震，最後決定響尖沙咀，咪好嚕，大家去既路程都差唔多，公平ｄ嘛，於是我同thomas同jimmy一齊打電話去book台，book完之後jimmy無端端話唔去，叫我地自己去，下？唔係咁玩嘛，頭先傾果時個個話好，而家book左先話唔去，玩野呀，唉...真係激死我呀。過左兩日時間，最後決定唔去尖沙咀，唔去韓國燒烤，咁去邊呢，去銅鑼灣喎，都好呀，不過我打算十點鐘左右走，去工展會同媽咪一齊倒數，因為同班同學都唔係咁熟，又唔多玩得埋，連去邊都搞一大餐，無乜共識咁，唔想無無謂謂浪費左咁重要既一日嘛，廣告都有教喇「始終都係媽媽好。」。 今日係除夕喎，梗係要扮靚ｄ，但...我個咀角裂左呀，係囉，本來無咁衰架，其實係我刷牙果時"依"得個口太大(絕對唔係笑到個咀裂左呀)，本來佢都結蕉架喇，我又衰多手囉，成鬼日"meet"佢，"meet"到佢遲遲都未好番，唔理喇，今晚大晒，照上粧喇！上年除夕剛剛出院無得去玩，前年就去左跑馬地睇show，果次都幾開心架，我黐左粒閃閃貼紙響左邊眼角，夾曲左ｄ頭髮，掛左隻傻豹響件衫度，戴左頂小丑帽，仲拎左兩隻大手板手套添，哈，好懷念呢，好！今次都咁打扮先。
掛住打扮，搞到遲晒出門口，去到銅鑼灣仲要封路，搞到遠遠先有得落車，佢地約好響地鐵站Ｆ出口等，我就懶醒，諗住時代廣場係Ａ出口，咁Ｆ出口實響sogo果邊架喇，於是咪由三越行左過去世貿中心(唔係911果個呀...)，行左好耐之後，經過Ｅ出口以為就到喇，點知...行到去sogo都唔見，最後打俾jimmy，先知原來Ｆ出口即係屈臣士對住果個...嗚，我足足兜多左一個長方形咁多路呀，行到眼坦坦。頭先響車上面見到眼鏡舖出面有人派波波呀，係入氫氣果ｄ喎，勁想拎番個，不過因為封晒路同太多人，原本行三十秒必定到既路程，我諗起碼要行一個字或以上囉，唉...波波呀，我想要波波...
thomas、jimmy、阿達、阿瑩、阿may、sammy幾個響茶餐廳食野，jimmy嗌左個「雞公」，我Ｒ晒頭都唔知係乜，唔通係雞公既肉？定係我聽錯，應該係雞「冠」呢，哇...食雞冠咁恐佈，個侍應俾左個公仔麵佢，上面有ｄ肉，咦...莫非上面ｄ肉就係雞冠...呀...後來先知，「雞公」即係...雞扒公仔麵，嚇親添。因為好恨食格仔餅既關係，所以叫左個奶醬多，又有奶，又有醬，咪差唔多。sammy就勁嚕，佢嗌左個西多士，食完一個仲唔夠，要整多個添，唔滯架喎，兩個加埋都三十幾蚊喇，食個飯咪仲扺ｄ，不過想食又例外既。jimmy食完走左出去話買野喎，原來佢聽我講話想要波波，專登走去拎呀，可惜俾人拎晒嚕，但我都好滾動呢，起碼有朋友對自己咁有心喎。 食完野我地就成棚人行番過去去屈臣士果邊，開始討論仲可以去邊，哈，時間仲係八點幾，咁快就要諗去邊，ｄ時間點磨呢．呢．呢，忽然氣氛變得好無聊，因為無人有意見去邊，而我地企下企下，已經響人地giodano門口企左好耐，呼...好彩我預左今晚去搵媽咪咋，咪陪佢地企下嚕，之後佢地話行入去時代廣場，哇，隔幾個街口已經俾想入時代廣場既人潮阻住去路嚕，原來果邊一早爆晒喇，而我地隊尾呢度，根本連時代廣場都見唔到，前面既人企定定唔郁，後面又不停有人湧過黎，我地只係黎左一陣之嘛，已經俾人迫實晒，佢地話實入唔到時代架喇，要走快ｄ走，再遲少少走都走唔郁呀，真係誇張呀。 