因過年o既關係成個血科病房都好靜，可以出院o既都走晒，唔可以o既佢都儘量俾你請假，連請假都唔得，就真係無可奈何了。要落八個鐘o既化療葯，五點幾先攪掂，仲要等醫生批准，"五日o既化療先o岩o岩落完，唔可以放得假住，而家俾你返去食團年飯，聽朝返黎抽血睇埋佈告先講啦！

"唉…..你係醫生，你話點就點啦。"
咩哥哥同小倍駛o左部車o係水塘 stand by，一聲話走得，好！五分鐘就到。

"去花墟行年宵嚕"其實佢係掛住o係花墟擺攤位o既bee哥哥。
花墟門口已經改為禁區，最近都要o係油站先落得車，行過去都要十幾分鐘路程，亦剛好等埋哥哥泊完車趕上黎。
一入大門口，經過d食物檔，就見到羊爸爸租出黎o既棉花糖機，
咩咩："哥哥我好想食呀！"
咩哥哥就懶叻咁走過去，對那個雞手鴨腳的小姐話："我整俾你睇丫"
個位小姐答："你俾錢咪俾你整嚕"
"o下…你真係有眼不識泰山，部機係我地o既，你咁攪法，會整壞部機架！"
嚇到o個位小姐即時彈開，呀哥，咩只係想食一枝棉花糖咋，唔駛咁惡播！
拎o左枝棉花糖，話之你慢慢教喇，一路行一路食，繼續行花市兼搵狗，
嘩！d學生做生意真係落力，企o係路中心，聲都沙晒都仲係咁叫，
服o左你地，唉！我就做唔到喇。
  

行o左兩三條街，咩o既耳仔又塞喇，但突然見佢精神一振，舉起攝錄雞，
哦…搵到你喇，見到主人仲唔飛撲出黎！
佢兩個就站在路邊對望o左成分鐘， bee狗先開聲："我可唔可以抱下你"
"我都想呀"呢兩個無所不談，傾計完全冇機心，互相欣賞o既好朋友，
(咩講過好朋友唔可以做情人，做o左情人就會冇o左個好朋友 )
就在那裡擁抱起來，我呢個媽咪只好尷尷尬尬的轉身去睇公仔了。

     過o左幾分鐘，"媽咪，我好累呀，去搵個地方坐下嚕。"
好在個球場旁邊都有d木椅，可以同bee狗坐多一會，影下相就要走嚕，
佢真係唔多舒服，行番去剛才落車個油站，都停o左三、四次，
等到上車時，佢辛苦到暈咁滯。 

                                           以下是由 bee 狗自己講番當時情形
                                          **********************************
　　
        咩媽媽誠邀我為呀咩寫年三十晚的日記，我光榮之至，因為呀咩是我最要好的朋友，我亦很了解她的心理狀態。

