::::::二零零二年二月七日至十日::::::

距離上次出院只有十日，呢十日裡面我除左日日去順利村睇醫生，同埋去左兩日camp之外，我就無做過其他野，但今日我又要入院喇，最近病情似乎愈黎愈控制唔到，唔知我係唔係就黎會死呢...

每一次醫生叫我入院，我都會喊喊喊，然後喊住咁俾人推上病房，今次都係一樣，不過今次比較好既係我可以去番血科病房，梗係喇，臨近新年，ｄ人走得就走，就算有ｄ咩唔舒都盡量唔入院住喇，我算係盡量唔到，迫住要入果一群卦。

血科有兩種房，一種係兩度門，個廁所新ｄ既，一種係得一度門，但度門多數都唔會閂埋，個廁所又窄又舊既，而我今次就係住後面果種。同我同房既係一個老太太，佢住埋今晚都會出院嚕。媽咪去幫我辨理入院既野，院牧ken哥就陪我傾計，我不停問佢人死左之後會點，而佢就用宗教既角度黎話我知，我似乎問錯野喇...好怕聽耶穌。難以控制心中既恐懼，每次入院總會諗「今次會唔會出唔到院？」，我怕死，因為我怕要離開愛我既屋企人同朋友。

我向主診醫生要求番幾個鐘頭屋企，因為我想執ｄ野入notebook，佢一口答應呀，點知唔夠一分鐘佢就入番黎話「你ｄ白血球咁高，出去好易中風架喎，我就唔讚成喇。」，然後又走左去，激死人喇...原來佢仲未睇我個file，所以先咁口輕輕應承喎。今次入黎要落五日化療，然後再睇報告，數數手指，即係落到年三十晚...咦...如果果日早ｄ吊完，我咪可以出去行年宵囉！希望可以出去過埋新年喇，新年流流響醫院，好淒涼喎。

第一次住呢種得一度門既房，因為對住姑娘櫃台，朝頭早一早就好嘈，成日都要吊鹽水同吊化療，所以要不停去廁所，尤其夜晚要去幾次，根本都訓得唔好，個廁所又窄又舊，轉個身都難呀。

雖然今次入院都係有大哭大嚷，但比起上次入院要住普通房，總算係定好多，始終血科床房係熟識既地方，有好多好friend既姑娘、阿姐同病人嘛，而且其實之前出院果十日，響屋企都好辛苦好累，入黎咪當休養下囉。

入院第三日，哥哥幫我買左隻「不速之嚇」，我就諗住同媽咪一齊睇，橫掂隔離床無人，開得大聲ｄ都唔怕嘛。得一度門呢種房無vcd機，所以我地響電腦睇，點知媽咪食食下角仔(新年果ｄ油角呀)，突然左邊面腫左喎，哎呀，以前都識過架喇，醫生話係口水線塞左喎，今次係第二次，都無咁驚，而且媽咪一唔食野塊面就慢慢退ｄ腫，不過佢話好肚餓，唔食野唔得喎，咁又係，但一再食番又腫過，佢仲話腫到痛添呀，咁唔得架喎，我咪叫佢拿拿臨落去急症室囉，媽咪都唔知點算好，於是就聽我講落左去嚕。念慈姑娘見媽咪咁，整左個冰袋去俾佢呀，仲請媽咪飲左杯朱古力。好擔心呀，我訓左響度等，等等下就訓著左，起身既時候係五點幾，媽咪都落再去三、四個鐘嚕，都唔打個電話番黎，好擔心呢。過左一陣媽咪番黎，話一直響急症室呆等喎，等左幾個鐘先有得見醫生，媽咪因為怕醫生捉佢入院，佢會黎唔到陪我，所以話俾醫生聽佢以前都試過係咁，係因為口水線塞左...醫生見無咩事就求求其其開ｄ止痛藥俾媽咪，媽咪話無痛，唔要佢ｄ藥，但要求打止消炎針，因為上一次都係咁先無事，但醫生就唔肯，唉...結果等左幾個鐘，乜野都無做到，塊面都等到消晒腫嚕，個醫生淨係叫媽咪只可以食流質野喎...激死。

諗住件事完左可以一齊睇戲，點知媽咪一食野又腫喇，唔得，媽咪決定去旺角睇番上次個醫生，唉...浪費左成日時間，總之唔好貪近睇急症室喇，都廢既。我咪唯有一個人睇「不速之嚇」嚕，好鬼衰架，講野細聲到死，一出恐佈鏡頭就牛咁大聲，嘈得滯嚇親護士長，入黎閂鬼左我度門，到左八點幾媽咪終於正正常常咁番黎，嘻，我再播多一次「不速之嚇」，今次可以一齊睇嚕，我地仲一邊吃旺角既炸魚蛋同炸豆腐添呀，幾歎呀。

病房經理送左盒樂家杏仁餅俾我呀，聽聞係之前陳寶珠買黎淨番架喎，妹姐話我知經理房仲淨番十幾盒添呀。

如是者過左四日，聽日就係年三十晚喇，希望可以請假出去行一行年宵喇                                     。