結果我地又走番去giodano門口，哈，人家真係多得我地唔少呀，遮左佢半個門口，難委阿達個女朋友黎埋陪我地企，不過我好羡慕佢呀，咁凍都可以著咁少衫，著得鬼咁靚，我身子弱囉，每次出街都包到成隻粽咁，件衫登台咁靚都無用喇，件褸都遮實晒嚕。見佢地無乜搞作，我就提議不如去工展會喇，哈，有人陪我去丫嘛，佢地又無乜意見，問我點去喎，銅鑼灣行過去唔會好遠卦，行去囉，兩個地鐵站之嘛，橫掂無野做，咁多人當行百萬行都好呀。thomas同阿瑩見我地無乜打算，所以就約其他朋友嚕，thomas就話落club，佢係我第一個識既朋友會去呢ｄ地方，真係驚歎呀，而阿瑩就陪多我地一陣之後再過去尖沙咀，都好呀，我又有著落嚕，我都想個個過得開心架嘛。 於是我、jimmy 、瑩瑩、阿may、sammy、阿達、阿達's女友，一行七人就開始行過去灣仔，其實...話行果個係我，諗住大時大節係行下迫下先有氣氛架嘛，見佢地無反對，咪行囉，點知行左一半之後jimmy就扭計話唔舒服，我就陪佢慢慢行嚕，之後佢地又嫌遠，咁又係，未行到過灣仔個個塊面都變晒色咁滯嚕，於是我地咪諗住行到過去灣仔地鐵站撘的士，我又衰多口話有穿梳巴士，但等極都無，好似老點左佢地咁，唉...到頭來都係分兩架的士去。嘻，我有三張免費飛呀，我同jimmy同阿瑩三個響的士分左佢，又慳十蚊喇。 我地入到工展會，聚集左之後，阿達就同佢女朋友兩個去行，拍拖嘛，而我地五個就一齊慢慢行，哇哇，行左一陣我就忍唔住，要去我黎親都吃既阿波羅雪糕，而jimmy就買左一兜燒賣同魚蛋，好正咁喎，之後佢買左個沙律，瑩瑩又買左雪糕，呵，終於搵到今晚最有意義既時間喇，好吃好吃，雖然天氣好凍，不過可以食想食既野就一ｄ都唔凍，仲好幸福添。咦？食食下發現唔見左sammy，sammy呢！周圍都搵唔到佢，佢換左電話又無俾我地喎，都係因為佢打過一次俾我，我先有咋，我咪打俾佢嚕，原來佢一個人走左去，呀...仲細咩，成班一齊走左去都唔出聲，佢話去左影相喎，搵番佢之後無耐，又唔見左佢嚕，唉...懶得再搵佢，咁古怪既人都有既，你係想自己一個既，你無需要同我地一齊架，既然我地一齊黎既，你走開係唔係都要講聲呢，我地會擔心你蕩失路架嘛，唉...唔怪得佢話佢無乜朋友喇，我都開始頂唔順佢既古怪性格。今晚最刺激就係，我地成班偷偷走左入本來欄住既大維他奶模型度影相，哈，有罪惡感先夠開心卦。
阿瑩走埋之後，開始覺得今晚好失敗，出到黎先知無地方去，企左成晚，差ｄ變左企鵝，而家又愈黎愈人少，所以我就決定離開佢地，去左搵媽咪，順便坐下抖下，一坐低我就唔願走嚕，同媽咪一齊開心ｄ，多ｄ計傾丫嘛。媽咪買左兜螺肉同埋格仔餅番黎俾我吃呀，ｄ格仔餅就麻麻地，腍既，都唔得脆，仲好放左成日咁，食左一啖就忍唔住放低左，ｄ螺肉就唔錯，呵呵，繼厭食之後，暴食症就黎喇，不過唔緊要呀，仲有排俾我暴食，食得愈多愈開心，最好去食番次回本既自助餐，哈哈哈(進入忘我狀態)。