     年三十晚，我響旺角花墟做年宵，黃昏六點幾七點既時候，因為生意唔係太好，所以個人有少少氣餒，個人亦都好累，就係響呢個時候，我見到咩哥哥唻探我，佢唻探我係因為佢之前一兩晚有唻教我扭波波，扭果Ｄ小丑波波，咁佢行埋唻，問候左我既生意同埋波波之後，佢就同我講話呀咩唻左，果一下我成個人同成個心都跳起，我真係好開心。但係，等左一陣都唔見呀咩唻我個檔口喎，咁唔理唻，繼續做生意啦。
     突然間，我望一望去隔離舖，咦，點隔有個傻妹響度渣住部相機影我既？原來係呀咩呀，我果下真係開心到癲左，乜都唔理就衝左出去迎佢喇！我好記得，佢果晚係著左一件白色既大褸，好似羽絨咁。我地一見面，剩係你眼望我眼咁響度笑，都笑左好幾十秒。 
     跟住大家都講左句：「好耐無見喇，好掛住你呀！」我再加多句：「其實頭先一見到你果一下，我真係好想攬住你架！」跟住呀咩同我講：「其實我都係呀，我都好想攬住你呀！」跟住佢就好似一個小妹妹咁攬住左我呢個叔叔。佢攬得我好大力，當然，我亦都好大力咁攬住佢，但係，我唔敢攬得咁出面，因為，我地仲係企響我個檔口前面，我怕被我班朋友話鬼我。攬攬下，佢無端端喊左出唻。 
     其實我地真係好耐無見，亦都好少傾電話。果陣時佢精神好少少既時候，佢成日都打俾我，同我講佢有咩開心同唔開心，我就好耐心咁聽佢講。而呢排，我地好少傾電話，並唔係因為佢既生活無乜特別，而係因為佢精神唔好，就算有好多唔開心野都同唔到我講。我間中都有打俾佢，同佢講我搞年宵，叫佢點都要唻睇一睇我，點知，今晚，呢一刻，佢真係唻左，我真係好感動。
        而佢喊，當然係想表達佢響呢段少聯絡既日子入面佢係受左好多苦，我亦感受到佢響呢段日子入面真係受左好多好多既苦頭，佢咁樣喊法，其實遠勝千言萬語去解釋佢有幾苦，佢有幾掛住我。響呢一刻，我既眼淚水都流左出唻，因為我感受得到佢呢段日子既苦，同埋，我地真係太掛住對方喇，一見到心頭梗係會有一股震撼，所以相擁而泣！我只係流左幾滴眼淚，而佢就喊到我件衫濕晒。 
     佢既心情平伏左之後，我地大家都笑左出唻，笑大家既幼稚，笑大家好似拍戲咁相擁而泣，亦都笑我件衫濕晒！ 
　　呢次既義犬相擁主人記，完全被咩媽媽望住，亦被周圍既人望望下。但我地並唔尷尬，因為我地真情流露，我地可以做自己想做既野。 
之後，我同呀咩就去左隔離既凳仔度坐，撇甩左咩媽媽，傾左一陣偈，傾下近況，傾下我檔年宵。過左一陣，真係一陣，十分鐘掛，都唔係好記得喇，呀咩話佢唔係好舒服，因為好似話佢今日都係請假出唻特登唻搵我架，於是就召返咩媽媽返唻接佢。臨走之前，咩媽媽幫我地影左幾張相，影得幾靚架，影完之後佢兩母女就同埋咩哥哥一齊走左喇！ 
我響後面，好無奈咁望住佢既背影，真係好唔捨得，咁難得先見到，但係就只可以傾得十多分鐘。好唔捨得，好唔捨得，呀咩，真係好唔捨得你呀！ 



心碎了的媽媽
****************** 
年三十晚

返到屋企，d親戚都黎晒嚕，三嬏o係美心買o左兩個盤菜上黎，個樣好似好好食咁喎，本來好興奮，心係好想食，但食落去都係冇乜聞味，呢樣都係拜化療所致。不過一家人可以坐埋一齊食團年飯，都係好事。
剛剛電話響起，o下！高八度上緊黎？唔係掛，我地團年都有你份。
咩咩食食下都冇晒心機，好唔開心咁番o左入房；我快快趣食飽就入房睇係點啦，見佢好淒涼咁o係度喊……..你點呀？
"我好想一家人坐埋一齊食飯架，但又做唔到，見咁多野食又食唔到，
好唔開心呀，又好想媽咪你成日陪住我，你唔好返工啦。" 
"而家放緊假，我咪成日陪住你嚕""我係要你以後都唔返工咁陪我"
"咁點可以呢，唔返工冇錢駛嘛，重有係跟住個團，唔可以成日都唔返工。"
"你咁鍾意返工，我死o左你咪可以成日返嚕"唔停佢咁大聲喊， 其他人都入晒黎勸佢，但佢唔聽，仲越講越激動，
"我剩係要媽咪陪都咁難"佢唔停咁大喊大叫，
最後羊爸爸趕晒我地出房，單獨同佢傾計~~~~~~~~~~~~~~~~~~~~~~~~~
過o左差不多三十分鐘，爸爸出黎叫我入去……………..
"媽咪，對唔住呀，我誤會左你"佢就係咁攬住我喊
"乖~~~~~~~咁，以後你入醫院我就唔返工陪你，出院後，你搵朋友陪，我就返工搵錢。"我亦抱住佢一齊喊，我地o既感情，更誇進一大步，我地會爭取及珍惜相聚o既每一刻時間。
事後我雙方打聽，原來羊爸爸同佢傾果半小時，係向佢哭訴：要供樓、俾家用、工人薪金、水電雜費同伙食，爸爸一個人負擔唔起，先要媽咪出去做野幫補，媽咪都好想陪你，但又要搵錢，都係我冇用，你唔好怪媽咪，爸爸o既哭訴生效，佢 d 情緒先慢慢平復下來。
由細到大，咩咩都好錫爸爸，我地兩個一齊佢會幫爸爸而唔幫我，問過佢點解，佢話：因為我地係姓吳，而你唔係嚕。:爸爸,我愛你!