jimmy黎媽咪攤位搵我，俾左個膠袋我，立下眼見到入面有一個綠色既圈圈，上面有幾朵紅色既玫瑰，哇，咁邪門，成個花牌咁，采采采，我仲未死呀，做乜送個花牌佢我呀，於是我咪俾番佢嚕，哈，其實果個係個廁紙套黎架，不過我屋企係用盒裝紙巾，見用唔著咪俾番佢嚕，但佢怪我佢送俾我既野我唔要喎...唔係唔係，係我用唔著，放響我屋企我又會周圍放，遲早變左垃圾，咁我珍惜佢呢份禮物，所以我俾番佢，希望佢可以用到個廁紙套既真正功用嘛，哇哇...解釋完都有少少覺得自己實無老人院收呀，結果為左佢開心，我都係收左，不過可以點用呢又係呢一回事。 十二點喇十二點喇，我掉低我媽咪，走左出去廣場搵班同學仔倒數，唔係唔想同媽咪過，而係媽咪唔會介意呢ｄ時刻嘛，我地晚晚響屋企都可以倒數架，但我同我班同學仔，始終係一齊黎既，唔一齊渡過呢個時刻，我會覺得自己好無義氣囉，(整個莫文蔚喜劇之王look丫唔該)正所謂「情與義~~~~值千金~~~~刀山去地獄去有何憾~~~~」，都好呀，呢邊有阿好姨同我地一齊倒數。 同班同學仔倒數完，我地就分別喇，過番去搵媽咪，媽咪話頭先倒數呢面好有氣氛呀，個個檔口ｄ人都走晒出黎一齊數，仲睇住長江大廈添，哇...好羡慕呀，我既長江大廈呀。同媽咪一齊行去地鐵站果邊撘巴士，經過有棵好大既聖誕樹，忍唔住衝左過去影左兩張相，係呀係呀，我好鐘意同聖誕樹合照架，唔知點解喎，因為鐘意，所以鐘意囉。架巴士經過銅鑼灣，ｄ人潮先散，哈，好彩無黎迫咋，唔係撘巴士都無位坐，一定累死街頭呀。我就好有精力四圍望呀，但成點鐘嚕，媽咪就一早頂唔順響巴士瞌著左嚕。
新既一年祝大家每天偷笑、傻笑、狂笑，阿咩吉場與你同在，秒秒鐘歡聚歡笑~~
|
| 叫我表姑姐 |
|
::::::一月二日::::::星期三:::: 哇哇，上次同展翅班同學仔去唱Ｋ，皆因唔想俾佢地知我唱歌咁難聽，所以一直都齋聽，無乜點唱，俾左百四蚊聽Ｋ，真係有少少心有不甘，所以決定一定要去再唱一次夠皮既，呵，好彩阿dick放埋今日假，聽日先要番學，所以一於捉佢陪我，兩條友去？梗係喇，個個都要番工番學，而且人少少先夠膽唱丫嘛。 前日除夕，夾硬勁上粉落個咀角度，想遮左個傷口去，點鬼知...惡報黎喇，尋晚開始個咀角已經痛痛地，今朝起身仲起埋水泡仔，一個一個咁，痛到我死呀，哎呀，但去街唔化粧會好驚嚇架喎，仲約左響銅鑼灣呢ｄ地方添，但...如果我照上粉，佢惡化爛面我咪死俾佢睇！哈，於是我好專業咁，化晒成塊面，淨係唔化個咀角，得既咩？唔知呀，唔會好覺...卦。媽咪仲嚇鬼呀，話我個咀角生蛇呀，呀...救命呀，我見過好多病友生蛇，都痛不欲生架，仲要入醫院吊藥呢，因為ｄ蛇會入神經線，所以會痛到發癲架，唔制呀，我剛剛出黎，又要我入番去，唔係嘛，嗚...媽咪仲話醫好都有疤痕架，我唔要變刀疤咩呀。嚇到我無晒心機，望住塊鏡發牛豆，嗚嗚嗚... 媽咪今日都係響工展會開工，於是我地就一齊撘巴士出去喇，我約左阿dick響灣仔唱Ｋ呀，因為佢四點鐘左右要番學杯夾band喎，為左唱多ｄ時間，所以就揀間近佢學校架喇。本來lunch k係由十二點開始架，但我扭扭擰擰，所以又約遲左半個鐘，哇哇哇，因為我地遲左ｄ去到開房，ｄ細既房俾晒人，所以俾左間成二十人既大大房我地呀，哇......(大到有迴音)勁開心呀，我第一次試兩條友都咁大間房架咋，個電視又寧捨大過人喎，呵呵。