:::二月十二日 (年初一):::星期二:::

哥哥去左花墟收番部棉花糖機，仲要洗乾淨拎番落倉，先番黎接我地去醫院。 因為要九點前報到，所以七點幾已經 換好衫stand by。               

點解會聽到哥哥把聲o既，乜唔係我地落樓，而係你上黎接我地呀！當大門打開，嘩！有隻狗認錯門口呀~~~~~~~哥哥帶住bee狗搬緊D 汽水入黎，數下1、2、3、4、5…..！ 一共有五箱24罐裝汽水，四箱24合的紙包飲品…辛苦晒你地嚕。 

Bee狗…昨晚見完，仲講緊唔知幾時再見，今日又見，開心到唔知講添！

原來哥哥今朝去花墟收番部棉花糖機時，間小食店賣剩D汽水半賣半送咁俾哥哥拎走，一盤汽水20蚊咋！哈哈~~~~~今次唔駛等惠康大減價都有汽水飲嚕！

一路行一路講，上左車，唔傾得幾多句就 zzzzzzzzzzzzzz

         哥哥成晚冇睏，而家仲要開車，慢慢黎啦，我地唔趕o既 ~~~~~滴汗中

----------------------------------------------------------------------------------------------------------------

以下呢段聽聽 bee狗點講： ( 呢段係接住昨日年三十的一段寫 o既 )

收拾心情，我要返回我既作戰岡位。做做做，好氣餒，但都要做。做到咁上下　，咩哥哥折返，佢問我聽朝跟唔跟佢車走，佢話佢會返去接呀咩返醫院，我死帶都話跟啦，之後佢亦都走左去做佢既工作。  

第二朝大年初一，七點鐘左近，咩哥哥渣左架車唻接我，於是我埋好條數就掟低我班戰友，掟低我女朋友，掟低手頭上既一切，坐左上咩哥哥部車，向我班朋友揮一揮衣袖，不帶走任何東西就走左喇。

 　　坐住咩哥哥架車，係有條件架，就係要幫佢搬汽水，佢有幾大箱汽水，又有好幾箱紙包飲品，咁多飲品有排飲呀！響佢架車度好想訓一陣，因為太累喇，成晚無訓，加上連日唻都唔夠訓。但係，我唔可以訓，我要以最精神既姿態去見呀咩。

 　　咩哥哥送完佢朋友再去某個地方放低一Ｄ紙包飲品，然後先返佢屋企。去到佢屋企樓下，開左個車尾箱，大劑喇，有好多箱汽水呀，點搬呀？我要抬兩大箱汽水，而咩哥哥要抬幾多汽水就唔係好記得，但就肯定多抬得多過我架！兩大箱，雖然好似好少，但一抬到上手，都幾係野呀，再加埋我無訓覺，都幾陰公。不過為左俾呀咩一個驚喜，無辦法啦！

 　　抬到上樓喇，好緊張呀，唔知咩咩響度做緊乜呢？一入到門口，我抬住兩箱汽水，扮晒係送貨工人咁，咩咩坐左響個廳，依然著返尋晚果件白色羽絨，望住我，呆左一下，之後就好開心咁笑左出唻，哈哈，你尋晚俾左個驚喜我，到我而家俾返一個驚喜你呀，哈哈哈哈！

 但係，講返轉頭，佢一直都唔覺得之前果晚唔算係一個驚喜，因為早在到達我檔口之前，咩哥哥已經通風報訊，所以佢唔覺得俾到一個驚喜我。而我呢次送汽水，真係估我唔到呢，佢真係嚇呆左。其實，到而家我都諗唔明，果一刻佢真係嚇呆左丫，定係未訓醒呢？咩咩已經換好晒衫，準備出門口喇！  