thomas同阿達響銅鑼灣番工，佢地話黎喎，唔...我諗無乜所謂喇，唔係大棚人我都敢唱...卦，過左兩個字左右佢地就黎到嚕，死喇...原來我真係會唔敢唱架，阿dick話晒都識左年幾喇嘛，哎呀哎呀，結果下下都要佢地伴住我唱，我先敢唱，真係無鬼用呀，而且thomas、阿達同阿dick又唔係咁熟，所以ｄ氣氛好似好靜，無乜人講野，到左兩點幾，我地已經到左無晒歌好點既地步，其實我仲有好多歌想唱架，不過...怕醜呢...哈，我會架喎。lunch k到三點完，但多數唔趕，可以唱多一陣架嘛，上次同阿龍去唱，唱到五點幾添呀，但今次一到三點即cut，哦噢，閃。
阿dick佢要番學校，一個鐘左右，我就諗住一條友去銅鑼灣行一陣街，等埋佢放學再一齊去行多陣，點解一條友都去行？因為我真係好去恨睇衫、睇化粧品、睇野食呀，我響醫院困左咁耐，每次一睇non-no真係發癲咁滯，所以我要去shopping！thomas同阿達又無地方去，其實佢地放lunch咋喎，點解可以放咁耐架，佢地話同埋我去行街，下，咦...我睇女仔野喎，兩個男仔好似實Ｑ咁跟住，好驚架喎，而且點可以俾佢地見到我貪小便宜既師奶樣架，於是我地又企左響前日除夕，企左好耐諗去邊度好既地鐵站Ｅ出口，佢地兩佢企響度，睇人地點sell保險喎，我甩唔到身咪同佢地一齊企嚕。 糾纏左半個鐘頭左右，我地決定去麥記食野，咦咦咦，出左新新口味喎，係唔知乜野芭菲，廣告個look係幾吸引，不過見到佢好鬼大杯，又有ｄcreme響度，好滯咁，所以我地都最後都係分別買左三杯朱古力、菠蘿、士多啤梨新地，呵呵。
今次係我地第一次三個靜靜咁坐響度傾計，其實一講起我既過往，我根本無可能唔講我既病，我唔係有心瞞佢地，所以我都決定老實如盤托出，但總好似難以啟齒咁，我咪嬉皮笑臉咁講「其實...我係有絕症架，哈哈哈。」阿達初初唔信架，但我愈講愈深入，佢就開始信喇，而thomas就話佢一早知，因為佢睇左我網頁，係咪真架，不過我都無理由唔信既。 我地吹水吹到五點鐘左右，阿dick就黎到喇，於是我同thomas、阿達就響sogo對面既路口分別，呵，終於有得去行街喇。哇！忽然有兩個女仔走過黎，問我「你係唔係阿咩吉場既阿咩呀？」，哇哇哇，開心死我喇，原來係我睇我網頁既網友呀，我開心到亂講野，不停話自己今日爛咀，嘿嘿，好似個癲婆咁，哎呀，係丫嘛，如果知道會撞到網友，我一定著靚ｄ呀，點知今日...爛咀，唔理喇，我捉住佢地兩個同我合照，嘻，好彩有帶相機，實在太太太興奮喇。
帶住興奮既心情，我同阿dick兩個去左行sogo，聽人講開左間日式十蚊店嘛，梗係要去睇下，果間野響金百利卓悅隔離有電梯落，哇哇，有好多日本既用品，仲有化粧品、眼鏡、cd、袋...應有盡有，通通都係十蚊咋，我諗同市面上既中蚊店比較，呢度既野的確係靚ｄ，同埋香港人崇日丫嘛。本來我揀中左幅八婆眼鏡架，但可惜係老花鏡，其他又睇唔中，可惜可惜。最後我買左一個禁止通電話既木牌，諗住掛響個袋度，哈，另外又買左個錢箱，sammy話儲緊錢去旅行嘛，送俾佢最適合，個錢箱得意在佢係彷日本神社ｄ香油箱，搞鬼。 買完平野之後，我地再落多一層，去左行超市，哇哇哇，離遠睇到有人排晒長龍呀，咩事呢，原來係排隊買puff cakes，足足排到打晒蛇餅，呵，香港人既心態梗係愈多人排隊愈想試架喇，於是我就捉左阿dick陪我去排。