　　我放低左Ｄ汽水，跟住就同咩咩同咩媽媽落街喇，要出門口去醫院喇！聽咩咩講，佢係未刷牙未洗面架，因為果朝都幾凍，同埋反正返到醫院又係訓，所以就索性唔洗面刷牙，求求其其咁返去。落Lift既時候，咩媽媽俾左封利是我，哎呀，真係唔好意思呀，我咁遠唻，都無諗過逗你利是，我只係想見下你個女咋。

 　　落到樓下，我再一次坐咩哥哥架車，送佢去醫院，響車度，佢只係講左幾句野，好似係好開心呀，好感動呀，講左幾句跟住都無乜點講，因為佢都未訓醒，佢個樣話俾我知，佢好眼訓，唔係好講到野，但又真係好驚喜，好想同我傾幾句，見佢好矛盾，我咪叫佢抖下唔駛理我囉，咁佢就混混愕愕咁繼續坐車喇！

去到醫院，佢落車喇，佢頭都無回就走左喇，睇唻佢真係好眼訓呀。講開眼訓，我都好好好眼訓呀，我成晚無訓呀。

 　　咩哥哥問我陪唔陪佢等下，等咩咩覆完診再接佢走，咁我話無所謂啦，都無乜野做，咁咪同咩哥哥去左附近既一個水塘入口度，響架車入面訓囉！兩個男人，都幾似搞基。

-------------------------------------------------------------------------------------------------------------------

年初一o既醫院更加冷清，呢一層係血液腫瘤科，是男女都收，兩個人一間，只以男女來分房，所以咩咩D病友，男女老幼都有，但以幼黎講，咩咩就差唔多係最細o既一個，因佢起病時得十七歲，本來是入兒童病房，但因某D原因而入左成人病房，所以D姑娘、病友個個都錫佢，佢把咀又逗得人開心呢，好似抽骨髓咁，佢o係度驚到大哭大喊，成四、五個姑娘陪住佢安撫D情緒，同佢傾 計分散佢注意 ~~~~~~等等。

記得之前血科宣佈微型骨髓研究成功，一齊出席記者會o既人版鄧本強，而家都o係度過年，大家都係年青人，又玩電腦，所以特別傾得埋，佢今次入院是腸排斥，肚痾左成十幾日了，而家要食抗排斥葯， ( 呢種葯會令人好開胃同埋癡肥 )

仲有好多其他唔知乜野葯，攪到佢而家成個人大左成兩個碼，無復從前瀟灑嚕。

在幾年前已做過骨髓移植，今次復發試做微形骨髓，是外人捐的，成績幾好，有排斥都有葯控制丫，佢以自己為例成日都勸咩咩再做。(但佢唔知醫生話左因咩咩太弱，而家已經唔可以再做喇)今次落葯每日都要唔可以停，所以今日年初一都要返黎，不過D姑娘就晒佢全部早上落，呢幾日下午都可以放假出去拜年。咁都好過冇丫，總比其他冇得出去o既人幸福喇。

傾左咁耐計，抽左血D佈告又未返，冇野好做，呀 ~~~~~~~~踩單車練下腳骨力都好喎~~~~~~~~~

拿！真係有踩架~~~~~~~~唔係亂作喎，手拎住就係麻麻整o既油角做早餐。

 好野！驗血報告出左，D白血球跌緊，李醫生帶住D姑娘好似一隊兵咁操入黎，見到最鍾意o既醫生，梗係四萬咁口“恭喜發財”今年第一封利是就是李醫生俾的，“呀！仲掙你D野”佢咁就掉低晒D姑娘走左出去，等D姑娘戇居居咁係到等， 咪估下係乜~~~新年禮物？~~~等左幾分鐘，哦 ~~~~~原來係早前李醫生應承借給咩咩睇一本關於喜樂 o既漫畫書，舊的一本不見了，現在買過本新的仲簽埋名添呀，本書D漫畫係叫人用喜樂心情去接受既成o既事實，仲有D空位在每一段O既後面，俾你寫觀後感“ 好！我會寫完畫完就還返俾你喇。(呢本書現已交還李醫生手上)     多謝您！”言歸正傳，“既然D壞細胞跌緊，就俾你放到年初四至返啦”