雜誌講，puff cakes係類似泡芙既物體，外面係好鬆化既鬆餅，入面就係凍凍既奶油，初頭都唔明有乜好食，但見到咁多人排隊，梗係唔輸蝕。本來諗住一人一個試下架咋，但排左成半個鐘，先買得兩個好似有ｄ唔扺，所以決定買多個俾媽咪試。嗯嗯...咦？又真係幾好食喎，雖然個鬆餅皮係剛剛焗起，但唔會話好熱，入面凍冰冰既奶油，又唔覺得太甜、太滯，唔怪得十蚊個都咁多人買喇，又真係幾好食既。
今晚係表哥個bb滿月，響藍田擺左兩圍滿月酒，所以我等埋媽咪收工一齊去，但唔同地方點約好呢？媽咪話佢響金鐘撘603，過到黎銅鑼灣我就上番佢架車，再一齊去喎，哇，高難度喎，就快到果陣，媽咪打俾我，佢話樓上得番一個位咋，係佢特登放個袋響度霸住，唔係無埋添呀，但佢話如果再上既話就好難保得住個位嚕。車黎喇，俾個男人衝左上上層，佢企響個樓梯口睇左好耐，呵，可能見唔到媽咪隔離個位喇，所以走番落黎，呵，我地終於母女團聚喇。 我地去到藍田美心酒樓，好多親戚都黎晒呀，今晚梗係個bb做主角喇，個個輪流抱住佢影相。我由細到大都無試過抱bb架，因為覺得佢地好重，我怕佢地一掙扎，我會跌佢落地下，但今次佢地叫我試下抱下個bb喎，我欲拒還迎咁，最終bb就交到我手上喇，我抱住佢笑到癲左，唔知點解好開心，抱住一個小生命響懷中，佢暖暖既身驅，仲有厚厚、軟綿綿既衫仔，雖然正在熟睡，但佢微微既郁動，令我有種前所未有既別感覺，嘻，我做左表姑姐呀，bb~bb~叫聲表姑姐喇。
本來諗住刷番餐，但個咀角好痛呀，ｄ細細既水泡仔仲多過今朝，睇佢愈生愈開，有擴散既跡像，死喇，毀容呀...媽咪話聽日覆診俾醫生睇下係唔係生蛇喎...千其唔好係呀...
間ｋ房好大呀::::::睇下:::::: |
| 帶狗睇最愛演唱會 |
|
:::::: 一月五日::::星期六:::前兩日覆診左，袁姑娘一睇左我個咀角，就話我係生蛇，仲即刻好細心咁同我book定床，點知醫生話「蛇？都無條蛇響度。」，哈，佢話係泡疹一型，即係飛滋果類，搽ｄ藥膏就無事架喇，呼...好彩，搞到袁姑娘又要打番去cancel番張床，真係邪呀，平時血科ｄ床好難book架嘛，但今次唔洗入院又book到血科床喎，哈，無奈。 都好，唔洗入院，因為我今日約左bee狗仔去睇最愛演唱會呀，嘻，話說前排響醫院，無無聊聊睇雜誌既時候，見到gigi開演唱會，得三場咋，咁我記得bee狗佢幾鐘意gigi，我又幾欣賞佢喎，哈，平平地買張八十蚊飛，當去聽下歌都好呀，於是就叫bee狗買飛睇喇，不過八十蚊得果兩行，一早賣晒嚕，所以我地買左百五十蚊飛，呵呵，我地睇最後一場呀，好緊張呢，呢次係我第一次睇個人演唱會咋。