走得就梗係開心啦，可以返屋企原來都是一種恩賜！

--------------------------------------------------------------

Bee狗又到你出場喇

訓左兩個鐘左近，跟住就返去醫院接佢，佢都依然好似未訓醒，咪由佢繼續傻下傻下咁囉！但係，其實我真係感覺得到，佢係好開心好感動，我知佢見到我真係好開心，仲要晨早流流俾左一個咁大既驚喜佢添，俾著我都開心啦！跟住，咩哥哥問我去邊，我就話求其掟我響是但一個地鐵站就得架喇，我呢個答案，有好幾次同咩咩出街，我都係咁同咩哥哥講架。我都唔記得左響邊個地鐵站喇，總之我就混混愕愕咁返左屯門啦！亦就係咁，就咁就度過左我既年三十晚喇！

　　咩咩，你的笑容，與我常在！ 

-------------------------------------------------------------------------------------------------------------------

每年o既年初一我地都會去遊塘一間老人院，探哥哥o既契媽，但見咩咩好累，於是叫哥哥車左我地返屋企先，佢自己一個人去嚕。五點幾哥哥泊好車返黎，佢好唔開心，原來契媽o係兩個多月前已經走左，咁都冇人通知我地，真係驚我地分身家咩！

返到屋企，d 親戚返晒黎拜年，好熱鬧呢 !!! 第一時間梗係上網啦，新年流流劃返幅畫應下節先，開左個Flash黎劃真係靚好多， 畫既時候仲有表妹同媽咪俾意見添。

 咩咩剛落完化療，抵抗力低，咁多人同一空間，都驚佢會易受感染，所以夜 d 時，全部人都去晒姑媽度食飯，剩番我同咩咩兩母女，今晚食乜野呀？“丫！不如打邊爐嚕。”0下！唔係喇掛，今日年初一，連超級市場都未開，而家仲天都黑齊，街市邊有野賣呀！0拿！試下咋，買唔到野食唔好賴我。幾經辛苦都只係買到生菜同生根，d 生根都係菜檔個事頭婆0係隔鄰果檔拎咋，唔知佢會唔會俾返錢人家呢? 都係唔理嚕，總之唔係我偷就算啦，屋企個雪柜度仲有豬扒，用黎打邊爐都 ~~~~~~好特別唧。 

記得對上次入院(迷失笑臉)，咩咩連續幾日燒到四十幾度都唔退燒，我係神面前許下諾言，如果咩咩可以平安出院，以後初一、十五我都食齋。咁 ~~今日係年初一梗係要食齋啦，結果一張三尺木台上面放左兩個萬能窩，真係各自各精彩嚕。                                                     

                 (羊媽媽憶述)

久違了的肥牛   "正"！

                                                                                                                     (情人節)

 今日年初三，麻麻帶埋工人入左大埔表伯度拜年，爸爸、哥哥、叔叔、三嬏 、姑媽同姑姐，個個下午都要開工，仲約埋收工之後，全部人都去晒表伯度食飯~~~屋企就剩番我同媽咪，好野 ！又可以同媽咪一齊睏晏覺~~~~~好鍾意媽咪張大床架， 除左可以〝che〞住媽咪外，我張床得兩尺半，擺埋張綿被，轉身都要就住啦 ~~~~~~

雖然今日係情人節，但對我黎講~~我寧願陪住媽咪，媽咪又陪住我 ~~~~~~~比對住任何人都特別開心。

"媽咪~~~~果日打邊爐都冇野食，不如 ~~今日又打嚕 ! "

"哦 ! 好呀 ! 還掂都冇人煲飯，咁落去官塘福星丫，自助火窩多 d 野食 ! "

"我好想食牛肉呀~~~~~~~~~~"

"我同你問過爸爸喇，爸爸話最緊要係你想食咪食嚕，唔駛成日掛住冇得食而唔開心嚕 ~~~~，但我地係大人，要守諾言呢，所以剩係你食喎~~~~~~~"

 "哦~~你話點咪點嚕 ！"