今日唔敢化粧呀，雖然有藥膏搽咀角，但ｄ水泡愈生愈多，廢事爛面喇，而且橫掂都爛咀角嚕，仲化粧，人地會覺得我醜人多八怪架嘛...所以索性自然ｄ，真相係醜ｄ架喇，唔扺得咩，而且今晚個個都係睇gigi架喇，扮咁靚做乜喎，入到場漆黑一片，鬼知你醜定靚喎。六點左右，我撘巴士直達紅磡火車站，bee狗佢要番工，放六點，電話聯絡嚕。見佢未到，我咪響火車站入面行下嚕，話時話，呢度既裝修同機場勁似，點解既呢。哇哇，見到優之良品，即刻走入去睇下有無正野食，哎呀哎呀，俾我搵到辣辣地、甜甜地既紅燒魚柳，正呀，買左佢先。之後又去左零食物語，見到有幾十盒生日熊響度，多又唔係多呀，不過見有時間，咪即管睇下有無我想搵既囉，哈，俾我搵到呀，十一月十三，我想搵thomas既生日熊，哈，仲俾我搵到jimmy九月三、叔叔十月十七既熊仔呀，好，一於買晒佢，唔知佢先鐘唔鐘意架，不過心意既野，搏得佢地一笑，我已經好開心嚕。
bee 七點幾八點左右，我地開始入場，哇哇，超級多人呀，響對面馬路已經開始排隊入場喇，臨入門口前，有演唱會既工作人員響度派野，有雙面既poster喇，一面係gigi既拳手look，另外一面就係G For Girl cd封面既紅長裙look，索到暈，仲有雙面寫住「g for girl」既圓形紙牌仔，同埋螢光條條，哈，乜咁多野派既。 原來我地個百五蚊為好高架，響中間入，仲要行多大約十幾行先到，真係索晒氣呀，坐低無耐有個男人拎住個牛奶公司既大筒響度賣雪糕喎，哈，我都係第一次見咋，我初初仲以為唔俾食野既添，於是我就用十蚊雞買左個甜筒吃喇，完來全場好多呢ｄ賣雪糕既人架，真係得意呀，咦...下面最近個台，三百二蚊飛果度，都有人賣雪糕，不過就富貴得多喇，係賣Haagen-Dazs呀，哇哇哇，咁又係，買得貴飛既人通常都係食貴野既。八點鐘左右，演唱會就開始喇，種感覺好震憾呀，因為感到全場都係愛gigi既人，每個人都係為左梁詠琪而黎。雖然我坐山頂咁滯，但都覺得gigi好索，一開始黎一個拳手look，同黑鬼玩拳擊，gigi梗係做贏果個喇，姐手姐腳咁就打低左個黑鬼嚕。唱左幾首之後林憶蓮上台獻花，gigi開心到喊呀，好似個小fans咁問憶蓮「我可唔可以攬住你呀？」，又開心到嘻嘻嘻嘻咁笑，好鬼得意。
gigi  男版gigi
我曾經都因為gigi同伊麵一齊既事，而唔喜歡過佢架，但時間可以証明一切，gigi的確好勇敢，然後我漸漸開始欣賞佢，而且睇佢既舉子談吐，我感覺佢係一個幾純品既女仔添，gigi亦刻意揀左首「一個為你甘去蹈火海的人」黎表明佢既心意，好霖呀。最後唱「花火」同「灰姑娘」果時，gigi喊得好勁呀，搞到我都鬼咁感動。有機會真係想睇多ｄ其他鐘意既歌手既演唱會，千嬅...你快ｄ開演唱會喇。
架巴士行到紅磡，哇哇...成條街既人都攬住公仔既？諗諗下先記得，係喎，冬日嘉年華喎，我都未去過添，個個都拎住公仔，唔通好易掟既？好恨去呀。媽咪同爸爸響官塘福興打邊爐呀，所以我就響官塘落車，去搵佢地喇。頭先不能夠同阿bee狗吃甜品，心思思想去食添，所以經過許牛山就買左個芒果西米露拎走，好正架，一大舊芒果肉，仲有呀，ｄ西米露係用芒果汁整架，哇哇...流晒口水。上到福興搵媽咪爸爸，佢地吃緊自助邊爐呀，我黎等佢地一齊番屋企之嘛，又唔係幫襯，所以個經理只俾我坐兩個字...哇...洗唔洗呀，算...我咪放低個袋，響街邊搵下有無野食嚕，咦...都無炸大腸既，最後買左五蚊粉果同五蚊燒賣，食得是福，呵。 好遠既山頂遙望gigi::::::睇下:::::: |
|
前面笑左未呀<---->呀 咩 昔 日 發 傻<---->睇下仲有乜野笑 |