其實都係個心魔作怪唧，越唔俾食就越想食，落完化療，除個人好，仲係冇乜胃口呢，工人唔係度，媽咪整野食 ~hehe ~ 係咁夷食 少少啦，都係留番個肚今晚打邊爐，趁而家夠精神，打下機先~~~~~~~~~~~~~

落到官塘福星都係六點半，人唔係好多，但卻被安排坐 d 臨時加的兩尺半，媽咪同佢地講，"要加多個火窩！"

有個部長走埋黎，不如要個鴛鴦窩唔要有燒烤既，咪有兩邊嚕，"唔得~~~ d 水會滾過隔鄰架，我仲要兩個都有燒烤架既添，要加幾多錢丫"

媽咪講野有時都好豪架 ！不過 ~比起爸爸都唔夠一半 ，可能真係冇人咁樣叫加爐，個部長行開左一陣，跟住個女待應埋黎講加十五蚊，"好 ！一於係咁啦 ！！"

兩個直徑尺幾既燒烤爐就平排咁放左係張兩尺半上面 ，要擺野就o係旁邊放多張机仔，仲要同隔鄰共用；d人行過都眼望望，咁又係既 ~~d咁特別日子，兩母女黎食已經觸目，仲一人一爐咁放係張超細度，俾我都會超下佢啦 ！

唔怪得要我地要坐細，原來真係好多一對對d 情侶度撐腳，但係唔知你地覺唔覺 ~~今年冇乜人拎花喎~~~~~~唔通真係經濟唔好，連呢 d 浪漫都冇埋呢 ！

揀肥牛媽咪都有一手呀~~~佢話驚我揀d 肥牛唔新鮮，唔駛我出去，其實咁我都唔願郁~~~~~~黎喇 ~~~黎喇~~~~~~~鮮嫩雪花肥牛黎喇~~~~~~~~~~~~~仲有細細棵生菜芯，唔知你地鍾唔鍾意食呢，大大棵的生菜，剩係食最裡面的四份一，真係鮮甜爽脆 ~~~~~~~肥牛肥牛~~~我地好耐冇見嚕，一層肥羔一層肉，我唔客氣喇，仲要趁熱呀~~~~~~唔~唔~好味呀 ！我率之可以再食肥牛 ，其實係好滿足就真。

記得去年咩咩做左骨髓移植之後五個月就復發，在四月再要哥哥血幹細胞，今次算係加強濟，希望可以消滅到d癌細胞，但住左成個月醫院，抽骨髓化驗o既結果係癌細胞仲多過未做之前，醫生提議再做多次血幹，今次乜野抗排斥葯都唔食，等哥哥d血幹可以發揮到作用 咩咩好驚，因為排斥係好辛苦架，亦唔知會排斥邊個器官，我地覆診就見得多，有d 排斥皮膚，成塊面都爛晒，鼻翼...耳珠...手指...腳趾都可以爛到得番塊〝招〞，而且佢而家都已經走左，唔係個病要佢走，而係去街市買跌倒，咁樣走 ；另外一個係成身連埋塊面都變到好似斑點狗 ﹙sorry  candy~~~﹚咩咩咁貪靚~~~佢肯做都要好大勇氣 ！

當時有個女同學小燕，佢個姑姐想同我地傾，問我地有冇信仰，點解唔俾自己一條生路喎，當時我地都唔係好有反應，但佢搵左另外一位女士黎同我地通電話，佢個女兒在五年前都係血癌， 而家已經八歲喇，佢就係信左 呀伯，所以佢個女就有得救喇 ！因為係信神佛，所以呢世都唔可以食牛肉，但因為佢個家婆話佢地迷信，俾佢個女食左牛肉，而家先至會復發，但佢係好深信呀伯會幫到佢，亦希望可以幫到我地，佢自己係做教師，呢幾日放左學仲要去醫院陪個女，但佢都隔日就打個電話黎同我傾，仲係傾好耐，率之就係咁俾佢 誠懇態度感化左 ~~~~~~

咩咩唔肯講出黎，就係怕俾人話佢迷信，所以你地睇佢以前d日記，都係話唔食得牛肉，但就冇講做咩唔食得嚕~~~~~~~~~~而我地全家人都係由果時開始唔再食牛肉！

         (羊媽媽憶述)